শোণিতপুৰ জিলাৰ জামুগুৰিহাটস্থিত  ধলাইবিলৰ এগৰাকী প্ৰতিভাসম্পন্ন মেধাৱী ছাত্ৰ তথা দৰং মহাবিদ্যালয়ৰ মেধাৱী ছাত্ৰগৰাকীৰ নাম হৈছে অজয় সোনাৰ। অজয় হৈছে জিলাখনৰ ধলাইবিলস্থিত চামধাৰা পানী গাঁৱ নিৱাসী মনবাহাদুৰ সোনাৰ আৰু প্ৰয়াত ৰূপা দেৱীৰ কনিষ্ঠ পুত্ৰ। অজয় নিজৰ পঢ়াশুনাৰ উপৰিও সাধাৰণ জ্ঞানৰ ওপৰত সম্পূৰ্ণৰূপে অধ্যয়ন কৰি টেলেন্ট চাৰ্চ পৰীক্ষা দিবলৈকো সক্ষম হৈছে। দৰং মহাবিদ্যালয়ৰ পৰা জিলা ভিত্তিত অনুষ্ঠিত সাধাৰণ জ্ঞান সন্দৰ্ভত এক বিশেষ পৰীক্ষাত ৯৫.৩৩ শতাংশৰে প্ৰথম স্থান দখল কৰি সুখ্যাতিৰে উৰ্ত্তীন্ন হোৱাত তেওঁক নগাঁ‌ওস্থিত আমনিত আয়োজন কৰা এক গাম্ভীৰ্যপূৰ্ণ অনুষ্ঠানত ফুলাম গামোচা,জাপি,প্ৰসংশা পত্ৰৰ লগতে দুটা ট্ৰফীৰে ২০২১ বৰ্ষৰ শ্ৰেষ্ঠ জ্যোতি শিক্ষা বঁ‌টা প্ৰদান কৰে। ২৩ বছৰীয়া ছাত্ৰজনৰ এনে সফলতাক লৈ দৰং মহাবিদ্যালয়ৰ শিক্ষাগুৰুসকল,অঞ্চলবাসীৰ লগতে বিভিন্ন দল-সংগঠন,অনুষ্ঠান প্ৰতিষ্ঠানে উষ্ম আদৰণি জনাই উজ্বল ভৱিশ্যত কামনা কৰে।

 শোণিতপুৰ জিলাৰ ঐতিহ্যমণ্ডিত জামুগুৰিহাট তথা নদুৱাৰত জন্মগ্ৰহণ কৰি কৰ্মসূত্ৰে গুৱাহাটী নিবাসী হোৱা জামুগুৰীয়াই অঞ্চলটোৰ উন্নয়ন বাবে গ্ৰহণ কৰি অহা প্ৰশংসনীয় পদক্ষেপে ৰাইজৰ দৃষ্টি আকৰ্ষণ কৰিবলৈ সক্ষম হৈছে। ইয়াৰ বাবে গঠন হোৱা ‘জামুগুৰিহাট গুৱাহাটী ফ’ৰামে’ জন্মলগ্নৰে পৰা অঞ্চলটোৰ উন্নয়ন বাবে বিশেষকৈ শোণিতকোঁৱৰ গজেন বৰুৱা বঁটা প্ৰদান, গুৱাহাটীত স্মৃতি দিৱস পালন, জামুগুৰিৰ কৃতী ছাত্র-ছাত্ৰীলৈ আৰ্থিক সহযোগিতা আগবঢ়োৱা, জামুগুৰিৰ পৰা যোৱা ৰোগীৰ চিকিৎসাৰ ক্ষেত্রত সহায় কৰা আদি কাৰ্যই অঞ্চলবাসীক হৃদয় স্পৰ্শ কৰিবলৈ সক্ষম হৈছে । শেহতীয়াকৈ এই ফ’ৰামে যোৱা ৩ অক্টোবৰ তাৰিখে “ৰোগীৰ যত্ন আৰু পৰিচৰ্যাৰ ওপৰত স্বেচ্ছাসেবকৰ ভূমিকা” শীৰ্ষক বিষয়ত এখনি আলোচনা চক্ৰ অনুষ্ঠিত কৰে। উক্ত আলোচনা চক্ৰত সমল ব্যক্তি হিচাপে অংশ লয় গুৱাহাটী চিকিৎসা মহাবিদ্যালয় অধ্যক্ষ ডাঃ অচ্যুত বৈশ্য, নৰ্থ ইষ্ট কেঞ্চাৰ হস্পিটালৰ সঞ্চালক ডাঃ মুনীন্দ্ৰ নাৰায়ণ বৰুৱা আৰু আই, আই, ই, গুৱাহাটীৰ প্ৰাক্তন সঞ্চালক ড০ সুনীল শইকীয়াই। চক্ৰত ৰোগীসকলৰ আৰ্থিক স্থিতি, সামাজিক স্থিতি আৰু মনোবৈজ্ঞানিক দিশত বিশেষভাৱে আলোকপাত কৰাৰ লগতে ডাঃ মুনীন্দ্ৰ নাৰায়ণ বৰুৱাই ধপাত মুক্ত সমাজ গঢ়াৰ ক্ষেত্রত স্বেচ্ছাসেবকৰ ভূমিকা সম্পৰ্কে বিশেষ ভাৱে আলোচনা কৰে। ফ’ৰামৰ কাৰ্যকৰী সভাপতি দ্বিজেন দাসে আদৰণি ভাষণ প্ৰদান কৰা আলোচনা চক্ৰখনত উপস্থিত থকা ফ’ৰামৰ সদস্য তথা মুখ্যমন্ত্রীৰ বিশেষ কৰ্তব্যৰত বিষয়া কুন্টলমণি বৰদলৈয়ে বিষয় সন্দৰ্ভত এক গুৰুত্বপূৰ্ণ ভাষণ আগবঢ়োৱাৰ লগতে ড০ কন্দৰ্প শইকীয়া, আৰমান আলি, দিপিকা গোস্বামী আৰু শশীমোহন ভূঞাইও স্বেচ্ছাসেবক ভূমিকা আৰু দায়বদ্ধ তাৰ ওপৰত নাতিদীর্ঘ বক্তব্য আগবঢ়াই। ফ’ৰামৰ সদস্য শান্তনু শৰ্মা আৰু ইন্দ্ৰ কাৰ্কীয়ে বিশেষ উদ্যোগ গ্ৰহণ কৰা আৰু খানাপাৰাৰ শিক্ষা প্ৰতিষ্ঠান, স্বাস্থ্য আৰু পৰিয়াল কল্যাণ বিভাগৰ প্ৰেক্ষাগৃহত অনুষ্ঠিত উক্ত আলোচনা চক্ৰৰ অন্তত জামুগুৰিৰ উন্নয়ন কেন্দ্ৰীক বহুকেইটা গুৰুত্বপূৰ্ণ সিদ্ধান্ত ফ’ৰামে গ্ৰহণ কৰে। ইয়াৰ ভিতৰত জামুগুৰিৰ পৰা গৈ গুৱাহাটীত থকা লোকসকলৰ মাজত এটা শক্তিশালী স্বেচ্ছাসেবকৰ দল গঠন কৰা। ২) সেৱা আগবঢ়োৱা স্বেচ্ছাসেবকসকলক মাননি প্ৰদান কৰা । ৩) স্বেচ্ছাসেবকসকলে  চিকিৎসাজনীত কাৰণত সহায় কৰাৰ উপৰিও ,প্ৰয়োজনত জামুগুৰিহাটৰ পৰা যোৱা ৰোগীৰ ওচৰলৈ গৈ যাবতীয় দিহা পৰামৰ্শ আগবঢ়োৱা। ৪) শিক্ষাৰ বাবে সময়ে সময়ে guide হিচাপে সকলোবোৰ খৱৰ যোগান ধৰা। ৫) জামুগুৰিহাটত এখন ধপাত মুক্ত গাঁৱৰ সৃষ্টি কৰি এক নিদৰ্শন দাঙি ধৰা। ৬) ৰোগীসকলৰ সুবিধা হোৱাকৈ বিভিন্ন লজ, ধৰমশালা ,হোষ্টেলৰ যোগাযোগৰ ব‍্যৱস্হ কৰি দিয়াৰ লগতে ফ’ৰামে নিজাববীয়াকৈ এটা থকা লোৱাৰ ব‍্যৱস্হা কৰা আদি। জামুগুৰিহাট গুৱাহাটী ফ’ৰামৰ এনেবোৰ চিন্তাই সম্প্ৰতি বৃহত্তৰ জামুগুৰিহাটলৈ এক আশাৰ বতৰা কঢ়িয়াই আনিছে। চিকিৎসা আৰু শিক্ষাৰ বাবে ফ’ৰামে ইতিমধ্যে একোটাকৈ ন্যাস গঠনৰো প্ৰস্তুতি চলাইছে বুলি কাৰ্যালয় সম্পাদক ঈশ্বৰচন্দ্ৰ বৰাই জানিবলৈ দিয়ে।

পদ্মনাথ গোহাঞিবৰুৱা চৰকাৰী আদৰ্শ মহাবিদ্যালয়ত কালি দিনযোৰা কাৰ্যসূচীৰে প্ৰথম প্ৰতিষ্ঠা দিৱস উদযাপন কৰে। পুৱা ৮ বজাত মহাবিদ্যালয়ৰ পতাকা উত্তোলনেৰে অনুষ্ঠানটো শুভাৰম্ভ কৰে অধ্যক্ষ ডঃ ঠানুৰাম মজিন্দাৰে। পতাকা উত্তোলনৰ পিছত মহাবিদ্যালয়ৰ শিক্ষক আৰু ছাত্ৰ-ছাত্ৰীসকলৰ উদ্যোগত তথা ডিগবৈ ৰ’টাৰী ক্লাৱৰ সৌজন্যত এলানি বৃক্ষৰোপনৰ কাৰ্যসূচীও অনুষ্ঠিত হয়। কপাহতলি গাওঁৰ গাওঁপ্ৰধান তিলেশ্বৰ মৰানে পদ্মনাথ গোহাঞি বৰুৱাৰ প্ৰতিকৃতিত বন্তি প্ৰজ্বলন কৰাৰ পাছতেই ছাত্ৰ-ছাত্ৰীসকলে পৰিৱেশন কৰা আদৰণি সংগীতেৰে মূল সভা আৰম্ভ হয়। সভাত বিশিষ্ট অতিথি হিচাপে উপস্থিত থাকে তিনিচুকীয়া উইমেনছ কলেজৰ ইংৰাজী বিভাগৰ প্ৰাক্তন মুৰব্বী অধ্যাপক উত্তম দুৱৰা, ডিগবৈ মহিলা মহাবিদ্যালয়ৰ সমাজশাস্ত্ৰ বিভাগৰ অধ্যাপক ডঃ প্ৰভাত শৰ্মা আৰু অসম চৰকাৰৰ প্ৰাক্তন ৰাজহ বিষয়া তথা প্ৰকৃতিকর্মী গোপাল দাস। সভাৰ আদৰণি ভাষনত মহাবিদ্যালয়ৰ অধ্যক্ষ ডঃ ঠানুৰাম মজিন্দাৰে আদৰ্শ মহাবিদ্যালয় সমূহ প্ৰতিষ্ঠাৰ ইতিহাসৰ লগতে ইয়াৰ লক্ষ্য-উদ্দেশ্য আদিৰ বিষয়ে অৱগত কৰে।মহাবিদ্যালয়ৰ সমূহ সদস্যলৈ প্ৰতিষ্ঠা দিৱসৰ শুভেচ্ছা জনাই দিয়া বক্তব্যত অধ্যাপক উত্তম দুৱৰাই শিক্ষানুষ্ঠান এখনৰ সামগ্ৰিক বিকাশত শিক্ষক শিক্ষয়িত্ৰী আৰু ছাত্ৰ-ছাত্ৰীৰ ভূমিকাৰ বিষয়ে আলোকপাত কৰে। পুথিগত শিক্ষাৰ বাহিৰেও শিক্ষা আহৰণৰ আৰু আন বিকল্প মাধ্যমো থাকে বুলি মত প্ৰকাশ কৰা দুৱৰাই ছাত্ৰ-ছাত্ৰীসকলক ইংৰাজী ভাষা শিক্ষণৰ প্ৰতি থকা ভীতি নোহোৱা কৰিবলৈ আহ্বান জনায়। ডঃ প্ৰভাত শৰ্মাই তেওঁৰ বক্তব্যৰ মাজেৰে গ্ৰন্থ অধ্যয়নৰ প্ৰয়োজনীয়তা আৰু ইয়াৰ মাজেৰে মানসিক উৎকৰ্ষ কেনেকৈ সাধন কৰিব পাৰে-সেই সম্পৰ্কে তাৎপৰ্যপূৰ্ণ বক্তব্য আগবঢ়ায়। জীৱনক অধ্যয়নৰ মাজেৰে ইতিবাচক ৰূপ দিবলৈ আহ্বান জনায় বক্তব্য ৰাখে গোপাল দাসে। ডঃ প্ৰভাত শৰ্মা আৰু গোপাল দাসে মহাবিদ্যালয়ৰ ছাত্ৰ-ছাত্ৰীসকলৰ বাবে একোটাকৈ গ্ৰন্থৰ টোপোলা মহাবিদ্যালয়ৰ অধ্যক্ষৰ হাতত অৰ্পণ কৰে। সভাত মহাবিদ্যালয়ৰ প্ৰতিষ্ঠা লগ্নৰ পৰা জড়িত তিনিচুকীয়া জিলা পৰিষদৰ প্ৰাক্তন সভাপতি ললিত মৰাণ, কপাহতলী গাঁওৰ গাঁওপ্ৰধান তিলেশ্বৰ মৰাণ, স্থানীয় সমাজকর্মী সুৰেন নেওগেও বক্তব্য ৰাখে। মহাবিদ্যালয়ৰ শিক্ষকসকলৰ হৈ বক্তব্য ৰাখে ইংৰাজী বিভাগৰ মুৰব্বী অধ্যাপক সঞ্জীৱ কলিতাই। সভাত মহাবিদ্যালয়ৰ পৰিচালনা সমিতিৰ অভিভাৱক প্ৰতিনিধি চেনীধৰ বৰা আৰু হেৰম্বৰ মৰাণ উপস্থিত থাকে। মূল সভাৰ শেষলৈ ইংৰাজী বিভাগৰ দ্বাৰা আয়োজিত ফটোগ্ৰাফী প্ৰতিযোগিতা আৰু সমাজশাস্ত্ৰ বিভাগৰ দ্বাৰা আয়োজিত ৰচনা প্ৰতিযোগিতাৰ পুৰস্কৃত প্ৰতিযোগীসকলক পুৰস্কাৰ প্ৰদান কৰা হয়। মহাবিদ্যালয়ৰ উচ্চতৰ মাধ্যমিক দ্বিতীয় বৰ্ষৰ ছাত্ৰ ঋতু মৰানে বছৰৰ শ্ৰেষ্ঠ ছাত্ৰৰ পুৰস্কাৰ লাভ কৰে। মহাবিদ্যালয়ৰ প্ৰথম প্ৰতিষ্ঠা দিৱস উপলক্ষে মহাবিদ্যালয়ৰ বিগত এটা বছৰৰ বিদ্যায়তনিক- সাংস্কৃতিক অগ্ৰগতি ৰ খতিয়ান হিচাপে এখন তথ্যচিত্ৰও এই সভাতে প্ৰদৰ্শিত হয়। মহাবিদ্যালয়ৰ ইংৰাজী বিভাগৰ সহকাৰী অধ্যাপিকা আকাংক্ষিতা শৰ্মাই আঁত ধৰা সভাৰ শলাগৰ শৰাই জ্ঞাপন কৰে অসমীয়া বিভাগৰ মুৰব্বী তথা প্ৰতিষ্ঠা দিৱস উদযাপন সমিতিৰ আহ্বায়ক ডঃ মনালিছা কছাৰীয়ে। মহাবিদ্যালয়ৰ ছাত্র-ছাত্ৰী আৰু শিক্ষক শিক্ষয়িত্ৰীসকলৰ উপস্থিতিয়ে অনুষ্ঠানটোৰ সৌষ্ঠৱ বৃদ্ধি কৰে।