ধুবুৰীৰ ঝগৰাৰপাৰ চতুৰ্থ খণ্ড গাঁওৰ আবুল কালাম নামৰ লোক এজনৰ ঘৰত অভিযান চলাই এটা দুষ্প্ৰাপ্য কেঁকো সাপ উদ্ধাৰ কৰিবলৈ সক্ষম হয়। উল্লেখ্য যে, আবুল কালামে তিনি বছৰমান পূৰ্বে মেঘালয়ৰ পৰা তিনিশ টকাত ক্ৰয় কৰি আনিছিল কেঁকো সাপটো। তিনি বছৰে কেঁকো সাপটো পুহি ডাঙৰ দীঘল কৰি কোটি টকা মূল্যত বিক্ৰী কৰাৰ পৰিকল্পনা কৰিছিল আবুল কালামে। কিন্তু আবুল কালামৰ কপাল বেয়া। যোৱা নিশা ধুবুৰী আৰক্ষীৰ দল এটাই এক গোপন তথ্যৰ ভিত্তিত অভিযান চলাই কেঁকো সাপডাল জব্দ কৰাৰ বিপৰীতে আবুল কালামক আটক কৰে। বৰ্তমানে ধুবুৰী সদৰ থানাত  আবুল কালামক জেৰা অব্যাহত ৰাখিছে আৰক্ষীয়ে।

অসমৰ বিশিষ্ট জিকিৰ আৰু জাৰীৰ শিল্পী, প্ৰসিদ্ধ গীতিকাৰ তথা কবি নবাবুদ্দিন আহমেদৰ যোৱা নিশা ১০-৩০ বজাত তেখেতৰ ৰঙিয়াৰ এন টি ৰোড স্থিত নিজা বাসভৱনত মৃত্যু হয়। মৃত্যুৰ সময়ত সংগীত শিল্পীগৰাকীৰ বয়স আছিল ৮৫ বছৰ । শিল্পীগৰাকীৰ মৃত্যুত সমগ্র ৰঙিয়াতে গভীৰ শোকৰ ছা পৰিছে । প্ৰয়াত নবাবুদ্দিন আহমেদে প্ৰায় চাৰি কুৰি জিকিৰ, জাৰী,কাৱালী আৰু আধুনিক গীত ৰচনা কৰি অসমৰ সংগীত জগতখন চহকী কৰি গৈছে । প্ৰয়াত নবাবুদ্দিন আহমেদে ৰচনা কৰা তুমি খোদা মেহেৰবান, লা ইলাহা ইল্লালাহু, ৰমজানৰে ৰোজা ৰখা, খোদাই কলে ৰচুলক, আল্লাহি আল্লা, নামাগো দৌলত, আদিকে ধৰি প্ৰায় অৰ্ধশতাধিক জিকিৰ, জাৰীৰ লগতে কাৱালী ৰচনা কৰি থৈ গৈছে । প্ৰয়াত  আহমেদে ৰচনা কৰা জিকিৰ, জাৰী আৰু কাৱালীসমূহত ৰাজ্যখনৰ কেইবাগৰাকী বিশিষ্ট কন্ঠশিল্পী খগেন মহন্ত, পুলক বেনাৰ্জী, নীলিমা খাতুন, হাফিজা বেগম চৌধুৰী, হাছিনা হাজৰিকা আদিয়ে কন্ঠদান কৰিছিল। প্ৰয়াত আহমেদে ৰচনা কৰা আৰু বিশিষ্ট সংগীত পৰিচালক ৰমেন চৌধুৰীয়ে পৰিচালনা কৰা ‘গুলে নাগমা’ নামৰ কেছেটটি মুকলি হোৱাৰ পিছত অসম চৰকাৰৰ সাংস্কৃতিক সঞ্চালকালয়ে তেখেতক আনুষ্ঠানিকভাৱে সম্বৰ্ধনা জনাইছিল। অসম চৰকাৰৰ শিক্ষা বিভাগৰ অৱসৰপ্ৰাপ্ত কৰ্মচাৰী আহমেদে ৰঙিয়াৰ সামাজিক ক্ষেত্ৰখনৰ লগতো জৰিত হৈ আছিল । মৃত্যুৰ সময়ত আহমেদে পত্নীৰ লগতে দুজন পুত্ৰৰ উপৰি দুগৰাকী কন্যা ইহসংসাৰত এৰি গৈছে । মঙলবাৰেদিনৰ ১০ বজাত নবাবুদ্দিন আহমেদৰ জানাজা সম্পন্ন কৰা হয় ।

 মৰিগাঁও জিলাৰ লাহৰীঘাটৰ  বোৱালগুৰিত ১ জুলাইত এদল দূৰ্বিত্তই এজন চিকিৎসা কৰ্মীক প্ৰহাৰ কৰে।আৰক্ষীয়ে যোৱা কালি  ডিমাপুৰৰ পৰা তিনিওজনকে  গ্ৰেপ্তাৰ কৰিবলৈ সক্ষম হয় । ধৃত অভিযুক্ত কেইজন হ’ল মুকছিদুল ইছলাম, ,আফতাপ হুছেইন আৰু আনোৱাৰ হুছেইন । উল্লেখ্য যে যোৱা ১ জুলাই কৰ্মৰত অৱস্থাত  স্বাস্থ্য  কৰ্মী ছাইফুল ইছলামক ছয়-সাত জনীয়া দূৰ্বিত্তৰ দলে আক্ৰমণ কৰিছিল।পিছত ছাইফুল ইছলামে লাহৰীঘাট আৰক্ষী থানাত এজাহাৰ দাখিল কৰিছিল।দোষীক কৰায়ত্বৰ দাবীত স্বাস্থ্য কৰ্মী সকলে প্ৰতিবাদ সাব্যস্ত কৰিছিল। সেই বাতৰি সংবাদ মাধ্যমত  সম্প্ৰচাৰ হৈছিল।   এজাহাৰৰ ভিত্তিত এজনক গ্ৰেপ্তাৰ কৰি জেল হাজতলৈ প্ৰেৰণ কৰে যদিও বাকী কেইজন অভিযুক্ত পলাতক আছিল। বাকী কেইজন অভিযুক্তৰ ভিতৰত তিনিজনক গ্ৰেপ্তাৰ কৰিবলৈ সক্ষম হয় আৰক্ষী। তিনি অভিযুক্তক লাহৰীঘাট আৰক্ষীয়ে জেল হাজতলৈ প্ৰেৰণ কৰে।

 মৰিগাঁও জিলাৰ    লাহৰীঘাটৰ নিজ গেৰুৱা গাঁও পঞ্চায়ত এলেকাত চোৰৰ উপদ্ৰৱ। সোমবাৰে নিশা পঞ্চায়ত কাৰ্যালয়ৰ তলা ভাঙি লৈ গ’ল দুটা  চলাৰ বেটাৰি, ইনভাৰ্টাৰ, চলাৰ প্লেট আদি । পঞ্চায়তৰ গুৰুত্বপূৰ্ণ নথি পত্ৰৰ কোঠাৰ তলা ভাঙিবলৈ চেষ্টা চোৰৰ। গেছ চিলিণ্ডাৰ পেলাই থৈ গ’ল ৰাস্তাত। দীৰ্ঘ দিন ধৰি চোৰৰ উপদ্ৰৱ হৈ আছে যদিও ভূৰাগাঁও আৰক্ষীয়ে বৰ্তমানলৈ কোনো চোৰকে আটক কৰিব পৰা নাই । গোহালিৰ গৰু ছাগলি কেইটাক লৈয়ো সংকিত গেৰুৱাবাসী। ভূৰাগাঁও আৰক্ষী চূড়ান্ত ব্যৰ্থ জনসাধাৰণক নিৰাপত্তা দিয়াত। মন্দিৰ নামঘৰতো কিছু দিন ধৰি চলি আছে চোৰৰ উপদ্ৰৱ।

ওদালগুৰি জিলাৰ ৰৌতা চক্ৰ আৰক্ষী সংমণ্ডল পৰিদৰ্শক‌‌‌ কাৰ্যালয় তথা  মাজবাট আৰক্ষী থানাৰ অন্তৰ্গত  লাল পানীত  ৬ জুলাই মঙলবাৰে  মাজবাট বন বিভাগে চোৰাং ভাৱে বল্ডাৰ কঢ়িয়াই অনা এখন টেক্টৰ জব্দ কৰিবলৈ সক্ষম হয় ।  জনামতে  ,মাজবাট বনাঞ্চলিক কাৰ্যালয়ৰ বিট অফিচাৰ মিন্টু বড়োৰ নেতৃত্বত যোৱা এটি বন কৰ্মীৰ দলে  নম্বৰ বিহীন বল্ডাৰ কঢ়িয়াই অনা টেক্টৰ জব্দ কৰে । অৱশ্যে  আগতিয়াকৈ বন কৰ্মীৰ দলটোক দেখা পাই  ড্ৰাইভাৰজনে  ট্ৰেক্টৰখন এৰি পলায়ন কৰে।  বল্ডাৰ ভৰ্তি টেক্টৰ খন মাজবাট বনাঞ্চলিক কাৰ্যালয়লৈ আনি বন আইনৰ অধীনত এটি গোচৰ ৰুজু কৰি তদন্ত অব্যাহত ৰাখিছে বিট অফিচাৰ মিন্টু বড়োই ।