নতুন দিল্লীৰ ফৰিদাবাদস্থিত মেজিক এণ্ড আৰ্ট বিশ্ববিদ্যালয়ে অসমৰ বিশিষ্ট কণ্ঠশিল্পী, সাংস্কৃতিক সংগঠক ৰজনী স্বৰ্গীয়াৰীক ডক্টৰেট ডিগ্ৰীৰ সন্মান প্ৰদান কৰিছ।উল্লেখ্য যে- বিভিন্ন সাংস্কৃতিক অনুষ্ঠানৰ লগত জড়িত অনাতাঁৰ,দুৰদৰ্শন তথা বড়ো চলচ্চিত্ৰৰ কণ্ঠশিল্পী তথা বজালী জিলাৰ সৰুপেটা উচ্চ মাধ্যমিক বিদ্যালয়ৰ অৱসৰী প্ৰধান শিক্ষক ৰজনী স্বৰ্গীয়াৰীক ডক্টৰেট ডিগ্ৰীৰ এই সন্মান সমাজৰ কল্যাণমূলক কৰ্মৰাজি,শিক্ষা আৰু সাংস্কৃতিক ক্ষেত্ৰখনলৈ আগবঢ়োৱা অৱদানৰ বাবে কালি এনচিআৰ,দিল্লীৰ ফৰিদাবাদস্থিত দ্য কাষ্টেল অৱ আৰ্ট থিয়েটাৰৰ প্ৰেক্ষাগৃহত অনুষ্ঠানিকভাৱে প্ৰদান কৰা হয়।শিল্পী গৰাকীৰ এই স্বীকৃতিয়ে তেওঁৰ বাসভূমি সৰুপেটা-কহৰাৰ বৃহত্তৰ অঞ্চলৰ লগতে জন্মস্থান বাক্সা জিলাৰ শালবাৰী মহকুমাৰ অন্তৰ্গত লেচেৰা গাৱঁত আনন্দৰ লহৰ তোলে।

উল্লেখ্য যে- বড়ো আৰু অসমীয়া সংগীত শিল্পী তথা সাংস্কৃতিক সংগঠক হিচাপে ৰজনী স্বৰ্গীয়াৰীয়ে সুদীৰ্ঘ দিনৰে পৰা সাংস্কৃতিক ক্ষেত্ৰখনলৈ সেৱা আগবঢ়াই এগৰাকী বিপ্লৱী জাতীয়তাবাদী সংগীত শিল্পী হিচাপে পৰিচয় লাভ কৰিবলৈ সক্ষম হৈছে।তেওঁ ১৯৭৯ চনত অনাতাঁৰ আৰু ১৯৮৮ চনত দুৰদৰ্শনৰ স্বীকৃতিপ্ৰাপ্ত কণ্ঠশিল্পীৰূপে স্বীকৃতি লাভ কৰাৰ লগতে ১৯৯০ চনত বড়োলেণ্ড আন্দোলনৰ সময়ত বড়ো বিপ্লৱী জাতীয়তাবাদী গীতৰ জাংখ্ৰিথাই, দাওহাৰু,হাৰিমু আদিকে ধৰি একাধিক অডিঅ’ কেছেটত বড়ো গীত গাইছিল।তদুপৰি ১৯৯১ চনত বিপ্লৱী গীতৰ অডিঅ’ কেছেট “থুংগ্ৰী”ত বড়ো গীত পৰিবেশন কৰিছিল।তেওঁ সেই সময়তে তথা ১৯৯১ চনৰ পৰা ২০০১ চনলৈ সদৌ বড়ো সাংস্কৃতিক সন্থাৰ প্ৰতিষ্ঠাপক সাধাৰণ সম্পাদকৰ দায়িত্ব বহন কৰিছিল।সাহিত্য জগতখনতো খোজ দি স্বৰ্গীয়াৰীয়ে ১৯৯২ চনত “জীউ ছাহাৰা” নামৰ এখন বড়ো ভাষাৰ গ্ৰন্থও প্ৰকাশক কৰে।

উল্লেখ্য যে- ২০০৪ চনত মুক্তি লাভ কৰা “গোৰোবথানি জাৰিমিন” নামৰ বড়ো কথাছৱিৰ সংগীত পৰিচালকৰ দায়িত্ব বহন কৰাৰ লগতে কেবাটাও গীতত কণ্ঠদানো কৰিছিল।তেনেদৰে ২০০৫ চনত মুক্তি দিয়া “গংছে ননিনুং সুবুং” নামৰ অডিঅ’ গীতৰ কেছেটতো বড়ো আৰু অসমীয়া গীত গাইছিল ৰজনী স্বৰ্গীয়াৰীয়ে।একাধিক বড়ো আৰু অসমীয়া গীতৰ স্ৰষ্টা তেওঁ।আনহাতে ২০০২ চনৰ পৰা ২০০৭ চনলৈ সদৌ বড়ো সাংস্কৃতিক সন্থাৰ সভাপতি পদতো অধিষ্ঠিত হৈছিল ৰজনী স্বৰ্গীয়াৰীয়ে।তদুপৰি তেওঁ ২০০৯ চনৰ পৰা ২০১১ চনলৈ বড়ো সাহিত্য সভাৰ সানজোৰাং লক্ষেশ্বৰ ব্ৰহ্ম বঁটা নিৰ্বাচনী সমিতিৰ সভাপতি, ২০০৪ চনত বড়ো জ্ঞানপীঠ বঁটা নিৰ্বাচনী সমিতিৰ সদস্য,২০০৭ চনত বড়ো সাহিত্য অকাডেমি বঁটা নিৰ্বাচিনী সমিতিৰ জুৰি সদস্য, ২০১৯ চনত বড়ো কথাছৱি ছেনছৰ বৰ্ডৰ সদস্য হিচাপেও দায়িত্ব বহন কৰিছিল শিল্পী স্বৰ্গীয়াৰীয়ে।তেওঁ বড়ো সাংস্কৃতিক ক্ষেত্ৰখনলৈ ধাৰাবাহিকভাৱে আগবঢ়োৱা অবদানৰ বাবে ২০১১ চনত বাংবুলা ছৱি প্ৰমাণ পত্ৰ,২০১৭ চনত বড়ো সাহিত্য সভা আৰু নিখিল বড়ো ছাত্ৰ সন্থাই বিশেষভাৱে সম্বৰ্ধনা জনায়।

লগতে তেওঁ ২০২১ চনত থুংগ্ৰী বি মহিলাৰী বঁটা, ২০২১ চনত অসম চৰকাৰৰ পৰা শিল্পী সম্বৰ্ধনা, ২০২৩ চনত বিটিআৰ চৰকাৰৰ পৰা জৌহৌলাঔ নীলেশ্বৰ ব্ৰহ্ম সাংস্কৃতিক বঁটা, ২০২৩ চনত সদৌ বড়ো সাংস্কৃতিক সন্থাৰ পৰা অ’স্তাদ কামিনী কুমাৰ নাৰ্জাৰী সাংস্কৃতিক বঁটা, ২০২৪ চনত অসম চৰকাৰৰ অধ্যক্ষৰ পৰা মানপত্ৰ আৰু ২০২৫ চনত বিটিআৰ পৰিষদৰ পৰা মানপত্ৰ লাভ কৰিবলৈ সক্ষম হয়।বাক্সাৰ শালবাৰী মহকুমাৰ লেচেৰা গাঁৱত জন্ম গ্ৰহণ কৰা আলাৰাম স্বৰ্গীয়াৰী আৰু থপেশ্বৰী স্বৰ্গীয়াৰীৰ কণিষ্ঠ পুত্ৰ ৰজনী স্বৰ্গীয়াৰী সম্প্ৰতি ভৱানীপুৰৰ নিকটবৰ্তী কহৰা গাঁৱৰ বাসিন্দা। বড়ো লোক সাহিত্যৰ সাধক সুকুমাৰ বসুমতাৰীৰ ভাগিনীয়েক এই গৰাকী শিল্পী ৰজনী স্বৰ্গীয়াৰীয়ে এই সন্মান লাভ কৰাৰ বাবে তেওঁক বিভিন্ন দল-সংগঠন অনুষ্ঠানত-প্ৰতিষ্ঠানে অভিনন্দন জ্ঞাপন কৰিছে।ডক্টৰেট ডিগ্ৰী গ্ৰহণ কৰি আজি সংবাদ মাধ্যমক বৰ্ষীয়াণ কণ্ঠশিল্পী ৰজনী স্বৰ্গীয়াৰীয়ে কয়- “জাতিৰ বাবে,জনতাৰ বাবে,সমন্বয়ৰ বাবে গীত গাই আহিছোঁ আৰু গীত গাই যাম”।

অসম–নাগালেণ্ড সীমান্তৱৰ্তী গোলাঘাট জিলাৰ ৰালান গাঁৱত শনিবাৰে উত্তেজনাপূৰ্ণ পৰিস্থিতিৰ সৃষ্টি হয়। একাংশ নাগা যুৱকে কেন্দ্ৰীয় সংৰক্ষিত আৰক্ষী বাহিনী (চিআৰপিএফ)-ৰ জোৱানসকলৰ সৈতে সংঘৰ্ষত লিপ্ত হোৱা বুলি অভিযোগ উত্থাপিত হৈছে। স্থানীয় সূত্ৰ অনুসৰি, ঘটনাৰ সময়ত কিছুমান লোকক অস্ত্ৰ-শস্ত্ৰসহ চিআৰপিএফ জোৱানসকলৰ সৈতে হতাহতি কৰা দেখা যায়। ঘটনাটোৰ ভিডিঅ’ সামাজিক মাধ্যমত ব্যাপকভাৱে প্ৰচাৰিত হৈছে, যাৰ ফলত সীমান্ত অঞ্চলত উদ্বেগৰ পৰিৱেশ সৃষ্টি হৈছে।

জানিব পৰা মতে, সীমান্তৱৰ্তী নাগা অধ্যুষিত অঞ্চলত অৱস্থিত এটা ইন্ধন ডিপ’ পুনৰ মুকলি কৰাৰ প্ৰচেষ্টাক কেন্দ্ৰ কৰি এই বিবাদৰ সূচনা হয়। পূৰ্বতে ডিপ’টো বন্ধ কৰি ৰখা হৈছিল। কিন্তু পুনৰ চালু কৰাৰ প্ৰচেষ্টাত স্থানীয় লোকৰ একাংশই আপত্তি জনোৱাৰ ফলত পৰিস্থিতি উত্তপ্ত হৈ উঠে আৰু সংঘৰ্ষৰ সৃষ্টি হয়। পৰিস্থিতি নিয়ন্ত্ৰণত ৰাখিবলৈ প্ৰশাসন আৰু নিৰাপত্তা বাহিনীয়ে অঞ্চলটোত নিৰাপত্তা ব্যৱস্থা অধিক কটকটীয়া কৰিছে। যাতে পৰৱৰ্তী সময়ত কোনো অপ্ৰীতিকৰ ঘটনা সংঘটিত নহয়, তাৰ বাবে সতৰ্কতামূলক ব্যৱস্থা গ্ৰহণ কৰা হৈছে।

এই ঘটনাত কোনো লোক আহত হৈছে নে গ্ৰেপ্তাৰ কৰা হৈছে নে নাই, সেই বিষয়ে এই প্ৰতিবেদন প্ৰেৰণ কৰা সময়লৈকে চৰকাৰীভাৱে কোনো নিশ্চিত তথ্য প্ৰকাশ কৰা হোৱা নাই। অৱশ্যে, প্ৰশাসনে পৰিস্থিতিৰ ওপৰত নিবিড়ভাৱে নজৰ ৰাখিছে বুলি জানিব পৰা গৈছে।