গুৱাহাটী : গুৱাহাটী মহানগৰীৰ উলুবাৰীস্হিত গান্ধী মণ্ডপ পথৰ জৰাজীৰ্ণ অৱস্হাই পথচাৰীক দুৰ্ভোগ ভোগাইছে ৷ জানিব পৰা মতে মহামানৱ মহাত্মা গান্ধীৰ প্ৰতিমূৰ্ত্তি থকা গান্ধীমণ্ডপৰ পথচোৱাত কেইবা ঠাইত প্ৰকাণ্ড গাঁতৰ সৃষ্টি হৈছে ৷ ইয়াৰ সমান্তৰালভাৱে পথচোৱাত থকা নলাসমূহ পাহাৰৰ মাটিৰে ভৰি পৰিছে ৷ বিগত কেইদিনমান বৰষুণ দিয়াৰ ফলত পাহাৰৰ মাটি খহি আহি নলাসমূহ পুতি পেলাইছে ৷ যাৰ বাবেই এজাক বৰষুণ দিলে পথচোৱাৰে নদী সদৃশ ঢাৰ বয় ৷ সেইবাবেই পথচোৱাৰ যথেষ্ট পৰিমাণৰ গাঁতৰ সৃষ্টি হৈছে ৷ এই ক্ষেত্ৰত পথচাৰী অহা যোৱাৰ ক্ষেত্ৰত দুৰ্ভোগ ভুগিবলগীয়া হৈছে ৷ ইপিনে চলিত সপ্তাহত কেইবাটাও ভূমিস্খলনৰ ঘটনা সংঘটিত হয় ৷ যাৰ ফলত পথচোৱাত শিল মাটিৰ দমৰে ভৰি আছে ৷ ইয়াৰ বাবেই গাড়ী মটৰ অহা-যোৱাৰ ক্ষেত্ৰত যথেষ্ট অসুবিধাৰ সন্মুখীন হৈছে৷ স্হানীয় ৰাইজে বিভাগীয় কৰ্তৃপক্ষক অৱগত কৰাৰ পিছতো কোনো ধৰণৰ পদক্ষেপ গ্ৰহণ নকৰাৰ অভিযোগ উত্থাপন হৈছে ৷ প্ৰাতঃভ্ৰমণ কৰিবলৈ অহা একাংশ লোকৰ অভিযোগ পথচোৱাৰে গাড়ী মটৰৰ লগতে খোজকাঢ়ি যাব নোৱৰা অৱস্থা হৈছে ৷ তৎস্বত্বেও গড়কাপ্তানি বিভাগৰ লগতে গুৱাহাটী পৌৰনিগম কুম্ভকৰ্ণৰ নিদ্ৰাত মগ্ন বুলি একাংশ পথচাৰীয়ে অৱগত কৰে৷ স্থানীয় ৰাইজে উক্ত পথচোৱাৰ পুননিৰ্মাণৰ লগতে নলাসমূহ পৰিস্কাৰ কৰিবলৈ বিভাগীয় কৰ্তৃপক্ষক দাবী জনায় ৷

তিনিচুকীয়া : তিনিচুকীয়া ৰাজহ চক্ৰৰ অধীনৰ বৃহত্তৰ বৰুৱাহোলাৰ উন্নয়নৰ বাবে আঞ্চলিক মটক যুৱ ছাত্র সম্মিলনে নিম্নলিখিত সমস্যাসমূহ পূৰণ কৰিবলৈ দাবী জনাই উপায়ুক্তৰ যোগেদি মুখ্যমন্ত্ৰীলৈ আজি স্মাৰক পত্ৰ প্ৰেৰণ কৰে। বৰুৱাহোলাত এটা পুথিভঁৰালৰ বাবে পুঁজিৰ আৱণ্টণ প্ৰদান কৰা, এটা অতিথিশালাৰ বাৰে পুজিঁ আৱণ্টন দিয়া, গাঁৱৰ প্ৰধান ৰাস্তা সমূহত অভিলাশী ষ্ট্রীট লাইটৰ ব্যৱস্থা কৰা, নিবনুৱা সকলৰ বাবে বিশেৰ আঁচনি প্ৰদান কৰা, গাঁৱৰ মহিলা সকলৰ স্বাৱলম্বিতাৰ বাবে তাঁতশালৰ ব্যৱস্থা কৰা, ক্রীড়া আৰু সাংস্কৃতিক ক্ষেত্রত অগ্ৰাধিকাৰ দিয়া বৰুৱাহোলা হাইস্কুল তিনিআলি আৰু বালিজান তিনিআলিত একোটাকৈ বাটচ’ৰাৰ বাবে পুঁজিৰ আবণ্টন দিয়া, কৃষিৰ বাবে বিশেষ সুবিধাৰ ব্যৱস্থা কৰা, গাঁৱৰ কেঁচাপথসমূহ অতিশীঘ্ৰে পকীকৰণৰ ব্যৱস্বা গ্ৰহণ কৰা, গাৱঁত skill Development ৰ কেন্দ্র স্থানৰ ব্যৱস্থা কৰা আৰু কৃষিৰ বাবে জলসিঞ্চনৰ ব্যৱস্থা কৰাৰ দাবী জনাই সভাপতি তনুশ্যাম চেতিয়া আৰু সম্পাদক পল্লব চেতিয়া স্বাক্ষৰিত স্মাৰক পত্ৰ প্ৰদান কৰে।

ধুবুৰী : ধুবুৰীত কালি বান পৰিস্থিতিৰ বুজ ল’লে সমাজ কল্যাণ বিভাগৰ মন্ত্ৰী প্ৰমীলাৰাণী ব্ৰহ্ম‌ই। বান পৰিস্থিতিয়ে ক্ৰমশঃ জটিল ৰূপ ধাৰণ কৰাত ধুবুৰীৰ দায়িত্বত থকা মন্ত্ৰী গৰাকীয়ে কালি জিলা প্ৰশাসন আৰু স্থানীয় বিধায়ক সকলকৰ সৈতে এখন গুৰুত্বপূৰ্ণ বৈঠকত মিলিত হয়। কালিৰ এই গুৰুত্বপূৰ্ণ বৈঠকখনত উপস্থিত থাকে স্থানীয় বিধায়ক সকল। মন্ত্ৰী ব্ৰহ্ম‌ই বানপীড়িত অঞ্চল ভ্ৰমণ কৰি জিলাখনত জলবন্দী হৈ ঘৰত ককবকাই থকা পৰিয়ালবোৰৰ বুজ লয়। পানী আৰু বাঢ়িলে তেনে পৰিয়ালবোৰ  নিশ্চিতভাৱে ভয়াৱহ পৰিস্থিতিৰ সন্মুখীন হ’ব বুলি মন্তব্য প্ৰকাশ কৰে। ৰাইজৰ এনে সংকটৰ সময়ত স্থানীয় বিধায়ক সকলক নিজৰ সমষ্টিত থাকি বানপীড়িতক সহায়-সহযোগিতা কৰিবলৈ আহ্বান জনায়। লগতে জিলা প্ৰশাসনক সদায় সজাগ থাকিবলৈ নিৰ্দেশ দিয়ে। আনহাতে বানপীড়িতক সাহায্য প্ৰদানৰ ক্ষেত্ৰতো জিলাখনত পৰ্যাপ্ত পৰিমাণৰ খাদ্যৰ লগতে পশু খাদ্য মজুত ৰখাৰ বাবে জিলা উপাযুক্তক নিৰ্দেশ দিয়ে।ইতিমধ্যে বানপানীত তিনিজনৰ মৃত্যু হোৱা বুলি জানিবলৈ দিয়ে মন্ত্ৰী গৰাকীয়ে।

লংকা : হোজাই জিলাৰ বিজেপিত হৈছে নেকি দলীয় সংঘাত। যাৰ পৰিণতিত দেওবাৰে বিধায়ক শিলাদিত্য‌ই বিজেপিৰ পৰা অৱসৰ লোৱাৰ পথ বাছি লৈছে। বিধায়ক শিলাদিত্য আৰু হোজাই বিজেপি সমিতিৰ কৰ্মীৰ মাজত চলিছে আভ্যান্তৰীণ সংঘাত যাৰ পৰিণতিত জিলা বিজেপি কাৰ্য্যালয়ত জিলা পৰিষদৰ উপ-সভাপতি নুৰ আহমেদক সভাৰ জৰিয়তে ততাতৈয়াকৈ বিজেপিত যোগদান কৰা হʼল। ৰাজ্যিক বিজেপি, নেতা কৰ্মী কাৰ পক্ষত? কিয় বিষয়টো নিয়ন্ত্ৰণ কৰিব পৰা নাই উচ্চ ৰাজ্যিক পৰ্যায়ৰ নেতাসকলে। সকলো বৰ্তমান পানীৰ তলৰ কাঁইট সদৃশ পৰিবেশ। কালি বিজেপিৰ হোজাই জিলা সমিতিৰ সভাপতি অনুপ দেৱ আৰু প্ৰাক্তন সভাপতি অৰ্জুন মজুমদাৰে হোৱা এক আছুতীয়া সাক্ষাৎকাৰত সাংবাদিকক কয় যে বিধায়ক শিলাদিত্য দেৱে বিজেপি দলৰ পৰা অৱসৰ লোৱাৰ ক্ষেত্ৰত জনোৱা নাছিল হোজাই জিলা বিজেপিৰ কৰ্মকৰ্তাক। আনহাতে, আকৌ হোজাই সভাপতি গৰাকীকো ব্যক্তিগতভাৱে জনোৱা নাছিল কোনো কথা। তেওঁ পৰিষদৰ সন্দৰ্ভত কয় যে, বিধায়ক গৰাকীয়ে কোৱাৰ দৰে কথাবোৰ নহয়। হোজাই জিলা পৰিষদৰ উপ-সভাপতি নুৰ আহমেদে কংগ্ৰেছৰ পৰা পদত্যাগ কৰি নিৰ্দলীয় হৈ আহিছিল। পদত্যাগৰ লিখিত পত্ৰ হোজাই জিলা বিজেপিৰ হাতত আছে। পিছতহে কংগ্ৰেছৰ পৰা নুৰ আহমেদক বহিষ্কাৰ কৰিছিল। পৰিষদত অবাধ দুৰ্নীতি সন্দৰ্ভত কয় যে, পুৰণি পৰিষদৰ কিছু পুঁজি আছিল যদিও পৰিষদত পুঁজিক লৈ কোনো দুৰ্নীতি হোৱা নাই । পুঁজিয়েই নাই দুৰ্নীতি হ’ব কʼৰ পৰা? কান্ধত মোনা লৈ হোজাইত দলীয় কৰ্মীৰ মাজত বিভাজন অনা ৰাজ্যিক পৰ্যায়ৰ নেতা, কাৰ কথা বিধায়ক শিলাদিত্য‌ই কৈছে নাজানো। তেওঁ নাম কোৱা নাই। বিজেপিৰ প্ৰায় সংখ্যক কৰ্মকৰ্তাই কান্ধত মোনা লয়। ৰাজ্যিক পৰ্যায়তো বহু আছে কাৰ কথা কৈছে নাজানো। এইদৰে কয় জিলা সভাপতি অনুপ দেৱে। আনহাতে প্ৰাক্তন সভাপতি অৰ্জুন মজুমদাৰে কয় যে, বিধায়ক শিলাদিত্য‌ই কিছু দিনৰ পৰা এনে কথা কৈ দলৰ কৰ্মীসকলৰ মনোৱল ভাঙিছে। কোন সেই কান্ধত মোনা লোৱা ব্যক্তিৰ লগত প্ৰাক্তন জিলা সভাপতি অৰ্জুন মজুমদাৰ সম্পৰ্ক আছে, যদি সত্ সাহস আছে শিলাদিত্য‌ই স্পষ্ট কৰক। হোজাই বিজেপিত হোৱা নাই দল কেন্দ্ৰীক ৰাজনীতি। আনহাতে আকৌ শিলাদিত্যই অৰ্জুন মজুমদাৰক নাৰী লগত অপকৰ্ম কৰা বুলি সংবাদমেলত যি মন্তব্য আগবঢ়াইছিল তাৰ সন্দৰ্ভত অৰ্জুন মজুমদাৰে কয় যে, মোৰো এটা পৰিয়াল আছে। এনেবোৰ কথা দুনাই যাতে শিলাদিত্য‌ই নকয়। ৰাজনৈতিকভাবে যি কয় ক‍ওঁক কিন্তু ব্যক্তিগতভাবে যাতে শিলাদিত্যই নকয়। নহ’লে ম‌ই আইনৰ আশ্ৰয় লম।