ধেমাজি আৰু চিলাপথাৰ আৰক্ষীৰ যুটীয়া অভিযানত দেওবাৰে দুজন যুৱকক আটক কৰাৰ লগতে ১৮.৮ ওজনৰ গ্রাম ব্রাউন চুগাৰ আৰু ৯ হেজাৰ ২৮০ টকা, এটা খালী চিৰিঞ্জ, এখন হিৰ’ বাইচাইকেল আৰু দুটা ম’বাইল ফোন জব্দ কৰে। ধেমাজি গােহাঁই গাঁৱৰ কেশৱ বুঢ়াগােঁহাইৰ পুত্র আকাশ বুঢ়াগােহাই (২১)আৰু চিলাপথাৰৰ ৰবীন চন্দ্র পাইটৰ পুত্র মানসপাইট (২৩) যুৱক দ্বয়ে ধেমাজি সদৰৰ পৰা চিলাপথাৰ নগৰত ১৮.৮ গ্রাম ব্রাউন চুগাৰ বিক্ৰী কৰিবলৈ অহাৰ গোপন তথ্যৰ ভিত্তিত ধেমাজি আৰক্ষীৰ দলে তানুসৰণ কৰি খেদি যায়। ৩৫ কিল’মিটাৰ দূৰত্ব অনুসৰণ কৰি চিলাপথাৰ আৰক্ষীৰ সহযােগত যুটীয়া অভিযান চলাই চিলাপথাৰ জোনাকী নগৰত চুগাৰসহ দুয়ো জনক হাতে-লােটে কৰায়ত্ত কৰে।

ৰাজ্যখনৰ ক’ভিড পৰিস্থিতিৰ প্ৰতি লক্ষ্য ৰাখি আজি ঘোষণা কৰা নতুন SOP অহা মঙলবাৰ (২০ জুলাই/২০২১)ৰ পুৱা ৫ বজাৰ পৰা এসপ্তাহলৈ প্ৰযোজ্য হ’ব। মৰিগাঁও আৰু গোৱালপাৰা জিলাত লকডাউন শিথিল কৰি দুপৰীয়া ১২ বজালৈকে সকলো কাৰ্যালয় আৰু দোকান, জিলাৰ ভিতৰত পৰিবহন তথা যাতায়াত ব্যৱস্থা মুকলি থাকিব। দুপৰীয়া ১ বজাৰ পৰা পিছদিনা পুৱা ৫ বজালৈ প্ৰযোজ্য হ’ব সান্ধ্য আইন। গেলামালৰ দোকানৰ লগতে ইয়াৰে সংলগ্ন শাক-পাচলি আৰু ফলমূলৰ বিপণী বিয়লি ৫ বজালৈকে খোলা থাকিব। জিলাত বিয়লি ৪ বজালৈকে খোলা থাকিব সকলো কাৰ্যালয়, দোকান, জিলাৰ ভিতৰত পৰিবহন তথা যাতায়াত ব্যৱস্থা। বিয়লি পাঁচ বজাৰ পৰা ৰাতিপুৱা পাঁচ বজালৈ সান্ধ্য আইন। ক’ভিড পৰিস্থিতিৰ পৰিপ্ৰেক্ষিত মছজিদ-ঈদগাহত মাথো ৫গৰাকী লোকক ঈদৰ ধৰ্মীয় ৰীতি-নীতি পালন কৰিবলৈ অনুমতি প্ৰদান কৰা হৈছে। পূৰ্বৰ দৰেই ৰাজ্যত আন্তঃজিলা যাতায়াত সম্পূৰ্ণ বন্ধ থাকিব। পৰৱৰ্তী ঘোষনা পৰ্যন্ত ৰাজ্যত যান বাহন চলাচলৰ ক্ষেত্ৰত Odd/Even ব্যৱস্থা বাহাল থাকিব।

ৰাজ্যৰ ঠায়ে ঠায়ে বৰষুণৰ পৰিমাণ বৃদ্ধি পাইছে যদিও বহু ঠাইত বৰষুণ কম হোৱাত পানীৰ অভাৱত শালি খেতিৰ  বাবে সমস্যাৰ সন্মুখীন হৈছে কৃষকসকল।আহাৰ মাহৰ পৰাই পথাৰত শালি খেতিৰ ভূই ৰোৱাৰ পৰ্ব আৰম্ভ হয় যদিও খুমটাই সমষ্টিৰ অন্তৰ্গত দেৰগাঁও ৰাজহ চক্ৰৰ আমনিপাম অঞ্চলৰ কৃষকে পানীৰ অভাৱত মূৰে কপালে হাত দিব লগা পৰিস্থিতিৰ সৃষ্টি হৈছে। পথাৰত খৰালি সদৃশ পৰিবেশৰ সৃষ্টি হোৱাত এগছি ভূই ৰুব পৰা নাই কৃষকে। পথাৰৰ কঠিয়া পথাৰতে শুকাবলৈ লৈছে।অঞ্চলটোৰ কৃষকৰ সুবিধাৰ বাবে  ২০১৪ চনতে উত্তৰ দলিজলীয়া আমনিপাম অঞ্চলত জলসিঞ্চন বিভাগৰ অগভীৰ নলীনাদ প্ৰকল্প স্থাপন কৰে  যদিও আজিলৈকে কৃষক সকলে সেই প্ৰকল্পৰ পৰা কোনোধৰনৰ উপকৃত নোহোৱাৰ অভিযোগ উত্থাপিত কৰিছে।সুবিধা থাকিও সেই সুবিধাৰ পৰা বঞ্চিত হোৱাত ৰাইজ এতিয়া ক্ষোভিত হৈ পৰিছে জলসিঞ্চন বিভাগৰ বিৰুদ্ধে ।ৰাইজৰ অভিযোগ অনুসৰি অঞ্চলটোৰ বিশেষ এজন ব্যক্তিয়ে ব্যক্তিগত ভাবে নিজৰ প্ৰয়োজন অনুসৰি পানীযোগান প্ৰকল্পটোৰ পৰা সুবিধা গ্ৰহণ কৰি আছে অথচ প্ৰকৃত কৃষকৰ প্ৰয়োজনৰ সময়ত কোনো দিনেই পানী নাপায়। এইক্ষেত্ৰত বিভাগীয় লোকক যোগাযোগ কৰিলে পাইপ বেয়া হৈ থকাৰ অজুহাত দেখুৱাই।এনে পৰিপেক্ষিতত ১৭ জুলাইত আমনিপাম অঞ্চলৰ ভূক্তভোগী কৃষক সকল একগোট হৈ এক সভাৰ যোগেদি বিভাগীয় উৰ্দ্ধতম কতৃপক্ষলৈ স্মাৰক পত্ৰ প্ৰেৰণৰ প্ৰস্তাৱ গ্ৰহণ কৰে।ৰাইজৰ অভিযোগ অতি নিম্ন মানদণ্ডৰে নিৰ্মাণ কৰা অগভীৰ নলীনাদ প্ৰকল্পটো দীৰ্ঘদিন ধৰি বিভাগীয় ভাৱে চোৱাচিতা নকৰাত মেৰামতিৰ অভাৱত পথাৰৰ পাইপলাইন সমুহ ঠায়ে ঠায়ে ছিন্ন বিছিন্ন হৈ পৰিছে।চৰকাৰী ধনৰ অপচয় কৰি বহু কেইজন কৰ্মচাৰী জড়িত হৈ থকা এই জলসিঞ্চন প্ৰকল্পটোক ৰাইজৰ উপকৃত হোৱাকৈ কাৰ্যক্ষম কৰি তুলিবলৈ ৰাইজে বিভাগীয় কতৃপক্ষক দাবী জনোৱাৰ লগতে খুমটাই সমষ্টিৰ বিধায়ক মৃনাল শইকীয়াক এই বিষয়ে দৃষ্টি নিক্ষেপ কৰিবলৈ  আহ্বান জনাইছে।ইফালে আহাৰ মাহ পাৰ হৈ শাওন সোমালেহি অথচ পথাৰত এটুপিও পানী নথকাত কৃষি কৰ্মৰে জীৱন নিৰ্বাহ কৰা অঞ্চলটিৰ কৃষক সকল এতিয়া চিন্তিত হৈ পৰিছে ভৱিষ্যতৰ কথা ভাবি।

কৰ’না অতিমাৰীয়ে এক ত্ৰাসৰ সৃষ্টি কৰাৰ পাছতো বিধ্বস্ত পথৰ বাবে ত্ৰাসী মধুসূদন সোঁৱৰি ৰাইজ ৰাজপথলৈ ওলাই আহি পথ নিৰ্মাণৰ দাবীত উত্তাল প্ৰতিবাদ সাব্যস্ত কৰে নাজিৰা মহকুমাৰ সীমান্তবৰ্তী গেলেকী গোহাঁইবাৰীত।উল্লেখ্য যে নাজিৰা মহকুমাৰ সীমান্তবৰ্তী গেলেকী দোলাকাষৰীয়া পঞ্চায়তৰ অন্তৰ্গত ১০নং ৱাৰ্ডৰ অধীনৰ গেলেকী গোহাঁইবাৰী পথৰ বিধ্বস্ত অৱস্হা ই গ্ৰামাঞ্চলটোৰ সহস্ৰাধিক ৰাইজক অতিস্থ কৰি তুলিছে।লোকনিৰ্মাণ বিভাগৰ নাজিৰা পথ সংমণ্ডল ৰ অধীনৰ এই বিধ্বস্ত পথটো নিৰ্মাণৰ ক্ষেত্ৰত বিভাগীয় কৰ্তৃপক্ষই সূদীৰ্ঘ দিনধৰি কোনো ব্যৱস্থা গ্ৰহন নকৰিলে।এই পথটোত থকা দুটাকৈ ইটাভাটা আৰু এটা কয়লা ডিপুলৈ অহা যোৱা কৰা ট্ৰাক সমূহে এই বাৰিষা সম্পূৰ্ণ বোকাময় কৰি তুলিছে,যাৰবাবে পথটিয়েদি ৰাইজৰ যাতায়ত কৰাত ব্যাপক সমস্যাৰ সন্মুখীন হৈছে।পথটিয়েদি সৰু গাড়ী বা এই ক’ৰোনা মহামাৰীৰ সময়ত প্ৰয়োজনত এখন এম্বুলেঞ্চ ও সোমাব নোৱাৰে।পথটি নিৰ্মাণৰ বাবে স্হানীয় ৰাইজে স্হানীয় বিধায়ক আৰু সাংসদৰ লগতে বিভাগীয় কৰ্তৃপক্ষক বাৰম্বাৰ দাবী জনাই আহিছে যদিও কোনো প্ৰদক্ষেপ গ্ৰহন কৰা এটা পক্ষইও ।যাৰবাবে আজি স্হানীয় ৰাইজে পথটি নিৰ্মাণৰ দাবীত অৱৰোধ কৰি প্ৰতিবাদ সাব্যস্ত কৰে।

ওদালগুৰি জিলাৰ অভিভাৱক মন্ত্ৰী অশোক সিংঘালে  ১৮ জুলাইত  ওদালগুৰিত উপস্থিত হৈ ক’ভিড’১৯ত মৃত্যু হোৱা ওদালগুৰি জিলাৰ ৭গৰাকী স্বামীহাৰাৰ পত্নীৰ মাজত  চেক বিতৰণ কৰে। স্থানীয় ওদালগুৰি কলেজৰ অডিট’ৰিয়াম হলত ওদালগুৰি জিলাৰ উপায়ুক্তৰ সভাপতিত্বত ওদালগুৰি জিলাৰ অভিভাৱক মন্ত্ৰী অশোক সিংঘালে প্ৰতি গৰাকী পত্নীক মুখ্যমন্ত্ৰীৰ সাহাৰ্য নিধিৰ জৰিয়তে ২লাখ ৫০ হাজাৰ টকাৰ এককালীন সাহাৰ্য প্ৰদান কৰি মন্ত্ৰীগৰাকীয়ে কোভিডত স্বামীক হেৰুৱা দুৰ্ভগীয়া সকলক তেওঁ গভীৰ সমবেদনা জনায়।ওদালগুৰি জিলা উপায়ুক্ত কাৰ্যালয়ৰ অতিৰিক্ত সহায়ক আয়ুক্ত নীলাক্ষি বৈশ্যই আঁত ধৰা উক্ত চেক বিতৰণ অনুষ্ঠানত  বিটিআৰৰ উপমুখ্য কাৰ্যবাহী তথা বিধায়ক গোবিন্দ বসুমতাৰী,মাজবাটৰ বিধায়ক চৰণ বড়োয়েও হিতাধিকাৰী মহিলাসকলক চেক বিতৰণ কৰে।উক্ত অনুষ্ঠানত কেইবাগৰাকীও বিশিষ্ট লোক উপস্থিত আছিল।এই সাহাৰ্য লাভ কৰা সকলৰ ভিতৰত আছে ওদালগুৰি জিলাৰ  খৈৰাবাৰীৰ বিমালেন্দু দত্তৰ পত্নী বৰ্নালী দত্ত,মাজবাট ষ্টেচন ব্লকৰ উমা শংকৰ হৰিজনৰ পত্নী কুচমাবাতি ৰবিদাস,ৰৌতা চাৰিআলিৰ অমলেন্দু চক্ৰৱৰ্তীৰ পত্নী ৰত্না চক্ৰৱৰ্তী,নবীনপল্লীৰ অজিৎ চৰকাৰৰ পত্নী ৰুমা চৰকাৰ,খাংখালাবাৰীৰ মনোজ ৰাইৰ পত্নী গঙ্গা ৰাই,বান্দৰগুৰিৰ যমুনা বিশ্বকৰ্মাৰ পত্নী কমলা দেৱী আৰু বৰঙাজুলি খুটিৰ দীপক থপলীয়াৰ পত্নী ইন্দিৰা দেৱী।

হিমন্ত বিশ্ব শৰ্মাই ৰাজ্যৰ শাসনভাৰ হাতত লোৱাৰে পিছত তেওঁৰ নিৰ্দেশত আৰক্ষী প্ৰশাসনে ড্ৰাগছ, গাঞ্জা আদি নিচাজাতীয় দ্ৰব্যৰ বিৰুদ্ধে ব্যাপক অভিযান চলাই বৃহৎ পৰিমানৰ নিচাজাতীয় সামগ্ৰী জব্দ কৰাৰ লগতে বহুকেইজন সৰবৰাহকাৰীক গ্ৰেপ্তাৰ কৰিবলৈ সক্ষম হৈছে৷ অসমৰ বিভিন্ন জিলাৰ লগতে হোজাই আৰক্ষীয়েও বিগত কিছুদিন ধৰি অভিযান চলাই বৃহৎ পৰিমানৰ নিচাজাতীয় কফ সিৰাপ, ব্ৰাউন সুগাৰ, গাঞ্জা আদি জিলাখনৰ বিভিন্ন প্ৰান্তৰ পৰা জব্দ কৰিছে৷ হোজাই আৰক্ষী অধীক্ষক বৰুণ পুৰকায়স্থ, অতিৰিক্ত আৰক্ষী অধীক্ষক পনজিৎ দুৱৰা আৰু উপ আৰক্ষী অধীক্ষক ৰৌজি তালুকদাৰে তৎপৰতাত জিলাখনৰ বিভিন্ন প্ৰান্তৰ পৰা জব্দ কৰা নিচাজাতীয় সামগ্ৰীসমূহ আজি হোজাইৰ সদৰ শংকৰদেৱনগৰত দাহ কৰি বিনষ্ট কৰা হয়৷ নিচাজাতীয় সামগ্ৰীসমূহ বিনষ্টকৰণ অনুষ্ঠানত অংশগ্ৰহণ কৰে অসমৰ মুখ্যমন্ত্ৰী ড° হিমন্ত বিশ্ব শৰ্মা আৰু অসম আৰক্ষী সঞ্চালকপ্ৰধান ভাস্কৰজ্যোতি মহন্তই৷দিনৰ প্ৰায় এক বজাত হেলিকপ্টাৰেৰে নগাঁওৰ পৰা হোজাইৰ শংকৰদেৱনগৰত উপস্থিত পোনে পোনে এই কাৰ্যসুচীত অংশগ্ৰহণ কৰে৷ লগতে এই কাৰ্যসূচীত যমুনামুখৰ বিধায়ক সিৰাজুদ্দিন আজমল, হোজাইৰ বিধায়ক ৰামকৃষ্ণ ঘোষ, লামডিঙৰ বিধায়ক শিৱু মিশ্ৰ, হোজাইৰ উপায়ুক্ত ড° সাদনেক সিং, হোজাই আৰক্ষী অধীক্ষক বৰুন পুৰকায়স্থ তথা হোজাইৰ প্ৰাক্তন বিধায়ক শিলাদিত্য দেৱে অংশগ্ৰহণ কৰি শংকৰদেৱনগৰ ময়দানত জ্বলাই বিনষ্ট কৰে নিচাজাতীয় সামগ্ৰীসমূহ৷ গই উপলক্ষে শংকৰদেৱনগৰত আয়োজন কৰা হয় এখন ৰাজহুৱা সভা৷ সভাত ভাষণ প্ৰসংগত হিমন্ত বিশ্ব শৰ্মাই কয় যে একবাৰে কমবয়সীয়া কিশোৰ ড্ৰাগছৰ কবলত পৰি এক অন্ধকাৰময় দিশেৰে গতি কৰিছে৷ ৰাজ্যত এনে পিতৃও আছে, যাৰ দুয়োটি সন্তানে ড্ৰাগছৰ কবলত পৰি মৃত্যুবৰণ কৰিছে৷ বহু পৰিয়াল ড্ৰাগছৰ বাবে ধ্বংস হৈ পৰিছে৷ বহুতে ড্ৰাগছ সেৱনকাৰী পুত্ৰক জীয়াই ৰাখিবলৈ নিজৰ মাটিকনো বিক্ৰী কৰিবলগীয়া হৈছে৷ ড্ৰাগছ সেৱনকাৰী সকলে নিজৰ পৰিয়ালটোক শেষ কৰাৰ পিছতে লাহে লাহে অপৰাধমুলক কাৰ্যত লিপ্ত হয়৷ যাৰ বাবে ড্ৰাগছ তথা নিচাজাতীয় দ্ৰব্যৰ বিৰুদ্ধে চৰকাৰে এই অভিযান আৰম্ভ কৰি যথেষ্ট সফলতা লাভ কৰাৰ কথি দোহাৰে মুখ্যমন্ত্ৰী শৰ্মাই৷ তেওঁ লগতে কয় যে মে মাহৰ ১০ তাৰিখৰ পৰা জুলাইৰ ১৫ তাৰিখলৈকে মুঠ ৮৭৪ টা ড্ৰাগছৰ গোচৰ পঞ্জীয়ন হৈছে৷ ১৪৯৩ জন ড্ৰাগছ সৰবৰাহকাৰী তথা ড্ৰাগছ ব্যৱসায়ৰ লগত জড়িত থকা অপৰাধীক কৰায়ত্ব কৰা হৈছে৷ লগতে ২০ কেজি হিৰোইন, ৮২৭ কেজি গাঞ্জা,  ১৪ কেজি অপিয়াম, ৬৭৬৫০ টা কফ সিৰাফ,১২ লাখ ৯৩ হাজাৰ ৬২৮ টা নিচাজাতীয় টেবলেট, ২ কেজি মৰফিন,  ৩৩১৪ কেজি পপিষ্ট্ৰো, আদি নিচাজাতীয় সামগ্ৰীৰ লগতে নগদ ধন ১ কোটি ৯ লাখ ২৮ হাজাৰ ৭৬২ টকা, ১৩ হাজাৰ ৬৩০ টকাৰ বৈদশিক মুদ্ৰা, নকল মুদ্ৰা ৬ হাজাৰ ৮০০ টকা ড্ৰাগছ ব্যৱসায়ী সকলৰ পৰা জব্দ কৰিবলৈ সক্ষম হৈছে বুলি মন্তব্য কৰে মুখ্যমন্ত্ৰীজনে৷ লগতে ৩১ বিঘা কেনাবীজৰ খেতি ধ্বংস কৰাৰ কথাও উল্লেখ কৰে মুখ্যমন্ত্ৰী হিমন্ত বিশ্ব শৰ্মাই৷ যোৱা দুমাহত মুঠ ১৬৩ কোটি টকাৰ ড্ৰাগছ জব্দ কৰা বুলি ভাষনত উল্লেখ কৰে৷ অসম আৰক্ষী সতৰ্ক হোৱা বাবেই এই সফলতা লাভ কৰিব পাৰিছে বুলি মন্তব্য কৰে তেওঁ৷ সভাত মুখ্যমন্ত্ৰীজনে এই সফলতাৰ বাবে অসম আৰক্ষীক ধন্যবাদ জনায়৷ দিনে নিশাই পৰিশ্ৰম কৰি অসম আৰক্ষীয়ে ড্ৰাগছৰ সকলো ৰেকেট বন্ধ কৰিবলৈ আহ্বান জনায় হিমন্ত বিশ্ব শৰ্মাই৷ আজি হোজাইত ৩ কেজি ২৪০ গ্ৰাম হিৰোইন, ১ হাজাৰ ১৫ কেজি গাঞ্জা, ২৫ হাজাৰ ৫৫২ টা নিচাজাতীয় টেবলেট দাহ কৰি বিনষ্ট কৰা হয়৷হোজাই আৰক্ষীৰ এনে সফলতাৰ বাবে হোজাই আৰক্ষীকো ধন্যবাদ জ্ঞাপন কৰে হিমন্ত বিশ্ব শৰ্মাই৷ আগন্তুক দিনতো অসম আৰক্ষীক ড্ৰাগছৰ বিৰুদ্ধে এই অভিযান অব্যাহত ৰাখিবলৈ আহ্বান জনায় হিমন্ত বিশ্ব শৰ্মাই৷