দৰং

 ৰাজ্যত অব্যাহত আছে প্ৰধানমন্ত্ৰী কৃষক সন্মান নিধি আঁচনি ৰূপায়ণত সংঘটিত বৃহৎ কেলেংকাৰীৰ বাতৰি৷ তাৰ মাজতে দৰঙত দেখিবলৈ পোৱা গ’ল কৃষিমন্ত্ৰী অতুল বৰা আৰু দৰঙৰ জিলা কৃষি বিষয়া ভাৰত কুমাৰ দেউৰীৰ পুত্তলিকা দাহ কৰা ঘটনা৷ প্ৰধানমন্ত্ৰী কৃষক সন্মান নিধি আঁচনিত ব্যাপক খেলিমেলি আৰু পঞ্চায়ত প্ৰতিনিধিসহ ঘৰৰ আন আন পৰিয়ালে এই আঁচনিৰ ধন লাভ কৰাত ক্ষোভৰ বহিঃপ্ৰকাশ কৃষকৰ মাজত৷ প্ৰকৃত কৃষক এই আঁচনিৰ পৰা বঞ্চিত হোৱাৰ অভিযোগত যদিও মুখ্যমন্ত্ৰীয়ে তদন্তৰ ঘোষণা কৰিছে কিন্তু তদন্তৰ দায়িত্ব দিছে আঁচনিখনত দূৰ্নীতি কৰা বিষয়াকে৷ সেয়ে ৰাজ্যত প্ৰধানমন্ত্ৰী কৃষক সন্মান নিধি আঁচনি ৰূপায়ণত বৃহৎ কেলেংকাৰী সংঘটিত কৰা কৃষি বিষয়াসকলকে বিষয়টি তদন্ত কৰিবলৈ দি ভেকোঁভাওনাৰ নাটক কৰাত খৰ্গহস্ত প্ৰকৃত কৃষক৷ দৰঙৰ পাথৰিঘাট মহকুমা কৃষি বিষয়া কাৰ্যালয়ৰ অন্তৰ্গত সোণাৰীশালত একাংশ কৃষকে এই কাৰ্যত প্ৰতিবাদ সাব্যস্ত কৰি বুধবাৰে কৃষিমন্ত্ৰী অতুল বৰা আৰু দৰঙৰ জিলা কৃষি বিষয়া ভাৰত কুমাৰ দেউৰীৰ পুত্তোলিকা দাহ কৰে৷ প্ৰতিবাদকাৰী কৃষকসকলে দাবী জনাইছে প্ৰধানমন্ত্ৰী কৃষক সন্মান নিধি আঁচনিত সংঘটিত দূৰ্নীতিৰ  তদন্তৰ দায়িত্ব কৃষি বিভাগৰ বিষয়াৰ বাহিৰে অন্য বিষয়াৰ হাতত অৰ্পনৰ জড়িয়তে প্ৰকৃত কৃষকক চিনাক্ত কৰি আঁচনিখনৰ সফল ৰূপায়ণ কৰিবলৈ৷

মঙলদৈ

 দৰং জিলাৰ নৱনিযুক্ত উপায়ুক্ত দিলীপ কুমাৰ বৰাই ক’ভিড-১৯ সংক্ৰমণৰ এই জটিল সন্ধিক্ষণতো স্বাস্থ্য ক্ষেত্ৰৰ কামকাজৰ সমান্তৰালকৈ গতিশীল কৰিবলৈ চেষ্টা চলাইছে চৰকাৰৰ বিভিন্ন বিভাগৰ কামকাজ। অৰ্থনীতি স্হবিৰ হৈ নপৰিবলৈ তেওঁ এম জি এনৰেগা, বান নিয়ন্ত্ৰণ আদি বিভিন্ন আঁচনিৰ সুচল ৰূপায়নৰ জৰিয়তে শ্ৰমিক, ক্ষুদ্ৰ ব্যৱসায়ী আদি লোকসকলৰ হাতলৈ ধন অহাৰ প্ৰক্ৰিয়া কোনো কাৰণতে যাতে স্তব্ধ নহয় সেই ক্ষেত্ৰত এক সুস্থ পৰিৱেশ সৃষ্টিত গুৰুত্ব প্ৰদান কৰিছে। বুধবাৰে উপায়ুক্তৰ কাৰ্যালয়ৰ সভাকক্ষত সাংবাদিকসকলৰ সৈতে হোৱা বাৰ্তালাপত উপায়ুক্তগৰাকীয়ে এই কথা সদৰী কৰে। ৰাজ্যৰ বাণিজ্যিক কেন্দ্ৰ বিন্দু গুৱাহাটীৰ ফাঁচী বজাৰক কোৱাৰাণ্টাইন জ’ন হিচাপে ঘোষণা কৰাৰ ফলত জিলা প্ৰশাসনে বিভিন্ন সা-সামগ্ৰী সংগ্ৰহৰ ক্ষেত্ৰত কিছু পৰিমাণে অভাৱ উপলব্ধি কৰিছে বুলি উল্লেখ কৰি উপায়ুক্তগৰাকীয়ে কয় যে কোনো সহৃদয়বানলোক প্ৰশাসনক স্বেচ্ছাই আচবাব- পাতি দান দিলে তেওঁলোকে গ্ৰহণ কৰিবলৈ সাজু আছে। দৈনিক শ শ লোক বহিঃৰাজ্যৰ পৰা গৃহাভিমুখী হোৱাৰ বাবে কোৱাৰেণ্টাইন কেন্দ্ৰসমূহত লাহে লাহে বিশেষকৈ বিচনাপাতিৰ অভাৱ হ’ব বুলি উল্লেখ কৰি উপায়ুক্তগৰাকীয়ে জিলাখনৰ লোকসকলক যদিহে কাৰোবাৰ অতিৰিক্ত বিচনা, খাট আছে স্বেচ্ছাই প্ৰশাসনক ব্যৱহাৰ কৰিবলৈ দি জনসাধাৰণৰ উপকাৰ কৰিবলৈ আহ্বান জনায়৷ সাংবাদিকসকলক জিলাখনৰ বিভিন্ন বিভাগৰ চৰকাৰী কামকাজৰ খুটি-নাটি দেখিলে তেওঁক অনতিপলমে অৱগত কৰিবলৈ আহ্বান জনাই তেওঁ লগতে কয় যে ক’ৰোনা যুঁজৰ ৰণুৱা হিচাপে সাংবাদিকসকলে দিন-ৰাতি ২৪ ঘণ্টাই কাম কৰাৰ সময়তো তেওঁলোকে নিজক সুৰক্ষিত কৰি কামত অগ্ৰসৰ হ’ব লাগিব। এই সংবাদমেলতে উপায়ুক্তগৰাকীয়ে সাংবাদিকসকলক “মই গৰ্বিত কৰণা যুঁজাৰুৰূপে” বুলি লিপিবদ্ধ একোটাকৈ বেজ লগাই দিয়াৰ উপৰি মাস্ক আৰু ছেনিটাইজাৰ প্ৰদান কৰি ক’ৰোনা যুঁজত সফলভাৱে অগ্ৰসৰ হ’বলৈ উৎসাহিত কৰে৷

ধুবুৰী

গোৱালপাৰা ডাক সংমণ্ডলৰ ডাক কৰ্মীসকলে গ্ৰাহকৰ ঘৰে ঘৰে গৈ ডাকঘৰৰ দ্বাৰা উপলব্ধ সেৱাসমূহ বিশেষকৈ ছেভিংছ, ৰেকাৰিং ডিপোজিট, সুকন্যা সমৃদ্ধি একাউণ্ট আৰু ডাক জীৱন বীমাৰ লেনদেনৰ ব্যৱস্থা কৰিছে। ইয়াৰ উপৰি আই পি পি বি একাউণ্ট আৰু আধাৰযুক্ত যিকোনো বেংক একাউণ্টৰ পৰা টকা উঠোৱাৰ সুবিধা গ্ৰাহকৰ ঘৰতে প্ৰদান কৰা হৈছে। বুধবাৰে এই অভিযানৰ যোগেদি গোৱালপাৰা ডাক সংমণ্ডলৰ অধীনত ধুবুৰী, কোকৰাঝাৰ, বঙাইগাঁও আৰু গোৱালপাৰা জিলাৰ কমেও ৮৭খন গাঁৱৰ ২১৭১জন গ্ৰাহকক সেৱা প্ৰদান কৰা হয়। উল্লেখনীয় যে গোৱালপাৰা ডাক সংমণ্ডলৰ অধীক্ষক দেবৰাজ শেঠী আৰু সহ অধীক্ষক গিৰিকান্ত ডেকাই ধুবুৰী আৰু কোকৰাঝাৰ জিলাৰ কেইবাখনো গাঁৱত উপস্থিত হৈ উক্ত অভিযানৰ তদাৰক কৰাৰ লগতে এনে এক জটিল পৰিস্থিতিৰ মাজতো গ্ৰাহকৰ ঘৰে ঘৰে গৈ আগবঢ়োৱা সেৱাৰ বাবে ডাক কৰ্মীসকলক ভূয়সী প্ৰশংসা কৰে আৰু প্ৰকৃত ক’ৰোনা যোদ্ধা বুলি অভিহিত কৰে।