সদৌ অসম ছাত্ৰ সন্থাৰ সম্পাদক হৈ থাকোতে নিজৰ বাকপটুতা আৰু জাতিৰ প্ৰতি দেখুওৱা ভালপোৱাৰ বাবে অসমবাসীৰ হৃদয় জিনিছিল লুৰীণজ্যোতি গগৈয়ে । হৈ পৰিছিল বহুতৰ বাবে এটা আবেগৰ নাম লুৰীণজ্যোতি গগৈ। কা আন্দোলনৰ পাছতে ৰাজনৈতিক ভাৱে নিজৰ সমাজ জীৱন আৰম্ভ কৰাৰ বাবে চকুলো টুকি আছুৰ মজিয়া এৰি দায়িত্ব ল’লে অসম জাতীয় পৰিষদৰ।

কথাৰে বহু অসমীয়াৰ হৃদয় জিনিব পৰা লুৰীণজ্যোতি গগৈ আজি ডিব্ৰুগড় লোকসভা সমষ্টিত বিৰোধী ঐক্য মঞ্চ প্ৰাৰ্থী। শক্তিশালী বিজেপি প্ৰাৰ্থী সৰ্বানন্দ সোণোৱালৰ সৈতে ৰাজনৈতিক যুঁজত নামিছে । চাৰিওফালে বিজেপিৰ উত্থান, ধন বল বাহু বলৰ ৰাজনীতি। তেনে সময়ত সততাৰ কথা কৈ ৰাজনৈতিক যুঁজত ব্যস্ত হোৱা লুৰীণজ্যোতি গগৈক একাঁজলি আশীৰ্বাদ দিবলৈ মাজুলীৰ পৰা ধপলিয়াই আহিল মাতৃ চুনু দাস ।

পৃথিৱীৰ আটাইতকৈ নিঃস্বাৰ্থ আৰু পৱিত্ৰ সম্পৰ্কটিয়েই হৈছে মাতৃ-পুত্ৰৰ সম্পৰ্ক। লুৰীণজ্যোতি গগৈৰ জন্মদাত্রী মাতৃৰ বিয়োগৰ পাছত মাজুলীৰ আউনীআটীৰ আলিমূৰ গাঁৱৰ এইগৰাকী আইমাতৃ চুনু দাসে লুৰীণজ্যোতি গগৈক দিছিল পুত্ৰৰ মৰ্যদা। সেয়ে ৰাজনৈতিক ৰণ ক্ষেত্ৰত ব্যস্ত থকা পুত্ৰক আশীৰ্বাদ দিবলৈ মাজুলীৰ পৰা ঢপলিয়াই আহিল। মৰাণত লুৰীণৰ প্ৰচাৰ সভাত উপস্থিত থাকিল মাতৃ ।

পুত্ৰৰ ভাষণ কাষৰ পৰা শুনিলে মাতৃয়ে । মাতৃয়ে ক’লে, মই আৰ্শীবাদ দিবলৈ আহিছো, ৰাইজৰ উৎসাহ দেখি ভাল লাগিছে ।

স্বদেশ-স্বজাতিৰ অস্তিত্ব আৰু স্বাভিমকান সুৰক্ষাৰ অঙ্গীকাৰেৰে অসম জাতীয় পৰিষদৰ নিৰ্বাচনী ইস্তাহাৰ প্ৰকাশ ।
স্বদেশ আৰু স্বজাতিৰ অস্তিত্ব আৰু স্বাভিমান সুৰক্ষা তথা তেল আৰু চাহ উদ্যোগক ভিত্তি কৰি ডিব্ৰুগড় লোকসভা সমষ্টি এলেকাত ব্যাপক কৰ্মসংস্থাপন সৃষ্টিৰ পৰিকল্পনা প্ৰস্তুত কৰাৰ সংকল্পৰে অসম জাতীয় পৰিষদে আজি নিৰ্বাচনী ইস্তাহাৰ প্ৰকাশ কৰে৷ ২০২৪ চনৰ লোকসভা নিৰ্বাচনৰ বাবে প্ৰস্তুত কৰা এই ইস্তাহাৰত মূলতঃ ডিব্ৰুগড় লোকসভা সমষ্টি এলেকাৰ কিছুমান বিশেষ সমস্যা সমাধান তথা উন্নয়নৰ সংকল্প গ্ৰহণ কৰা হৈছে যদিও দলৰ সাংসদ নিৰ্বাচিত হ’লে ৰাজ্যৰ জাতীয় সমস্যাসমূহ সংসদত উত্থাপন কৰাৰো অংগীকাৰ ব্যক্ত কৰা হয়৷

আজি ডিব্ৰুগড় চহৰৰ বৈৰাগীমঠস্থিত হোটেল দ্য প্ৰিমলেণ্ডত আয়োজিত এক অনুষ্ঠানত চলিত লোকসভা নিৰ্বাচনৰ বাবে নিৰ্বাচনী ইস্তাহাৰখন মুকলি কৰে দলৰ সাধাৰণ সম্পাদক জগদীশ ভূঞাসহ কেন্দ্ৰীয় নেতৃবৰ্গই৷ ৮ পৃষ্ঠাৰ নিৰ্বাচনী ইস্তাহাৰখনক তিনিটা ভাগত ভাগ কৰা হৈছে৷ প্ৰথমটো ভাগত বিজেপি দলৰ চৰকাৰে দেশ, ৰাজ্য আৰু বিশেষকৈ ডিব্ৰুগড় লোকসভা সমষ্টি এলেকাৰ ৰাইজক কৰা প্ৰতাৰণা-প্ৰৱঞ্চনাৰ চমু অৱলোকন, দ্বিতীয় ভাগত দলৰ প্ৰাৰ্থীগৰাকী সাংসদ নিৰ্বাচিত হ’লে ডিব্ৰুগড় লোকসভা সমষ্টি এলেকাৰ বাবে কৰিবলগীয়া কাম-কাজসমূহ আৰু তৃতীয় ভাগত সমগ্ৰ ৰাজ্য তথা জাতিটোৰ বাবে কৰিবলগীয়া কাম-কাজসমূহৰ আভাষ দিয়া হৈছে৷

উল্লেখযোগ্য যে অসম জাতীয় পৰিষদে ৰাজ্যৰ ১৪ টা লোকসভা সমষ্টিৰ ভিতৰত অকল ডিব্ৰুগড় সমষ্টিত নিজা প্ৰাৰ্থী প্ৰক্ষেপ কৰিছে৷ দলৰ সভাপতি তথা জনপ্ৰিয় যুৱ নেতা লুৰীণজ্যোতি গগৈক প্ৰাৰ্থিত্ব প্ৰদান কৰিছে দলটোৱে৷ গগৈৰ প্ৰাৰ্থিত্বৰ প্ৰতি ইণ্ডিয়া মর্চাৰ সহযোগী দলসমূহক লৈ অসমত গঠিত বিৰোধী ঐক্যমঞ্চই সমৰ্থন আগবঢ়াইছে৷ সেয়েহে নিৰ্বাচনী ইস্তাহাৰখনত দলটোৱে আগবঢ়োৱা প্ৰতিশ্ৰুতি বা সংকল্পসমূহ মূলতঃ ডিব্ৰুগড় লোকসভা সমষ্টিক কেন্দ্ৰ কৰিহে আগবঢ়োৱা হৈছে৷

নিৰ্বাচনী ইস্তাহাৰখনত কোৱা হৈছে যে দলৰ প্ৰাৰ্থীগৰাকী সাংসদ নিৰ্বাচিত হ’লে অসমীয়া তথা ৰাজ্যৰ অন্য থলুৱা জনগোষ্ঠীসমূহৰ ভাষিক তথা সাংস্কৃতিক অস্তিত্ব তথা ঐতিহ্য সুৰক্ষাৰ প্ৰসঙ্গ অগ্ৰাধিকাৰ ভিত্তিত সংসদকে ধৰি সকলো প্ৰয়োজনীয় মঞ্চত উত্থাপনৰ লগতে সেইসমূহ ৰূপায়নৰ পক্ষত দিল্লীত জনমত গঠন কৰিব৷

আনহাতে অসম চুক্তিৰ আধাৰত বিদেশীৰ চিনাক্তকৰণ, ভোটাৰ তালিকাৰ পৰা বিদেশীৰ নাম কৰ্তন আৰু আইনী প্ৰক্ৰিয়াৰে বহিস্কৰণ, অসমীয়াৰ বাবে সাংবিধানিক ৰক্ষা কৱচৰ ব্যৱস্থা, সীমান্তৰ সুৰক্ষা আৰু এখন সম্পূৰ্ণ আৰু ত্ৰুটি হীন ৰাষ্ট্ৰীয় নাগৰিক পঞ্জী (এন আৰ চি) প্ৰস্তুতকৰণৰ লগতে অসম চুক্তিক অৱমাননা কৰা ‘কা’ আইন বাতিলৰ দাবী সংসদত উত্থাপন কৰিব৷ অসম চুত্তিৰ ৫ আৰু ৬ নং দফা ৰূপায়ন তথা ন্যায়াধীশ (অৱসৰপ্ৰাপ্ত) বিপ্লৱ শৰ্মা কমিটীৰ পৰামৰ্শ কায্যৰ্কৰীকৰণৰ হকে ৰাষ্ট্ৰীয় স্তৰত জনমত গঠনেৰে চৰকাৰক হেঁচা দিয়া হ’ব৷ ছয় জনগোষ্ঠীৰ জনজাতিকৰণৰ দাবীকো অগ্ৰাধিকাৰ ভিত্তিত সংসদত উত্থাপন কৰাৰ লগতে বান-গৰাখহনীয়াক ৰাষ্ট্ৰীয় দুৰ্যোগ হিচাপে ঘোষণা কৰোৱাত উদ্যোগ লব দলৰ সাংসদে৷

ইস্তাহাৰখনৰ প্ৰগথম দফাটোতে কোৱা হয়, “প্ৰায় দুশ বছৰীয়া চাহ উদ্যোগ আৰু এশ বছৰীয়া তৈল উদ্যোগেৰে এই জিলা দুখনে ভাৰত তথা বিশ্বৰ দৃষ্টি আকৰ্ষণ কৰিছে৷ দেশৰ সর্বাধিক ৰাজহ আহৰণকাৰী জিলাৰ তালিকাতো আছে এই দুই জিলাৰ স্থান৷ কিন্তু সেই অনুপাতে জিলা দুখনত উন্নয়ন হোৱা নাই৷ চাহ আৰু তৈল সম্পদ ব্যৱহাৰেৰে ব্যাপক সংস্থাপন সৃষ্টি কৰি জিলা দুখনক আৰ্থিকভাৱে সমৃদ্ধ কৰা হোৱা নাই৷ এসময়ত আৰ্থিকভাৱে টনকিয়াল হৈ থকা ডিব্ৰুগড় আৰু তিনিচুকীয়া জিলাৰ অৰ্থনৈতিক অৱস্থা দিনে দিনে বেয়াৰ ফাললৈ গতি কৰিছে৷ তাৰ মূলতে আছে উপযুক্ত পৰিকল্পনাৰ অভাৱ৷ নিৰ্বাচিত জনপ্ৰতিনিধিসকলৰ অদক্ষ্যতা, অদূৰদৰ্শিতা, অৱহেলা আৰু প্ৰৱঞ্চনাৰ মানসিকতাই হৈছে তাৰ মূল কাৰণ৷

বিজেপি চৰকাৰৰ দিনত সামগ্ৰিকভাৱে কেন্দ্ৰীয় আৰু ৰাজ্যিক উভয় চৰকাৰে যেনেকৈ জাতীয় বিষয়সমূহ প্ৰতিশ্ৰুতি অনুসৰি সমাধান নকৰিলে, তেনেকৈ ডিব্ৰুগড় লোকসভা সমষ্টি এলেকাৰ সমস্যা আৰু সম্ভাৱনাসমূহক গুৰুত্বহীন কৰি ৰাখিলে৷” দলৰ সাংসদ নিৰ্বাচিত হ’লে এই বিষয়সমূহ সমাধান আৰু তাৰ ভিত্তিত ব্যাপক উন্নয়নৰ সংকল্পৰ কিছু আভাষ ব্যক্ত কৰা হয় ইস্তাহাৰখনত৷

লক্ষ্যণীয় যে সাংসদ নিৰ্বাচিত হৈ দলৰ প্ৰাৰ্থীগৰাকী কেন্দ্ৰীয় চৰকাৰৰ অংশীদাৰ হ’ব পাৰিলে উক্ত বিষয়সমূহ চৰকাৰৰ দ্বাৰা সমাধান কৰোৱাৰো সংকল্প ইস্তাহাৰখনত প্ৰকাশ কৰা হয়৷ ৰাজ্যিক ইছ্যূসমূহৰ ভিতৰত শিক্ষা আৰু স্বাস্থ্য খণ্ডৰ সংস্কাৰ আৰু উক্ত খণ্ডসমূহত কৰ্মৰত লোকসকলৰ সমস্যা সমাধান, আশা-অংগণাৱাড়ী কৰ্মীসকলৰ সমস্যা সমাধান আদিও ইস্থাহাৰত উল্লেখ কৰা হয়৷ কৃষি খণ্ড, ক্ষুদ্ৰ চাহ খেতিয়কৰ সমস্যা, চাহ জনগোষ্ঠীৰ সমস্যা, ধৰ্মীয় আৰু ভাষিক সংখ্যালঘুৰ সমস্যা আদি বিষয়েও ইস্তাহাৰত স্থান লাভ কৰে৷ ধৰ্মীয় আৰু ভাষিক সংখ্যালঘু সন্দৰ্ভত ইস্তাহাৰখনত কোৱা হয়, “অসমত স্থায়ীভাৱে বসবাস কৰা সকলো বৈধ ভাৰতীয় বাংলা, হিন্দী আদি ভাৰতীয় ভাষাভাষী মানুহ – যাৰ অসমক বাদ দি দ্বিতীয় এখন ঘৰ নাই; আৰু লগতে অসমীয়া কিম্বা এই ৰাজ্যৰ থলুৱা ভাষা-সংস্কৃতিৰ প্ৰতি যাৰ আন্তৰিক শ্ৰদ্ধা আছে, তেনে সকলো সম্প্ৰদায়ক আমি বৃহত্তৰ অসমীয়া সমাজৰ অংগ বুলি গণ্য কৰো আৰু তেনে প্ৰতিজন স্থায়ী ভাৰতীয় নাগৰিকৰ সামাজিক, অৰ্থনৈতিক আৰু ৰাজনৈতিক সুৰক্ষাৰ বাবেও আমি দায়বদ্ধ৷ আনহাতে অসমত যুগ যুগ ধৰি বসবাস কৰি অহা আৰু অসমীয়া বৃহৎ জাতিসত্তাৰ অভিন্ন অংগ স্বৰূপ গোৰ্খা ৰাইজো বিভিন্ন সমস্যাৰে ভাৰাক্ৰান্ত৷ আমি অসমৰ গোৰ্খা ৰাইজৰ সমস্যা সমূহ স্থায়ী সমাধানৰ বাবে শক্তিশালী পদক্ষেপ ল’বৰ বাবেও অংগীকাৰবদ্ধ৷”

উন্মোচনী অনুষ্ঠানত দলৰ উপসভাপতি চমছেৰ সিং, অনুপ ফুকন, ডঃ দিলীপ কুমাৰ ভূঞা, বিৰেণ বৰুৱা, সম্পাদক ৰাজীব ভট্টাচাৰ্য, ৰাজু ফুকন, জিয়াউৰ ৰহমান, কেন্দ্ৰীয় কাৰ্যনিৰ্বাহক সঞ্জীব চাংমাই, নিৰ্বাচন পৰিচালনা সমিতিৰ মু্খ্য আহ্বায়ক চিত্ত বসুমতাৰী, জাতীয় মহিলা শক্তিৰ সভানেত্ৰী আলপনা শৰ্মা, তথ্য প্ৰযুক্তি সম্পাদক দেৱজিৎ চৌধুৰী আৰু পিনাক কৌশিক বৰা, ডিব্ৰুগড় জিলা সমিতিৰ সভাপতি পৰাগজ্যোতি বৰুৱা আদি নেতাসকল উপস্থিত থাকে৷

ৰাজ্যত ক্ৰমাৎ তীব্ৰতৰ হৈ উঠিছে লোকসভা নিৰ্বাচনৰ প্ৰচাৰ অভিযান। কোনো ক্ৰূটি নৰখাকৈ স্বতস্ফূৰ্তভাৱে অভিযান চলাইছে মন্ত্ৰী পীযুষ হাজৰীকাই। সোমবাৰে মৰিয়নি সমষ্টিত বিজেপি প্ৰাৰ্থী তপন গগৈৰ হৈ জোৰদাৰ প্ৰচাৰ অভিযান মন্ত্ৰী পীযুষ হাজৰীকাৰ।

মৰিয়নি,কলিয়াপানী আৰু চেলেং মণ্ডলৰ ৯ খনকৈ সভাত ভাগ লৈ নিৰ্বাচনী প্ৰচাৰ চলায় মন্ত্ৰী গৰকীয়ে।
ৰান্ধনি সহায়িকাক বিজেপিক ভোট দিবলৈ আহ্বান পীযুষ হাজৰীকাৰ। বিয়লি মৰিয়নি নাগাজাংকা ৰঙ্গমঞ্চত ৰান্ধনী আৰু সহায়িকা সকলৰ লগত মিলিত হোৱা এক সভাত তেওঁলোকৰ দুখ দুৰ্দশা সমূহ দূৰ কৰাৰ পদক্ষেপ হাতত লোৱা হ’ব বুলি উল্লেখ কৰে মন্ত্ৰী গৰাকীয়ে।

লগতে বিজেপিক ভোট দিবলৈ আহ্বান জনায় মন্ত্ৰীগৰাকীয়ে। অন্যহাতে যোৰহাট লোকসভা সমষ্টিত আঢ়ৈ লাখ ভোটৰ ব্যৱধানত বিজেপি জয়ী হ’ব বুলি মন্তব্য কৰে মন্ত্ৰী পীযুষ হাজৰীকাই। লগতে ভূপেন বৰাৰ দিনতে অসমত কংগ্ৰেছ শূণ্য হব বুলিও জনায়। এনেদৰে অত্যন্ত ব্যস্ততাৰে নিৰ্বাচনী প্ৰচাৰ অভিযানত নামি পৰিছে মন্ত্ৰী পীযুষ হাজৰীকা।