তিনিচুকীয়া

ক’ভিড-১৯ ক’ৰোনা ভাইৰাছ মহামাৰীৰ আতংকত গৃহবন্দী জনতাক আত্মনিৰ্ভৰ ভাৰত গঢ়িবলৈ কোৱা নৰেন্দ্ৰ মোডী নেতৃত্বাধীন বিজেপি চৰকাৰে দেশৰ সম্পদ আৰু শিল্পসমূহ এপদ এপদকৈ পুঁজিপতি গোষ্ঠীৰ হাতত গতাবলৈ ধৰিছে৷ দেশৰ বুনিয়াদ গঢ়া এই সম্পদ আৰু শিল্পসমূহক ক’ৰোনা মহামাৰীৰ আতংকৰ গইনা লৈ বিক্ৰী কৰি থকা কেন্দ্ৰীয় চৰকাৰৰ হঠকাৰী নীতিৰ বিৰুদ্ধে এন এফ ৰে’লৱে মজদুৰ ইউনিয়নেও ২২ মে’ত প্ৰতিবাদ সাব্যস্ত কৰিব৷ বুধবাৰে তিনিচুকীয়াত সংগঠনটোৰ কেন্দ্ৰীয় নেতা পুলক গগৈয়ে এই কথা সদৰি কৰিছে৷ প্ৰসংগত উল্লেখ কৰি ৰে’ল শ্ৰমিক নেতাজনে কয় যে সকলো চেণ্ট্ৰেল ট্ৰেড ইউনিয়নে ২২ মে’ত দেশব্যাপী প্ৰতিবাদ সাব্যস্ত কৰিবলৈ ঠিৰাং কৰিছে৷ চেণ্ট্ৰেল ট্ৰেড ইউনিয়নসমূহৰ এই প্ৰতিবাদ আৰু আন্দোলনৰ কাৰ্যসূচীলৈ অল ইণ্ডিয়া ৰে’লৱেমেনছ ফেডাৰেচন তথা এন এফ ৰে’লৱে মজদুৰ ইউনিয়নেও পূৰ্ণ সমৰ্থন আগবঢ়াইছে৷ এই সন্দৰ্ভত এন এফ ৰে’লৱে মজদুৰ ইউনিয়নৰ কেন্দ্ৰীয় সাংগাঠনিক সম্পাদক তথা প্ৰচাৰ সচিব আৰু তিনিচুকীয়া ডিভিজনৰ কনভেনৰ পুলক গগৈয়ে বুধবাৰে তিনিচুকীয়াত এক প্ৰেছ বাৰ্তাত তীব্ৰ ক্ষোভ প্ৰকাশ কৰি কয় যে প্ৰধান মন্ত্রী নৰেন্দ্ৰ মোডীয়ে ক’ৰোনা ভাইৰাছৰ মহামাৰীত আতংকিত দেশৰ জনগণক আত্মনিৰ্ভৰ ভাৰতৰ কথা কোৱা নীতি বচনৰ বিপৰীতে ৰঙা দলিছা পাৰি আদৰি আনি পুঁজিপতি গোষ্ঠীৰ হাতত জাতীয় সম্পদ তৈলক্ষেত্র, ক’লা সোণ কয়লা খনি, বনজ সম্পদ, লাভজনক শিল্প উদ্যোগসমূহ এফালৰ পৰা পানীৰ দৰত বিক্ৰী কৰি থকা কাৰ্য কোনো কাৰণতে মানি লোৱা নহ’ব৷ সমান্তৰালভাৱে দেশৰ বুনিয়াদ গঢ়া শ্ৰমিক শ্ৰেণীৰ অধিকাৰ কাঢ়ি শ্ৰম আইন বিলুপ্তিকৰণ কৰি কৰ্ম সময় আঠ ঘণ্টাৰ পৰা ১২ ঘণ্টালৈ বৃদ্ধি কৰা, শ্ৰমিক ছাটাই দৰে বনুৱাক পেটে-ভাতে মৰা সৰ্বনশীয়া শ্ৰমিক বিৰোধী নীতি, ক’ভিড-১৯ ক’ৰোনা ভাইৰাচ যুঁজৰ যুঁজাৰু বুলি কোৱা স্বাস্থ্য কৰ্মী তথা নাৰ্চক পুস্প বৃষ্টি কৰি অভিবাদন জনোৱা প্ৰধান মন্ত্রী নৰেন্দ্ৰ মোডী নেতৃত্বাধীন বিজেপি চৰকাৰে দিনে ৰাতিয়ে নিজৰ জীৱনকো তুচ্ছ জ্ঞান কৰি ৰে’লপথৰ জৰিয়তে দেশৰ সংকট মুচনৰ অৰ্থে মালগাড়ী চলাচল কৰি অত্যাৱশ্যকীয় খাদ্য সামগ্ৰী সৰবৰাহৰ ক্ষেত্রত কাম কৰা ৰে’ল শ্ৰমিকৰ মৰগীয়া ভাট্টা কৰ্তন কৰা দৰে নিষ্ঠুৰ নীতিৰ বিৰুদ্ধে এন এফ ৰে’লৱে মজদুৰ ইউনিয়নে তীব্ৰ নিন্দা কৰিছে৷ ৰে’ল শ্ৰমিকসকলৰ একমাত্র অৰাজনৈতিক শক্তিশালী সংগঠন অল ইণ্ডিয়া ৰে’লৱেমেনছ ফেডাৰেচন আৰু এন এফ ৰে’লৱে মজদুৰ ইউনিয়নে সদায় যুঁজ দি আহিছে৷ প্ৰতিবাদৰ ভাষা বুজি নোপোৱা কেন্দ্ৰীয় চৰকাৰৰ বিৰুদ্ধে লকডাউনৰ মাজতে সামাজিক দূৰত্ব বৰ্তাই ৰাখি ফেচ মাস্ক পৰিধান কৰি নিজ নিজ কৰ্মস্থলীত কৰ্তব্য পালন আৰু সম্পাদন কৰি সমান্তৰালভাৱে ন্যায্য প্ৰাপ্য আদায়ৰ হকে প্ৰতিবাদী কাৰ্যসূচী পালন কৰিব বুলি প্ৰকাশ কৰিছে৷

নাজিৰা

নাজিৰা আদৰ্শ আৰক্ষী থানাৰ অন্তৰ্গত মঠিয়াছিগা ৰাজমাও পুখুৰীত বুধবাৰে পুৱাভাগত এজন ব্যক্তিৰ মৃতদেহ উদ্ধাৰ হোৱা ঘটনাই অঞ্চলটোত ব্যাপক চাঞ্চল্যৰ সৃষ্টি কৰিছে। স্থানীয় ৰাইজৰ পৰা জানিব পৰা মতে  আজি কিছুদিনৰ পৰা ৰাজমাও পুখুৰীকে ধৰি অঞ্চলটোৰ ঐতিহাসিক পুখুৰী, বিল-জলাশয়ত এটা দলে ফাঁচিজাল পাতি মাছ, কাছ ধৰি গোপনে ব্যৱসায় কৰি আহিছে। বুধবাৰে ৰাজমাও পুখুৰীত উদ্ধাৰ হোৱা মৃতদেহটো পুখুৰীটোৰ পাৰৰে নিবাসী প্ৰৱীণ মোহন (৪০) ওৰফে লাংফু নামৰ ব্যক্তিজনেও নিশা জাল পাতিবলৈ যাওঁতেই পুখুৰীৰ মাজভাগত কৰুণভাৱে মৃত্যুক আঁকোৱালি লয় বুলি ৰাইজে ধাৰণা কৰিছে। যিহেতু মৃতদেহৰ কাষত পুখুৰীটোত এখন বৃহৎ জাল উদ্ধাৰ হয়৷ পুৱা স্থানীয় ৰাইজে পুখুৰীৰ প্ৰায় মাজত মৃতদেহটো দেখা পাই নাজিৰাৰ আৰক্ষীলৈ খবৰ দিয়ে আৰু আৰক্ষীয়ে মৃতদেহটো পুখুৰীৰ পৰা উদ্ধাৰ কৰি মৰণোত্তৰ পৰীক্ষাৰ বাবে জয়সাগৰস্থ শিৱসাগৰ অসামৰিক চিকিৎসালয়লৈ প্ৰেৰণ কৰে। ঘটনাৰ সন্দৰ্ভত নাজিৰাৰ আৰক্ষীয়ে ১০/২০২০ নম্বৰত এক গোচৰ ৰুজু কৰি তদন্ত অব্যাহত ৰাখিছে। আনহাতে ৰাজমাও পুখুৰীকে ধৰি অঞ্চটোৰ আন আন পুখুৰী, বিল-জনাশয় আদিত নিশা নিশা গোপনে বহু লোকে জাল পাতি মাছ, কাছ ধৰি ব্যৱসায় চলাই অহা কাৰ্যক বিৰূপ প্ৰতিক্ৰিয়া প্ৰকাশ কৰাৰ লগতে সম্প্ৰতি মাছ ধৰা কাৰ্যত নিষেধাজ্ঞা বাহাল থকাত এনেদৰে নিশা মাছ ধৰা কাৰ্য বন্ধ কৰাৰ বাবে মহকুমা প্ৰশাসন তথা বিভাগীয় কৰ্তৃপক্ষক ৰাইজে দাবী জনাইছে৷

নাজিৰা

ক’ৰোনা ভাইৰাছ সংক্ৰমণ প্ৰতিৰোধৰ বাবে দেশত অব্যাহত থকা চতুৰ্থ পৰ্যায়ৰ লকডাউনৰ মাজতে কেন্দ্ৰীয় চৰকাৰে এখন খচৰা বিদ্যুৎ বিধেয়ক প্ৰস্তুত কৰি অহা ৫ জুনৰ ভিতৰত ৰাজ্য চৰকাৰৰ সমূহৰ পৰা মতামত বিচাৰিছে। উল্লিখিত বিধেয়কৰ জৰিয়তে কেন্দ্ৰীয় চৰকাৰে ৰাজহুৱা শক্তি খণ্ডৰ বিশেষকৈ বিতৰণ কোম্পানীসমূহ ব্যক্তিগত খণ্ডলৈ হস্তান্তৰ কৰিব বিচৰাৰ লগতে ৰাজ্য চৰকাৰসমূহৰ ৰাজ্যৰ বিদ্যুৎ খণ্ডৰ ওপৰত থকা ক্ষমতা হ্ৰাস কৰিব বিচৰা হৈছে। ইয়াৰ ফলত বিদ্যুৎ কৰ্মচাৰীৰ লগতে বিদ্যুৎ উপভোক্তাৰ ওপৰতো নেতিবাচক প্ৰভাৱ পৰিব৷ সেয়েহে আসাম ষ্টেট পাৱাৰ ৱ’ৰ্কাৰ্ছ ইউনিয়নে উক্ত খচৰা বিধেয়কখনৰ তীব্র বিৰোধিতা কৰিছে আৰু খচৰা বিধেয়কখনলৈ সন্মতি নজনাবলৈ অসম চৰকাৰক অনুৰোধ জনাই মুখ্যমন্ত্ৰীলৈ স্মাৰকপত্ৰ প্ৰেৰণ কৰিছে। তদুপৰি আসাম ষ্টেট পাৱাৰ ৱ’ৰ্কাৰ্ছ ইউনিয়নৰ শাখাসমূহেও অহা ২২ মে’ত এই সন্দৰ্ভত মুখ্যমন্ত্ৰীলৈ স্মাৰকপত্ৰ প্ৰেৰণ কৰিব বুলিও ইউনিয়নৰ প্ৰচাৰৰ বিশেষ দায়িত্বত থকা উপ সাধাৰণ সম্পাদক প্ৰণৱ খটনিয়াৰে এক বিবৃতি যোগে জানিবলৈ দিছে৷

নাজিৰা

অসমৰ মানচিত্ৰতে নহয় ভাৰতৰ মানচিত্ৰত এক সুকীয়া স্হান আছে শিৱসাগৰ জিলাৰ নাজিৰা মহকুমাৰ সীমান্তবৰ্তী গেলেকীৰ। কেৱল সীমান্ত অঞ্চলৰূপে নহয় দেশৰ ৰাজহুৱা খণ্ডৰ মহাৰত্ন তৈল কোম্পানী তেল আৰু প্ৰাকৃতিক গেছ নিগম চমুকৈ অ’ এন জি চি অসম সম্পদৰ অধীনৰ অতি লাভজনক গেলেকী তৈলক্ষেত্ৰৰ বাবেই ভাৰতৰ ঔদ্যোগিক ক্ষেত্ৰৰ মানচিত্ৰত এক সুকীয়া স্হান আছে গেলেকীৰ। ইয়াৰ উপৰি দেশৰ কেইবাটাও বহুজাতিক কোম্পানীৰ কেইবাখনো বৃহৎ চাহ বাগিচাৰ উপৰি ৮০ দশকৰ আৰম্ভণিৰ পৰাই এই সীমান্ত অঞ্চলটোত গঢ় লৈ উঠিছে কেইবাশতাধিক ক্ষুদ্ৰ চাহ বাগিচা আৰু সীমান্ত অঞ্চলটোত উৎপাদিত কয়লা। দেশ তথা ৰাজ্যৰ অৰ্থনীতি টনকীয়াল কৰাত উল্লেখযোগ্য ভূমিকা গ্ৰহণ কৰা প্ৰাকৃতিক সম্পদৰ ভঁৰালস্বৰূপ এই গুৰুত্বপূৰ্ণ অঞ্চলটোৰ ৰাইজে এতিয়া পথ এটা নিৰ্মাণৰ বাবে বছৰ বছৰ ধৰি দাবী, আন্দোলন আদি কৰিব লগা হোৱাটো অতি দূৰ্ভাগ্যজনকে আৰু পৰিতাপৰ বিষয়। কিন্তু তাৰ পাছতো পথ নিৰ্মাণ সম্পূৰ্ণ নহয়। উল্লেখ্য যে শিৱসাগৰ জিলা তথা ৰাজ্যৰ বিভিন্ন প্ৰান্তৰ সৈতে যাতায়াতৰ বাবে থকা নাজিৰা-গেলেকী বিধ্বস্ত পথছোৱাই ৰাইজক বছৰ বছৰ ধৰি জ্বলাকলা খুৱাই আহিছে। এই প্ৰায় ১৪ কিলমিটাৰ বিধ্বস্ত পথছোৱা নিৰ্মাণৰ বাবে সময়ে সময়ে বিভিন্ন দল-সংগঠন আৰু স্হানীয় ৰাইজে বাৰম্বাৰ দাবী জনাই আহিছে। কিন্ত ৰাইজৰ এই দাবীৰ প্ৰতি কোনো গুৰুত্ব প্ৰদান নকৰে চৰকাৰ আৰু অ’ এন জি চি কৰ্তৃপক্ষই। উপায়ন্তৰ হৈ বিগত বৰ্ষৰ ১০ অক্টোবৰত বৃহত্তৰ গেলেকী অঞ্চলৰ হাজাৰ হাজাৰ ৰাইজ ৰাজপথলৈ স্বতঃস্ফূৰ্তভাৱে ওলাই আহি ৰাজপথ অৱৰোধ কৰাত গা লৰিল চৰকাৰ তথা গড়কাপ্তানী বিভাগৰ। বিভাগে অক্টোবৰ মাহৰ ভিতৰত বিধ্বস্ত পথটি নিৰ্মাণ সম্পূৰ্ণ কৰাৰ বাবে তদানীন্তন নাজিৰাৰ মহকুমাধিপতি ৰাজীৱ থাপাৰ উপস্হিতিত ৰাইজক প্ৰতিশ্ৰুতি দিয়াই নহয় ৰাইজক পতিয়ন নিয়াবৰ বাবেই উক্ত দিনাই পথ নিৰ্মাণৰ কামো আৰম্ভ কৰে। প্ৰায় ৮ কোটি টকাৰে নিৰ্মাণ হ’ব লগা পথটো আজিও নিৰ্মাণ সম্পূৰ্ণ নহ’ল। যি ছোৱা পথ নিৰ্মাণ হৈছে সেয়াও অতি নিম্নমানৰ কাম হে হৈছে। আনহাতে পথছোৱাৰ বিশেষকৈ হাতীপটি তিনি আলিৰ পৰা গেলেকী পৰ্যন্ত বিধ্বস্ত পথছোৱাইদি যাতায়াত একপ্ৰকাৰ অসম্ভৱ হৈ পৰিছে। বৰষুণ দিলেই পথছোৱাৰ বিয়াগোম পুখুৰীসদূশ গাঁতসমূহৰ বাবে প্ৰায়ে দূৰ্ঘটন সংঘটিত হয়। দেশ তথা ৰাজ্যৰ অৰ্থনীতিত বিশেষ ভূমিকা গ্ৰহন কৰি থকা বৃহত্তৰ গেলেকী অঞ্চলৰ ৰাইজে বিশুদ্ধ খোৱাপানী, বিনামূলীয়া ৰন্ধন গেছ, বিনামূলীয়া বিদ্যুৎ, বিনামূলীয়া উন্নত চিকিৎসা আদি অ’ এন জি চিৰ পৰা লাভ কৰাতো দূৰৰে কথা বছৰ বছৰ ধৰি বিধ্বস্ত মূল পথটিৰ বাবে ৰাইজে হাহাকাৰ কৰিব লগা হয়।শেহতীয়াভাৱে পথটিৰ বিধ্বস্ত অৱস্হাই ৰাইজক জ্বলাযন্ত্ৰণা দিবলৈ ধৰাত প্ৰাক্তন ছাত্ৰ নেতা টিংকু হাজামাৰ লগতে বিভিন্ন সংগঠনে সামাজিক দূৰত্ব বৰ্তাই ৰাখি পথটি উন্নত মানদণ্ডৰে অতি শীঘ্ৰে নিৰ্মাণৰ দাবীত আন্দোলন কৰাৰ হুংকাৰ দিছে। 

নাজিৰা

ক’ৰোনা সংকটৰ সময়তে কেন্দ্ৰীয় চৰকাৰে অসমৰ অবিভক্ত শিৱসাগৰ জিলাৰ অ’এনজিচিৰ অধীনৰ ৮ খন তৈলক্ষেত্ৰ ব্যক্তিগত কোম্পানীক গতাই দিয়া কাৰ্যক তীব্ৰ বিৰোধিতা কৰাৰ লগতে উক্ত সিদ্ধান্ত বাতিলৰ দাবী জনাইছে অসমৰ শক্তিশালী জনগোষ্ঠীয় সংগঠন টাই আহোম ছাত্ৰ সন্থাই। বৰ্তমানৰ পৰিস্থিতিত চৰকাৰে মৃত উদ্যোগসমূহ কৰ্মসংস্থাপনহীন যুৱকৰ জড়িয়তে জীয়াই তোলাৰ থল আছিল তেনে সময়তে কিন্তু বিজেপি চৰকাৰে এই তৈলক্ষেত্ৰসমূহ ব্যক্তিগতকৰণ কৰি বাৰে বাৰে পুঁজিপতিক সহায় কৰাহে পৰিলক্ষিত হৈছে৷ উল্লেখ্য যে ঐতিহাসিক অবিভক্ত শিৱসাগৰ জিলাৰ লগতে উজনি অসমৰ উদ্যোগিক বিকাশৰ অন্যতম সম্পদ হৈছে তৈল সম্পদ৷ ৰাজহুৱা খণ্ডৰ নৱৰত্ন উদ্যোগ অ’এনজিচিয়ে ৰাজ্যখনৰ লগতে দেশৰ অৰ্থনীতিত এক গুৰুত্বপূৰ্ণ অৰিহণা আগবঢ়াই আহিছে৷ কিন্তু পুঁজিপতিৰ ভঁড়াল চহকী কৰিবলৈ গৈ চৰকাৰে এনেবোৰ সম্পদ বিক্ৰী কৰিছে৷ উল্লেখযোগ্য যে সংগঠনটো খাৰুৱা তেল উৎপাদনৰ বিৰোধী নহয়৷ কিন্তু অ’এনজিচিৰয়ে নিজাববীয়াকৈ উন্নত প্ৰযুক্তি ব্যৱহাৰ কৰি উৎপাদন বৃদ্ধি কৰক৷ এই সম্পদ শিৱসাগৰবাসী ৰাইজৰ সম্পদ আৰু ইয়াৰ জৰিয়তে শিৱসাগৰবাসী ৰাইজও সৰ্বাংগীণ বিকাশ হ’ব লাগিব৷ আটাছুৰ শিৱসাগৰ জিলা সমিতিৰ সভাপতি ধমেন গগৈ, যুটীয়া সম্পাদক মানস সন্দিকৈ আৰু নিপন বৰুৱা স্বাক্ষৰিত এক প্ৰেছ বাৰ্তা যোগে ভাৰত চৰকাৰৰ এই হঠকাৰী সিদ্ধান্তক ধ্বিকাৰ দিয়াৰ লগতে এই সিদ্ধান্ত অতি সোনকালে বাতিল কৰিবলৈ দাবী জনাইছে৷ অন্যথা সংগঠনটোৱে অ’ এন জি চি আৰু কেন্দ্ৰীয় চৰকাৰৰ এনে হঠকাৰী সিদ্ধান্তৰ বিৰুদ্ধে তীব্ৰ আন্দোলন গঢ়ি তোলা হ’ব বুলি সকীয়াই দিয়ে৷