দিলীপ হাজৰিকা : নাজিৰা

 ৰাজ্যজুৰি অসমীয়া বাতৰি কাকত আৰু বাতৰি চেনেল সমূহৰ ক্ষেত্ৰ সংবাদকৰ্মী সকলে লকডাউনৰ সময়ত ভোগি অহা সংকটক একাংশ লোকে লক্ষ্য কৰি অহাৰ লগতে দায়ৱদ্ধতাৰে কাষত থিয় হোৱাৰ বাবে প্ৰয়াস কৰা পৰিলক্ষিত হৈছে । কৰ’না সম্পৰ্কীয় বাতৰি সংগ্ৰহৰ বেলিকা নিতৌ নিজ স্বাস্থ্যৰ প্ৰতি ভাবুকিতো স্তব্ধ নোহোৱা সংবাদ কৰ্মী সকলৰ ভূমিকাক প্ৰশাসন যন্ত্ৰ, আৰক্ষী বাহিনীয়ে স্বীকাৰ কৰি আহিছে । দৰিদ্ৰ জনগণৰ কাষত থিয় দিবলৈ দৌৰি ফুৰা সংবাদ কৰ্মীয়ে সমস্যাৰ সমাধানৰ যোগসূত্ৰ সাধন কৰি প্ৰশাসনকো সষ্টম কৰি তোলাৰ বাবে অহৰহ সক্ৰিয় হৈ থকাৰ বাবে  নিজ পৰিয়ালৰ মাজতো বিৰাজ কৰিছে দৈন্যতাই । ২৯ মে’ত নাজিৰা ইনড’ৰ ষ্টেডিয়ামত স্বেচ্ছাসেৱী সংগঠন “প্ৰৱাহ”ৰ তৰফৰপৰা এক নাতিদীৰ্ঘ অনুষ্ঠানত বিধায়ক দেৱব্ৰত শইকীয়াৰ  তত্বাৱধানত উদ্যোক্তা সকলে খাদ্য সামগ্ৰী আৰু নিত্য প্ৰয়োজনীয় সামগ্ৰীৰ একোটিকৈ টোপোলা আগবঢ়ায়  । অনুষ্ঠানত “প্ৰৱাহ”ৰ উদ্যোগক শলাগ লৈ নাজিৰা প্ৰেছ ক্লাৱৰ সভাপতি বুলু চেতিয়াই নাজিৰাৰ উপান্ত হৈ পৰা শিল্পী সকলকো অনুৰূপ সহায় আগবঢ়োৱাৰ বাবে ধন্যবাদ জ্ঞাপন কৰে । নাজিৰা জিলা সাংবাদিক সংস্থাৰ সম্পাদক অনন্ত কলিতাই সাংবাদিক সকলে জেপৰ ধন ভাঙি বাতৰি সংগ্ৰহ কৰি প্ৰকাশৰ বাবে যোগান ধৰি অহা প্ৰক্ৰিয়াত বাতৰি প্ৰকাশন গোষ্ঠী সমূহৰ পৰা প্ৰাপ্য ন্যূন্যতম পাৰিতোষিক কেইটাৰো নিয়মীয়া নোহোৱাৰ কথা উল্লেখ কৰে । এনে পৰিস্থিতিত কৰোনাৰ বাতৰিৰ বাবে তৎপৰ হোৱা সংবাদসেৱী সকলৰ ভূমিকাক শ্ৰদ্ধা জনোৱাৰ বাবে প্ৰৱাহ আৰু ইয়াৰ তত্ত্বাৱধায়ক দেৱব্ৰত শইকীয়াৰ শলাগ লয়  । সত্ৰীয়া নৃত্যশিল্পী ৰেখা বৰুৱাই চমু দুৱাষাৰ কয় । শইকীয়াৰ পত্নী বন্দনা শইকীয়াসহ “প্ৰৱাহ”ৰ কৰ্মকৰ্তা ক্ৰমে গজেন শৰ্মা, প্ৰশান্ত বৰঠাকুৰ, কৃষ্ণ কান্ত গগৈ, আৰফান আজম, যিচুৱা কন্যাক, বিনোদ সন্দিকৈ আদিয়ে বিতৰণ প্ৰক্ৰিয়া পৰিচালনা কৰে । একাংশ শিল্পীক ঘৰে ঘৰে গৈ সঁহাৰি যোগোৱা প্ৰৱাহে মুঠ পঞ্চল্লিশ জনক আজিৰ কাৰ্য্যসূচীত সামৰি লয় ।

চাংসাৰি  

লক ডাউনৰ সুবৰ্ণ সুযোগ লৈ তথা কামৰূপ খাদ্য আৰু অসামৰিক যোগান বিভাগৰ কুম্ভকৰ্ণ নিদ্ৰাৰ বাবে কামৰূপ জিলাত নিয়ন্ত্ৰনহীন এতিয়া মাছ মাংসৰ বজাৰ । পৰ্যাপ্ত যোগান থকাৰ পিছতো বজাৰত এতিয়া প্ৰতি কেজি ব্ৰইলাৰ মুৰ্গীৰ দৰ ৩২০ টকাৰ পৰা ৩৫০ টকা হৈছেগৈ । জালুকবাৰী সমষ্টিৰ আমিনগাওঁ, উত্তৰ গুৱাহাটী, চাংসাৰি আদি বিভিন্ন ঠাইত খাহী মাংস ৮০০ ৰ পৰা ৯০০ টকা বিক্ৰীৰ সমান্তুৰালকৈ লোকেল মুৰ্গী  ৭০০ ৰ পৰা ৮০০ টকা প্ৰতি কিলোত মুকলিকৈ বিক্ৰীহৈ আহিছে । ইফালে  কামৰূপ জিলাৰ মাছৰ বজাৰতো লাগিছে জুই । প্ৰতি কেজি কুঢ়ি মৃগাৰ (সৰু) ২০০ টকাৰ মাছ এতিয়া ৩০০টকা , ডাঙৰ ৰৌ ভকুৱা ৪০০, মিছা মাছ ৬০০ টকা, বৰলীয়া ৮০০ টকাত আমিনগাঁৱ বজাৰকে আদি কৰি জালুকবাৰী সমষ্টিৰ কেইবা ঠাইত বিনা বাধাই বিক্ৰী হৈ আহিছে । ইফালে পাচলি তৰকাৰীৰো আকাশলংঘী দৰ , প্ৰতিকেজি তৰকাৰী ৬০ টকাৰ পৰা ৮০ টকা । অভিযোগ অনুসৰি অসাধু ব্যবসায়ীৰ সতে কামৰূপ অসামৰিক খাদ্য যোগান বিষয়াৰ হলিগলি ও গোপন মিতিৰালিৰ বাবেই বজাৰত নিয়ন্ত্ৰণহীন হৈছে বস্তুৰ দৰ। এতিয়া বজাৰত মোনা লৈ দুখীয়া গ্ৰাহকে তৰ্কত লিপ্ত হব লগীয়া হৈছে সামগ্ৰীৰ আকাশলংঘী দৰৰ বাবে । এনেদৰেই এফালে দীঘলীয়া লক ডাউন আনফালে জলমগ্ন ৰাজ্য আৰু তাৰ মাজতে অসাধু ব্যবসায়ীয়ে মাধমাৰ সোধাইছে জনতাক । উপাৰ্জনহীন হৈ পৰা প্ৰায় সংখ্যক লোকেই এতিয়া পৰ্যাপ্ত খাদ্যৰ অভাবত পুষ্টি হীনতাত ভুগিছে । মধ্যবিত্ত পৰিয়ালেও ধনৰ অভাবত চৰা দৰ স্বত্বেও বইলাৰ মাংসকে ভৰষা কৰিব লগীয়া হৈছে। কিন্তু জনতাৰ এই দুৰ্দশাৰ কথা চিন্তা কৰি অভাবনীয়ভাবে বৃদ্ধি কৰা ব্ৰইলাৰ, মাছ, পাছলী তথা অন্য সামগ্ৰীৰ দৰকলৈ মুৰ নঘমাই কামৰূপ অসামৰিক খাদ্য আৰু যোগান বিভাগে । জিলাৰ এই বিয়াগোম বিভাগটোৱে জনতাৰ দুৰ্দিনতো জিলাৰ বজাৰ পৰিদৰ্শনৰ বাবে অভিযান নচলোৱাৰ আৰতযে অসৎ উদ্দেশ্য নিহিত হৈ আছে তেওলোকৰ কাৰুকাৰ্য্যৰ পৰা এতিয়া সেয়া নিশ্চিত হৈ পৰিছে । পিছে পব্বত ভৈয়াম একাকাৰ কৰি সমবিকাশ, দুৰ্নীতিৰ  বিৰুদ্ধে শূন্য সহনশীলতাৰ কথা কোৱা মুখ্যমন্ত্ৰী সৰ্বানন্দ সোনোৱালে দৰিদ্ৰ জনতাৰ বিপদ কালত ৰং চোৱাটোহে আক্ষেপৰ বিষয় বুলি উল্লেখ কৰি জালুকবাৰী সমষ্টিৰ কেইবাটাও অঞ্চলৰ জনতাই জিলা খনত অসাধু ব্যৱসায়িয়ে নিজ খেয়াল খুছিৰে বজাৰৰ সামগ্ৰীৰ দৰ নিৰ্ধাৰণ কৰা কাৰ্যক ৰোধ কৰি বজাৰৰ সামগ্ৰীৰ আকাশলংঘী দৰ নিয়ন্ত্ৰণ কৰিবলৈ চৰকাৰ প্ৰশাসনক দাবী জনাইছে । এতিয়া চৰকাৰ ও প্ৰশাসনে ৰাইজৰ দুৰ্দশাৰ কথা চিন্তা কৰি বজাৰৰ সামগ্ৰীৰ দৰ নিয়ন্ত্ৰণ কৰিবলৈ তৎপৰ হব নে ৰাইজক দুৰ্দশাৰ মাজতে থাকিব দি অসাধু ব্যৱসায়িকহে উৎসাহিত কৰিব সেয়া সময়তহে লক্ষণীয় হব। 

এ জে আকন্দ‌, নগাঁও 

অসমৰ এগৰাকী বহু বিতৰ্কিত বিধায়ক শিলাদিত্য দেৱ। নামেই যাৰ পৰিচয়। হোজাই সমষ্টিৰ বিজেপি দলৰ এইগৰাকী বিধায়কে সততে বিতৰ্কিত মন্তব্য কৰি সংবাদ মাধ্যমৰ শিৰোনাম প্ৰায়ে দখল কৰি আহিছে। বিশেষকৈ এটা সম্প্ৰদায়ক টাৰ্গেট কৰি বিভিন্ন সময়ত সাম্প্ৰদায়িক মন্তব্যৰে ৰাজ্যজুৰি তীব্ৰ প্ৰতিক্ৰিয়াৰ সৃষ্টি কৰি আহিছে। কেতবোৰ সাম্প্ৰদায়িক আৰু নিচ মন্তব্যৰ বাবে ৰাজ্যৰ বিভিন্ন আৰক্ষী থানাত এইজন বিধায়কৰ বিৰুদ্ধে ৰুজু হোৱা গোচৰৰ সংখ্যা শতাধিক ছুইছেগৈ। এনে এগৰাকী সাম্প্ৰদায়িক নেতাক গ্ৰেপ্তাৰৰ দাবী সৰ্বস্তৰৰ লোকে উত্থাপন কৰাৰ পিছতো তেওঁক গ্ৰেপ্তাৰ কৰাতো দূৰৰে কথা আৰক্ষীয়ে আজিলৈকে সোধা পোচা কৰিবলৈ সাহস গোটাব পৰা নাই। তদুপৰি, একমাত্ৰ শাসকীয় দলৰ বিধায়ক হোৱাৰ বাবেই তেওঁক আৰক্ষীয়ে থানালৈ মাতি পঠিয়াবলৈ সাহসো কৰা নাই। কিন্তু ইয়াৰ বিপৰীতে ধিঙৰ বিধায়ক আমিনুল ইছলামকে ধৰি অন্যান্য বহু বিতৰ্কিত লোকক আৰক্ষীয়ে গ্ৰেপ্তাৰ কৰি জেল হাজোতলৈ প্ৰেৰণ কৰিছে। বিতৰ্কিত মন্তব্য কৰি আত্ম সন্তুষ্টি লাভ কৰি ভাল পোৱা বিধায়ক শিলাদিত্য দেৱে শেহতীয়াকৈ নিজৰ দলৰ একাংশ নেতাৰ বিৰুদ্ধে বিস্ফোৰক মন্তব্য কৰাত ৰাজনৈতিক মহলত ব্যাপক আলোড়ন সৃষ্টি কৰি আহিছে। তেওঁ কৰা বিস্ফোৰক অভিযোগ অনুসৰি, বিজেপিৰ একাংশ নেতা-পালিনেতা কয়লাকে ধৰি বিভিন্ন চিণ্ডিগেটত জৰিত হৈ আছে। আনকি, দলটোৰ এটা প্ৰভাৱশালী চক্ৰ‌ই এই চিণ্ডিগেট চক্ৰটোক ৰক্ষণাবেক্ষণ দি অহাৰো গুৰুতৰ অভিযোগ তোলা এইগৰাকী বিধায়কে অলপতে হোজাইলৈ গ্ৰামোন্নয়নৰ কামৰ পৰ্যবেক্ষণ কৰিবলৈ অহা গ্ৰামোন্নয়ন মন্ত্ৰী নৱ কুমাৰ দলেকো ৰেহাই দিয়া নাই। মন্ত্ৰী গৰাকীকো সমালোচনা কৰি সংবাদ মাধ্যমৰ শিৰোনামা দখল কৰি অহা এই জন বিধায়ক কাৰ আৰ্শীবাদত আবোল তাবোল মন্তব্য কৰিবলৈ সাহস পাইছে এই লৈ বিভিন্ন মহলত চৰ্চা লাভ কৰিছে। এইগৰাকী নেতাক নাকি লগাব পাৰিবনে মুখ্যমন্ত্ৰী সৰ্বানন্দ সোনোৱালে। এয়াই এতিয়া সৰ্বত্ৰ চৰ্চা লাভ কৰিছে। ইপিনে, সমষ্টিবাসীৰ সৰ্বাঙ্গীন উন্নয়নত মন নিদি সততে বিতৰ্কিত মন্তব্য কৰা এই গৰাকী বিধায়কৰ ভৱিষ্যত এতিয়া কোন দিশে এই লৈয়ো সমষ্টিখনৰ ভোটাৰ ৰাইজৰ মাজত সৰৱ চৰ্চা চলিছে। তেওঁৰ বিতৰ্কিত মন্তব্য‌ই সমষ্টিবাসী মন জয় কৰিব পাৰিবনে  ? এই লৈয়ো ৰাজনৈতিক মহলত গুনাগথা চলিছে। অনাগত দিনত নিজৰ দলীয় শীৰ্ষ নেতৃত্ব‌ই তেওঁক কেনেদৰে গ্ৰহণ কৰে, সেয়াও পৰৱৰ্তী সময়ত লক্ষ্যনীয় হ’ব।

নলবাৰী

অসমত চৰকাৰ আৰু প্ৰশাসনক ভেঙুচালি কৰি নিৰিহ জনতাৰ ওপৰত অসুৰ ৰুপে থিয় দিছে একাংশ গুণ্ডাবাহিনীয়ে । ইয়াৰ সাক্ষী হিচাবে ৰৈ গল হাজোৰ সনাতন ডেকাক পৰিকল্পিতভাৱে কৰা হত্যাকাণ্ড । সনাতন ডেকাক ৰাজপথত মৰিয়াই মৰিয়াই হত্যা কৰা দেখিছিল ৰাইজে আৰু এই  হত্যাকাণ্ডৰ ঘটনা প্ৰত্যেক্ষ কৰা ১১ পৰিয়ালক মৃত্যুৰ ভাবুকি প্ৰদান কৰিছে মাফিয়াৰাজ ফইজুল হকৰ গুণ্ডাবাহিনীয়ে । আৰু আজি সেই বিষয় সন্দৰ্ভত এনে অসুৰ তথা অমানৱীয় ঘটনা সংঘটিত কৰা লোক কেইজনক দৃষ্টান্তমূৰক শাস্তি প্ৰদানৰ দাবীত  নলবাৰীস্থ হৰিমন্দিৰ চকত হিন্দু ক্ৰান্তি দল নলবাৰী জিলা সমিতিয়ে প্ৰতিবাদী কাৰ্যসূচী সাব্যস্ত কৰে । হিন্দু ক্ৰান্তি দলৰ কৰ্মী সকলে জয় শ্ৰীৰাম ,হত্যাকাৰীক ফাচী দিয়ক,তুষ্টিকৰন ৰাজনীতি বন্ধ কৰক, সনাতন ডেকাক ন্যায় দিয়ক আদি বিভিন্ন শ্লোগানেৰে নলবাৰী চহৰখনৰ পৰিবেশ উত্তাল কৰি তোলে । উক্ত কাৰ্যসূচীত জিলাৰ সংযোজক নিৰ্মল ৰাজবংশীয়ে কয় যে হিন্দু ক্ৰান্তি দলৰ অভিযোগ চৰকাৰে সম্পুৰ্ণ ভাৱে তুষ্টিকৰনৰ ৰাজনীতি কৰিছে কিয়নো লাফিকুল ইছলামৰ মিত্যুত তেওলোকে ২০ লাখ টকা আৰু এটা চাকৰি প্ৰদান  কৰিছে,তেনে ক্ষেত্ৰত সনাতন ডেকাক কিয় ২ লাখতে সমাপ্তি হল । তাতোকৈ দুখৰ বিষয় যিটো পৰিয়ালৰ আশ্ৰয় বাবে হাহাকাৰ তেনেক্ষেত্ৰত কুলিৰ দৰে নেদেখা ভাও জোৰো হাজোৰ বিধায়িকা গৰাকীয়ে এই সময়তেহে পকী ঘৰ প্ৰদান কৰিলে আগতে কিয় নকৰিলে । সেয়েহে হিন্দু ক্ৰান্তি দলৰ স্পষ্ট কথা সনাতন ডেকাৰ পৰিয়ালক উচিত ন্যায় প্ৰদান কৰি ২০লাখ টকা আৰু এটা সামেন্য হলেও চৰকাৰী চাকৰি প্ৰদান কৰক অন্যথাই অনাগত দিনত তিব্ৰ আন্দোলন কৰিবলৈ বাধ্য হম । লগতে সংযোজক গৰাকীয়ে কয় য়ে সম্প্ৰীতিৰ পীঠ স্থলী  হাজোত কিয় নৃশংস হত্যাকাণ্ড হল,আৰত আছিল নেকি পুৰ্ববংগীয় ইছলামিক পন্থি, সকলো তথ্য পোহৰলৈ অনাৰ বাবে দাবী কৰিছে সংযোজক গৰাকীয়ে । আৰু নিৰপেক্ষতাৰ সুযোগ লৈ আইনী মেৰপেচত যাতে হত্যাকাৰী সাৰি যাব নোৱাৰে তাৰ বাবে দৃষ্টি আকৰ্ষন কৰিবলৈ অসমবাসীলৈ আহ্বান জনাইছে হিন্দু ক্ৰান্তি দলে।