‘কংগ্ৰেছে ৬০ বছৰ ভাৰতবৰ্ষ চলালে, অসমখন চলালে ৬০ বছৰ, কাম একো নকৰিলে’
কংগ্ৰেছে ৬০ বছৰ ভাৰতবৰ্ষ চলালে, অসমখন চলালে ৬০, কাম একো নকৰিলে৷- এই মন্তব্য মন্ত্ৰী পীযুষ হাজৰীকাৰ৷ নাজিৰা বিধানসভা সমষ্টিৰ ন-পাম বাৰুৱতী গাঁও পঞ্চায়তৰ দেওপানী গোঁহাইগাঁও ৰংগমঞ্চত অনুষ্ঠিত এখনি নিৰ্বাচনী প্ৰচাৰ সভাত অংশগ্ৰহণ কৰি এই মন্তব্য কৰে মন্ত্ৰীগৰাকীয়ে৷ যোৰহাট লোকসভা সমষ্টিৰ বিজেপিৰ প্ৰাৰ্থী তপন কুমাৰ গগৈৰ হৈ নিৰ্বাচনী প্ৰচাৰ সভাত অংশগ্ৰহণ কৰি মন্ত্ৰী হাজৰীকাই কয় যে আমি অসমখন চলালো মাত্ৰ ৭ বছৰ ১০ মাহ আৰু ভাৰতবৰ্ষখন চলালো ১০ বছৰ৷ এই কেইবছৰত কংগ্ৰেছে কি কৰিছিল আৰু আমি কি কৰিছো সেইসমূহ মই আজিৰ সভাত আপোনালোকৰ আগত দাঙি ধৰিম৷
আনহাতে, কংগ্ৰেছৰ দিনৰ অনুদানৰ ঘৰবিলাক এটা ৰূমৰ আছিল বুলি কৈ মন্ত্ৰীগৰাকীয়ে কয় যে আমাৰ দিনত দুটা ৰূমৰ ঘৰৰ লগতে বাৰান্দাও আছে৷ কংগ্ৰেছৰ দিনত ঘৰটোৰ দাম আছিল ৭৫ হাজাৰ টকা৷ তাত মাজত দালাল আছিল৷ ঘৰৰ টকা বিধায়ক, ঠিকাদাৰে খাইছিল৷ কিন্তু আমাৰ দিনত ঘৰৰ বাবে দিয়া হয় ডেৰ লাখ টকা৷ ইয়াত কোনো দালাল নাথাকে, ঘৰৰ গৰাকীয়ে নিজে বনায় ঘৰ৷ টকা ডাইৰেক্ট বেংকৰ একাউণ্টত যায়৷ এতিয়া ডেৰ লাখ টকাৰ ডেৰ লাখ টকাৰে ঘৰ হয় বুলি মন্ত্ৰীগৰাকীয়ে ভাষণত প্ৰকাশ কৰে৷ আনহাতে, বহুত খেতিয়কে বছৰত ৬ হাজাৰকৈ টকা পায়, কিন্তু কংগ্ৰেছৰ দিনত কৃষকে এই ধন পোৱা নাছিল বুলি তেওঁ কয়৷ মন্ত্ৰীগৰাকীয়ে ধানৰ মূল্য সন্দৰ্ভত ৰাইজৰ আগত ভাষণ দাঙি ধৰি কয় যে আজিৰ পৰা অলপ দিন আগতে ১ কুণ্টল ধানৰ মূল্য ১২০০ টকা আছিল, এতিয়া ২২,০০ টকা হ’ল৷ এয়া কিয় হ’ল তাৰ ব্যাখ্যা দাঙি ধৰি মন্ত্ৰীগৰাকীয়ে কয় যে এতিয়া ধানবিলাক আমি চৰকাৰে কিনি লওঁ, আমাৰ ড০ হিমন্ত বিশ্ব শৰ্মাৰ চৰকাৰে কিনি লয়৷ চৰকাৰে নিকিনিলেও যদি বেপাৰীয়েও কিনে, বেপাৰীয়ে ধানৰ দাম এতিয়া ২৩০০ টকা দিব লাগে৷ এয়া কৰাৰ বাবে আমাৰ কৃষক ৰাইজৰ লাভ হৈছে৷ এই কাম মুখ্যমন্ত্ৰী ড০ হিমন্ত বিশ্ব শৰ্মাই কৰিছে বুলি মন্ত্ৰী পীযুষ হাজৰীকাই ভাষণত প্ৰকাশ কৰে৷
তেওঁ এই আঁঠুৱা-কম্বলৰ পাৰ্টি কংগ্ৰেছক ভোট নিদিবলৈ ৰাইজক আহ্বান জনায়৷ তেওঁ কয় যে আঁঠুৱা-কম্বল লাগিলে কংগ্ৰেছক ভোট দিয়ক, যদি অৰুণোদয় লাগে, মুখ্যমন্ত্ৰী উদ্যমিতা লাগে, নিযুত মইনা লাগে তেতিয়া হ’লে আমাক ভোট দিয়ক৷ সভাত মন্ত্ৰীগৰাকীয়ে ৰাইজক ইঞ্চুৰেন্সৰ সুবিধা কৰি দিয়াৰো প্ৰতিশ্ৰুতি দিয়ে৷ তেওঁ আৰু কয় যে কংগ্ৰেছে ৬০ বছৰ অসমখন চলাই মেডিকেল কলেজ বনাইছিল ৬ খন, আমি অসম চলালো ৭ বছৰ ১০ মাহ৷ আমি মেডিকেল কলেজ বনালো ১৮ খন৷ স্বাস্থ্য নাথাকিলে একো নহয়, কংগ্ৰেছে এই কাম নকৰিলে৷ এই কাম আমি কৰিলো৷ মন্ত্ৰীগৰাকীয়ে অসমৰ শৌৰ্য-বীৰ্যৰ প্ৰতীক লাচিত বৰফুকনৰ বিশাল প্ৰতিমূৰ্তি বিজেপি চৰকাৰে কৰাৰ কথাও উল্লেখ কৰে৷ তেওঁ ৰাইজক বহুমূলীয়া ভোটটি বিজেপিৰ পদুম ফুল ছবিত দিবলৈ আহ্বান জনায়৷
