অভিশপ্ত বুধবাৰৰ সন্ধিয়া যোৰহাটৰ নিমাতীঘাটত উঠিল কান্দোনৰ ৰোল৷ মৰণকাতৰ আর্তনাদে কঁপাই তুলিলে নিমাতীঘাটৰ আকাশ–বতাহ৷ বুধবাৰে বিয়লি প্রায় চাৰি বজাত নিমাতীঘাটৰ সমীপতে ব্রহ্মপুত্রৰ বুকুত সংঘটিত হ’ল এই হূদয়বিদাৰক দুর্ঘটনা৷

এই ঘটনাৰ পাছতে প্ৰতিক্ৰিয়া প্ৰকাশ কৰিছে যুৱপ্ৰজন্মৰ হাৰ্টথ্ৰব জুবিন গাৰ্গে। মাজুলী মোৰ নিজৰ ঠাই বুলি উল্লেখ কৰি কণ্ঠশিল্পীগৰাকীয়ে ছ’চিয়েল মিডিয়াযোগে নিজৰ ক্ষোভ উজাৰিলে। তেওঁ লিখিছে, “সকলো কুশলে থাকক৷ আগলৈ এনেকুৱা যাতে নহয়, সেইটো নিশ্চিত কৰক৷ এনেকুৱা কিয় হ’বলৈ পালে, তাৰ উচিত বিচাৰ হওক৷ মাজুলী মোৰ নিজৰ ঠাই৷ মই আছোঁ সদায় লগত৷”

ব্রহ্মপুত্রৰ বুকুত হোৱা ভয়ংকৰ নাও দুর্ঘটনাই ব্যাপক প্রতিক্রিয়া অব্যাহত আছে দ্বীপ জিলা মাজুলীত৷ কালিৰ দুর্ঘটনাৰ তদন্তৰ দাবী জনাই বৃহস্পতিবাৰে মাজুলীত উত্তাল প্রতিবাদ সাব্যস্ত কৰে৷

কমলাবাৰীত সদৌ মাজুলী জিলা ছাত্র সন্থাই ক’লা পতকা উৰুৱাই প্রতিবাদ সাব্যস্ত কৰি দিনটো ক’লা দিন হিচাপে পালন কৰে৷ আভ্যন্তৰীণ জল পৰিবহণ বিভাগ আৰু মাজুলী জিলা প্রশাসনৰ বিৰুদ্ধে প্রতিবাদ সাব্যস্ত কৰে জিলা ছাত্র সন্থাই৷ প্রতিবাদকাৰীসকলে পৰিবহণ মন্ত্রী চন্দ্রমোহন পাটোৱাৰীৰ প্রতিকৃতি দাহ কৰি প্রতিবাদ সাব্যস্ত কৰে৷

ব্রহ্মপুত্রত হোৱা নাও দুর্ঘটনাৰ উচিত তদন্ত দাবী কৰাৰ লগতে মাজুলী জিলাৰ উপায়ুক্ত বিক্রম কৈৰীৰ বদলিৰ দাবী জনায়৷ প্রতিবাদকাৰীয়ে চন্দ্রমোহন পাটোৱাৰী হায় হায় ধ্বনি দি পৰিৱেশ উত্তাল কৰি তোলে৷

আনহাতে, একে স্থানতে অসম জাতীয়তাবাদী যুৱ–ছাত্র পৰিষদ মাজুলী জিলা সমিতিয়ে কেন্দ্রীয় মন্ত্রী তথা মাজুলীৰ বিধায়ক সর্বানন্দ সোণোৱালৰ প্রতিকৃতি দাহ কৰে৷ কর্মীসকলে সর্বানন্দ সোণোৱাল হায় হায় ধ্বনি দি উত্তাল প্রতিবাদ সাব্যস্ত কৰে৷ ফলত কমলাবাৰীত এক অভাৱনীয় পৰিৱেশ সূচনা হয়৷ আনহাতে, যুৱ–ছাত্র পৰিষদে কমলাবাৰীত ফেৰী দুর্ঘটনাত নিহতসকলৰ আত্মাৰ সদ্গতি কামনা কৰি শ্রদ্ধাঞ্জলি অনুষ্ঠানৰ আয়োজন কৰে৷

আনহাতে, মাজুলীৰ গডমূৰত মাজুলীৰ বৃহত্তৰ ছাত্র সমাজ স্বতঃস্ফূর্তভাৱে ওলাই আহি পুৱা ১১ বজাৰ পৰা উপায়ুক্ত কার্যালয়ৰ প্রৱেশ পথ অৱৰোধ কৰি উত্তাল প্রতিবাদ সাব্যস্ত কৰে৷ প্রতিবাদকাৰীসকলে আমাক সুৰক্ষা লাগে, আমাক বিচাৰ লাগে, মাজুলীয়ে দলং বিচাৰিছে, অকর্মণ্য মাজুলীৰ বিধায়ক হায় হায়, আভ্যন্তৰীণ জল পৰিবহণ বিভাগক নাকী লগাওক, মাজুলীৰ উপায়ুক্তক বর্খাস্ত কৰক আদি প্রতিবাদী শ্লোগানেৰে গড়মূৰৰ আকাশ–বতাহ কঁপাই তোলে৷ দুই সহস্রাধিক প্রতিবাদকাৰীয়ে উপায়ুক্ত কার্যালয়ৰ পথৰ ফালে অগ্রসৰ হোৱাত আৰক্ষীয়ে বেৰিকেড বনাই প্রতিবাদকাৰীক সোমোৱাত বাধা দিয়ে৷ প্রচণ্ড ৰ’দ আৰু গৰমকো নেওচি প্রতিবাদকাৰীসকলে ৰাজপথতে বহি অৱস্থান কৰি উক্ত শ্লোগান আৰম্ভ কৰে৷

প্রতিবাদ চলি থকাৰ মাজতেই মুখ্যমন্ত্রীসহ মাজুলীলৈ অহা শক্তিমন্ত্রী তথা মাজুলীৰ অভিভাৱক মন্ত্রী বিমল বৰা আগবাঢ়ি আহি প্রতিবাদীকাৰীসকলক বুজাবলৈ চেষ্টা কৰিছিল যদিও প্রতিবাদকাৰীসকলে মন্ত্রীগৰাকীক বিভিন্ন প্রশ্ণৰে থকা–সৰকা কৰে আৰু উপায়ুক্তক বর্খাস্ত কৰিবলৈ দাবী জনায়৷

এফালে ৰাজপথত প্রতিবাদকাৰীৰ উত্তাল প্রতিবাদ আনফালে আৱর্ত ভৱনত মুখ্যমন্ত্রীয়ে দল–সংগঠনৰ লগত আলোচনাৰ অন্তত সাংবাদিকক সাক্ষাৎ কৰি মাজুলীৰ পৰা হেলিকপ্টাৰে ৰাওনা হোৱাৰ ঠিক পাছতেই প্রতিবাদকাৰীসকলক মুখ্যমন্ত্রীয়ে সাক্ষাৎ নিদিয়াত পুনৰ ক্ষুব্ধ হৈ বেৰিকেডৰ সন্মুুখত বেৰিকেড ভাঙি যাবলৈ উদ্যত হোৱাত অতিৰিক্ত উপায়ুক্ত কার্তিক কলিতাৰ নির্দেশত আৰক্ষী আৰু চি আৰ পি এফ বাহিনীয়ে প্রতিবাদকাৰীসকলৰ্ ওপৰত লাঠীচালনা কৰে৷ এই লাঠীচালনৰ ঘটনাত প্রায় ৬জন প্রতিবাদকাৰী আহত হয়৷ প্রায় ৫ ঘণ্টা ধৰি ৰাজপথ অৱৰোধ কৰি প্রতিবাদকাৰীসকলে এই প্রতিবাদ সাব্যস্ত কৰে৷

বঙাইগাঁৱৰ বিদ্যাপুৰ আৰক্ষী চকীৰ অন্তৰ্গত নানকাৰগাঁৱত ১৮ দিনীয়া শিশু চুৰিৰ চাঞ্চল্যকৰ কাণ্ড সংঘটিত হৈছে ৷ নিশা বিছনাত শুই থকা অৱস্থাতে মাতৃৰ বুকুৰ পৰা অন্তৰ্ধান হল পানী কেঁচুৱা ৷

বিনয় সূত্ৰধৰ নামৰ লোকজনৰ সদ্যোজাত সন্তানক নিশা ঘৰৰ পৰাই কোনোবাই চুৰি কৰি নিয়ে ৷ মাক শেফালী সূত্ৰধৰে নিজ সন্তানক লৈ নিশা টোপনি যোৱাৰ পিছত কাষতে থকা কণমাণি সন্তানটি অন্তৰ্ধান হৈ পৰে ৷ পৰৱৰ্তী সময়ত মাজ নিশা মাকে উঠি নিজৰ সন্তানক কাষত নাপাই হুৱাদুৱা লগায় ৷ ঘৰৰ ভিতৰৰ পৰা বন্ধ কৰা দৰ্জাখনো  খোলা অৱস্থাত মহিলাগৰাকীয়ে প্ৰত্যক্ষ কৰে ৷

ইতিমধ্যে জিলাৰ আৰক্ষী অধীক্ষক স্বপ্ননীল ডেকাসহ আৰক্ষী বিষয়া বৰ্গ ঘটনাস্থলীত উপস্থিত হৈ তদন্ত  আৰম্ভ কৰিছে ৷ কিন্তু ঘটনাৰ প্ৰকৃত ৰহস্য বৰ্তমানলৈ উদঘাটন হোৱা নাই ৷