অসম বিধানসভাৰ প্ৰাক্তন উপাধক্ষ্য, অধিবক্তা, সাহিত্যিক, তেজপুৰ সাহিত্য সভাৰ প্ৰাক্তন সম্পাদক নবীন চন্দ্ৰ কাথ হাজৰিকাৰ বৰ্ণিল জীৱন পৰিক্ৰমা সংপৃক্ত” Nabin Chandra Kath hazarika – A Complete man ” শীৰ্ষক এখনি তথ্য চিত্ৰৰ শুভ মহুৰত কালি সম্পন্ন হয়। তেজপুৰ সাহিত্য সভাৰ তিনিটা কাৰ্যকালৰ প্ৰাক্তন সম্পাদক, জ্যেষ্ঠ সাংবাদিক পংকজ বৰুৱাই চিত্ৰনাট্য প্ৰস্তুত কৰা তথ্য চিত্ৰ নাট্য খনৰ কেমেৰা অন কৰে বিশিষ্ট অভিনেতা অৰুণ নাথ আৰু বিশিষ্ট শিল্পী কৃষ্ণা দাস নাথে।

অনুষ্ঠানৰ আৰম্ভণিতে আন্তৰ্জাতিক খ্যাতি সম্পন্ন আলোক চিত্ৰ শিল্পী নলিনী বৰৱা , বিশিষ্ট সাহিত্যিক, অধিবক্তা বিপিন কটকী , শিল্পী অপৰূপ আগৰৱালাই বন্তি প্ৰজ্জলনেৰে আৰম্ভ কৰা অনুষ্ঠানত দৰং মহাবিদ্যালয়ৰ প্ৰাক্তন অধ্যক্ষ ডo অবনী কুমাৰ শৰ্মা , ডo জয়শঙ্কৰ হাজৰিকা , উপাধ্যক্ষ ডo গহন চন্দ্ৰ মহন্ত , জ্যেষ্ঠ অধিবক্তা ইস্কে আলম , যামিনি কুমাৰ বৈশ্য,প্ৰবীণ কন্ঠশিল্পী অজিৎ দাস,তেজপুৰ পৌৰসভাৰ পৌৰপতি প্ৰজ্ঞানু ভট্টাচাৰ্য্য, সাংবাদিক তৰুণ দাস , লেখিকা ৰাণু হাজৰিকা , প্ৰবীণ অভিনেত্ৰী তথা কন্ঠশিল্পী কল্পনা কলিতাকে ধৰি হাজৰিকা দেৱৰ গুণমুগ্ধ সকল উপস্থিত থাকে।

সভাত নবীন চন্দ্ৰ কাথ হাজৰিকা দেৱৰ বৰ্নিল জীৱন পৰিক্ৰমা সম্পৰ্কে বক্তা সকলে বক্তব্য আগবঢ়াই। উল্লেখ্য যে, প্ৰয়াত হাজৰিকা দেৱ এগৰাকী সফল ৰাজনীতি বিদ হিচাপে অসম বিধান সভালৈ আগবঢ়োৱা অবদান ,আকাশ বাণীৰ এগৰাকী সফল গীতিকাৰ , সাহিত্যিক, তথা এগৰাকী সফল আইনজ্ঞ হোৱাৰ লগতে তেজপুৰ সাহিত্য সভালৈ তেওঁৰ অবদান সম্পৰ্কত বক্তা সকলে আলোকপাত কৰি হবলগীয়া তথ্যচিত্ৰৰ প্ৰস্তুতি সম্পৰ্কে আন্তৰিক শলাগ জ্ঞাপন কৰে ।নৃত্য শিল্পী ৰুবী বৰা বৰদলৈয়ে কাথ হাজৰিকা ৰচিত এটি গীত পৰিবেশন কৰে ।উল্লেখ্য যে নবীন চন্দ্ৰ কাথ হাজৰিকাৰ পুত্ৰ, গুৱাহাটী উচ্চ ন্যায়ালয়ৰ অধিবক্তা দুলাল চন্দ্ৰ কাথ হাজৰিকাৰ তৎপৰতাত তেজপুৰৰ নেহৰু ময়দানৰ সন্মুখৰ বহু ইতিহাস বিজড়িত হৈ থকা বাসগৃহতে অনুষ্ঠিত বিশেষ অনুষ্ঠানৰ শুভ মূহুতৰ্তে অধিবক্তা দুলাল চন্দ্ৰ কাথ হাজৰিকাৰ পুত্ৰ অধিবক্তা নীলম কাথ হাজৰিকা আৰু জাহ্নৱী বেজবৰুৱাৰ আঙঠি পিন্ধোৱা পৰ্বও মাংগলিক ভাৱে সম্পন্ন হয় । উল্লেখ্য যে তেজপুৰৰ প্ৰবীণ কন্ঠশিল্পী শিল্পী কল্পনা কলিতাই গীত পৰিবেশন কৰাৰ লগতে বিশিষ্ট লেখিকা ৰাণু হাজৰিকাই বিয়ানাম পৰিবেশন কৰা সমগ্ৰ অনুষ্ঠানটিৰ আঁত ধৰে শোণিতপুৰ জিলা সাহিত্য সভাৰ প্ৰাক্তন সম্পাদক, কবি মৃদুল কুমাৰ চহৰীয়াই । সভাৰ শেষত শলাগ জ্ঞাপন কৰে পুত্ৰ দুলাল চন্দ্ৰ কাথ হাজৰিকাই।

বিশিষ্ট লোকসংস্কৃতিবিদ, গুৱাহাটী বিশ্ববিদ্যালয়ৰ শ্ৰেণী সমুহৰ অৱসৰপ্ৰাপ্ত সচিব, প্রয়াত ড° প্রবীণ চন্দ্র দাসৰ জন্মদিনটো আজি অসম জনকৃষ্টি সমাজৰ উদ্যোগত আৰু গুৱাহাটীৰ পশ্চিম প্ৰান্তৰ আজাৰাস্থিত গিৰিজানন্দ চৌধুৰী বিশ্ববিদ্যালয়ৰ সহযোগত বিশ্ববিদ্যালয়খনৰ মূল শৈক্ষিক ভৱনৰ সভাগৃহত পালন কৰা হয়। জন্মদিনৰ লগত সংগতি ৰাখি এক স্মাৰক বক্তৃতানুষ্ঠানৰো আয়োজন কৰা হয়। এই উপলক্ষে অসম জনকৃষ্টি সমাজৰ সভাপতি ডঃ মুণাল কুমাৰ বৰাৰ আদৰণি ভাষণৰে শুভাৰম্ভ হোৱা অনুষ্ঠানটোত মূল বক্তৃতা প্রদান কৰে বিশিষ্ট সাংবাদিক গৌতম শর্মাই। ভাষণ প্রসংগত গৌতম শর্মাই বিশিষ্ট লোকসংস্কৃতিবিদ ডঃ প্রবীণ চন্দ্র দাসৰ সৈতে লাভ কৰা সান্নিধ্য, লোকসংস্কৃতি আৰু সংগীতৰ ক্ষেত্ৰখনত লাভ কৰা অভিজ্ঞতা আদিৰ আলোকপাত কৰে। আনহাতে অনুষ্ঠানত মুখ্য অতিথি হিচাপে অংশগ্ৰহণ কৰি গিৰিজানন্দ চৌধুৰী বিশ্ববিদ্যালয়ৰ উপাচার্য ডঃ কন্দর্প দাসে প্রয়াত লোক সংস্কৃতিবিদ ডঃ প্রবীণ চন্দ্র দাসৰ সোঁৱৰণত এনে ধৰণৰ অনুষ্ঠান বিশ্ববিদ্যালয়ত অনুষ্ঠিত কৰা বাবে অসম জনকৃষ্টি সমাজৰ শলাগ লয়। অনুষ্ঠানত বিশিষ্ট কণ্ঠশিল্পী ডঃ অণিমা চৌধুৰীয়ে চমু ভাষণ দিয়াৰ লগতে লোকগীত পৰিৱেশন কৰে। তেনেদৰে গৱেষক আৰু বিশ্ববিদ্যালয়খনৰ অতিথি অধ্যাপক হীৰকজ্যোতি শর্মাই অনুষ্ঠানত লোক সংগীতৰ ঐতিহ্য আৰু বিবর্তন শীর্ষ এক অনুষ্ঠান প্রদর্শন কৰে।

অনুষ্ঠানত আবিলেকৰ সঞ্চালক ডঃ দিলীপ কলিতা, গুৱাহাটী বিশ্ববিদ্যালয়ৰ লোকসংস্কৃতি গৱেষণা বিভাগৰ অধ্যাপকদ্বয় ডঃ অনিল চন্দ্র বড়ো আৰু ডঃ কিশোৰ ভট্টাচাৰ্য, অসমীয়া বিভাগৰ জ্যেষ্ঠ অধ্যাপক ড’ উপেন ৰাভা হাকাছাম , অসম জনকৃষ্টি সমাজৰ কেবাজনো কর্মকর্তা , ডঃ মণিৰূপা মিশ্ৰকে ধৰি বিশ্ববিদ্যালয়খনৰ কেবাজনো শিক্ষক আৰু বহু সংখ্যক ছাত্ৰ – ছাত্ৰী উপস্থিত থাকে। শেষত শলাগৰ শৰাই আগবঢ়াব অসম জনকৃষ্টি সমাজৰ সাধাৰণ সম্পাদক ডঃ কৰুণাকান্ত কাকতিয়ে। উল্লেখ্য যে পূৰ্বতে ডঃ প্ৰবীণ চন্দ্ৰ দাসৰ ১৬ ফেব্ৰুৱাৰীৰ জন্মদিনটো তেওঁৰ গুণমুগ্ধ সকলে সেউজ মনৰ দিন হিচাপে পালন কৰি আহিছিল। ২০২২ চনৰ ছেপ্তেম্বৰ মাহত তেওঁৰ মৃত্যু হৈছিল।