চৰকাৰৰ হস্ততাঁত বস্ত্ৰ শিল্প বিভাগ আৰু টীয়ক সমষ্টিৰ জনপ্ৰতিনিধি গৰাকীৰ চৰম দায়িত্বজ্ঞানহীনতাৰ বাবে এতিয়া শ্মশান যাত্ৰাৰ দিশে ধাৱমান হৈছে টীয়কৰ চিন্তামনিগড়ৰ খাটোৱালত থকা বিভাগৰ হস্ততাঁত বস্ত্ৰৰ প্ৰশিক্ষণ কেন্দ্ৰটোৰ । অঞ্চলটোৰ যুৱতীসকলক হস্ততাঁতৰ উপযুক্ত প্ৰশিক্ষণ প্ৰদান কৰিবৰ বাবে ১৯৮৭ চনতে সেইসময়ৰ স্থানীয় বিধায়ক তথা মন্ত্ৰী প্ৰয়াত ললিত চন্দ্ৰ ৰাজখোৱাই এই প্ৰশিক্ষণ কেন্দ্ৰটো স্থাপনত আগভাগ লৈছিল ।কিন্তু অতি সম্প্ৰতি এই প্ৰশিক্ষণ কেন্দ্ৰটোৰ আন্ত: গাঠনিৰ অভাৱ ।দীৰ্ঘদিন মেৰামতি নকৰাত জহিখহি গৈছে প্ৰশিক্ষণ কেন্দ্ৰটোৰ দুৱাৰ খিৰিকী,টিনপাত আদি । উল্লেখযোগ্য যে প্ৰতিবছৰে ১৫ গৰাকীকৈ যুৱতীক প্ৰশিক্ষণ প্ৰদানৰ সুবিধা থকা এই প্ৰশিক্ষণ কেন্দ্ৰটোত কেৱল মাত্ৰ দুখন তাঁতশালহে কাৰ্যক্ষম হৈ আছে ।বাকী কেইখন তাঁতশাল ব্যৱহাৰৰ অনুপযোগী হৈ পৰি আছে দীৰ্ঘদিন ধৰি ।লক্ষনীয় বিষয় এই যে প্ৰশিক্ষণ কেন্দ্ৰটোত এগৰাকী প্ৰশিক্ষক আৰু এগৰাকী ডেমন্চটেটৰ নিযুক্তি দিয়া হৈছিল যদিও প্ৰদৰ্শক গৰাকীক ইয়াৰ পৰা বহু দিনৰ পূৰ্বে পদসহ লৈ যোৱাত এতিয়া কেৱল এগৰাকী প্ৰশিক্ষকে কাৰ্যনিৰ্বাহ কৰি আছে চিন্তামনিগড়ৰ এই হস্ততাঁত বস্ত্ৰ শিল্পপ্ৰশিক্ষণ কেন্দ্ৰটোত ।শীঘ্ৰে এই কেন্দ্ৰটোৰ আন্ত:গাঠনি উন্নয়ন কৰি প্ৰশিক্ষণৰ এক উপযুক্ত পৰিৱেশ গঢ়ি তোলাৰ আহ্বান জনাইছে দল সংগঠন সমূহে।

সাত সাগৰ তেৰ নদী পাৰ হৈ সুদৰ আফ্ৰিকা, চাইবেৰিয়া আদিৰ পৰা মাজুলীৰ অভয়পুৰীয়াত অৱস্থিত চৰাইচোঙলৈ অহা আলহী পক্ষীবোৰ এতিয়া লাহে লাহে ঘৰমুৱা হৈছে। ক্ৰমাৎ কমিছে পুৱাই শুনিবলৈ পোৱা কলকলনি বোৰ। নিৰ্জান হৈ পৰিছে চৰাইচোং। নিজ নিজ ঘৰলৈ উভতিছে পক্ষী সমূহ। আহোম ৰজা প্ৰমত্ত সিংহই নিৰ্মাণ কৰা অসমৰ প্ৰথমখন ৰাজকীয় পক্ষী উদ্যান চৰাইচোঙে আজিও বহন কৰি আহিছে নিজৰ স্বকীয়তা আৰু জৈৱ বৈচিত্ৰতাৰে ভৰপূৰ শ বছৰীয়া ইতিহাস। মাজুলীৰ শ্ৰীৰাম গাওঁ পঞ্চায়তৰ অন্তৰ্গত অভয়পুৰীয়া ৰাজহ গাঁৱত অৱস্থিত এই পক্ষী উদ্যানখনে সমগ্ৰ মাজুলীৰ লগতে দেশ বিদেশৰ পৰ্যটকৰ আকৰ্ষণৰ কেন্দ্ৰ বিন্দু হৈ উঠিছে। দেশী বিদেশী এই আলহী পক্ষীবোৰ আহে শালি খেতি চপোৱাৰ মাজভাগত। পুৱাই দৃষ্টি নন্দনভাৱে সকলোৰে দৃষ্টি আকৰ্ষণ কৰি ৰাখে এই আলহী পক্ষীবোৰে। সন্ধিয়া উৰি যোৱা পৰত প্ৰতিধ্বনিত হয় এক আকৰ্ষণীয় কলকলনি আৰু নৈসৰ্গিক দৃশ্য। ইয়াৰ মাজতে সততে প্ৰশ্ন উত্থাপন হয় চৰাইচোঙৰ নিৰাপত্তা আৰু সংৰক্ষণৰ বিষয়টোৰ ওপৰত। সাধাৰণতে দোষাৰোপ কৰা হয় চৰাইচোঙৰ ওচৰ পাজৰৰ ৰাইজক। কিন্তু এই প্ৰতিবেদকে স্বজমিন ভাৱে কৰা এক অভিযানত এই কথা স্পষ্ট হৈ পৰিছে যে অঞ্চলবাসীৰ ওচৰত সদায় সুৰক্ষিত হৈ আহিছে চৰাইচোং। আনহাতে চৰাইচোঙৰ স্থানীয় ৰাইজৰ মতে কিছু সংখ্যক লোকে  চৰাইচোঙৰ সুৰক্ষাৰ দিশটোত কেৱল স্থানীয় ৰাইজকে দোষাৰোপ কৰি আহিছে। যাৰ বাবে অসন্তুষ্টি প্ৰকাশ কৰি স্থানীয় ৰাইজে কয় যে ৰাইজে ৰাইজৰ ফালৰ পৰা যিমানখিনি কৰিব পাৰে সেইয়া কৰিছে। স্থানীয় অভয়পুৰীয়া গাঁৱৰ যুৱ সমাজেও নিশা চৰাই সমূহৰ সম্ভাৱ্য বিপদ হোৱাৰ আশংকাত চৰাইছোঙৰ ওপৰত চকু ৰাখে। আনহে নালাগে ৰাতি যদি চৰাইচোঙৰ মাজত টৰ্চৰ পোহৰ দেখিলেও যুৱক সকলে একলগ হৈ দৃষ্টি ৰাখে পক্ষীসমূহৰ ওপৰত। প্ৰয়োজন সাপেক্ষে নিজাববীয়াকৈ যুৱকসকলে ৰাতিও পথাৰৰ মাজলৈ গৈ সন্ধান কৰে । কিন্তু ইয়াৰ পাছতো কেৱল স্থানীয় ৰাইজকে দোষাৰোপ কৰা কাৰ্যত দুখ প্ৰকাশ কৰিছে স্থানীয় ৰাইজে। ইয়াৰ বিপৰীতে চৰকাৰৰ কৰণীয় খিনিক সোঁৱৰাই দিবলৈ চেষ্টা কৰা নাই সেই সকল লোকে । স্থানীয় ৰাইজৰ মতে চৰাইচোঙৰ সংৰক্ষণৰ প্ৰয়োজন আছে কিন্তু সেই সংৰক্ষণ কেৱল ৰাইজৰ দ্বাৰা কৰাটো সম্ভৱ নহয়, তাৰ বাবে প্ৰয়োজন বিভাগীয় কৰ্তৃপক্ষ আৰু চৰকাৰৰ সু পৰিকল্পিত আঁচনিৰ। চৰাইচোঙলৈ পক্ষী সমূহ আহে শালি খেতি চপোৱাৰ মাজভাগত অথবা শেষৰ সময়ত আৰু ইয়াৰ পৰা উভতি যায় পুনৰ খেতি আৰম্ভ কৰাৰ পূৰ্বেই। গতিকে স্থানীয় ৰাইজৰ খেতি বাতিত কোনো ধৰণৰ প্ৰভাৱ নেপেলায় চৰাইবোৰে। সেয়ে অঞ্চলৰ ৰাইজক বেদখলকাৰী আখ্যা দিয়া কাৰ্যই এতিয়া একাংশ স্থানীয় ৰাইজক অসন্তুষ্ট কৰিছে। তাৰ মাজতে যদিও বিগত বৰ্ষত চৰাইচোঙত ফিচাৰী খন্দাৰ অভিযোগ আহিছে, সেই অভিযোগ পোন চাতেই নাকচ কৰিবও নোৱাৰি। দুই এটা ফিচাৰীৰ বাদে প্ৰায় কেইটা ফিচাৰী চৰাইচোঙৰ পৰা বহু দূৰৈত অৱস্থিত | সেই সমূহ স্থানত সাধাৰণতে চৰাই সমূহ নচৰে |

ঐতিহ্য মণ্ডিত গড়গাঁও মহাবিদ্যালয়ৰ ৰাষ্ট্ৰীয় সেৱা আঁচনিৰ উদ্যোগত আৰু মহাবিদ্যালয়ৰ আভ্যন্তৰীণ মান নিৰূপন কোষ আৰু  ডিব্ৰুগড় বিশ্ববিদ্যালয়ৰ ৰাষ্ট্ৰীয় সেৱা আঁচনি কোষৰ সহযোগত ‘আজাদী কা অমৃত মহোৎসৱ’ ৰ এটি কাৰ্যসূচী ৰূপে  আজি উদযাপন কৰা হয় ‘ৰাষ্ট্ৰীয় কন্যা শিশু দিবস'(National girl child day)।প্ৰথমে মহাবিদ্যালয়ৰ অধ্যক্ষ ড০ সব্যসাচী মহন্ত, ৰাষ্ট্ৰীয় সেৱা আঁচনিৰ কাৰ্যক্ৰম বিষয়া ড০ৰিমঝিম বৰা , আভ্যন্তৰীণ মান নিৰূপন কোষৰ সমন্বয়ক ড০সুৰজিত শইকীয়া,শিক্ষাতত্ব বিভাগৰ মুৰব্বী অধ্যাপক ড০বিদ্যানন্দ বৰকাকতী, অসমীয়া বিভাগৰ অধ্যাপক প্ৰণব দুৱৰা,অৰ্থনীতি বিভাগৰ অধ্যাপিকা অংকিতা দত্ত আৰু সমূহ ৰাষ্ট্ৰীয় সেৱা আঁচনিৰ স্বেচ্ছাসেৱক-স্বেচ্ছাসেৱিকাইডিব্ৰুগড় বিশ্ববিদ্যালয়ৰ  সহযোগত ভাৰ্চুৱেল মাধ্যমৰ উদ্বোধনী অনুষ্ঠানত অংশ গ্ৰহণ কৰে। এই অনুষ্ঠানৰ পাছতে মহাবিদ্যালয়ৰ অধ্যক্ষ ড০ সব্যসাচী মহন্তই ৰাষ্ট্ৰীয় কন্যা শিশু দিবসৰ তাৎপৰ্য ব্যাখ্যা কৰি তেখেতৰ সাৰগৰ্ভ বক্তৃতাত কয় যে কন্যা সকলক পূৰ্ণ মানব সত্বা ৰূপে প্ৰতিষ্ঠিত কৰিবলৈ হ’লে এনেধৰণৰ সজাগতা অনুষ্ঠানৰ লগতে বৰ্তমানৰ প্ৰজন্মই কন্যা সন্তানৰ অধিকাৰ, সুৰক্ষা, গুৰুত্ব আৰু দায়িত্ব সম্পৰ্কে সজাগ হোৱাটো অতিকে প্ৰয়োজনীয় হৈ পৰিছে। প্ৰতিগৰাকী নাৰীক পুৰুষৰ সমানে আগবঢ়াই নিব পাৰিলেহে এখন সুন্দৰ গণতান্ত্ৰিক সমাজৰ আশা কৰিব পাৰি। ইয়াৰ পাছতে বিভিন্ন দিশত  স্বপ্ৰতিভাৰে  ৰাজ্যিক আৰু ৰাষ্ট্ৰীয় পৰ্যায়ত উজ্জ্বলি উঠা মহাবিদ্যালয়ৰ চাৰিগৰাকী ছাত্ৰী ক্ৰমে জ্ঞানতৃষা ফুকন (২০১৯-২০ বৰ্ষৰ  ৰাষ্ট্ৰীয় সেৱা আঁচনিৰ ৰাজ্যিক বঁটা প্ৰাপ্ত শ্ৰেষ্ঠ স্বেচ্ছাসেৱিকা), ৰুটুজা দেউৰী (ৰাষ্ট্ৰীয় পৰ্যায়ৰ সাহিত্য  প্ৰতিযোগিতাত বঁটা প্ৰাপ্ত) গৌৰাংগী ভট্টাচাৰ্য (ৰাষ্ট্ৰীয় পৰ্যায়ৰ নৃত্য প্ৰতিযোগিতাত বঁটা প্ৰাপ্ত),প্ৰস্তুতি ফুকন (ৰাষ্ট্ৰীয় পৰ্যায়ৰ দবা খেলুৱৈ) ক সম্বৰ্ধনা জ্ঞাপন কৰা হয়।ৰাষ্ট্ৰীয় সেৱা আঁচনিৰ কাৰ্যক্ৰম বিষয়া ড০ৰিমঝিম বৰাই আঁত ধৰা অনুষ্ঠানটিত উল্লেখ কৰে যে অতি প্ৰাচীন কালৰে পৰা নাৰীয়ে নিজৰ যোগ্যতাসমূহ প্ৰদৰ্শন কৰি আহিছে  আৰু এই গুৰুত্ব উপলব্ধি কৰিয়েই বৰ্তমান সময়তো নাৰীৰ স্বাধীনতা,সমতা আৰু সুৰক্ষাৰ ক্ষেত্ৰত সমাজৰ প্ৰতিজন ব্যক্তি সচেতন হোৱাটো উচিত। অনুষ্ঠানটিত ভিন্ন দিশত উজ্জ্বলি উঠা ছাত্ৰী কেইগৰাকীয়ে নিজা অভিজ্ঞতা সমূহ বৰ্ণনা কৰে। প্ৰায় ডেৰশৰো অধিক মহাবিদ্যালয়ৰ শিক্ষক, ছাত্ৰ-ছাত্ৰী স্বেচ্ছাসেৱক-স্বেচ্ছাসেৱিকা উপস্থিত থকা অনুষ্ঠানটি সাফলতাৰে  উদযাপন কৰা বাবে ড০ৰিমঝিম বৰাই সকলোকে শলাগৰ শৰাইৰ আগবঢ়াই।

নগাঁওৰ কীৰ্তিকমলৰ ঘটনা সন্দৰ্ভত ৰবিবাৰে সংবাদ মন্তব্য প্ৰকাশ কৰে মুখ্যমন্ত্ৰীৰ ৰাজনৈতিক সচিব তথা নলবাৰী সমষ্টিৰ বিধায়ক জয়ন্ত মল্ল বৰুৱাই  । ৰবিবাৰে নলবাৰী জিলাৰ বাহঁজানীৰ গোপালথান পলিটেকনিক ইনষ্টিটিউটত এটি গৃহৰ শুভ উদ্বোধনী অনুষ্ঠানত উপস্থিত থাকি নগাঁওৰ কীৰ্তিকমল ঘটনা সন্দৰ্ভত বিধায়ক জয়ন্ত মল্ল বৰুৱাই প্ৰথমতে প্ৰশ্ন উত্থাপন কৰি ব্যক্ত কৰে যে, ছাত্ৰ নেতা হ’লে পুলিচকো মাৰিব নেকি,তেওঁ ড্ৰাগছৰো বেপাৰ কৰিব নেকি,,ছাত্ৰ নেতা হল বুলি তেওলোকক সেইবিলাক লাইচেন্স দিয়া হোৱা নাই বুলি উল্লেখ কৰে বিধায়ক গৰাকীয়ে  ।

লগতে বিধায়ক জয়ন্ত মল্ল বৰুৱাই কয় যে ছাত্ৰ নেতাজনৰ পক্ষত তৎক্ষণাত সাংবাদিক সকল অথবা সাধাৰণ লোক,সংগঠন আগবাঢ়ি নালাগে প্ৰকৃত সত্য কি তাক চাব লাগে বুলি কোৱাৰ উপৰিও পুলিচে যদি ভুল কৰি  গুলীচালনা কৰিছে তেন্তে তেতিয়া হলে পুলিচৰ ওচৰত তদন্ত হব কিন্তু ছাত্ৰ নেতা হলে সকলো মাফ এই ধাৰণা বাদ দিয়ক বুলি মন্তব্য প্ৰকাশ কৰে জয়ন্ত মল্ল বৰুৱাই  । আনহাতে নগাঁওৰ আৰক্ষী অধীক্ষক আনন্দ মিশ্ৰা ওপৰত এসময়ত অসমৰ জনসাধাৰণে বহুত আস্থা দেখুৱাইছে,ভাল পুলিচ বিষয়া হিচাপে নাম আছে ও সদৰী কৰে মুখ্যমন্ত্ৰীৰ ৰাজনৈতিক সচিব তথা নলবাৰী সমষ্টিৰ বিধায়ক জয়ন্ত মল্ল বৰুৱাই  ।