ভূমি সংক্ৰান্তীয় বিষয়ত ৰাজহ চক্ৰৰ কাৰ্যালয়ত মণ্ডল সকলে যাতে কোনো কন্দল নলগায় তাৰ বাবে মণ্ডলসকলক সকিয়াই দিয়ে অসম চৰকাৰৰ ৰাজহ তথা দুৰ্যোগ ব্যৱস্থাপনা বিভাগৰ মন্ত্ৰী যোগেন মহনে।

সোমবাৰে জামুগুৰিহাটত শোণিতপুৰ জিলাৰ ভিতৰতে অসম চৰকাৰৰ পৃষ্ঠপোষকতাত ইংৰাজী মাধ্যমৰ চি বি এছ চি পাঠ্যক্ৰমৰ প্ৰথমখন আদৰ্শ বিদ্যালয়ৰ শুভ উদ্বোধন কৰিবলৈ আহি নিজৰ ভাষণত এইদৰে ৰাজহ চক্ৰ কাৰ্যালয়ৰ মণ্ডল সকলক সকিয়াই দিয়ে ৰাজহ মন্ত্ৰী গৰাকীয়ে।

ভূমি সংক্ৰান্তীয় সকলো বিবাদ মীমাংসা বাবে বসুন্ধৰা-২ৰ জৰিয়তে সকলো কাম চলি থকাৰ সময়তে দুই এটকা পইচাৰ কাৰণে মণ্ডলসকলে মাজে সময়ে হাত দাঙি থাকিব লগা হোৱাটো অতিকৈ লজ্জাজনক বুলি অভিহিত কৰি মন্ত্ৰী যোগেন মহনে দুৰ্নীতি ৰোধ কৰাৰ বাবেই অহা দুটামাহৰ ভিতৰত ই-দলিলৰ ব্যৱস্থা কৰা হ’ব বুলিও মন্তব্য কৰে।

উল্লেখ্য যে আদৰ্শ বিদ্যালয়ৰ শুভ উদ্বোধনী অনুষ্ঠানত তেজপুৰৰ সাংসদ পল্লব লোচন দাস,চতিয়াৰ বিধায়ক পদ্ম হাজৰিকাৰ লগতে শোণিতপুৰ জিলাৰ উপায়ুক্ত দেৱ কুমাৰ মিশ্ৰও উপস্থিত আছিল।
-জোন বৰা, জামুগুৰিহাট

সোমবাৰে মাজুলী অভিমুখে গৈ থকা অসমৰ ব্ৰহ্মপুত্ৰ নদীৰ মাজমজিয়াত এম ভি লোহিত নামৰ এখন ফেৰী নিৰুদ্দেশ হয়।

সূত্ৰ অনুসৰি যোৰহাটৰ নিমাতী ঘাটৰ পৰা মাজুলীৰ কমলাবাৰী অভিমুখে গৈ আছিল ফেৰীখন।

খবৰ অনুসৰি, ১৩৪ জন যাত্ৰী আৰু ৩২ খন বাইক কঢ়িয়াই নিমাটি ঘাটৰ পৰা ১.৩০ বজাত ফেৰীখন ৰাওনা হয় যদিও ঘন কুঁৱলীৰ মাজতে ফেৰীখন অদৃশ্য হোৱাৰ সন্দেহ কৰা হৈছে।

সময়ৰ লগে লগে ফেৰীখনত থকা লোকসকলৰ সুৰক্ষাৰ চিন্তা বাঢ়িছে। দ্ৰুত সঁহাৰি জনাই ৰাজ্যিক দুৰ্যোগ সঁহাৰি বাহিনীয়ে কমলাবাৰীৰ পৰা যাত্ৰা আৰম্ভ কৰি অনুসন্ধান আৰু উদ্ধাৰ অভিযান আৰম্ভ কৰিছে।

নিৰুদ্দেশ হোৱা ফেৰীখন আৰু ইয়াৰ যাত্ৰীসকলক বিচাৰি উলিওৱাৰ প্ৰচেষ্টা অব্যাহত আছে, কিয়নো কৰ্তৃপক্ষই তেওঁলোকৰ উদ্ধাৰ অভিযান তীব্ৰতৰ কৰি তুলিছে।