ঐতিহ্যমণ্ডিত বৰপেটা সত্ৰত যোৱা ছয় মাৰ্চৰ পৰা আৰম্ভ হোৱা চাৰিদিনীয়া দৌল মহোৎসৱৰ আজি দ্বিতীয় ভৰদৌল পালন কৰা হয়৷

নক্ষত্ৰ গণনাৰ ভিত্তিত কালি দুপৰীয়াৰ পৰা আৰম্ভ হোৱা গোঁসাইৰ গাত ফাকু দি আশীষ লোৱা পৰ্ব আজিও অব্যাহত আছে। আজিও পুৱাৰ পৰা বৰপেটা সত্ৰত অজস্ৰ লোকৰ সমাগম হয়।

ইয়াকে লৈ কেৱল সত্ৰ চৌহদেই নহয়, সমগ্ৰ বৰপেটাত বিৰাজ কৰিছে উখল মাখল পৰিৱেশ।

বৰপেটা সত্ৰৰ ডেকা সত্ৰীয়া গৌতম পাঠকে জনায় যে কাইলৈ পুৱতি নিশা ৪.২০ বজাত ভৰদৌলৰ ক্ষণ শেষ হব। তাৰ লগে লগে কলীয়া গোসাই মহাপ্ৰভূক দৌলগৃহৰ পৰা নমাই অনা হব।

তাৰ পাছত আৰম্ভ হব ফাকুৱা পালনৰ ক্ষণ। উল্লেখযোগ্য যে কাইলৈ বৰপেটা সত্ৰত ফাকুৱা উৎসৱ পালন কৰা হ’ব। ফাকুৱা তথা হোলী পালনৰ মাজতে কাইলৈ বিয়লি গোঁসাইক বৰপেটা সত্ৰৰ পৰা গণকুছিৰ কলবাৰী সত্ৰলৈ হেকতা খুৱাবলৈ নিয়া হ’ব।

কলবাৰী সত্ৰৰ পৰা পুনৰ গোঁসাইক বৰপেটা সত্ৰলৈ ঘুৰাই অনাৰ পাছত সত্ৰৰ দালানত বাহ ভঙা পৰ্ব অনুষ্ঠিত হব। গোঁসাইৰ ভক্তসকলে বাহ ভঙাৰ পাছত পুনৰ গোঁসাইক সত্ৰৰ মূল উপাসনা স্থানত অধিস্থিত কৰা হ’ব।

কিন্তু বৰপেটাৰ হোলীৰ এক অন্যতম আকৰ্ষণৰ কেন্দ্ৰবিন্দু হৈ পৰে ইয়াত উপলব্ধ খাদ্য সম্ভাৰ। হোলীৰ সময়ত বৰপেটা সত্ৰৰ সমীপত অস্থায়ীভাৱে স্থাপন কৰা দোকানসমূহত পোৱা যায় বিভিন্নধৰণৰ সুস্বাদু খাদ্য। সোৱাদতকৈও এই খাদ্য সামগ্ৰীসমূহৰ নামে মানুহক অধিক আকৰ্ষণ কৰে৷

প্ৰতি বছৰৰ দৰে এইবাৰো বৰপেটাত দেখা গ’ল তেনে দৃশ্য। ৰঙা ডিমা–আলু ভাজিৰ উপৰি এইবাৰ বৰপেটাৰ হোলীত মানুহৰ দৃষ্টি আকৰ্ষণ কৰিছে পে পে পে আলু, পতলী কমৰীয়া আলু আৰু ভাল পাই পেলালো অ’ আলুৱে। লগতে আছে জানমণি ডিমা।

নাজিৰাত হোলীৰ নামত অসভ্যালি।



যান-জঁট নিয়ন্ত্ৰণ কৰিবলৈ অহা কৰ্তব্যৰত যানবাহন আৰক্ষীক প্ৰহাৰ একাংশ উদণ্ড যুৱকৰ।

মহিলা আৰক্ষী যোৱানৰ গাতো হাত তুলিলে একাংশ উদণ্ড যুৱকে।

হোলীৰ নামত একাংশ যুৱকে সুৰাপান কৰি মাতাল হৈ নাজিৰা নগৰত সৃষ্টি কৰিলে উদ্ভণ্ডালিৰ।

এই উদ্ভণ্ডালিয়ে পালেগৈ চৰম সীমা।কৰ্তব্যৰত আৰক্ষীক সুৰাৰ ৰাগিত মাতাল হৈ কৰিলে প্ৰহাৰ।

নাজিৰা নগৰৰ ব্যস্ততাপূৰ্ণ যি পথ সেই পথচোৱাত হোলী উদযাপন কৰিবলৈ নাজিৰা প্ৰশাসনে কিদৰে অনুমতি দিয়ে সিও এক আশ্চৰ্য্যৰ বিষয়।

নাজিৰা মহকুমা প্ৰশাসনে নাজিৰা নগৰৰ পথৰ মাজ মজিয়াত এইদৰে হোলী উদ্‌যাপন কৰিবলৈ অনুমতি দিয়াৰ পিছত অধিক যান-জঁট সৃষ্টি হোৱাত যান-জঁট ভাঙিবলৈ যোৱাত এইদৰে আৰক্ষীক প্ৰহাৰ কৰে একাংশ উদণ্ডযুৱকে।

ইয়াৰ উপৰিও আৰক্ষীৰ বাহনো কিছু ক্ষতি হোৱা পৰিলক্ষিত হয়।

শ্বিলঙৰ ধানখেতিষ্ঠিত এক বিশেষ অনুষ্ঠানত আজি ৰিণিকি চক্ৰৱৰ্তী মাৰ্ৱেইনৰ প্ৰথমখন কবিতাৰ পুথি ‘ব্ৰিটল’ উন্মোচন কৰে উত্তৰ পূৰ্বাঞ্চলৰ প্ৰসিদ্ধ সংগীতজ্ঞ লু মাজাউয়ে।

অনুষ্ঠানত খ্যাতি স্থানীয় সাংবাদিক পেত্ৰিচিয়া মুখাম আৰু শিল্পী উৎপল বৰপূজাৰীৰ লগতে ভালেসংখ্যক গণ মান্য ব্যক্তি উপস্থিত থাকে। মাজাউয়ে ব্ৰিটলৰ কিছুসংখ্যক কবিতা পাঠ কৰাৰ লগতে উপস্থিত গ্ৰন্থ অনুৰাগী ৰাইজক সংগীতেৰে মোহাছন্ন কৰি তোলে।

কবিতা পুথিখন উন্মোচন কৰি মাজাউৱে মন্তব্য কৰে – “ৰিণিকিৰ কবিতাৰ সৈতে জীৱনৰ বৰ্ণিল শংকা আৰু শীতল ঘাঁবোৰত চকু ফুৰোৱা এই সন্ধ্যাটোক মই মন্ত্ৰমুগ্ধ সন্ধ্যা আখ্যা দিম।”

প্ৰসঙ্গত অনুষ্ঠানত উপস্থিত ব্যক্তিসকলৰ মাজৰ বহু সংখ্যক গণ্য মান্য ব্যক্তিয়ে কবিতা আৰু গ্ৰন্থ অধ্যয়নৰ ক্ষেত্ৰত মানুহৰ আকৰ্ষণ হ্ৰাস পোৱাৰ সময়তে গ্ৰন্থ উন্মোচন আৰু সংগীতৰ যুগলবন্দী ৰিণিকি আৰু লউ মাজাউৰ উপস্থিতিয়ে অনাবিল আনন্দ দিছে বুলি মন্তব্য প্ৰদান কৰে। উল্লেখ্য যে ব্ৰিটল কবিতাৰ সংকলন যদিও ই লেখিকাৰ উদ্বেগ, আবেগ আৰু সংগ্ৰামৰ মিশ্ৰিত বাস্তৱ কাহিনী। তেওঁৰ মনৰ জগতখনত শক্তিশালী ভাৱে অগাদেৱা কৰা শৈশৱ-কৈশোৰৰ স্মৃতিবোৰ লক ডাউনৰ গৃহবন্দী সময়বোৰত মূৰ দাঙি উঠিছিল।

সেই ভয়াবহ আৰু ভাললগা অনুভূতিবোৰ কবিতাত প্ৰকাশ কৰোতে বাৰে বাৰে কবি শংকিত হৈ উঠিছে আপোনজনৰ কথা ভাবি। তেওঁ যেন শেষবাৰৰ বাবে মনৰ ভিতৰতে আপোন ঘৰখন আপোন মানুহবোৰক সাক্ষাৎ কৰি আহিছে!

কবিতা পুথি খন উন্মোচন কৰি ৰিণিকিয়ে কয় “গৃহবন্দীৰ সময়বোৰত মই কিছু পৰিমাণে সুখ আৰু দুখৰ মিশ্ৰিত এক অনুভৱৰ মাজত ৰৈ গৈছিলো। মোৰ শৈশৱৰ লগতে ভাৰতত অতিবাহিত কৰা অন্যান্য সময়ৰ স্মৃতিবোৰ বাবে বাৰে মনলৈ আহিছিল। সকলোৰে দৰে মইও গৃহবন্দী হৈ পৰাত স্বাভাৱিকতেই আপোন মানুহবোৰৰ বাবে খুবেই শংকিত হৈ পৰিছিলো। সেই ভয়ক অতিক্ৰম কৰিবলৈ মই হাতত কলম তুলি লৈছিলো। কিতাপখন লিখিবলৈ আৰম্ভ কৰিলো আৰু আজি অবিশ্বাস্য যেন লাগিলেও এইখন প্ৰকাশ হৈ ওলাল।” স্মৰ্তব্য যে ব্ৰিটল ৰিণিকিৰ প্ৰথম প্ৰকাশিত কবিতাৰ সংকলন।

ইয়াত তেওঁৰ পৰিয়াল আৰু শৈশৱ, ভালপোৱা, কিছু হেৰুৱা আবেগ আৰু অজস্ৰ স্মৃতি সংকলিত হৈছে। লকডাউনৰ ফচল গ্ৰন্থখনে এজন ব্যক্তিৰ হতাশা আৰু নিৰাশাৰ মাজত শান্তিৰ সন্ধানৰ ইংগিত দিছে। অতি সহজ আৰু বোধগম্য ভাষাত ৰচিত হ’লেও ইয়াত জীৱন সন্ধানৰ বৈচিত্ৰময় দৰ্শন আছে। কিতাপখন প্ৰেম আৰু আৱেগৰ এক মিশ্ৰিত প্ৰকাশ।

ৰিণিকি চক্ৰৱৰ্তী মাৰ্ৱেইনৰ জন্ম শ্বিলঙত আৰু অধিকাংশ শিক্ষা গ্ৰহণ শ্বিলঙতে কৰিছিল। অন্যহাতে তেওঁৰ পিতৃ অভিনেতা বাদল চক্ৰৱৰ্তী গুৱাহাটীৰ উজান বজাৰৰ বাসিন্দা। সেই হিচাপে ৰিনিকিৰ গুৱাহাটীৰ প্ৰতি এক বিশেষ টান আছে। ২০০৮ চনত চিংগাপুৰলৈ যোৱাৰ পূৰ্বে তেওঁ মুম্বাইত জন সংযোগৰ ক্ষেত্ৰখনত সম্পূৰ্ণৰূপে জড়িত হৈ আছিল।

গণ সংযোগ আৰু সাংবাদিকতাত স্নাতকোত্তৰ পাঠ গ্ৰহণ কৰা ৰিণিকিয়ে ক’ভিড১৯ ৰ ভয়াবহ সময়ছোৱাৰ পৰা গুৰুত্ব সহকাৰে কাব্য চৰ্চা কৰিবলৈ লয়। এই বৰ্ষত তেওঁ সংকলিত কাব্যগ্ৰন্থখন প্ৰকাশ কৰিবলৈ সক্ষম হ’ল।

দক্ষিণ শালমাৰা মানকাচৰ জিলাৰ ঝগৰাৰচৰ গাঁও পঞ্চায়তৰ ভাটি ঝগৰাৰচৰ গাঁৱৰ ইছৰাফিল হকৰ ঘৰত শেষ নিশা এক ভয়ংকৰ অগ্নিকাণ্ড সংঘটিত হয়।

নিশা আনুমানিক ৩-৩০ মান বজাত পৰিয়ালৰ লোকে জুইৰ উমান পায় আৰু কোনোমতেহে প্ৰাণ ৰক্ষা পৰে। গাঁৱৰ ৰাইজে ততাতৈয়াকৈ দৌৰি আহে যদিও নিমিষতে সকলো ভস্মিভূত হয়।

অৱশেষত স্থানীয় ৰাইজে জুই নুমুৱাবলৈ সক্ষম হয় যদিও নগদ ধনৰ উপৰিও সকলো যাৱতীয় নথি- পত্ৰ ভস্মিভূত হৈ পৰাত পৰিয়ালটোৱে হতাশাগ্ৰস্ত হোৱা পৰিলক্ষিত হৈছে।

এনে পৰিস্থিতিত স্থানীয় পঞ্চায়ত প্ৰতিনিধিয়ে পৰিয়ালটোক সামুহিক সকাহ দিয়াৰ চেষ্টা কৰিছে। দুৰ্ভগীয়া পৰিয়ালটোয়ে চৰকাৰৰ সহায় কামনা কৰিছে৷