‘চ’চিয়েল মিডিয়া বা ইলেকট্রনিক মিডিয়াৰ বহল প্ৰসাৰত ছপা মাধ্যমৰ বিকাশ স্থবিৰ নোহোৱা নহয়। কিন্তু পুনৰ নতুন প্ৰজন্মৰ প্ৰচেষ্টাতে গ্ৰন্থই পোহৰৰ বাট মেলিব । ‘ এই মন্তব্য বিশিষ্ট লেখক – সমালোচক অৰিন্দম বৰকটকীৰ। আজি  যুৱ লেখক, নাট্যকৰ্মী গৌৰাংগ বৰাৰ ‘গদ্য লেখা’শীৰ্ষক গ্ৰন্থ উন্মোচন কৰি  বৰকটকীয়ে এই মন্তব্য আগবঢ়াই।  বৰকটকীয়ে গ্ৰন্থ প্ৰসংগৰ উল্লেখ কৰি  কয় যে ‘ যুৱ লেখক গৌৰাংগ বৰাৰ গদ্য লেখাৰ প্ৰতিটো বিষয়ে গুৰুত্বপূৰ্ণ। চুটি লেখাৰ মাজেৰে গভীৰ বিষয়বস্তু গ্ৰন্থ খনিত পাঠকে বিচাৰি পাব ‘ । নগাঁও ইলেকট্রনিক মিডিয়াৰ কাৰ্যালয়ত ক’ভিড প্ৰট’কল মানি অনুষ্ঠিত হোৱা গ্ৰন্থ উন্মোচনী সভাত বিশিষ্ট অতিথি হিচাপে উপস্থিত থাকি কলংপাৰ কাকতৰ মুখ্য সম্পাদক তথা জেষ্ঠ্য সাংবাদিক গুৰুমাইল সিঙে কয় যে ‘ গৌৰাংগ বৰাৰ দৰে নতুন প্ৰজন্মৰ লেখকসকলেই ভৱিষ্যতে অসমীয়া ভাষা সাহিত্যক ধৰি ৰাখিব লাগিব।’ সন্মানীয় অতিথি হিচাপে নগাঁও প্ৰেছ ক্লাবৰ সভাপতি কনক হাজৰিকাই ভাষণ প্ৰসংগত কয় ‘ নতুন প্ৰজন্মৰ লেখক সকলে গ্ৰন্থ ৰচনাত ব্ৰতী হোৱাটো গ্ৰন্থ পঢ়ুৱৈৰ বাবে আশাৰ ৰেঙনি। ‘  ‘ পৱন কুমাৰ বৰাই আঁত ধৰা গ্ৰন্থ উন্মোচনী অনুষ্ঠানটিত গ্ৰন্থ খনিৰ লেখক গৌৰাংগ বৰাই নিজৰ অনুভৱ ব্যক্ত কৰি কয় যে ‘  নতুন প্ৰজন্মক গ্ৰন্থ অধ্যায়নৰ  প্ৰতি আগ্ৰহী কৰি তোলায়ে আমাৰ মূল উদ্দেশ্য। শংকৰদেৱৰ পৰা, জ্যোতিপ্রসাদ আগৰৱালাৰ নাটকৰ লগতে সমাজ আৰু ভাষাৰ প্ৰতিটো দিশ মাথো গ্ৰন্থ খনিত চুই যাবলৈ চেষ্টা কৰিছো। অনুষ্ঠানত সাংবাদিক অজিত শইকীয়া, বিৰেণ বৰা, লেখকৰ পিতৃ নাৰায়ণ বৰা,মিজু বৰাকে প্ৰমুখ্য কৰি নগাঁও ইলেকট্রনিক মিডিয়াৰ সংবাদকৰ্মী সকল গ্ৰন্থ উন্মোচনী সভাত উপস্থিত থাকে।

শোণিতপুৰ জিলাৰ জামুগুৰিহাটৰ শিল্পী,কবি তথা বিদেশত ইংৰাজী ভাষাত ভাওনা প্ৰদৰ্শনৰে খ্যাতি অৰ্জন কৰা অৰুপ শইকীয়াই বাঁ‌হ-কাঠ আৰু কংক্ৰিটেৰে নিৰ্মাণ কৰি উলিয়াইছে এটি বিশেষ আৰ্হিৰ তিনিমহলীয়া ঘৰ। যোৱা বৰ্ষৰ ক’ভিড মহামাৰীৰ ফলত হোৱা লকডাউনৰ সময়ত আৰম্ভ কৰা নিজৰ পৰিকল্পনাৰে বাঁ‌হ-কাঠেৰে থলুৱা অসমীয়া আৰ্হিৰ কাৰুকাৰ্যৰ সম্পূৰ্ণভাবে পৰিস্ফূটিত হোৱা এটা সম্পূৰ্ণ ঘৰ। বৰ্তমাণ সময়ত হেৰাই যাব বিচৰা অসমীয়াৰ থলুৱা বাঁহ-কাঠৰ ব্যৱহাৰ যেন পুনৰুজ্জীৱিত কৰি এটি আটক ধূনীয়া ঘৰটিৰ তেওঁৰ পিতৃৰ নামেৰে ‘হেমাপদ্ম আলয়’ নাম ৰাখিছে। দেশ-বিদেশত ইংৰাজী ভাষাত ভাওনা প্ৰদৰ্শন কৰি জনপ্ৰিয়তা লাভ কৰা অৰুপ শইকীয়াই জানিব দিয়া অনুসৰি প্ৰবাসী পৰ্যটক বা শিল্পীক অসমৰ থলুৱা কাৰিকৰী বিদ্যাৰ সুন্দৰ উপস্থাপন আৰু আৰ্হি প্ৰদৰ্শনৰ বাবে ঘৰটো সাজিছে বুলি কয়। অসমত পৰ্যাপ্ত পৰিমাণে পোৱা বাঁহ-কাঠৰ গুণগত মান বিশ্ববন্দী। বাঁহেৰে নিৰ্মিত ঘৰটোৰ প্ৰথম মহলাৰ চিৰি আৰু তৃতীয় মহলালৈ যোৱা চিৰিটো কাঠেৰে নিৰ্মিত। তৃতীয় মহলাত ক’লা,কৌশলী তথা সংস্কৃতি চৰ্চাৰ বাবে ষ্টুডিঅ হিচাপে ব্যৱহাৰ উপযোগীকৈ নিৰ্মাণ কৰা হৈছে বুলি জনাই। মস্কু(Moscow) আৰ্হিৰ অসমীয়া থলুৱা কাৰুকাৰ্যৰ সংমিশ্ৰণেৰে গঢ় দিয়া ঘৰটো সঁ‌চাই এক আকৰ্ষণৰ কেন্দ্ৰ বিন্দু হৈ পৰিছে জামুগুৰিহাটৰ সংগীয়া মাজৰচুক।

গনতান্ত্ৰিক প্ৰতিবাদৰ যেন মূল্য নাই বিজেপি চৰকাৰৰ শাসনৰ দিনত৷ চুৰ- ডকাইত, মাফিয়ালৈ গুলিচালনা কৰি চৰ্চা লাভ কৰা ডঃ হিমন্ত বিশ্ব শৰ্মা নেতৃত্বাধীন বিজেপি চৰকাৰখনে এতিয়া যেন বন্দুকৰ গুলিৰে ৰোধ কৰিব বিচাৰিছে প্ৰতিবাদৰ কণ্ঠ৷ আজি ইয়াৰেই যেন পৰিস্ফুটন দেখিবলৈ পোৱা গল তিনিচুকীয়াৰ বাঘজানত৷ অইলৰ তেল খাদ বিস্ফোৰন হৈ সৰ্বহাৰা হোৱা বাঘজানৰ বহু পৰিয়ালে আজিও নাপালে উচিত ক্ষতিপূৰণ৷ ক্ষতিপূৰণৰ দাবীত গনতান্ত্ৰিক আন্দোলন সাব্যস্ত কৰা বাঘজানৰ নিৰস্ত্ৰ জনতাৰ ওপৰত আজি জপিয়াই পৰিল আৰক্ষী আৰু অৰ্ধসামৰিক বাহিনী৷ প্ৰতিবাদী জনতাক ছত্ৰভংগ দিয়াবলৈ আৰক্ষীয়ে কৰিলে গুলিচালনা৷ আৰক্ষীৰ এই গুলিচালনাত আহত হৈছে ৬ গৰাকীকৈ লোক৷ উল্লেখ্য যে, ২০২০ বৰ্ষৰ ২৭ মে’ত তিনিচুকীয়া জিলাৰ বাঘজান গাওস্থিত অইলৰ বিজিআৰ-৫ নং তৈলক্ষেত্ৰত বিস্ফোৰণ সংঘটিত হৈছিল৷ ঘটনাটোৰ দ্বাৰা ক্ষতিগ্ৰস্ত ৰাইজ এতিয়াও ক্ষতিপূৰণ বিচাৰি আজিও হুমুনিয়াহ কাঢ়ি থাকিবলগীয়া হৈছে। ঘটনাৰ ক্ষতিগ্ৰস্ত পৰিয়ালক ক্ষতিপূৰণ প্ৰদান নকৰি অইল আৰু জিলা প্ৰশাসনে এচাম সুবিধাবাদী ঠিকাদাৰক বৃহৎ বৃহৎ অংকৰ পুঁজি মোকলাই দিয়েই দায়িত্ব সামৰা বুলি অভিযোগ উত্থাপন কৰি স্থানীয় ক্ষতিগ্ৰস্ত ৰাইজে বিগত সময়ত বাৰাম্বাৰ সাব্যস্ত কৰি আহিছে প্ৰতিবাদ। বাঘজানৰ বিজিআৰ-৫ নং তৈল খাদত বিস্ফোৰণ ঘটি সংঘটিত অগ্নিকাণ্ডই অঞ্চলটোৰ প্ৰায় ১,৬০০ পৰিয়ালে বিস্তৰ ক্ষয়ক্ষতিৰ সন্মুখীন হৈছিল ৷ ক্ষতিগ্ৰস্ত লোকসকলক আশ্ৰয় শিবিৰত ৰাখি অইল আৰু জিলা প্ৰশাসনে প্ৰতিটো ক্ষতিগ্ৰস্ত পৰিয়ালক তৎকালীন ক্ষতিপূৰণ, ক্ষতিপূৰণৰ আগধন আৰু এককালীন ক্ষতিপূৰণ মোকলাই দিয়াৰ প্ৰতিশ্ৰুতি দিছিল যদিও আজিপৰ্যন্ত প্ৰায় ১,২০০ টা ক্ষতিগ্ৰস্ত পৰিয়ালে ক্ষতিপূৰণৰ ফুটা কড়ি এটাও নোপোৱাৰ অভিযোগ উত্থাপন কৰিছে ৷ বিপৰীতে বাঘজানৰ কেৱল ৬২৫ টা পৰিয়ালকহে অইল আৰু জিলা প্ৰশাসনে পাকে প্ৰকাৰে সকলোধৰণৰ সুবিধা আদায় দিয়া বুলি অভিযোগ তুলিছে। কিছুদিনৰ পূৰ্বে স্থানীয় ৰাইজে বাঘজান স্থিত অইল খাদৰ সা- সৰমঞ্জানসমূহ আবদ্ধ কৰি অইলে ক্ষতিপূৰণ প্ৰদানৰ পিছতহে সা- সৰমঞ্জান সমূহ হস্তান্তৰ কৰিব পাৰিব বুলি হুংকাৰ দিছিল৷ কিন্তু আজি অইলে আৰক্ষী আৰু নিৰাপত্তাৰক্ষীৰ বিশাল কনভয় লৈ ঘটনাস্থলীত উপস্থিত হৈ অইলৰ গাড়ীকে ধৰি বিভিন্ন সা সৰমঞ্জানসমূহ নিবলৈ উদ্যত হওতেই গাওবাসীৰ প্ৰতিবাদৰ সন্মূখীন হয়৷ গঞা ৰাইজে পথ অবৰোধ কৰি অইলৰ এই কাৰ্য্যত বাধা প্ৰদান কৰাত ডুমডুমা ৰাজহ চক্ৰ বিষয়া উপস্থিত হৈ ৰাইজৰ এই আন্দোলন বে আইনী ঘোষনা কৰে৷ আৰক্ষী, অৰ্ধসামৰিক বাহিনীয়ে প্ৰতিবাদকাৰীৰ ওপৰত লাঠি চালনা কৰে৷ প্ৰতিবাদকাৰী জনতাই উত্তেজিত হৈ আৰক্ষীলৈ শিলগুটি নিক্ষেপ কৰাত আৰক্ষীয়ে প্ৰতিবাদকাৰীক ছত্ৰভংগ দিবৰ বাবে কন্দোৱা গেছ প্ৰয়োগ কৰাৰ লগতে গুলিচালনা কৰে৷ আৰক্ষীয়ে প্ৰতিবাদকাৰীলৈ লক্ষ্য কৰি বহুকেইজাই গুলি চালনা কৰে৷ এই ঘটনাত আৰক্ষীৰ মতে, এজন লোক আহত হৈছে যদিও গাওবাসীয়ে ৬ গৰাকীকৈ লোক আহত হৈছে বুলি দাবী কৰিছে৷ আহতসকল ক্ৰমে- ৰন্তু মৰাণ( ২০), বৰ্ণালী মৰাণ( ৩৫), কেহুধৰ হাজৰিকা( ৩৬), ধনেশ্বৰ বৰা( ৪২), বিনোদ মৰাণ( ৪০) আৰু প্ৰকাশ হাজৰিকা( ২৬) বুলি জানিব পৰা গৈছে৷ আহতসকলক ইতিমধ্যে তিনিচুকীয়া অসামৰিক চিকিৎসালয়ত ভৰ্টি কৰোৱা হৈছে৷ প্ৰতিবাদকাৰীসকলৰ মটৰ চাইকেল, চাইকেলসমূহ আৰক্ষীয়ে জব্দ কৰি থানালৈ লৈ যায়৷ আনফালে, ৰাইজৰ শিলাবৰ্ষনত অইলৰ অগ্নিনিৰ্বাপক বাহিনীৰ এখন গাড়ী ক্ষতিগ্ৰস্থ হৈছে৷ পৰবৰ্তী সময়ত পৰিস্থিতি শাম কাটে যদিও অঞ্চলটোত উত্তেজনাই বিৰাজ কৰিছে৷ আৰক্ষীয়ে চুৰ ডকাইটৰ দৰে প্ৰতিবাদী নিৰস্ত্ৰ জনতালৈ গুলিচালনা কৰাতো কিমানদূৰ যুক্তিসংগত বুলি প্ৰশ্ন কৰিছে সচেতন মহলে৷

ভাৰতীয় বিদ্যালয় প্ৰমাণপত্ৰ পৰীক্ষা পৰিষদ, চি.আই.এছ.চি.ই.য়ে ২৪জুলাই, ২০২১ তাৰিখে ঘোষণা কৰে আই.চি.এছ.ই., আই.এছ.চি.২০২১ৰ ফলাফল । ইয়াৰ সৈতে সম্পৰ্কিত, চি.আই.এছ.চি.ই.-য়ে দশম আৰু দ্বাদশ শ্ৰেণীৰ ফলাফল আবেলি ৩ বজাত মুকলি কৰে। পৰীক্ষাৰ বাবে পঞ্জীয়ন কৰা শিক্ষাৰ্থীসকলে cisce.org তেওঁলোকৰ ফলাফল অনলাইন লাভ কৰিব পাৰে।

দক্ষিণ কামৰূপ জিলাৰ নগৰবেৰা আৰক্ষীয়ে শুক্ৰবাৰে নিশা অভিযান চলাই দুজনকৈ দুধৰ্ষ ডকাইত আটক কৰিবলৈ সক্ষম হয়। নগৰবেৰা আৰক্ষীৰ দল এটাই ডকাইত দুজনৰ বিপৰীতে ৰুজু – ১২৮/২০, ১৫৩/২০ গোচৰৰ ভিত্তিত অভিযান চলাই আলোপতিচৰ আৰক্ষীৰ সহযোগত দুয়োকে ক্ৰমে কালাইৰদিয়া আৰু মাজৰচৰৰ নিজগৃহৰ পৰা আটক কৰে। জানিব পৰা মতে ডকাইতদ্বয় ক্ৰমে-বাঘবৰৰ আলোপতিচৰ আৰক্ষী থানাৰ অন্তৰ্গত কালাইৰদিয়া গাঁৱৰ আহম্মদ আলীৰ পুত্ৰ আবুল কালাম আজাদ (৩৬) আৰু মাজৰচৰ গাঁৱৰ হুৰমুজ আলীৰ পুত্ৰ কলম আলী (৩৪)। দুয়োজনে অঞ্চলটোৰ বিভিন্ন চুৰি-ডকাইতি কাণ্ডৰ সতে জড়িত বুলি আৰক্ষীয়ে জানিবলৈ দিয়ে। উল্লেখ্য যে কিছুদিন পূৰ্বে নগৰবেৰাৰ মালঞ্চাত দিন দুপৰতে ব্ৰীজৰ ওপৰত এগৰাকী বিড়ি ব্যৱসায়ীৰ পৰা প্ৰায় তিনি লাখ পঞ্চাশ হাজাৰ টকা লুটি নিয়া ডকাইতি কাণ্ডৰ সতে জড়িত আছিল ধৃত ডকাইতদ্বয়ে। শনিবাৰে পুৱাই দুয়োকে নগৰবেৰা আৰক্ষীয়ে জেল হাজোতলৈ প্ৰেৰণ কৰে।

দৰঙৰ শ্যামপুৰ আৰক্ষী থানাৰ অন্তৰ্গত বদলি চৰ গাঁৱত সংঘটিত হয় এক ভয়াবহ অগ্নিকাণ্ড । আব্দুল গফুৰৰ ঘৰত গেছ চিলিণ্ডাৰ বিস্ফোৰণ হৈ অগ্নিকাণ্ডৰ সুত্ৰপাত হয় । যোৱা কালি ( শুক্ৰবাৰে ) দিনৰ ১ মান বজাত সংঘটিত অগ্নি কাণ্ডৰ ফলত নিমিষতে ভস্মীভূত হয় কেইবাটাও বাসগৃহৰ লগতে ঘৰত থকা বিভিন্ন আজবাব , গুৰুত্বপূৰ্ণ নথি পত্ৰৰ লগতে নগদ ধন  জুইত জাহ যায় । লগে লগে খবৰ দিয়া হয় অগ্নি নিৰ্বাপক বাহিনীক । অগ্নি নিৰ্বাপক বাহিনীৰ লোক ঘটনাস্থলিত উপস্থিত হৈ স্থানীয় ৰাইজৰ সহযোগত জুই নোমোৱাবলৈ সক্ষম হয় যদিও প্ৰায় ৭ লক্ষাধিক টকাৰ সা সম্পত্তিৰ ক্ষতিসাধন হোৱা বুলি ভোক্তভোগী পৰিয়ালে জানিবলৈ দিয়ে । আনহাতে জুই নোমোৱাবলৈ আগবাঢ়ি যোৱাত ছহিদুল ইছলাম নামৰ যুৱক এজন গুৰুতৰ ভাৱে আহত হয় । আহত যুৱক জনক ততাতৈয়াকৈ মঙলদৈ অসামৰিক চিকিৎসালয়লৈ প্ৰেৰণ কৰা হয় ।  বিস্ফোৰণ হোৱা গেছ চিলিণ্ডাৰৰ কিছু অংশ চিটিকি যুৱক জনৰ হাতত লগাত হাতৰ দুখন আঙুলি চিঙি যায় ।  বৰ্তমান মঙলদৈ অসামৰিক চিকিৎসালয়ত চিকিৎসাধীন অৱস্থাত আছে ছহিদুল ইছলাম ।  উল্লেখযোগ্য যে আব্দুল গফুৰৰ ঘৰত লগা জুই কাষৰ ছাইদুৰ ৰহমানৰ ঘৰতো বিয়পি পৰে । দুটাকৈ পৰিয়ালৰ  ঘৰত থকা ধান চাউল সম্পূৰ্ণ জুইত জাহ যায় । বৰ্তমান পৰিয়াল দুটাৰ ঘৰত খাবলৈ এমুঠি চাউল পৰ্যন্ত নাই । শ্যামপুৰ গাওঁ পঞ্চায়তৰ সভাপতি মফিদুল ইছলাম উক্ত ঠাইত উপস্থিত হৈ ঘটনাৰ বুজ লোৱাৰ লগতে কিছু আৰ্থিক অনুদান আগবঢ়াব বুলি প্ৰতিশ্ৰুতি দিয়ে । পৰিয়াল দুটাক আৰ্থিক বাবে সহায় সহযোগিতা আগবঢ়াবলৈ স্থানীয় বিধায়ক তথা অসম চৰকাৰৰ ওচৰত কাতৰ আহ্বান জনাইছে স্থানীয় ৰাইজৰ লগতে অসম সংখ্যালঘু সংগ্ৰাম পৰিষদৰ দৰং জিলাৰ সাধাৰণ সম্পাদক নুৰ মহাম্মদ আলীয়ে ।