নগাঁও
কোভিড-১৯ ত আক্ৰান্ত এজন ৰোগীয়ে কালি নিশা ১০৮ এম্বুলেন্সৰ পৰা পলায়ন কৰা এক ঘটনাক কেন্দ্ৰ কৰি নগাঁৱত চাঞ্চল্যৰ সৃষ্টি হয় । অৱশ্যে আৰক্ষীয়ে নিশাই কোভিড আক্ৰান্ত লোকজনক কৰায়ত্ত কৰিবলৈ সক্ষম হয় । জানিব পৰা মতে তেলেংগানাৰ পৰা প্ৰায় দহ দিন পূৰ্বে অহা ননৈ কচুপিতৰ আবেদুৰ ৰহমান (৪৯) নামৰ লোকজনক প্ৰথম অৱস্থাত ননৈৰ এখন স্কুলত এসপ্তাহৰ বাবে কোৱাৰেন্টীন কৰি ৰখা হয়। কোৱাৰেন্টীনত থকা অৱস্হাত তেওঁৰ ‘স্বোৱাৱ’ৰ নমুনা পৰীক্ষাৰ বাবে প্ৰেৰণ কৰা হয় । ইপিনে এসপ্তাহ প্ৰতিষ্ঠানিক কোৱাৰেনন্টীনত থকাৰ পাচত আবেদুৰক নিজ গৃহলৈ যাবলৈ দিয়া হয় আৰু গৃহতে কোৱাৰেন্টীন ৰখা হয় । ইপিনে হোম কোৱাৰেন্টীনত থকা অৱস্হাত আবেদুৰ কোভিড-১৯ ত আক্ৰান্ত হোৱা বুলি তেওঁৰ স্বাস্থ্য পৰীক্ষাৰ প্ৰতিবেদনত প্ৰকাশ পায়। সেয়ে কালি নিশা স্বাস্থ্য বিভাগে আবেদুৰক ১০৮ এম্বুলেন্স সেৱাৰ জৰিয়তে কন্দলী আদৰ্শ চিকিৎসালয়লৈ আনে। আনহাতে চিকিৎসালয়খনৰ প্ৰৱেশদ্বাৰৰ ওচৰত আবেদুৰে এম্বুলেন্সৰ নামি পলায়ণ কৰে । কোভিড আক্ৰান্ত ৰোগীজনে এনেদৰে পলায়ণ কৰাত স্বাস্থ্য বিভাগ আৰু আৰক্ষী বিভাগৰ লোকৰ মাজত হাহাকাৰ লাগে ।নিশাই পলাতক ৰোগীজনৰ সন্ধানত আৰক্ষী নামি পৰে। পাচত অৱশ্যে ৰাঙলুৰ সমীপত পথাৰত লুকাই থকা অৱস্থাত আৰক্ষীয়ে আবেদুৰক কৰায়ত্ত কৰিবলৈ সক্ষম হয় । আনহাতে নিশাই আৰক্ষীয়ে আবেদুৰক নগাঁও ভোগেশ্বৰী ফুকননী অসামৰিক চিকিৎসালয় চৌহদৰ কোভিড হস্পিতালত ভৰ্তি কৰায়। গুৱাহাটীত চিকিৎসাধীন হৈ থকা দুৰ্ঘটনাগ্ৰস্ত পুত্ৰৰ চিন্তাতে আবেদুৰে এনেদৰে পলায়ণ কৰে বুলি জানিব পৰা গৈছে ।
