এতিয়াৰে পৰা ৰেলত ডাঙৰকৈ কথা ক’লেই যাত্ৰীয়ে ভৰিব লাগিব জৰিমনা। ভাৰতীয় ৰেলৱেই যাত্ৰীসকলৰ ৰেল যাত্ৰা অধিক আৰামদায়ক কৰি তুলিবলৈ ৰে’লৰ দবাৰ ভিতৰত উচ্চ স্বৰত সংগীত বজোৱা আৰু ফোনত ডাঙৰকৈ কথা পতা নিষিদ্ধ কৰিছে।
দৰাচলতে ডাঙৰকৈ সংগীত বজালে বা ফোনত ডাঙৰকৈ কথা ক’লে আন বহু যাত্ৰীৰ শান্তি ভংগ হ’ব পাৰে। সেইবাবেই ৰে’ল বিভাগে এনে সিদ্ধান্ত গ্ৰহণ কৰিছে। যিসকল যাত্ৰীয়ে ডাঙৰকৈ কথা পাতি থকা বা উচ্চ স্বৰত সংগীত বজাই ধৰা পৰিব তেওঁক কঠোৰভাৱে জৰিমনা বিহা হ’ব বুলি ৰে’ল বিভাগৰ সূত্ৰই প্ৰকাশ কৰিছে।

ইয়াৰ উপৰি কোনো যাত্ৰীৰ এনে আচৰণৰ বাবে যদি আন কোনো যাত্ৰীয়ে অসুবিধাৰ সন্মুখীন হয় তেন্তে ৰেলকৰ্মচাৰীসকলক এই কাৰ্যৰ বাবে দায়বদ্ধ কৰা হ’ব। ৰে’ল মন্ত্ৰালয়ে এই সন্দৰ্ভত বহু অভিযোগ পোৱাৰ বাবেই এনে কঠোৰ নিয়মৰ প্ৰৱৰ্তন কৰিবলৈ বাধ্য হৈছে। আৰপিএফ, টিকট পৰীক্ষক, কোচ এটেণ্ডেণ্ট আৰু কেটাৰিঙকে ধৰি ৰে’ল কৰ্মচাৰীসকলে যাত্ৰীসকলে যাতে কোনো অসুবিধাৰ সন্মুখীন নহয় সেয়া নিশ্চিত কৰিব । পশ্চিম ৰে’লৱেৰ এজন বিষয়াই এনে সিদ্ধান্তৰ কথা নিশ্চিত কৰিছে।

নতুন নিয়মত এইটোও কোৱা হৈছে যে দলবদ্ধভাৱে ভ্ৰমণ কৰা যাত্ৰীসকলক নিশা লৈকে কথা পাতিবলৈ অনুমতি দিয়া নহ’ব আৰু দবাৰ লাইট নিশা ১০ বজাৰ পিছত বন্ধ কৰিব লাগিব । যিসকল যাত্ৰীয়ে এনে নিয়মসমূহ পালন নকৰে তেওঁলোকক ৰে’ল আইন অনুসৰি জৰিমনা বিহা হ’ব।

কোভিড পৰিস্থিতিয়ে ভয়াৱহ ৰূপ ধাৰণ কৰাৰ সময়তে শণিবাৰে প্ৰধানমন্ত্ৰী নৰেন্দ্ৰ মোদীয়ে দেশৰ বিভিন্ন প্ৰান্তৰ জিলা দণ্ডাধীশসকলৰ সৈতে চৰকাৰী আঁচনিৰ ৰূপায়ণ সন্দৰ্ভত বাৰ্তালাপ কৰে। জিলা দণ্ডাধীশসকলৰ সৈতে হোৱা বাৰ্তালাপৰ সময়ত মোদীয়ে সু-শাসনৰ বাবে সকলোৰে সহযোগিতা কাম্য বুলি মন্তব্য কৰে। মোদীয়ে কয়—”সুশাসনৰ ক্ষেত্ৰত জিলা প্ৰশাসনৰ এক গুৰুত্বপূৰ্ণ ভূমিকা আছে। ই চৰকাৰক আঁচনিবোৰ ভালদৰে ৰূপায়ণ কৰাত সহায় কৰে। সেয়ে জিলা প্ৰশাসনৰ বিষয়াসকলে ক্ষেত্ৰ ভ্ৰমণ আৰু পৰিদৰ্শনৰ বাবে বিতং নিৰ্দেশনা প্ৰস্তুত কৰা উচিত,”।

শণিবাৰে কেইবাখনো ৰাজ্যৰ মুখ্যমন্ত্ৰীয়েও এই বাৰ্তালাপত অংশগ্ৰহণ কৰে। বৈঠকত কেন্দ্ৰ, ৰাজ্য আৰু স্থানীয় প্ৰশাসনৰ দলবদ্ধ কামে দেশৰ বহু উন্নয়নৰ প্ৰতি আগ্ৰহী জিলাত ভাল ফলাফল প্ৰদান কৰিছে বুলি মোদীয়ে উল্লেখ কৰে। এনে জিলাসমূহৰ বিষয়াসকলে এতিয়া যথেষ্ট সন্তুষ্টি অনুভৱ কৰিছে । প্ৰতিখন জিলাই আনৰ সফলতাৰ পৰা শিকিব লাগিব আৰু তেওঁলোকৰ প্ৰত্যাহ্বানবোৰ মূল্যায়ন কৰিব লাগিব বুলি মোদীয়ে উল্লেখ কৰে। প্ৰশাসন আৰু জনসাধাৰণৰ মাজত প্ৰত্যক্ষ, আৱেগিক সংযোগৰ প্ৰয়োজন আছে বুলি মন্তব্য কৰি মোদীয়ে কয় ‘ওপৰৰ পৰা তললৈ’ আৰু ‘তলৰ পৰা শীৰ্ষলৈ’ শাসন ব্যৱস্থাটোক গতিশীল কৰি তোলাটো এতিয়া সকলোৰে দায়িত্ব।

উল্লেখ্য চৰকাৰে ২২ খন ৰাজ্যৰ ১৪২ খন জিলা কেইবাটাও বিষয়ত পিছ পৰি থকাৰ কথা চিনাক্ত কৰিছে।

অসম চৰকাৰে শেহতীয়াকৈ ২৬ জানুৱাৰীত ৰাজ্যখনত ৭৩সংখ্যক গণতন্ত্ৰ দিৱস উদযাপনৰ বাবে নতুন এছ অ’ পি জাৰি কৰিছে।ৰাজ্য চৰকাৰৰ নতুন এছ অ’ পি অনুসৰি, গণৰাজ্য দিৱসৰ বাবে আয়োজিত যিকোনো অনুষ্ঠানত নিম্নতমসংখ্যক লোক উপস্থিত থাকি সমগ্ৰ ৰাজ্যতে গণৰাজ্য দিৱস পালন কৰা হ’ব।

এছ অ’ পিৰ জৰিয়তে চৰকাৰে জনাইছিল যে এই বছৰৰ গণতন্ত্ৰ দিৱস উদযাপনৰ বাবে কোনো বৰ্ণাঢ্য সাংস্কৃতিক কাৰ্যসূচী আয়োজন কৰা নহ’ব। আনহাতে, ৰাজ্যিক পৰ্যায়ৰ অনুষ্ঠানৰ ক্ষেত্ৰত কেৱল মুঠ ১০০০জন ব্যক্তিকহে কাৰ্যসূচীত উপস্থিত থাকিবলৈ অনুমতি দিয়া হ’ব। গণতন্ত্ৰ দিৱসৰ পূৰ্ব উদযাপনৰ সন্দৰ্ভত, এছ অ’ পিত চৰকাৰে উল্লেখ কৰিছিল যে কোনো অনুষ্ঠান বা সমাৱেশ অনুষ্ঠিত কৰাৰ অনুমতি দিয়া নহ’ব।

জাৰি কৰা নতুন এছ অ’ পি অনুসৰি, বিদ্যালয়ৰ শিক্ষাৰ্থীসকলক গণৰাজ্য দিৱসত অনুষ্ঠিত হ’বলগীয়া যিকোনো মাৰ্চ-পাষ্ট অনুষ্ঠানত অংশগ্ৰহণ কৰাত সীমাবদ্ধ কৰা হৈছে । আনহাতে অৰ্ধসামৰিক বাহিনী, গৃহৰক্ষী আৰু আৰক্ষী বিষয়াসকলক পেৰেডত অংশগ্ৰহণ কৰিবলৈ অনুমতি দিয়া নহ’ব।

এইটোও উল্লেখ কৰা হৈছে যে যিসকলে ৭৩তম গণতন্ত্ৰ দিৱসৰ কুচকাৱাজত অংশগ্ৰহণ কৰে তেওঁলোকৰ বাবে দুবাৰ টিকাকৰণ বাধ্যতামূলক অন্যথা তেওঁলোকক অংশগ্ৰহণ কৰিবলৈ অনুমতি দিয়া নহ’ব। অসম চৰকাৰে ক’ভিডৰ ভয়াৱহতাৰ প্ৰতি লক্ষ্য ৰাখি এছ অ’ পি কঠোৰভাৱে জাৰি কৰিছে।