গোৱালপাৰা জিলাৰ বগুৱানত পুনৰ  ড্ৰাগছৰ বিৰুদ্ধে বগুৱান আৰক্ষীৰ  সফল অভিযান । কালি  এক গোপন সূত্ৰৰ আঁত ধৰি বগুৱান আৰক্ষী থানাৰ ভাৰপ্ৰাপ্ত বিষয়া চবিৰ আলীৰ নেতৃত্বত আৰু ৰাইজৰ সহযোগত  বাইক সহ নিচা জাতীয় টেবলেটৰ লগতে ড্ৰাগছৰ বেহাত জড়িত এগৰাকী যুৱকক  গ্ৰেপ্তাৰ কৰিবলৈ সক্ষম হয়। আটক হোৱা ড্ৰাগছ ব্যৱসায়ী জন   বগুৱান থানা এলেকাৰ কাৰাইখোৱাৰ বদিউদ জামান বুলি জানিব পৰা গৈছে ।ড্ৰাগছ ব্যৱসায়ী জনৰ পৰা ৬৪৮টা নিচা যুক্ত টেবলেট জব্দ কৰে ।ধৃত জামালে As 19 B 4695 নম্বৰৰ স্পেলনডাৰ বাইকৰ হেড লাইটৰ ভিতৰত লৈ আনিছিল নিচা জাতীয় টেবলেট সমূহ । ইতিপূর্বেও এই গৰাকী বদিউল জামালে ড্ৰাগছৰ বেহাত জড়িত হৈ আছিল। কিছু দিন পূৰ্বেও গোৱালপাৰা জিলা আৰক্ষী অধীক্ষক নিৰ্দেশত  এই গৰাকী ভাৰ প্ৰাপ্ত বিষয়া চবিৰ আলীয়ে দুগৰাকীকৈ কুখ্যাত দ্ৰাগছ মাফিয়াক আটক কৰাৰ উপৰি,  চোৰাং গাঞ্জা ব্যৱসায়ী আৰু পেট্ৰলিয়াম জাতীয় চোৰাং তেল ভৰ্তি টেংকাৰ জব্দ কৰিছিল ।উল্লেখ্য যে গোৱালপাৰা জিলাত নতুনকৈ দায়িত্ব ভাৰ লোৱা আৰক্ষী অধীক্ষক বিৰা  ভেংকাটা ৰাকেশ ৰেড্ডীৰ নিৰ্দেশত জিলা খনত চোৰাং  গৰু ব্যৱসায়ী ,  বাইক চোৰ , ড্ৰাগছকে  ধৰি এনেদৰে  দুষ্ট চক্ৰৰ বিৰুদ্ধে চলোৱা সফল অভিযানত ৰাইজে বাৰুকৈ সন্তুষ্টি প্ৰকাশ কৰিছে ।বগুৱান আৰক্ষীয়ে অধিক তথ্য লাভৰ বাবে অভিযান অব্যাহত ৰাখিছে।

আজি ৰঙিয়া আঞ্চলিক ছাত্ৰ সন্থাই ৰঙিয়া মাণ্ডলিক ৰেল প্ৰৱন্ধকৰ কাৰ্যালয়ৰ সন্মুখত কেন্দ্ৰীয় ৰেল মন্ত্ৰী পিয়ুশ গোৱেলৰ প্ৰতিমূৰ্তি দাহ কৰে । উত্তৰ পূৱৰ শিক্ষিত নিবনুৱা যুৱক যুৱতী সকলক বঞ্চিত কৰি বহিৰাগত প্ৰাৰ্থীক গোপনে নিযুক্তি দিয়াৰ প্ৰতিবাদত এই প্ৰতিমূৰ্তি দাহ কাৰ্য্যসূচী গ্ৰহণ কৰে । বছৰ বছৰ ধৰি অসমীয়া তথা উত্তৰ পূৱৰ শিক্ষিত নিবনুৱা যুৱক যুৱতী সকলক ৰেল বিভাগে প্ৰতাৰণা কৰি অহাৰ বাবে সদৌ অসম ছাত্ৰ সন্থাৰ তৰফৰ পৰা নিৰন্তৰ ভাবে প্ৰতিবাদ কৰি আহিছিল । ইমানৰ পিচতো যোৱা কিছুদিন পূৰ্বে ৰঙিয়া মাণ্ডলীক ৰেল প্ৰৱন্ধকৰ কার্যলয়ত প্ৰায় ৫० জনকৈ বহিৰাগত যুৱকক গোপনে নিযুক্তি দিয়া হৈছিল ৰেল বিভাগত । আজি তাৰেই প্ৰতিবাদত ছাত্ৰ সন্থাৰ সদস্যসকলে ৰেল বিভাগৰ বিৰুদ্ধে প্ৰতিবাদ সাব্যস্ত কৰে ।সন্থাৰ কার্য্যকৰ্তা হেমন্ত দাসে অসমৰ সাংসদ সকলৰ ভূমিকাৰ ওপৰত ও তীব্ৰ ক্ষোভ উজাৰি কয় যে সাংসদ সকলে কেন্দ্ৰীয় চৰকাৰৰ ওপৰত হেঁচা প্ৰয়োগ কৰিব নোৱাৰাৰ বাবেই ৰেল বিভাগে উত্তৰ পূৱৰ শিক্ষিত যুৱক-যুৱতী সকলক এইদৰে প্ৰতাৰণা কৰি আহিছে । ৰঙিয়া আঞ্চলিক ছাত্ৰসন্থাৰ কার্য্যকৰ্তা সকলে অসম তথা উত্তৰ-পূৰ্বাঞ্চলৰ স্বাৰ্থত এখন সুকীয়া বʼৰ্ড গঠনৰ বাবেও দাবী উত্থাপন কৰে। আজিৰ এই কাৰ্যসূচীত ছাত্ৰসন্থাৰ নেতা হেমন্ত ডেকাসহ ,মৃন্ময় কুমাৰ ডেকা,তফিকুৰ ৰহমান,বুবুল আলী,জয়ন্ত শৰ্মাকে ধৰি বহুতো সদস্য উপস্থিত থাকে ।

বিগত সময়ত সমগ্ৰ ৰাজ্য কপাই তোলা ৪২ টাকৈ হত্যাকাণ্ডৰ মূল অভিযুক্ত কুখ্যাত অপৰাধী বুবু কোৱৰৰ এক সংঘৰ্ষত নাজিৰা মহকুমাৰ গেলেকী আৰক্ষীৰ গুলীত মৃত্যু হোৱা ঘটনাক কেন্দ্ৰ কৰি আজি চাৰিদিন উকলি যোৱাৰ পিছতো সমগ্ৰ জিলাখনত ব্যাপক প্ৰতিক্ৰিয়া অব্যাহত আছে । বহুজন নিৰীহক অতি শীতল মস্তিষ্কৰে শূন্য দূৰত্বৰ পৰা গুলীয়াই হত্যা কৰা দুধৰ্ষ হত্যাকাৰী তথা নৰখাদক চুপাৰি কিলাৰ বুবু কোৱৰৰ হৃদস্পন্দন স্তব্ধ কৰি দিছিল মাত্ৰ এটা বুলেটে । কাৰণবিহীন ভাৱে ১৫ হাজাৰৰ পৰা ২ লাখ টকা পৰ্যন্ত চুপাৰি লৈ এগৰাকীৰ পিছত সিগৰাকী নাৰীৰ শিৰৰ সেন্দুৰ মচি অনা বুবুৰ দৰে নৰখাদকৰ হৃদস্পন্দন মাত্ৰ এটা বুলেটৰ আঘাটত স্তব্ধ হৈ পৰাৰ চাঞ্চল্যকৰ তথ্য সদৰী হৈছে ।  জয়সাগৰস্থ শিৱসাগৰ জিলা অসামৰিক চিকিৎসালয়ত মৰনোত্তৰ পৰীক্ষা সম্পন্ন কৰাৰ সময়ত বুবু কোৱৰৰ শৰীৰৰ পৰা বাহিৰ হৈছে এটা নাইন এম এম পিষ্টলৰ বুলেট । পিঠিয়েদি সোমোৱা গুলী ভেদ কৰিছিল কলিজা । ইয়াৰ উপৰি পিঠিৰ ফালে তিনিটা আঘাটৰ চিহ্ন আছিল যদিও মৰনোত্তৰ পৰীক্ষাৰ সময়ত এটা গুলী উদ্ধাৰ হোৱাৰ তথ্য পোহৰলৈ আহিছে । ইফালে শিৱসাগৰ আৰক্ষীয়ে এক সংঘৰ্ষৰ অন্তত বুবু কোৱৰৰ মৃত্যু হৈছে বুলি দাবী কৰিছে যদিও বুবুৰ শৰীৰৰ পৰা এটা বুলেট উদ্ধাৰ আৰু তিনিটা আঘাতৰ চিহ্নই সমগ্ৰ ঘটনাক্ৰমক সময় অতিবাহিত কৰাৰ লগে লগে অধিক ৰহস্যঘন কৰি তুলিছে । একে সময়তে বুবু কোৱৰৰ সৈতে একেখন স্কুটীতে অহা আন এজন যুৱকো সংঘৰ্ষৰ মাজতে পলায়ন কৰিছিল বুলি আৰক্ষীয়ে স্পষ্ট কৰি দিয়ে যদিও ঘটনা সংঘটিত হোৱাৰ চাৰিদিনৰ পিছতো দ্বিতীয় জন পলায়ন ব্যক্তিৰ কোনো সন্ধান আৰক্ষীয়ে লাভ নকৰাৰ ঘটনাই ৰহস্যৰ সৃষ্টি কৰিছে । ভৌগোলিক ভাৱে চাৰিওফালে ওখ টিলাৰে আৱৰা তথা বোকাময় উক্ত সংঘৰ্ষস্থলীৰ পৰা সংঘৰ্ষৰ মাজতে দ্বিতীয় এজন ব্যক্তি পলায়ন কৰাতো জনগণে সহজে মানি ল’ব পৰা নাই । যাৰ বাবে বিভিন্ন মহলে প্ৰকৃততে এয়া সংঘৰ্ষ নে হত্যা তাক লৈও প্ৰশ্ন উত্থাপন কৰিছে। কিয়নো ৰাজ্যৰ সবাটোকৈ নৰখাদক ৰূপী এটা কুখ্যাত অপৰাধীৰ সংঘৰ্ষত মৃত্যু হোৱাৰ পিছত স্বাভাৱিকতে সংঘৰ্ষস্থলীৰ ফটো , ভি ডি অ’ সংগ্ৰহৰ বাবে স্থানীয় সংবাদসেৱীৰ সৈতে যোগাযোগ কৰিব লাগিছিল । কিন্তু ইয়াৰ বিপৰীতে গেলেকী অথবা শিৱসাগৰৰ প্ৰতিজন আৰক্ষী বিষয়াই সেই সময়ৰ পৰা প্ৰায় এঘণ্টা ধৰি সম্পূৰ্ণ ৰূপে সংবাদকৰ্মীৰ ফোন ধৰাৰ পৰা ৰহস্যজনক ভাৱে বিৰত আছিল । অৱশেষত বুবু কোৱৰৰ মৃতদেহ গেলেকী স্বাস্থ্য কেন্দ্ৰলৈ অনাৰ পিছতহে আৰক্ষীয়ে সংবাদ মাধ্যমৰ সৈতে যোগাযোগ কৰিছিল । যাৰ ফলত সংবাদ মাধ্যমে ঘটনাস্থলীৰ কোনো ফটো , ভি ডি অ’ সংগ্ৰহ কৰিবলৈ সক্ষম নহ’ল । আন নালাগে ঘটনাৰ চাৰিটা দিনৰ পিছতো শিৱসাগৰ আৰক্ষীয়ে ঘটনাস্থলীৰ কোনো ফটো , ভি ডি অ’ ৰাজহুৱা নকৰাৰ ঘটনাই অনেক প্ৰশ্নৰ সৃষ্টি কৰিছে । যিহেতু বিগত সময়ত শিৱসাগৰত মাজনিশা সংঘটিত সংঘৰ্ষৰ পিছতো সংবাকৰ্মীক সংঘৰ্ষস্থলীলৈ নি সংবাদ সংগ্ৰহত সুবিধা দিয়ে । ইয়াৰ বিপৰীতে শিৱসাগৰ আৰক্ষীয়ে প্ৰায় ৫ কিলোমিটাৰ ব্যাসাৰ্ধৰ এক স্থানত সংঘৰ্ষ হ’ল বুলি দাবী কৰাৰ বিপৰীতে সংঘৰ্ষৰ প্ৰকৃত স্থানটো কিয় সংবাদ কৰ্মীক পৰৱৰ্তী সময়ত প্ৰত্যক্ষ নকৰানে তাক লৈও প্ৰশ্নৰ সৃষ্টি হৈছে । বুবু কোৱৰৰ দৰে এটা নৰখাদকৰূপী অপৰাধীক সংঘৰ্ষৰ অন্তত নিধন কৰিবলৈ সক্ষম হোৱা শিৱসাগৰ আৰক্ষীক ৰাইজে মুকলিকৈ অভিনন্দন জনাইছে যদিও সংঘৰ্ষৰ প্ৰকৃত ছবিও ৰাজহুৱা হোৱাটো কামনা কৰিছে । আনহাতে বুবু কোৱৰৰ সংঘৰ্ষত মৃত্যুক লৈ ৰাইজৰ মাজত ব্যাপক প্ৰতিক্ৰিয়া সৃষ্টি হোৱাৰ মাজতে বুবুৰ নৃশংসতাৰ ন ন তথ্য পোহৰলৈ আহিছে । হত্যাক পেচালৈ ৰূপান্তৰিত কৰা আমগুৰি ৰতনপুৰীয়াৰ দুধৰ্ষ ডকাইত বুবু কোৱৰে কৰা নাছিল কী ? শিক্ষকৰ পৰা ব্যৱসায় লৈকে , চিকিৎসকৰ পৰা ৰাজনৈতিক নেতালৈকে ইজনৰ পিছত সিজন নিৰীহক মৃত্যুৰ শীতল দলিছাত শুৱাই বন্য উল্লাহ লাভ কৰা বুবু কোৱৰে মাত্ৰ ১৫ হাজাৰৰ পৰা ২ লাখ টকা লৈকে লৈছিল চুপাৰি  । গাড়ীখনৰ বাবেই চালকজনক হত্যা কৰাতো এটা সাধাৰণ ঘটনাত পৰিণত হৈছিল । অতি পৰিকল্পিত ভাৱে যুৱক – যুৱতী , মহিলাৰ হতুৱাই গাড়ী ভাৰালৈ নি মাজপথত গাড়ীত বহি লোৱা বুবুয়ে শব্দ বিহীন ভাৱেই বহুজন চালকক কেবোলেৰে ডিঙি চেপি হত্যা কৰি গাড়ী লৈ উধাও হৈছিল । শিৱসাগৰ , যোৰহাট , ডিব্ৰুগড় , তিনিচুকীয়া , গোলাঘাটকে ধৰি বিভিন্ন স্থানত বিগত সময়ত উদ্ধাৰ হোৱা বহু দুৰ্ভগীয়া চালকৰ মৃত্যুৰ আৰত আছিল নৰখাদক বুবু কোৱৰ । চৰকাৰী ভাৱে বুবুৰ বিৰুদ্ধে ডেৰকুৰিতকৈও অধিক হত্যাৰ গোচৰ ৰুজু থাকিলেও এনে বহু হত্যাকাণ্ড , নিৰীহ চালকৰ মৃতদেহ উদ্ধাৰৰ পিছত গোচৰ অজ্ঞাত ব্যক্তিৰ বিৰুদ্ধে ৰুজু কৰিয়েই দায়িত্ব সামৰে আৰক্ষীয়ে । সম্প্ৰতি এই ঘটনাই সৰ্বত্ৰে ব্যাপক প্ৰতিক্ৰিয়া সৃষ্টি হোৱা পৰিলক্ষিত হৈছে ।