বিগত সময়ত সমগ্ৰ ৰাজ্য কপাই তোলা ৪২ টাকৈ হত্যাকাণ্ডৰ মূল অভিযুক্ত কুখ্যাত অপৰাধী বুবু কোৱৰৰ এক সংঘৰ্ষত নাজিৰা মহকুমাৰ গেলেকী আৰক্ষীৰ গুলীত মৃত্যু হোৱা ঘটনাক কেন্দ্ৰ কৰি আজি চাৰিদিন উকলি যোৱাৰ পিছতো সমগ্ৰ জিলাখনত ব্যাপক প্ৰতিক্ৰিয়া অব্যাহত আছে । বহুজন নিৰীহক অতি শীতল মস্তিষ্কৰে শূন্য দূৰত্বৰ পৰা গুলীয়াই হত্যা কৰা দুধৰ্ষ হত্যাকাৰী তথা নৰখাদক চুপাৰি কিলাৰ বুবু কোৱৰৰ হৃদস্পন্দন স্তব্ধ কৰি দিছিল মাত্ৰ এটা বুলেটে । কাৰণবিহীন ভাৱে ১৫ হাজাৰৰ পৰা ২ লাখ টকা পৰ্যন্ত চুপাৰি লৈ এগৰাকীৰ পিছত সিগৰাকী নাৰীৰ শিৰৰ সেন্দুৰ মচি অনা বুবুৰ দৰে নৰখাদকৰ হৃদস্পন্দন মাত্ৰ এটা বুলেটৰ আঘাটত স্তব্ধ হৈ পৰাৰ চাঞ্চল্যকৰ তথ্য সদৰী হৈছে ।  জয়সাগৰস্থ শিৱসাগৰ জিলা অসামৰিক চিকিৎসালয়ত মৰনোত্তৰ পৰীক্ষা সম্পন্ন কৰাৰ সময়ত বুবু কোৱৰৰ শৰীৰৰ পৰা বাহিৰ হৈছে এটা নাইন এম এম পিষ্টলৰ বুলেট । পিঠিয়েদি সোমোৱা গুলী ভেদ কৰিছিল কলিজা । ইয়াৰ উপৰি পিঠিৰ ফালে তিনিটা আঘাটৰ চিহ্ন আছিল যদিও মৰনোত্তৰ পৰীক্ষাৰ সময়ত এটা গুলী উদ্ধাৰ হোৱাৰ তথ্য পোহৰলৈ আহিছে । ইফালে শিৱসাগৰ আৰক্ষীয়ে এক সংঘৰ্ষৰ অন্তত বুবু কোৱৰৰ মৃত্যু হৈছে বুলি দাবী কৰিছে যদিও বুবুৰ শৰীৰৰ পৰা এটা বুলেট উদ্ধাৰ আৰু তিনিটা আঘাতৰ চিহ্নই সমগ্ৰ ঘটনাক্ৰমক সময় অতিবাহিত কৰাৰ লগে লগে অধিক ৰহস্যঘন কৰি তুলিছে । একে সময়তে বুবু কোৱৰৰ সৈতে একেখন স্কুটীতে অহা আন এজন যুৱকো সংঘৰ্ষৰ মাজতে পলায়ন কৰিছিল বুলি আৰক্ষীয়ে স্পষ্ট কৰি দিয়ে যদিও ঘটনা সংঘটিত হোৱাৰ চাৰিদিনৰ পিছতো দ্বিতীয় জন পলায়ন ব্যক্তিৰ কোনো সন্ধান আৰক্ষীয়ে লাভ নকৰাৰ ঘটনাই ৰহস্যৰ সৃষ্টি কৰিছে । ভৌগোলিক ভাৱে চাৰিওফালে ওখ টিলাৰে আৱৰা তথা বোকাময় উক্ত সংঘৰ্ষস্থলীৰ পৰা সংঘৰ্ষৰ মাজতে দ্বিতীয় এজন ব্যক্তি পলায়ন কৰাতো জনগণে সহজে মানি ল’ব পৰা নাই । যাৰ বাবে বিভিন্ন মহলে প্ৰকৃততে এয়া সংঘৰ্ষ নে হত্যা তাক লৈও প্ৰশ্ন উত্থাপন কৰিছে। কিয়নো ৰাজ্যৰ সবাটোকৈ নৰখাদক ৰূপী এটা কুখ্যাত অপৰাধীৰ সংঘৰ্ষত মৃত্যু হোৱাৰ পিছত স্বাভাৱিকতে সংঘৰ্ষস্থলীৰ ফটো , ভি ডি অ’ সংগ্ৰহৰ বাবে স্থানীয় সংবাদসেৱীৰ সৈতে যোগাযোগ কৰিব লাগিছিল । কিন্তু ইয়াৰ বিপৰীতে গেলেকী অথবা শিৱসাগৰৰ প্ৰতিজন আৰক্ষী বিষয়াই সেই সময়ৰ পৰা প্ৰায় এঘণ্টা ধৰি সম্পূৰ্ণ ৰূপে সংবাদকৰ্মীৰ ফোন ধৰাৰ পৰা ৰহস্যজনক ভাৱে বিৰত আছিল । অৱশেষত বুবু কোৱৰৰ মৃতদেহ গেলেকী স্বাস্থ্য কেন্দ্ৰলৈ অনাৰ পিছতহে আৰক্ষীয়ে সংবাদ মাধ্যমৰ সৈতে যোগাযোগ কৰিছিল । যাৰ ফলত সংবাদ মাধ্যমে ঘটনাস্থলীৰ কোনো ফটো , ভি ডি অ’ সংগ্ৰহ কৰিবলৈ সক্ষম নহ’ল । আন নালাগে ঘটনাৰ চাৰিটা দিনৰ পিছতো শিৱসাগৰ আৰক্ষীয়ে ঘটনাস্থলীৰ কোনো ফটো , ভি ডি অ’ ৰাজহুৱা নকৰাৰ ঘটনাই অনেক প্ৰশ্নৰ সৃষ্টি কৰিছে । যিহেতু বিগত সময়ত শিৱসাগৰত মাজনিশা সংঘটিত সংঘৰ্ষৰ পিছতো সংবাকৰ্মীক সংঘৰ্ষস্থলীলৈ নি সংবাদ সংগ্ৰহত সুবিধা দিয়ে । ইয়াৰ বিপৰীতে শিৱসাগৰ আৰক্ষীয়ে প্ৰায় ৫ কিলোমিটাৰ ব্যাসাৰ্ধৰ এক স্থানত সংঘৰ্ষ হ’ল বুলি দাবী কৰাৰ বিপৰীতে সংঘৰ্ষৰ প্ৰকৃত স্থানটো কিয় সংবাদ কৰ্মীক পৰৱৰ্তী সময়ত প্ৰত্যক্ষ নকৰানে তাক লৈও প্ৰশ্নৰ সৃষ্টি হৈছে । বুবু কোৱৰৰ দৰে এটা নৰখাদকৰূপী অপৰাধীক সংঘৰ্ষৰ অন্তত নিধন কৰিবলৈ সক্ষম হোৱা শিৱসাগৰ আৰক্ষীক ৰাইজে মুকলিকৈ অভিনন্দন জনাইছে যদিও সংঘৰ্ষৰ প্ৰকৃত ছবিও ৰাজহুৱা হোৱাটো কামনা কৰিছে । আনহাতে বুবু কোৱৰৰ সংঘৰ্ষত মৃত্যুক লৈ ৰাইজৰ মাজত ব্যাপক প্ৰতিক্ৰিয়া সৃষ্টি হোৱাৰ মাজতে বুবুৰ নৃশংসতাৰ ন ন তথ্য পোহৰলৈ আহিছে । হত্যাক পেচালৈ ৰূপান্তৰিত কৰা আমগুৰি ৰতনপুৰীয়াৰ দুধৰ্ষ ডকাইত বুবু কোৱৰে কৰা নাছিল কী ? শিক্ষকৰ পৰা ব্যৱসায় লৈকে , চিকিৎসকৰ পৰা ৰাজনৈতিক নেতালৈকে ইজনৰ পিছত সিজন নিৰীহক মৃত্যুৰ শীতল দলিছাত শুৱাই বন্য উল্লাহ লাভ কৰা বুবু কোৱৰে মাত্ৰ ১৫ হাজাৰৰ পৰা ২ লাখ টকা লৈকে লৈছিল চুপাৰি  । গাড়ীখনৰ বাবেই চালকজনক হত্যা কৰাতো এটা সাধাৰণ ঘটনাত পৰিণত হৈছিল । অতি পৰিকল্পিত ভাৱে যুৱক – যুৱতী , মহিলাৰ হতুৱাই গাড়ী ভাৰালৈ নি মাজপথত গাড়ীত বহি লোৱা বুবুয়ে শব্দ বিহীন ভাৱেই বহুজন চালকক কেবোলেৰে ডিঙি চেপি হত্যা কৰি গাড়ী লৈ উধাও হৈছিল । শিৱসাগৰ , যোৰহাট , ডিব্ৰুগড় , তিনিচুকীয়া , গোলাঘাটকে ধৰি বিভিন্ন স্থানত বিগত সময়ত উদ্ধাৰ হোৱা বহু দুৰ্ভগীয়া চালকৰ মৃত্যুৰ আৰত আছিল নৰখাদক বুবু কোৱৰ । চৰকাৰী ভাৱে বুবুৰ বিৰুদ্ধে ডেৰকুৰিতকৈও অধিক হত্যাৰ গোচৰ ৰুজু থাকিলেও এনে বহু হত্যাকাণ্ড , নিৰীহ চালকৰ মৃতদেহ উদ্ধাৰৰ পিছত গোচৰ অজ্ঞাত ব্যক্তিৰ বিৰুদ্ধে ৰুজু কৰিয়েই দায়িত্ব সামৰে আৰক্ষীয়ে । সম্প্ৰতি এই ঘটনাই সৰ্বত্ৰে ব্যাপক প্ৰতিক্ৰিয়া সৃষ্টি হোৱা পৰিলক্ষিত হৈছে । 

আজিৰে পৰা ৰাজ্যত কাৰ্যকৰী হ’ব কোভিডৰ নতুন SOP। এসপ্তাহৰ বাবে বাহাল থাকিব নতুন SOPৰ বিধিসূহ। শুকুৰবাৰে সংবাদমেল সম্বোধন কৰি এই কথা জনাইছিল স্বাস্থ্যমন্ত্ৰী কেশৱ মহন্তই।

৪খন জিলাত সম্পূৰ্ণ কণ্টেইনমেণ্ট জ’ন ঘোষণা কৰা হৈছে। বিশ্বনাথ,মৰিগাঁও, গোলাঘাটৰ বোকাখাট মহকুমা আৰু গোৱালপাৰা জিলাত কণ্টেইনমেণ্ট জ’ন।

আজিৰে পৰা কামৰূপ মেট্ৰ’ত ৪ বজাৰ পৰা সান্ধ্য আইন। বিয়লি ৩ বজালৈ খুলিব পাৰিব দোকান–পোহাৰসমূহ। বাকী জিলা সমূহ পূৰ্বৰ দৰেই থাকিব৷ আন্তঃজিলা যাতায়াত বন্ধ থাকিব৷ ৰাজ্যত ২৪৭টা কোৰোণাৰ হটস্পট চিনাক্ত কৰা হৈছে।

গুৱাহাটী ৰে’লৱে পুলিচে জব্দ কৰে ভাংখিনি ।৩গৰাকী মহিলাই ৰে’লত আহিছিল ভাংখিনি ।জব্দ কৰা ভাংখিনিৰ মূল্য প্ৰায় ১ লাখ টকা । মহিলাকেইগৰাকী সুনিতা দেৱী, অৰপিতা দেৱী আৰু কিৰণ দেৱী ,আগৰতলাৰ পৰা বিহাৰলৈ নিয়া হৈছিল ভাঙখিনি ।

 গোলাঘাট ফৰকাটিংৰ কুখ্যাত  ড্ৰাগছ ব্যৱসায়ী পাপু আলি গ্ৰেপ্তাৰ । কিছুদিন পূৰ্বে পাপু আলি তিৰুৱাল বৰফুকন খাটৰ নিৰ্মিয়মান বাসগৃহৰ পৰা  বুজন পৰিমাণৰ ড্ৰাগছ উদ্ধাৰ কৰিছিল আৰক্ষীয়ে  । উক্ত ঘটনাৰ পিছতে  ড্ৰাগছ মাফিয়া পাপু আলি আৰক্ষীৰ চকুত ধুলি দি   পলাই ফুৰিছিল । অৱশেষত গোলাঘাট ফৰকাটিং আৰক্ষীয়ে ফৰকাটিং অঞ্চলৰ পৰাই ড্ৰাগছ  মাফিয়া পাপু আলিক গ্ৰেপ্তাৰ কৰিবলৈ  সক্ষম হয় ।  উল্লেখযোগ্য যে , পাপু আলি ড্ৰাগছৰ লগতে বহুতো অপৰাধমূলক কাৰ্যৰ লগতো  জড়িত আছিল । অগাধ  ধন-সম্পত্তিৰ মালিক এই পাপু আলিৰ বাসগৃহত  ২০১৯ চনৰ ২৬ ছেপ্টেম্বৰত  অভিযান চলাই ঘৰৰ বিভিন্ন স্থানৰ  পৰা পিষ্টল,গ্ৰেণেড, সেনাৰ পোছাক আদি উদ্ধাৰ কৰিছিল আৰক্ষীয়ে । গোলাঘাট জিলাৰ বিভিন্ন এলেকাৰ লগতে অন্য জিলালৈও ড্ৰাগছৰ ৰমৰমীয়া বেহা চলাই অহাৰ অভিযোগ আছে পাপু আলিৰ  বিৰুদ্ধে।  স্থানীয় লোকৰ ভাষ্য অনুসৰি  এনে অসাধু ব্যৱসায় কৰিয়েই পাপু আলিয়ে গোটাইছিল অজস্ৰ ধন-সম্পত্তি।  আজি এই কুখ্যাত ড্ৰাগছ মাফিয়াৰ গ্ৰেপ্তাৰত সন্তোষ প্ৰকাশ কৰিছে গোলাঘাটবাসীয়ে।

চলিত জুন মাহত  নিচাযুক্ত সামগ্ৰীৰ বিৰুদ্ধে ক্ৰমাৎ এটাৰ পাছত আনটো সফল অৰ্জন কৰিবলৈ সক্ষম হৈছে। প্ৰায় সাতটাকৈ অভিযানত ওদালগুৰি জিলা আৰক্ষী প্ৰশাসনে জব্দ কৰে বৃহৎ সংখ্যক সুৰা, গাঞ্জাকে ধৰি হেৰ‌’ইন জাতীয় নিচাযুক্ত সামগ্ৰী। অভিযানৰ প্ৰথমটো স্থান ওদালগুৰি সদৰ।  বিগত ৪ জুনত ওদালগুৰি আৰক্ষীৰ জালত পৰে গাঞ্জাসহ এজন লোক। নিশা এক গোপন সূত্ৰৰ খবৰৰ ভিত্তিত ওদালগুৰি সদৰ আৰক্ষী থানাৰ ভাৰপ্ৰাপ্ত বিষয়া অসীম বৰা আৰু আৰক্ষীৰ এটা দলে অভিযান চলাই ৯.৫ কিল’গ্ৰাম গাঞ্জাসহ ব্যৱসায়ীগৰাকীঅ গ্ৰেপ্তাৰ কৰে। গ্ৰেপ্তাৰ হোৱা ব্যৱসায়ীগৰাকী ওদালগুৰিৰ ৪ নম্বৰ ৱাৰ্ডত ভাৰাতীয়া হিচাপে থকা বিনোদ বসুমতাৰী(৩২)। গ্ৰেপ্তাৰ হোৱা গাঞ্জা ব্যৱসায়ীগজনৰ পৰা আৰক্ষীয়ে ১,৮৪০ টকা নগদ ধন জব্দ কৰে। ঘটনা সন্দৰ্ভত ওদালগুৰি আৰক্ষী থানাত এক গোচৰ ৰুজু কৰি ধৃত লোকজনক জেললৈ প্ৰেৰণ কৰে। আৰক্ষীৰ দ্বিতীয়টো অভিযানৰ স্থান মাজবাট। যোৱা ৬ জুনত ওদালগুৰি জিলাৰ অন্তৰ্গত মাজবাট আৰক্ষীয়ে এক অভিযান চলাই এটা বস্তাত ভৰাই অনা ২৫ কিঃগ্ৰাম গাঞ্জা জব্দ কৰে। মাজবাট অঞ্চলৰ ৰঙাপানীত নিশা চাইকেলেৰে গাঞ্জা সৰবৰাহ কৰি থকা অৱস্থাতে মাজবাট আৰক্ষীৰ তহলদাৰী দলে জব্দ কৰে গাঞ্জাখিনি। অৱশ্যে আৰক্ষীৰ দলটোক দেখিয়েই গাঞ্জা সৰবৰাহকাৰী লোকজন চাইকেল এৰি বৰষুণৰ সুযোগ লৈ পলায়ন কৰিবলৈ সক্ষম হয়। ঘটনা সন্দৰ্ভত তদন্ত অব্যাহত ৰাখিছে মাজবাট আৰক্ষীয়ে। ঘটনা সন্দৰ্ভত মাজবাট থানাত এক গোচৰ ৰুজু কৰি আৰক্ষীয়ে তদন্ত অব্যাহত ৰাখিছে। অভিযানৰ তৃতীয়টো স্থান হৈছে ৰৌতাৰ অমিনপাৰাৰ সমীপৱৰ্তী ফাকিৰালী। বিগত ১০ জুনত এক গোপন সূত্ৰৰ খবৰৰ ভিত্তিত দিনৰ প্ৰায় ২.১৫ বজাত ৰৌতা আৰক্ষী থানাৰ ভাৰপ্ৰাপ্ত আৰক্ষী বিষয়া হেমন্ত বৰুৱা আৰু লালপুলৰ আৰক্ষী বিষয়া ছৰাফৎ আলীয়ে আৰক্ষীৰ এটা দলসহ ৰৌতা থানাৰ অন্তৰ্গত আমিনপাৰাৰ সমীপৱৰ্তী ফাকিৰালীত এক অভিযান চলাইছিল। অভিযানত আৰক্ষীৰ দলটোৱে ১০ গ্ৰাম সন্দেহজনক হেৰ’ইনসহ দুজন অৰুণাচলৰ লোকক গ্ৰেপ্তাৰ কৰে। গ্ৰেপ্তাৰ হোৱা লোক দুজন ক্ৰমে তেন নৰবু(২১) আৰু বিজয় ৰয় বুলি জানিব পৰা গৈছে। ঘটনা সন্দৰ্ভত ৰৌতা আৰক্ষী থানাত ১২১/২১ নম্বৰত এক গোচৰ ৰুজু কৰি আৰক্ষীয়ে তদন্ত অব্যাহত ৰাখিছে। চতুৰ্থটো অভিযানৰ স্থান হৈছে ওদালগুৰিৰ ভৈৰৱকুণ্ড। যোৱা ১১ জুনত ওদালগুৰি জিলাৰ ভৈৰৱকুণ্ডৰ সমীপৱৰ্তী আংৰাজুলি গাওঁত বহু পৰিমাণৰ অৰুণাচলী সুৰা জব্দ কৰে এছএছবিয়ে। এক গোপন সূত্ৰৰ খবৰৰ ভিত্তিত ২৩ নম্বৰ লালপুল বেটেলিয়নৰ অন্তৰ্গত কচুবিল এছএছবি শিৱিৰৰ সহযোগত অভিযান চলায়। সহকাৰী কামাণ্ডেণ্ট ৰবি সিঙৰ নেতৃত্বত দহজনীয়া এছ এছবিৰ দল উক্ত দিনটোৰ পুৱা প্ৰায় ১০ বজাত চলোৱা অভিযানত আংৰাজুলি গাওঁৰ পৰা এখন বাহনৰ পৰা অৰুণাচলী সুৰাসহ এজন লোকক গ্ৰেপ্তাৰ কৰে। গ্ৰেপ্তাৰ হোৱা লোকজন হৈছে আংৰাজুলি গাওঁৰ চুমেন নাৰ্জাৰী। জব্দকৃত মাৰুটি চুজুকী বাহনখনৰ নম্বৰ হৈছে এএছ১২এফ-৫৭৪০। বাহনখনৰ পৰা এছএছবিৰ দলটোৱে ১৪৪ টা বিভিন্ন বেণ্ডৰ অৰুণাচলী সুৰাৰ বটল জব্দ কৰে। এছএছবিয়ে দাবী কৰা অনুসৰি কভিডৰ মিনি লকডাউনৰ সময়ছোৱাত এনেদৰে জিলাখনৰ বিভিন্ন প্ৰান্তলৈ অৰুণাচলী সুৰাৰ সৰবৰাহ চলি আহিছে। ঘটনা সন্দৰ্ভত এটা গোচৰ ৰুজু কৰি সুৰাখিনি ওদালগুৰি আৱকাৰী বিভাগৰ হাতত গটাই দিয়াৰ লগতে গ্ৰেপ্তাৰ হোৱা লোকজনক এছএছবিয়ে আৰক্ষীৰ হাতত গতাই দিয়ে। অভিযানৰ পঞ্চমটো স্থান হৈছে ওদালগুৰিৰ হৰিশিঙা। ১২ জুনত  হৰিশিঙা আৰক্ষীয়ে এক অভিযান চলাই থানাখনৰ অন্তৰ্গত এলেকাৰ পৰা বহু পৰিমাণৰ সুৰা জব্দ কৰে। এক গোপন সূত্ৰৰ খবৰৰ ভিত্তিত দিনৰ ১২-৩০ বজাত হৰিশিঙা আৰক্ষী থানাৰ ভাৰপ্ৰাপ্ত বিষয়া প্ৰেমাঙ্কুৰ হাজৰিকা আৰু সহ আৰক্ষী বিষয়া অনিল সোণোৱালৰ নেতৃত্বত নিৰাপত্তাৰক্ষীৰ এটা দলে এক অভিযান চলায়। হৰিশিঙা থানাৰ অন্তৰ্গত কুন্দৰবিল গাওঁ আৰু ধীপাবস্তিত অভিযানকাৰী দলটোৱে এক অভিযান চলাই বহু পৰিমাণৰ দেশীয় আৰু বিলাতী সুৰা জব্দ কৰিবলৈ সক্ষম হয়। জব্দকৃত সুৰাখিনিৰ ভিতৰত আছে প্ৰায় ২৫ লিটাৰ চুলাই তথা দেশীয় সুৰা। আৰক্ষীৰ সূত্ৰে সাংবাদিকক জনোৱা মতে, কভিডৰ এই জটিল সময়ত সকলো নীতি নিয়ম উলংঘা কৰি একাংশই এনেদৰে মুকলিভাৱে অবৈধ সুৰাৰ বেহা চলাই নিছে। অৱশ্যে আৰক্ষীৰ এই অভিযানত কোনো লোকক ধৰিবলৈ সক্ষম হোৱা নাছিল। ঘটনা সন্দৰ্ভত হৰিশিঙা আৰক্ষীয়ে এক গোচৰ ৰুজু কৰি বিধিগত ব্যৱস্থা গ্ৰহণ কৰে। অভিযানৰ ষষ্ঠ স্থান হৈছে ওদালগুৰি জিলা সদৰ। ১২ জুনৰ নিশা ওদালগুৰি সদৰ আৰক্ষী থানাৰ ভাৰপ্ৰাপ্ত আৰক্ষী বিষয়া অসীম বৰাৰ নেতৃত্বত এটা আৰক্ষীৰ দলে থানাখনৰ অন্তৰ্গত এলেকাৰ পৰা বহু পৰিমাণৰ অবৈধভাৱে বিক্ৰীৰ বাবে মজুত ৰখা সুৰা জব্দ কৰে। ইয়াৰোপৰি সুৰাসহ আৰক্ষীৰ জালত পৰে এজন লোক। ঘটনা সন্দৰ্ভত আৰক্ষীয়ে এটা গোচৰ ৰুজু কৰি তদন্ত চলাই আছে। এনেদৰে চলিত এমাহত  ওদালগুৰি মহকুমাত আৰক্ষী নিৰাপত্তাৰক্ষীয়ে ৭ টাকৈ সফল অভিযান চলাই বহু নিচাযুক্ত সামগ্ৰীৰ লগতে ঘটনাৰ সৈতে জৰিত লোকক গ্ৰেপ্তাৰ কৰে। আৰক্ষী এই সন্দৰ্ভত হুংকাৰ প্ৰদান কৰি অভিযান ধাৰাবাহিকভাৱে চলাৰ কথা প্ৰকাশ কৰে।আনহাতে  এক গোপন সূত্ৰৰ পম খেদি আজি ১৯ জুনত সন্ধিয়া ৫.৩০বজাত নিচাযুক্ত দ্ৰব্যসহ এজনক ওদালগুৰিৰ আৰক্ষীয়ে গ্ৰেপ্তাৰ কৰে।ভাৰপ্ৰাপ্ত বিষয়া অসীম বৰাই জনোৱা মতে- ওদালগুৰি জিলাৰ অন্তৰ্গত ভৈৰৱকুণ্ডত তালাচী চলাই টংলা নিবাসী গুবিন্দ্ৰ থাপা(৫৯)নামৰ এজন ড্ৰাগচ সৰবৰাহীক গ্ৰেপ্তাৰ কৰিবলৈ সক্ষম হয় আৰু তেওঁৰ  পৰা সন্দেহযুক্ত  ৩৪০ গ্ৰাম নিচাযুক্ত দ্ৰব্য জব্দ কৰে।বজাৰত নিচাযুক্ত দ্ৰব্যখিনিৰ মূল্য প্ৰায় ২০ হাজাৰ টকা হ’ব।আৰক্ষীয়ে লগতে এ.এছ.০১এৱাই.৬৪৭৩নম্বৰৰ মটৰ চাইকেল এখনো জব্দ কৰে।এই সন্দৰ্ভত অধিক অনুসন্ধানৰ বাবে তদন্ত অব্যাহত আছে।

এগৰাকী চৰকাৰী গাওঁবুঢ়াৰ স্বেচ্চাসাৰী কাৰ্য্য কালাপ আৰু হিটলাৰী শোষণত অতিষ্ঠ হৈ গাওঁ খনৰ একাধিক সামাজিক ব্যক্তিয়ে গাওঁবুঢ়া গৰাকীৰ বিৰুদ্ধে গোচৰ তৰাৰ পিছত বিষয়টো গুৰুত্ব সহকাৰে বিবেচনা কৰি জিলা উপায়ুক্তই গাওঁবুঢ়া গৰাকীক নিলম্বন কৰাত অঞ্চলবাসী ৰাইজে স্বস্তিৰ নিশ্বাস পেলাইছে। এই ঘটনা সংঘটিত হৈছে কামৰূপ জিলাৰ বকো আৰক্ষী থানাৰ অন্তৰ্গত ছমৰীয়া ৰাজহ চক্ৰৰ অধিনৰ গাওঁ তামুলদি গাওঁত। তামুলদি গাওঁৰ গাওঁবুঢ়া ছমেজ উদ্দিন আহমেদক নিলম্বন কৰা বিষয় সন্দৰ্ভত জানিব পৰা মতে ; গাওঁবুঢ়া গৰাকীয়ে গাওঁ খনৰ প্ৰশাসনিক সেৱাৰ নামত চলাইছিল এক প্ৰকাৰৰ গুণ্ডাৰাজ। গাওঁবুঢ়াই গাওঁত শাসনৰ নামত চলাইছিল এক প্ৰকাৰৰ হিটলাৰৰ শাসন।মুঠৰ ওপৰত ধুৰন্ধৰ প্ৰকৃতিৰ ছমেজ উদ্দিন আহমেদে নিজৰ স্বাৰ্থ পূৰণ কৰিবৰ বাবে গাওঁবুঢ়া হৈছিল। গাওঁবুঢ়াই সামাজিক দায়িত্ব পালন কৰাৰ পৰিৱৰ্তে নিজৰ লগতে পৰিয়ালৰ সকলোকে চৰকাৰৰ আঁচনিত অন্তৰ্ভুক্ত কৰি গাওঁৰ ৰাইজক বঞ্চিত কৰাৰ অভিযোগ উত্থাপিত হৈছে। গাওঁবুঢ়া গৰাকীৰ বিৰুদ্ধে গোচৰৰ উপৰি গোচৰ তৰাৰ পিছত বিষয়টো গুৰুত্ব সহকাৰে বিবেচনা কৰি কামৰূপ জিলা উপায়ুক্তই স্মাৰক পত্ৰ নং কে আৰ চি ৮৩/২০১৯/৫ গোচৰৰ বিচাৰ প্ৰক্ৰিয়া মৰ্মে ১৬ – ০৬ – ২০২১ তাৰিখে চূড়ান্ত ৰায় দিয়ে আৰু গাওঁ বুঢ়া ছমেজ উদ্দিন আহমেদক নিলম্বন কৰা হ’ল বুলি ঘোষণা কৰে। লগতে জিলা উপায়ুক্তই গাওঁবুঢ়া গৰাকীক নিলম্বন কৰা হুকুমৰ নথি ছমৰীয়া ৰাজহ চক্ৰৰ চক্ৰ বিষয়া ; বকো আৰক্ষী থানাৰ ভাৰপ্ৰাপ্ত আৰক্ষী বিষয়া ; ছমৰীয়া মৌজাৰ মৌজাদাৰ আৰু নিলম্বিত গাওঁ বুঢ়া ছমেজ উদ্দিন আহমেদক প্ৰেৰণ কৰি ৰাজহুৱা কৰে। উল্লেখ্য যে ; একাধিক অসামাজিক কাৰ্য্য কালাপত জড়িত আৰু চৰকাৰী আঁচনিৰ সা সুবিধা হৰলুকি কৰা অপৰাধত অভিযুক্ত গাওঁবুঢ়া গৰাকীক নিলম্বন কৰাত অঞ্চলবাসী ৰাইজে স্বস্তিৰ নিশ্বাস পেলাইছে।