সংস্কৃতিৰ নগৰী তেজপুৰ শনিবাৰে পুৱাৰ পৰা বিভিন্ন জাতি-জনগোষ্ঠীৰ গীত-নৃত্য, অসমীয়া লোককলা, শিল্পকলা, ভাওনা শিল্প আদিৰে মুখৰিত হৈ পৰিল। চৌদিশে মাথোঁ শিল্পৰ সমাহাৰ। শিক্ষাৰ্থীৰ পাৰভঙা উছাহৰ মাজত বুৰ গ’ল সমগ্ৰ তেজপুৰ চহৰ।

উল্লেখ্য যে যোৱা ৭ ফেব্ৰুৱাৰীৰ পৰা অনুষ্ঠিত হোৱা তেজপুৰ মহাবিদ্যালয়ৰ মহাবিদ্যালয় সপ্তাহৰ অন্তিম দিনটোৰ পুৱাই মহাবিদ্যালয়ৰ পৰা গজৰাজক সন্মুখত লৈ আৰম্ভ কৰা মহাবিদ্যালয়খনৰ ২১ টা বিভাগৰ প্ৰায় দুই সহস্ৰাধিক শিক্ষাৰ্থীৰ বাৰেৰহনীয়া সাংস্কৃতিক শোভাযাত্ৰাৰে মুখৰিত হৈ পৰে সমগ্ৰ তেজপুৰ চহৰ।

তেজপুৰৰ বিধায়ক পৃথ্বিৰাজ ৰাভাই আনুষ্ঠানিক ভাৱে পতাকা জোকাৰি শুভাৰম্ভ কৰাৰ পূৰ্বে অধ্যক্ষ ড॰ জ্যোতিকমল হাজৰিকা আৰু উপাধ্যক্ষ ৰীতা শইকীয়া দত্তকে ধৰি একাংশ অধ্যাপক – অধ্যাপিকাৰ উপস্থিতিত মহাবিদ্যালয়খনৰ ছাত্ৰ একতা সভাৰ সাধাৰণ সম্পাদক আদিত্য ৰাণা কাশ্যপে বিধায়ক গৰাকীক ফুলাম গামোচা আৰু ফুলাম জাপিৰে আদৰণী জনোৱাৰ পিছত বিধায়ক গৰাকীয়ে তেজপুৰ মহাবিদ্যালয় ইতিমধ্যে ৰাজ্যখনৰ বৌদ্ধিক ক্ষেত্ৰত এখন পৰিচিত মহাবিদ্যালয় হিচাপে পৰিগণিত হৈছে বুলি মন্তব্য কৰি শোভাযাত্ৰাত প্ৰদৰ্শন কৰা বিষয় সমূহে সামগ্ৰিক ভাৱে বৃহত্তৰ অসমীয়া ভাষা, সাহিত্য আৰু সংস্কৃতিৰ সমান্তৰাল ভাৱে ইতিহাসকো প্ৰতিফলিত কৰিবলৈ সক্ষম হোৱাতো এক আশাব্যঞ্জক খবৰ বুলি মন্তব্য কৰে।

ইয়াৰ পিছতেই মহাবিদ্যালয় প্ৰাংগনৰ পৰা আনন্দ উল্লাসৰ মাজেৰে আৰম্ভ হয় বাৰেৰহনীয়া সাংস্কৃতিক শোভাযাত্ৰা।
উল্লেখ্য যে, তেজপুৰ চহৰৰ তিনি কিলোমিটাৰ পৰিভ্ৰমণ কৰা এই শোভাযাত্ৰাত ছাত্ৰী নিবাসৰ দলটিয়ে “ব্ৰক্ষ্মপুত্ৰ উপনৈ সমূহ” শীৰ্ষক বিষয়ত ফেষ্টুনত সকলো উপনৈৰ নাম লিখি অগ্ৰসৰ হোৱাৰ লগতে অসমীয়া বিভাগে “অসমীয়া সংস্কৃতি” শীৰ্ষক বিষয়ত অসমীয়া সংস্কৃতিৰ সকলো দিশ প্ৰতিফলিত কৰাৰ উপৰি উদ্ভিদ বিজ্ঞান বিভাগে “বিহু” শীৰ্ষক বিষয়, বাণিজ্য প্ৰশাসন বিভাগে “ৰাসলীলা” শীৰ্ষক বিষয়ত ৰাস ভাওনাৰ সামগ্ৰিক দৃশ্যাংশ, শিক্ষা তত্ত্ব বিভাগে “বুঢ়ী আইৰ সাধুৰে মুখৰিত সোণালী শৈশৱ” শীৰ্ষক বিষয়ত বুঢ়ী আইৰ সাধুত ব্যৱ্হৃত সকলো জতুৱা ঠাঁচ, ফকৰা যোজনা, পটন্তৰ প্ৰদৰ্শনৰ লগতে বাণিজ্য বিভাগে” অনৈক্যৰ মাজত ঐক্য” শীৰ্ষক বিষয়, ভূগোল বিজ্ঞান বিভাগে “অংকীয়া নাট” শীৰ্ষক বিষয়ত সকলো অংকীয়া নাটৰ দৃশ্য, দৰ্শন বিভাগে “দৌল উৎসৱ” শীৰ্ষক বিষয়ত হোলী গীতৰ সমাহাৰ, ৰাজনীতি বিজ্ঞান বিভাগে “বাৰ মাহৰ চানেকীৰে অসমীয়া জাতীয় জীৱন” শীৰ্ষক আকৰ্ষণীয় বিষয়, অৰ্থনীতি বিভাগে “বিভিন্ন যুগ” শীৰ্ষক বিষয়ত প্ৰত্যেক যুগৰ তাৎপৰ্য প্ৰদৰ্শন, ৰসায়ন, পদাৰ্থ বিজ্ঞান আৰু প্ৰাণী বিজ্ঞান বিভাগে” অসমৰ পৰম্পৰাগত কৃষি পদ্ধতি” শীৰ্ষক বিষয়ৰ উপৰি কলা আৰু সংগীত বিভাগ, নেপালী বিভাগ, বাংলা বিভাগ, হিন্দী বিভাগ, ইংৰাজী বিভাগকে ধৰি আটাইকেইটা বিভাগে প্ৰদৰ্শন কৰা অনুষ্ঠানে তেজপুৰীয়া ৰাইজক মুগ্ধ কৰি তোলে।

আনহাতে মহাবিদ্যালয় সপ্তাহৰ প্ৰতিযোগিতামূলক ভাৱে উলিওৱা এই শোভাযাত্ৰাৰ বাবে বিচাৰক হিচাপে উপস্থিত থাকে বিশিষ্ট নাট্যশিল্পী তথা অসম নাট্য সন্মিলনৰ কেন্দ্ৰীয় উপসভাপতি মৃগেন চন্দ্র বড়া, শোণিতপুৰ প্ৰেছ ক্লাব, তেজপুৰৰ সম্পাদক তথা বাণ থিয়েটাৰৰ কাৰ্যনিৰ্বাহক সদস্য পংকজ বৰুৱা আৰু বিশিষ্ট কলা নিৰ্দেশক কুলেন বৰা।শোভাযাত্ৰাৰ পিছতেই মহাবিদ্যালয়খনৰ প্ৰেক্ষাগৃহত মহাবিদ্যালয় শীৰ্ষ গীতেৰে আৰম্ভ হয় বঁটা বিতৰণী আৰু মহাবিদ্যালয় সপ্তাহৰ মূল সভা।

মহাবিদ্যালয়খনৰ অধ্যক্ষ ড॰ জ্যোতিকমল হাজৰিকাৰ পৌৰোহিত্যত এই মূল অনুষ্ঠানত মুখ্য অতিথি ৰূপে অংশ গ্ৰহণ কৰে তেজপুৰৰ লোকপ্ৰিয় গোপীনাথ বৰদলৈ আঞ্চলিক মানসিক স্বাস্হ্য প্ৰতিষ্ঠানৰ সঞ্চালক ডাঃ শৈলেন্দ্ৰ কুমাৰ দেউৰী।

আনহাতে মহাবিদ্যালয়খনৰ পৰিচালনা আৰু উন্নয়ন সমিতিৰ সভাপতি ড॰ স্বাধীনতা মহন্তই বিশিষ্ট অতিথি ৰূপে অংশ গ্ৰহণ কৰা এই মূল সভাতে মহাবিদ্যালয় সপ্তাহ উপলক্ষে অনুষ্ঠিত হোৱা সাহিত্য, সংস্কৃতি আৰু ক্ৰীড়া প্ৰতিযোগিতা সমূহৰ বিজয়ী প্ৰতিযোগীসকলক পুৰস্কাৰ প্ৰদান কৰাৰ লগতে সদ্যঘোষিত অসম প্ৰশাসনিক সেৱাৰ পৰীক্ষাত ১৮ নম্বৰ স্থানেৰে কৃতিত্বৰ পৰিচয় দিবলৈ সক্ষম হোৱা মহাবিদ্যালয়খনৰ প্ৰাক্তন ছাত্ৰী প্ৰয়াসী গৌতমক অধ্যক্ষ ড॰ জ্যোতিকমল হাজৰিকাই অভিনন্দন পত্ৰৰে অভিনন্দন জ্ঞাপন কৰে ।আনহাতে বিয়লিৰ পৰা সন্ধিয়ালৈকে অনুষ্ঠিত আকৰ্ষণীয় সাংস্কৃতিক অনুষ্ঠান।

আখৰ পঢ়িব নজনা লোকেও কাব্যিক পৰম্পৰাৰ বাবেই কীৰ্তন ভাগৱত সহজে পঢ়িব পাৰে। অসমীয়া সাহিত্যৰ সবাতোকৈ প্ৰয়োজনীয় আৰু প্ৰচলিত অলংকাৰটোৱেই হ’ল কবিতা- পুৰণিগুদাম কবি সন্মিলনৰ “চোতালে চোতালে কবিৰ মেল” শীৰ্ষক এটি অবিৰত কবিতা পাঠৰ অনুষ্ঠানত উপস্থিত থাকি চামগুৰি মহাবিদ্যালয়ৰ অধ্যক্ষ তথা বিশিষ্ট চিন্তাশীল লেখক ড° ইন্দ্ৰজিৎ বেজবৰুৱাই শনিবাৰে এইদৰে কয়।

পুৰণিগুদাম মাজগাঁৱৰ বিশিষ্ট সমাজকৰ্মী মুকিবুৰ ৰহমানৰ আতিথ্যত আয়োজিত এই কবিৰ মেলত কবিসকলে স্বদেশ আৰু স্বজাতিক জাগ্ৰত কৰা কবিতা পাঠ কৰি পৰিৱেশ জীপাল কৰি তোলে। কবি, সাহিত্য সংগঠক দুলাল বৰাই নৱকান্ত বৰুৱাৰ “কবিতা মানুহৰ ৰখীয়া হৈ থাকিব” বোলা এই কথাষাৰ দাঙি ধৰি ৰাছিয়া-ইউক্ৰেইনৰ যুদ্ধৰ বিৰোধিতাৰে স্বৰচিত কবিতা পাঠ কৰি ৰাছিয়া চৰকাৰৰ ৰোষত পৰা ৰাছিয়াৰ যুৱ কবি অৰ্তময় কৰমদিনে যুদ্ধবিৰোধী কবিতা পাঠ কৰাৰ অপৰাধত আদালতে সাত বছৰৰ কাৰাদণ্ডৰ বিধান দিয়া বাতৰিটোত বিশ্বৰ সচেতন মহলক আঘাত দিয়াৰ লগতে পুৰণিগুদাম কবি সন্মিলনকো আঘাত দিছে বুলি মন্তব্য কৰে।

চামগুৰি মহাবিদ্যালয়ৰ অধ্যাপক হিৰণ্য কুমাৰ শৰ্মাই আঁত ধৰা কবিৰ মেলত পুৰণিগুদাম কবি সন্মিলনৰ সভাপতি নবীন কলিতা, কাৰ্যকৰী সভাপতি প্ৰফুল্ল বৰা, সম্পাদক হেমন্ত কুমাৰ বৰা, কুমাৰ বিভূতি, বসন্ত কৌশিক ভাগৱতী, দ্বীপজ্যোতি বৰা, প্ৰদীপ কুমাৰ শইকীয়া, বিপুল মজিন্দাৰ, দ্বিজেন্দ্ৰ মোহন শইকীয়া, শেৱালী বৰা, বিনু হাজৰিকা, হাৰুনাৰ ৰচিদ, লক্ষেশ্বৰ শৰ্মা, নিজৰা বৰা, মোচ্চাছিক হুছেইন, বিচিত্ৰ নাৰায়ণ বৰা, আবু মনচুৰল হক, জগত চন্দ্ৰ বৈৰাগী, অসীম বৰা, খগেন গায়ন, অমিয়া বৰা, কবিতা দাস, জয়ন্তী বৰা, কাবেৰী মহন্ত, অনু কোঁৱৰ, কবীন পাটৰ, নাৰায়ণ দাসকে ধৰি প্ৰায় অৰ্ধ শতাধিক কবিয়ে অংশগ্ৰহণ কৰে।

অনুষ্ঠানত কবি, গায়িকা হেলেন পণ্ডিত, প্ৰফুল্ল বৰাই গীত পৰিৱেশন কৰি সকলোকে মোহিত কৰে। উল্লেখযোগ্য যে, এই কবিমেলতে বিশিষ্ট কবি লেখক লক্ষেশ্বৰ শৰ্মাৰ “অস্তিত্বৰ সময় – ২” শীৰ্ষক এখনি কাব্যগ্ৰন্থ উন্মোচিত হৈ যায়। উক্ত গ্ৰন্থখনি ড° ইন্দ্ৰজিৎ বেজবৰুৱাই উন্মোচন কৰে।

“আপোনাৰ বাবে আপোনাৰ পৰিয়াল, প্ৰিয়জনে অপেক্ষা কৰি থাকে”, “মটৰ চাইকেল চলাওঁতে হেলমেট পৰিধান কৰক”, “মূৰ থকা সকলেহে হেলমেট পিন্ধে” আদি শ্ল’গানেৰে যোৱা ৯ ফেব্ৰুৱাৰীত মেৰাপানী নগৰত এনেদৰেই হেলমেট পৰিধান নকৰাকৈ বিপজ্জনকভাৱে বাইক চলাই নিজৰ লগতে পৰিয়ালটোলৈ বিপদ মাতি অনা বাইক আৰোহী সকলক সজাগ কৰি দুৰ্ঘটনা ৰোধৰ এক উল্লেখনীয় পদক্ষেপ গ্ৰহণ কৰে মেৰাপানী ফাউণ্ডেশ্যন আৰু সামাজিক উন্নয়ন ফ’ৰামে।

স্বেচ্ছাসেৱী সংগঠন দুটাই পথ দুৰ্ঘটনা ৰোধৰ উদ্দেশ্যৰে মেৰাপানীৰ বিভিন্ন ৰাজহুৱা স্থানত সজাগতা সূচক বেনাৰ, হৰ্ডিং অঁৰাৰ ব্যৱস্থা কৰাৰ লগতে কেইবাটাও ৰাজহুৱা স্থানত পথ সজাগতা সভা অনুষ্ঠিত কৰে। উক্ত সজাগতা অনুষ্ঠানটোত বহুসংখ্যক স্থানীয় ব্যক্তি, বাইক আৰোহী, মেৰাপানী থানাৰ আৰক্ষীৰ লগতে সামাজিক উন্নয়ন ফ’ৰামৰ সাধাৰণ সম্পাদক ধ্ৰুৱজ্যোতি বৰা, অধিবক্তা যোগেশ ভূঞা, মেৰাপানী সাংবাদিক সংস্থাৰ সম্পাদক তথা মেৰাপানী ফাউণ্ডেশ্যনৰ সচিব হিৰণ্য গগৈৰ লগতে ফাউণ্ডেশ্যনৰ কৰ্মকতা আৰু সাংবাদিকসকল উপস্থিত থাকে।

ধ্ৰুৱজ্যোতি বৰাই সজাগতা সভা সমূহত ব্যক্তব্য ৰাখি ৰাইজক সজাগ কৰাৰ লগতে অধিবক্তা যোগেশ ভূঞাই যান বাহন আইনৰ সম্পৰ্কত কেতবোৰ নীতি নিয়মৰ বিষয়ে জনসাধাৰণক অৱগত কৰে।

থাৰ্ড থিয়েটাৰৰ উদ্যোগত ভাৰত চৰকাৰৰ সাংস্কৃতিক মন্ত্ৰালয়ৰ সৌজন্যত আৰু গুৱাহাটী কমাৰ্চ কলেজৰ ছাত্ৰ একতা সভাৰ সহযোগত ৯ আৰু ১০ ফেব্ৰুৱাৰীত প্ৰথম ৰাষ্ট্ৰীয় মূকাভিনয় মহোৎসৱৰ প্ৰথম দিনাৰ কাৰ্যসূচী, অসমৰ বিশিষ্ট অভিনেত্ৰী চেতনা দাস, ৰাষ্ট্ৰীয় খ্যাতি সম্পন্ন মলয়া গোস্বামী, সংগীত নাটক অকাডেমী বঁটা প্ৰাপক ৰঞ্জু মনি শইকীয়া, অনিতা শৰ্মা, সাহিত্য অকাডেমি বঁটা প্ৰাপক জয়ন্ত মাধৱ বৰা, বিশিষ্ট সাংস্কৃতিক কৰ্মী গোপাল জালান, জ্যেষ্ঠ সাংবাদিক মন্টু শইকীয়াকে ধৰি বহু গণ্য মান্য ব্যক্তিৰ উপস্থিতিত বন্তি প্ৰজ্বলনৰে এটি মাংগলিক বন্দনাৰে আৰম্ভ হয়।

উক্ত ৰাষ্ট্ৰীয় মহোৎসৱটিত থাৰ্ড থিয়েটাৰৰ কণমানিসকলে মূকাভিনয়ৰ ব্যতিক্ৰমী শৈলীৰে “ৰসৰাজ লক্ষ্মীনাথ বেজবৰুৱা”দেৱৰ “বুঢ়ী আইৰ সাধুৰ” পৰা দুটি জনপ্ৰিয় সাধু , পশ্চিম বংগৰ দুবাৰকৈ ৰাষ্ট্ৰীয় সন্মানেৰে সন্মানিত মূকাভিনয় শিল্পী কল্পতৰু গুহৰ “Cricket Highlights”, মহোৎসৱ পৰিচালক বিজিত কুমাৰ দাসৰ হাস্য মধুৰ মূকাভিনয়ৰ লগতে ভগৱান শ্ৰীৰাম চন্দ্ৰৰ কাহিনীৰ ওপৰত আধাৰিত এখনি ব্যতিক্ৰমী শৈলীৰ অসমীয়া সংস্কৃতিৰ ভাওনা, সত্ৰীয়া নৃত্য, সমৰ কলা ইত্যাদিৰ পৰীক্ষামূলক ব্যৱহাৰেৰে থাৰ্ড থিয়েটাৰৰ যুৱচামে পৰিৱেশন কৰা “অনন্তগুণ শ্ৰী ৰামচন্দ্ৰ” শীৰ্ষক মূকাভিনয়ৰে গুৱাহাটী কমাৰ্চ কলেজৰ প্ৰেক্ষাগৃহত উপস্থিত থকা প্ৰতি গৰাকী দৰ্শকক মন্ত্ৰমুগ্ধ কৰি তোলে।

এটি কৃষ্ণ বন্দনাৰে আৰম্ভ হোৱা ৰাষ্ট্ৰীয় মূকাভিনয় মহোৎসৱৰ দ্বিতীয় দিনাৰ কাৰ্যসূচী থাৰ্ড থিয়েটাৰৰ কিশোৰ চামে অতি মনোমোহাকৈ “ঊষা – অনিৰুদ্ধ”, ক্লাউন এক্টৰ বাবে পৰিচিত মূকাভিনয় শিল্পী প্ৰণৱ জ্যোতি হিৰু, দেৱজিৎ ডেকা, মৃণাংক ডেকা আৰু জাগীৰোড মহাবিদ্যালয়ৰ অভিনয় বিভাগৰ উৎকৃষ্ট মানদণ্ডৰ মূকাভিনয় প্ৰদৰ্শনেৰে মহোৎসৱৰ সফল সামৰণি পৰে।

থাৰ্ড থিয়েটাৰ ৰ এই প্ৰয়াসত প্ৰায় ৮০ জন ছাত্ৰ ছাত্ৰীৰ ব্যক্তিক্রমী শৈলীৰ সুন্দৰ মূকাভিনয়ে ভৱিষ্যতে অসমৰ বহু ছাত্ৰ ছাত্ৰী এই মূকাভিনয় কলাৰ প্ৰতি আগ্ৰহী কৰিব বুলি আমাৰ দৃঢ় বিশ্বাস।