লিঅ’নেল মেছিক (Lionel Messi) বিশ্বৰ শ্ৰেষ্ঠ ফুটবলাৰ আখ্যা দিলে ক্ৰিষ্টিয়ানো ৰোণাল্ডোৱে (Cristiano Ronaldo)৷ বিশ্কাপৰ আগমুহূৰ্তত মেছি সম্পৰ্কত ৰোণাল্ডোৱে কৰা এই মন্তব্যই ব্যাপক চৰ্চা লাভ কৰিছে৷
‘‘মেছি এগৰাকী সাংঘাটিক ফুটবলাৰ৷ তেওঁ যাদু জানে৷ ১৬ বছৰ ধৰি আমি বিশ্ব ফুটবলৰ মঞ্চত আছো৷ তেওঁৰ লগত মোৰ ভাল সম্পৰ্ক৷’’- বৃহস্পতিবাৰে এটা সাক্ষাৎকাৰত ৰোণাল্ডোৱে কয়৷
উল্লেখ্য যে মেছি আৰু ৰোণাল্ডো- দুয়োৰে কেৰিয়াৰৰ আৰম্ভণিৰে পৰা ইজনে সিজনৰ প্ৰতিদ্বন্দি হিচাপে অৱতীৰ্ণ হৈ আহিছে৷ বিশেষকৈ লা লীগাত দুয়োৰে তীব্ৰ প্ৰতিদ্বন্দিতা চলিছিল৷ ফুটবলপ্ৰেমীসকলো মেছি আৰু ৰোণাল্ডোক লৈ দুভাগত বিভক্ত হৈ পৰিছিল৷ ৰোণাল্ডো শ্ৰেষ্ঠ নে মেছি শ্ৰেষ্ঠ- সেই লৈ অনুৰাগীসকলৰ বিতৰ্কৰ অন্ত নাই৷
বৃহস্পতিবাৰৰ সাক্ষাৎকাৰটোত এই সম্পৰ্কেও ৰোণাল্ডোৱে মন্তব্য কৰে৷ ৰোণাল্ডোৱে কয় যে তেওঁ নিজকে যদি বাদ দিয়ে, তেন্তে ভাৱ হয় মেছিয়ে শ্ৰেষ্ঠ ফুটবলাৰ৷ এইক্ষেত্ৰত জিনেদান জিদানৰো নাম লয় ৰোণাল্ডোৱে৷
‘‘কিন্তু যাৰ যাৰ লগত মই খেলিছো অথবা যুঁজ দিছো, তাৰ মাজত মেছিয়ে শ্ৰেষ্ঠ৷ মেছিৰ সম্পৰ্কে আৰু কি কম? তেওঁ এনে এজন ফুটবলাৰ যি বিশ্বৰ ফুটবলত সাংঘাটিক কীৰ্তি গঢ়িছে৷’’- পৰ্টুগীজ তাৰকাগৰাকীয় কয়৷
আনহাতে, প্ৰতিদন্বন্দী হ’লেও মেছিৰ স’তে ৰোণাল্ডোৰ সম্পৰ্ক কেনেধৰণৰ, সেই লৈও ৰোণাল্ডোৱে মন্তব্য কৰে৷ কয় যে মেছিৰ স’তে তেওঁ অন্তৰংগ বন্ধু নহয় কিন্তু সতীৰ্থৰ দৰে৷
ৰোণাল্ডোৱে কয় যে মেছিক তেওঁ অত্যন্ত শ্ৰদ্ধা কৰে৷ মেছিৰ পত্নীকো তেওঁ শ্ৰদ্ধা কৰে বুলি জনায়৷

কাটাৰৰ ৰাজপৰিয়ালে জাৰি কৰিছে এক নিৰ্দেশ৷ কাটাৰ বিশ্বকাপত নিষিদ্ধ হ’ল মদ বা মদজাতীয় পানীয়৷বিশ্বকাপ আৰম্ভৰ ৪৮ ঘণ্টাৰ পূৰ্বে এই লৈ এতিয়া বিপাঙত পৰিছে ফুটবল সংস্থা ফিফা৷
উল্লেখ্য যে বিশ্বকাপৰ অনত্যম স্পনছৰ হৈছে এটা বিয়েৰ প্ৰস্তুতকাৰক সংস্থা৷ বিশ্বৰ বিভিন্ন প্ৰান্তৰৰ পৰা ফুটবলপ্ৰেমীয়ে কাটাৰত উপস্থিত হৈছে৷ কিন্তু দেশখনৰ এই নিয়মৰ স’তে তেওঁলোক পৰিচিত নহয়৷
কিন্তু ৰাজপৰিয়ালৰ নিৰ্দেশ মানি চলিবলৈ বাধ্য হৈছে ফিফা৷ সেয়ে ষ্টেডিয়ামসমূহৰ পৰা বিয়েৰৰ দোকানসমূহ আঁতৰাই দিয়াৰ ব্যৱস্থা কৰা হৈছে৷ 
ৰাজপৰিয়ালৰ নিৰ্দেশে ফিফাক বিপাঙত পেলোৱাৰ অন্যতম কাৰণ হৈছে ষ্টেডিয়ামসমূহত বিয়েৰ বিক্ৰী নহ’লে আৰ্থিক ক্ষতি হ’ব সংস্থাটোৰ৷
কাটাৰৰ ৰজাই এই লৈ বিশেষ একো নক’লেও ৰাজপৰিয়ালৰ তৰফৰ পৰা ষ্টেডিয়ামত বিয়েৰ বিক্ৰীক লৈ তীব্ৰ আপত্তি প্ৰদৰ্শন কৰা হৈছে৷ ফিফাই এই লৈ ৰাজপৰিয়ালৰ স’তে আলোচনাত মিলিত হোৱা বুলিও জানিব পৰা গৈছে৷ কিন্তু নিজৰ দাবীত ৰাজপৰিয়াল অলৰ-অচৰ৷
সাধাৰণতে ইচলামিক দেশ হোৱা বাবে কাটাৰত মদ নিষিদ্ধ৷ ৰাজধানী দোহাৰ কেইখনমান বিলাসী হোটেলত মদ্যপানৰ অনুমতি আছে যদিও সাধাৰণ মানুহৰ বাবে ই সম্ভৱ নহয়৷
দোহাৰ পৰা আঠ কিলোমিটাৰ দূৰত এখন মদৰ দোকান আছে৷ কৰ্মসূত্ৰে কাটাৰত বাস কৰা বিদেশী নাগৰিকসকলৰ হাতত অনুমতি পত্ৰ থাকিলে সেই দোকানত গৈ মদ কিনিব পাৰে৷ কিন্তু ৰাজহুৱাভাৱে মদ্যপান কৰা দেশখনত নিষিদ্ধ৷