ৰাজ্যত বৰ্ধিত কৰোণাৰ সংক্ৰমণৰ ফলত ৰাজ্যবাসীক চিন্তিত কৰা সময়তে একাংশ দুস্কৃতিকাৰীয়ে গাড়ী মটৰ চুৰি কাৰ্যত লিপ্ত হৈ ৰাজ্যবাসীক বাৰুকৈ চিন্তিত কৰি তুলিছে । তেনে এক ঘটনা পোহৰলৈ আহিছে ওৰাং আৰক্ষী চকীত । ওৰাং আৰক্ষীয়ে জানিবলৈ দিয়া মতে আৰক্ষী চকীত কৰ্মৰত কেইবাজনো আৰক্ষীয়ে দৈনিক চলাই অহা তালাচী অভিযানৰ দৰেই ২৫ জুনত ওৰাংত তালাচী অভিযান চলাই থকা মুহূৰ্ততে ধৰা পৰে এখন চুৰি বাইক । বাইক আৰোহী সকলৰ কথা বাৰ্তাত সন্দেহ উপজাত আৰক্ষীৰ দলে ভালকৈ বিষয়টো চালি জাৰি চোৱাত আৰোহী দুয়োজনে লৈ অহা পালছাৰ বাইক খন চুৰি কৰা বুলি চিহ্নিত হয় । ওৰাং আৰক্ষী থানাৰ তালাচী অভিযানত ধৰা পৰা AS 03 J 3015 নম্বৰৰ পালছাৰ বাইক খন অৰুণাচল প্ৰদেশৰ জিৰো পইণ্ট ৰ পৰা চুৰি কৰি আনিছিল বুলি জানিব পৰা গৈছে । চুৰি বাইক সহ ধৰা পৰা ধ্ৰুত চুৰ দুজন ক্ৰমে আমিনুল হক পশ্চিম বংগৰ দিনহাটা ,আৰু ৰাছীদুল ইছলামৰ ঘৰ ধুবুৰী জিলাৰ গোলাকগঞ্জত বুলি জানিব পৰা গৈছে । এতিয়া চিন্তাৰ বিষয় হ’ল বহি: ৰাজ্জ্যৰ পৰা অসম অৰুণাচল আদি ৰাজ্যত প্ৰৱেশ কৰি বাইক , গাড়ী মটৰ চুৰি কৰাৰ কাৰ্যত লিপ্ত থকা বিষয়টো ৰাজ্যবাসীক অত্যন্ত চিন্তিত কৰা বিষয় । এই বহি: ৰাজ্জ্যৰ পৰা অসমত প্ৰৱেশ কৰি চুৰি কৰা ডাঙৰ গেংটোক উৎসাত কৰাৰ বাবে অসম প্ৰশাসনে বিশেষ গুৰুত্ব দিয়া বুলি অঞ্চলৰ ৰাইজে ব্যক্ত কৰিছে । ওৰাং আৰক্ষীৰ তালাচী অভিযানৰ বাবে চুৰ দুজন ধৰা পৰাত ওৰাং বাসী ৰাইজে ওৰাং আৰক্ষীক ধন্যবাদ জ্ঞাপন কৰে।
গুৱাহাটী ৰেডক্ৰছ শাখাৰ কভিড চিকিৎসাৰ লগত জড়িত সামগ্ৰী National Health Mission ৰ জৰিয়তে বিতৰণ
২৬জুন ২০২১ শুকুৰবাৰে দিনৰ ১১:৩০বজাত এক চমু আনুষ্ঠানিক সভাৰ জৰিয়তে গুৱাহাটী ৰেডক্ৰছ শাখাই আমেৰিকাৰ পৰা সাহায্য হিচাপে পোৱা কভিড চিকিৎসা ৰ লগত জড়িত কিছু সামগ্ৰী National Health Mission ৰ জৰিয়তে বিতৰণ কৰে । সভাত উপস্থিত থাকে ৰেডক্ৰছ নাৰ্চিং ইনষ্টিটিউটৰ মুখ্য সঞ্চালক, গুৱাহাটী ৰেডক্ৰছ শাখাৰ সভাপতি, আৰু বহুতো বিশিষ্ট অতিথি।
এই শাখাই পোৱা সাহায্যৰ কিছু অংশ যোৰহাট শাখালৈ ও প্ৰেৰণ কৰে। এই কথা মুখ্য সম্পাদকে জানিবলৈ দিয়ে। তেওঁ লগতে কয় যে ৰেডক্ৰছ ছছাইটি এটা বেচৰকাৰী ছছাইটি য’ত কোনো ধৰণৰ চৰকাৰী ধন বৰঙণি হিচাপে পোৱা নাযায়। তেনে অৱস্থাত ক’ভিড পৰিস্থিতিত সুদূৰ আমেৰিকাৰ টেক্সাছৰ পৰা পোৱা এনে সাহায্য মূল্যবান।
বিজনীত ড্ৰাগছৰ বিৰুদ্ধে সজাগতা সমদল
চিৰাং জিলাৰ বিজনী মহকুমা আৰক্ষী আৰু এছ এছ ডি ফাউন্ডেশন নামৰ স্বেচ্ছাসেৱী সংগঠনৰ সহযোগত ৰাষ্ট্ৰীয় ড্ৰাগছ বিৰোধী দিৱস উপলক্ষে সজাগতা সমদল উলিয়াই। বিজনী থানাৰ পৰা আৰম্ভ কৰি বিজনী কাৱাটিকা হৈ সম্পূৰ্ণ বিজনী চহৰ পৰিভ্ৰমণ কৰে। সমদলত অংশগ্ৰহণ কৰে বিজনী মহকুমা আৰক্ষী বিষয়া শ্বেখৰজ্যোতি ৰায় বিজনী থানাৰ ভাৰপ্ৰাপ্ত আৰক্ষী বিষয়া ৰূপক কুমাৰ বৰাৰ লগতে স্বেচ্ছাসেৱী সংগঠনৰ কৰ্মী সকলোৱে অংশগ্ৰহণ কৰে। ইফালে পাণবাৰী থানাৰ অন্তৰ্গত বিভিন্ন ঠাইত পাণবাৰী আৰক্ষীয়ে ড্ৰাগছকলৈ সজাগতা সভা অনুষ্ঠিত কৰে। উক্ত সজাগতা সভাত উপস্থিত থাকে পাণবাৰী আৰক্ষী চক্ৰ বিষয়া ৰফিকুল হাছান চৌধুৰীৰ লগতে পাণবাৰী থানাৰ ভাৰপ্ৰাপ্ত আৰক্ষী বিষয়া অক্ষয় নাৰায়ণ দেব ।
প্ৰকৃতি সংৰক্ষণত অহৰ্নিশে নীৰৱ সংগ্ৰাম বাক্সাৰ এদল যুৱকৰ
নামনি অসমৰ বাক্সা জিলাৰ সদৰ মুছলপুৰৰ পৰা প্ৰায় ১৮ কিলোমিটাৰ দূৰত্বৰ ভাৰত-ভূটান সীমান্তত অৱস্থিত এটা বিশেষ অঞ্চল ৷ বিশেষকৈ ভূটান পাহাৰৰ পৰা দিৰিং নৈৰ শিলাময় পথেৰে নামি অহা ফটফটীয়া পৰিস্কাৰ পানী আৰু চৌদিশ আবৃত সেউজীয়া পাহাৰৰ অপৰূপ সৌন্দৰ্যৰ বাবেই এতিয়া পৰ্যটকৰ অন্যতম আকৰ্ষণৰ কেন্দ্ৰবিন্দু এই বিশেষ অঞ্চলটো ৷ আৰু এই বিশেষ অঞ্চলটোৱেই হৈছে বিশ্ব ঐতিহ্য ক্ষেত্ৰ মানাস ৰাষ্ট্ৰীয় উদ্যানৰ ব্যঘ্ৰ প্ৰকল্পৰ অন্তৰ্গত দিহিৰা সংৰক্ষিত বনাঞ্চলৰ প্ৰাকৃতিক নান্দনিকতাৰে ভৰপূৰ দাৰাগাঁও । যেন এক সৰগৰ অময়াপুৰী । যি সময়ত ৰাজ্যৰ ভিন্ন প্ৰান্তত অবাধ গতিত বন ধ্বংস কাৰ্য অব্যাহত আছে, তেনে সময়তে এই বনাঞ্চলখনৰ প্ৰাকৃতিক ৰূপ-সুষমাত বিভোৰ হৈ প্ৰকৃতি সংৰক্ষণ আৰু জৈৱ-বৈচিত্ৰ্য ৰক্ষাৰ বাবে আগবাঢ়ি আহিছে এদল যুৱক ৷ বিগত বৰ্ষৰ ২ অক্টোবৰ তাৰিখে জিলাখনৰ বৰমা, মুছলপুৰ, নিকাছী আদি বিভিন্ন ঠাইৰ কেইজনমান প্ৰকৃতিপ্ৰেমী যুৱকৰ সন্মিলিত প্ৰচেষ্টাত মানাস-দাৰাগাঁও ইক’ ট্যুৰিজিম চ’ছাইটি নামেৰে এটি বেচৰকাৰী সংস্থা গঠন কৰি অঞ্চলটোৰ বনাঞ্চল সংৰক্ষণৰ কামত নিজকে নিয়োজিত কৰে । যাৰ তত্বাৱধানত এতিয়া গঢ় লৈ উঠিবলৈ সক্ষম হৈছে এখন বৃহৎ সেউজ অৰণ্যৰ লগতে বাক্সাৰ অন্যতম পৰ্যটনস্থলী দাৰাগাঁও ৷ প্ৰখৰ ৰ’দ অথবা ধাৰাষাৰ বৰষুণকো নেওচা দি তেওঁলোক এতিয়া প্ৰকৃতিৰ একো একোজন অতন্দ্ৰ প্ৰহৰী ৷ বনজ সম্পদ সংৰক্ষণেই যাৰ মূল উদ্দেশ্য । উল্লেখ্য যে প্ৰায় ডেৰ দশকৰ পূৰ্বে বাক্সা জিলাৰ ভাৰত-ভূটান সীমান্তত অৱস্থিত দিহিৰা সংৰক্ষিত বনাঞ্চলখন একাংশ চোৰাং কাঠ ব্যৱসায়ীয়ে তহিলং কৰি পেলাইছিল ৷ তাৰোপৰি উক্ত বনাঞ্চল খনৰ বিভিন্ন স্থানত চলিছিল অবাধ বেদখল ৷ যাৰ পৰিপ্ৰেক্ষিতত ক্ৰমান্বয়ে সংকুচিত হ’বলৈ আৰম্ভ কৰিছিল জৈৱ-বৈচিত্ৰ্যৰ অনুপম ভাণ্ডাৰ দিহিৰা সংৰক্ষিত বনাঞ্চলৰ ভূখণ্ড ৷ নিষ্ঠুৰ মানৱৰ আগ্ৰাসনৰ প্ৰভাৱত বনাঞ্চল খনৰ জৈৱ-বৈচিত্ৰ্যৰ প্ৰতি চৰম ভাবুকি আহি পৰিছিল ৷ কিন্তু ভাগ্যক্ৰমে ২০২০ চনৰ গান্ধী জয়ন্তীৰ দিনা জিলাখনৰ প্ৰকৃতিপ্ৰেমী যুৱক অমৰজ্যোতি হাজৰিকা আৰু ৰঞ্জিত গয়াৰীৰ নেতৃত্বত গঠন হোৱা মানাস-দাৰাগাঁও ইক’ ট্যুৰিজিম চ’ছাইটিৰ সহযোগত ধ্বংসৰ গৰাহৰ পৰা পুনৰ ঠন ধৰি উঠিবলৈ সক্ষম হৈছে বনাঞ্চলখন ৷ ইতিমধ্যে সংস্থাটোৱে বিগত সময়ত দুষ্প্ৰাপ্য সোণালী বান্দৰ, বিলুপ্তপ্ৰায় হাড়গিলা, ভিন্ন প্ৰজাতিৰ সৰীসৃপ আদি উদ্ধাৰ কৰি পুনৰ সংস্থাপনৰ ব্যৱস্থা কৰাৰ লগতে বৃহত্তৰ অঞ্চলটোক সেউজীয়া কৰি ৰখাৰ বাবে গছপুলি ৰোপণ কৰি আহিছে ৷ ভাৰত-ভূটান সীমান্ত অঞ্চলটোত যাতে কোনোৱে গছ-গছনি কটা বা জীৱ-জন্তু হত্যা কৰিব নোৱাৰে, তাৰ বাবে অহৰ্নিশে পহৰাৰো ব্যৱস্থা কৰি আহিছে সংস্থাটোৰ সদস্যসকলে ৷ মন কৰিবলগীয়া কথা এই যে স্বেচ্ছাসেৱী সংস্থাটোৱে এসময়ত বনজ সম্পদ ধ্বংসত লিপ্ত থকা সকলকো এতিয়া উক্ত চ’ছাইটিৰ সাধাৰণ সদস্য হিচাপে নিয়োগ কৰি মনোনিৱেশ কৰাইছে প্ৰকৃতি সংৰক্ষণৰ কামত। এসময়ৰ চোৰাং কাঠ ব্যৱসায়ীসকলো এতিয়া হৈ পৰিছে একো একোজন সদাজাগ্ৰত বন সুৰক্ষাকৰ্মী ৷ নিজৰ জীৱনকো তুচ্চজ্ঞান কৰি বিভিন্ন ঘাত-প্ৰতিঘাটৰ মাজেৰে এইসকল লোকেই এতিয়া অহৰহ সুৰক্ষা দি আহিছে দিহিৰা বনাঞ্চলৰ গছ-গছনিৰ লগতে তাত থকা বন্যপ্ৰাণীসমূহকো । সম্প্ৰতি চৰকাৰীভাৱে সংস্থাটোৱে কোনো সাহায্য লাভ কৰিবলৈ সক্ষম নহ’লেও প্ৰকৃতি সুৰক্ষাৰ বাবে নিৰৱচ্ছিন্নভাৱে কাম কৰি অহাৰ লগতে ভাৰত-ভূটান সীমান্তৰ পৰ্যটনসম্ভৱা দ্বাৰাগাঁওক ৰাজ্যৰ এক বিশেষ পৰ্যটনস্থলী হিচাপে গঢ় দিয়াৰ বাবেও যুৱককেইজনে প্ৰচেষ্টা অব্যাহত ৰাখিছে ৷ যি সময়ত নৱপ্ৰজন্মৰ একাংশই নিষিদ্ধ ড্ৰাগছ, মদ-জুৱা আদিৰ কবলত পৰি নিজৰ লগতে সমাজখনকো কলুষিত কৰি আহিছে তেনে সময়তে এখন বনাঞ্চল ৰক্ষাৰ বাবে স্বেচ্ছাই ওলাই অহা মানাস-দাৰাগাঁও ইক’ ট্যুৰিজিম চ’ছাইটিৰ এইসকল যুৱকৰ ঐকান্তিক প্ৰচেষ্টাই নিসন্দেহে সমাজখনৰ বাবে এক আশাৰ বতৰা কঢ়িয়াই আনিছে ৷
ভৱেশ কলিতা ৰাজ্যিক বিজেপিৰ নতুন সভাপতি
বিজেপিৰ কেন্দ্ৰীয় নেতৃত্বই ঘোষণা কৰিলে ৰাজ্যিক বিজেপিৰ সভাপতিৰ নাম।
ৰাজ্যিক বিজেপিক সভাপতি হিচাপে নিযুক্তি দিয়া হ’ল ৰঙিয়া সমষ্টিৰ বিধায়ক তথা প্ৰাক্তন মন্ত্ৰী ভৱেশ কলিতা।
উল্লেখ্য যে বিজেপিৰ প্ৰথম খন চৰকাৰত ভৱেশ কলিতা জলসিঞ্চন (স্বতন্ত্ৰ) মন্ত্ৰী আছিল।
ক্ৰীড়াৰ জৰিয়তে মানৱ সম্পদ গঢ়াৰ পৰিকল্পনা হাতত লবলৈ নতুন চৰকাৰক আহ্বান
ভাৰতীয় জনতা পাৰ্টীৰ চৰকাৰে অসমক ক্ৰীড়াৰ ৰাজধানী কৰিব বিছাৰি বিগত পাঁচ বছৰত অসমত বিভিন্ন আন্তৰ্জাতিক খেল সফলতাৰে সমাপন কৰি ক্ৰীড়াৰ এক বাতাবৰণ সৃষ্টি কৰিবলৈ সক্ষম হৈছে। কিন্তু অসমৰ ক্ৰীড়াই এতিয়াও যেন লক্ষ্যত উপনিত হ’ব পৰা নাই। অৱশ্যে ইয়াৰ বাবে সময়ৰো প্ৰয়োজন। ইতিমধ্যে বিগত সময় ছোৱাত অসমত বিভিন্ন আঁচনি প্ৰস্তুত কৰি ক্ৰীড়াৰ উন্নতি কল্পে কাম কৰি থকা পৰিলক্ষিত হৈছিল। এই আঁচনি সমূহৰ ফলাফল কি হ’ল সেয়া পৰ্য্যালোচনা কৰি অনাগত দিনত অধিক সক্ৰিয়তাৰে ক্ৰীড়াৰ কাম কৰিব পাৰিলে ক্ৰীড়া ক্ষেত্ৰ লাভৱান হ’ব বুলি মন্তব্য আগবঢ়াইছে সচেতন ক্ৰীড়া সংগঠক সকলে। অৰ্হতা সম্পন্ন প্ৰশিক্ষকৰ জড়িয়তে বিজ্ঞান সন্মত দীৰ্ঘকালীন প্ৰশিক্ষণৰ লগতে খেলুৱৈৰ জীৱন-জীৱিকাৰ পথ সূনিশ্চিত কৰিব নোৱাৰিলে সকলো আঁচনিয়ে ব্যাৰ্থ হ’ব, এই কথা নিশ্চিত। সন্মুখত এটা উজ্বল ভবিয্যত নাথাকিলে আজিকালি ক্ৰীড়া কৰিবলৈ কোনো খেলুৱৈয়ে আগবাঢ়ি নাহে। নহাটো স্বাভাৱিক কিয়নো খেল এৰি দিয়াৰ পিছত খেলুৱৈ সকলৰ পানীত হাঁহ নচঁৰাৰ দৰে অৱস্থা হয়। পানদোকান চাহদোকান দি এওঁলোকে জীৱন নিৰ্বাহ কৰিবলগীয়া হয়। এটা সময়ত এওঁলোকেই ৰাজ্যখনলৈ মান সন্মান কঢ়িয়াই অনাৰ বাবে যথেষ্ট কষ্ট আৰু ত্যাগ স্বীকাৰ কৰিছিল। খেলি থকা সময়ত জাউৰিয়ে জাউৰিয়ে দৰ্শকৰ হাত চাপৰিৰ বাহিৰে খেলুৱৈ সকলে চৰকাৰী ভাৱে সংস্থাপন নোপোৱাটো সঁচাকৈ দুৰ্ভাগ্যজনক। ইয়াৰ লগে লগে বহু শিক্ষিত যুৱকে শাৰীৰিক শিক্ষাৰ পাঠ্যক্ৰম সুখ্যাতিৰে উৰ্ত্তীৰ্ণ হৈ ঘৰত এনেই বহি ঘুমাই পাৰ কৰিবলগীয়া হৈছে তেওঁলোকৰ সময়। যি উদ্যেশ্য লৈ তেওঁলোকে এই পাঠ্যক্ৰম গ্ৰহন কৰি আছিল সকলো ফুটুকাৰ ফেন হ’ল। ক্ৰীড়াৰ হাৰে হিমজুৱে ভাল পোৱা এই সকল বহুতৰে এতিয়া চাকৰিৰ বয়স উকলি গ’ল। বহুতেই এতিয়া চাকৰিৰ আশাত হাঁহ-হুমুনিয়াহ কাঢ়ি আছে। ক্ৰীড়াৰ উন্নতি হ’ব লাগিলে বিদ্যালয় সমূহত ক্ৰীড়াক বাধ্যতামূলক বিষয় হিচাপে অন্তৰ্ভুক্ত কৰি এই সকল শাৰীৰিক নিৰ্দেশক সকলক চৰকাৰে নিয়োগ কৰিব লাগিব আৰু তেতিয়াহে পদ্ধতিগত ভাৱে ক্ৰীড়া আগবাঢ়ি যাব। বিদ্যালয় সমূহতে খেলুৱৈ নিৰ্বাচনৰ ক্ষেত্ৰত শাৰীৰিক নিৰ্দেশক সকল মুখ্য ভুমিকা পালন কৰিব পাৰে। কোন খেলুৱৈয়ে কি খেল খেলিলে লাভৱান হ’ব পাৰিব, খেলবিধে বিচৰা ধৰনে খেলুৱৈ সৃষ্টিত এওঁলোকৰ অৱদান অনস্বীকাৰ্য। বছা বছা খেলুৱৈ সকলক উন্নয়ন খণ্ড আৰু জিলা ভিত্তিত দীৰ্ঘকালিন প্ৰশিক্ষণৰ ব্যাৱস্থা কৰাৰ পিছত ৰাজ্যিক ভিত্তিত এই সকল খেলুৱৈক উন্নত মানৰ প্ৰশিক্ষণ দিব পাৰিলে অসমৰ ক্ৰীড়া উজ্বলি উঠিবলৈ সক্ষম হ’ব বুলি কব পাৰি। অৱশ্যে আঁচনি সমূহ সঠিক ভাৱে ৰূপায়ন হৈছে নে নাই সেই কথাটোত অধিক গুৰুত্ব প্ৰদান কৰিব লাগিব। এতিয়ালৈ চৰকাৰে ক্ৰীড়াৰ নামত যিমান আঁচনি প্ৰস্তুত কৰিছে সেয়াই এজন ৰাষ্ট্ৰীয়, আন্তুৰাষ্ট্ৰীয় খেলুৱৈ গঢ়াত কিমান সহায় কৰিছে সেয়াহে বিচাৰ্যৰ বিষয়। আমি আশাবাদী নতুন চৰকাৰে আহি থকা পাঁচ বছৰত অসমৰ জনপ্ৰিয় খেলসমূহৰ পৰা আন্তৰাষ্ট্ৰীয় খেলুৱৈ সৃষ্টিত মনোনিবেশ কৰি ক্ৰীড়াৰ জড়িয়তে ৰাজ্যত মানৱ সম্পদ গঢ়াৰ পৰিকল্পনা হাতত ল’ব। ক্ৰীড়াই যদি শাৰীৰিক মানসিক উৎকৰ্য সাধনত সহায় কৰিব পাৰে, ঐক্য-সংহতি-সম্প্ৰীতি বজাই ৰাখিব পাৰে, মানুহক নিৰোগী সুস্বাস্থ্যৱান কৰি গঢ়ি তুলিব পাৰে, দেশলৈ সুনাম কঢ়িয়াই আনি দেশ খনক সবাতকৈ চহকী কৰি তুলিব পাৰে তেনে ক্ৰীড়াক ধেমালী বুলি গ্ৰহন নকৰি উপযুক্ত মৰ্য্যদা প্ৰদান কৰি ক্ৰীড়াক অধিক আগবঢ়াই নিয়াত নতুন চৰকাৰে পদক্ষেপ গ্ৰহন কৰিব। এয়াই অসমৰ ক্ৰীড়া প্ৰেমী ৰাইজৰ একান্ত আশা।
৫৫০ দিনৰ বিৰতিৰ পিছত স্ব-গৃহত উপস্থিত জননেতা অখিল গগৈ
আজি পুৱা ৭ বজাৰ পৰা যোৰহাট জিলাৰ চেলেংহাট স্থিত কৃষক নেতা অখিল গগৈৰ বাসগৃহত এক উৎসৱ মুখৰ পৰিবেশ। সকলোবোৰ উৎকণ্ঠাৰ অন্ত পেলাই দিনৰ ১২- ১০ বজাত অসম আৰক্ষীৰ এক কনভয় সহ চেলেংহাটৰ লুখুড়াখন স্থিত বাসগৃহৰ পদূলিত উপস্থিত হয় কৃষক নেতা অখিল গগৈ। গাড়ীৰ পৰা নমাৰ লগে লগে তাত উপস্থিত থকা গুণ মুগ্ধই তেওঁক মৰমৰ উপহাৰেৰে উপচাই পেলাই। কৃষক নেতাজনে টুকিলে আবেগৰ অশ্ৰু। মৰমৰ নেতাজনক চাবলৈ ওলাই অহা বহু ৰাইজে অখিল গগৈ ছবি সম্বলিত চোলা পৰিধান কৰি মাথোঁ চিঞৰি গল আমাৰ নেতা অখিল অখিল গগৈ জিন্দাবাদ। অখিল গগৈ ভিতৰলৈ সোমাই গৈ আবেগিক হৈ মাতৃক সাৱটি ধৰে। মাতৃয়েও পুত্ৰক বহু দিনৰ মূৰত আঁকোৱালি লয়। মাতৃৰ কাষত বহি কৃষক নেতাজনে নষ্টালজিক হৈ পুৰণি দিনৰ সোঁৱৰণ কৰে। তেওঁ হালৰ পৰা আহি মাতৃৰ হাতৰ মাছৰ জোলৰ সোৱাদ লোৱাৰ দৰে আজিও মাতৃৰ হাতৰ সোৱাদ লব বুলি উল্লেখ কৰাৰ লগতে ক্ষন্তেক সময় মাতৃৰ কোলাত টোপনি যাব বুলিও উল্লেখ কৰে। সাংবাদিকে কৰা এক প্ৰশ্নৰ উত্তৰত তেওঁক নেদেখাকৈ ভোট দি প্ৰায় ৫০ হাজাৰ ভোটত জয় যুক্ত কৰাৰ বাবে শিৱসাগৰ বাসী ৰাইজক ধন্যবাদ জনোৱাৰ লগতে শিৱসাগৰক এক সুন্দৰ ৰূপ দিয়াৰ পৰিকল্পনাৰ কথাও অৱগত কৰে। আন এক প্ৰশ্নৰ উত্তৰত সদ্য পদত্যগী বিধায়ক ৰূপজ্যোতি কুৰ্মী মিছলিয়া আৰু ঠগবাজ বুলি উল্লেখ কৰি এইবাৰ কুৰ্মীক মৰিয়নিৰ ৰাইজে বিদায় দিব বুলি উল্লেখ কৰে। উল্লেখযোগ্য যে দুদিনৰ বাবে মুক্তি লাভ কৰা অখিল গগৈ পুত্ৰ আৰু পত্নীৰ লগত সময় কটোৱাৰ পিছত আজি মাতৃ প্ৰিয়দা গগৈৰ লগত নিশাটো কটাই পুৱা গুৱাহাটীলৈ ৰাওনা হব।
চীনৰ বুলেট ট্রেইন চলিল অৰুণাচল সীমান্তলৈ
ভাৰতৰ বিৰুদ্ধে আগ্রাসী ৰণনীতিৰে অৱশেষত আজি চীনে অৰুণাচল সীমান্তলৈ আনুষ্ঠানিকভাৱে বুলেট ট্রেইন চলালে৷ হিমালয়ান অঞ্চলৰ তিব্বতৰ প্রাদেশিক ৰাজধানী লাচা আৰু নিংছি সংযোগী ৪৩৫.৫ কিলোমিটাৰ ৰে’লপথত প্রথম সম্পূর্ণ বৈদ্যুতিক বুলেট ট্রেইনৰ শুভাৰম্ভ কৰিলে চীনে৷ নির্ধাৰিত ৩০ জুনৰ পৰিৱর্তে বেইজিঙে আজিয়েই এই ৰে’লপথটো মুকলি কৰে৷ চীনৰ শাসকীয় কমিউনিষ্ট পার্টী অৱ চীন চমুকৈ চি পি চিৰ অহা ১ জুলাইত শতবার্ষিকী উপলক্ষে আজি কৌশলগতভাৱে অতি গুৰুত্বপূর্ণ অৰুণাচল সীমান্তৰ সমীপৰ ৰে’লপথত বুলেট ট্রেইনৰ চলাচল আৰম্ভ কৰে৷ উল্লেখ্য যে অৰুণাচল প্রদেশ সীমান্তৰ পৰা মাত্র ১৭ কিলোমিটাৰ দূৰত্বত অৱস্থিত নিংচি হৈছে দক্ষিণ–পূব তিব্বতত চীনৰ পুৰণি সামৰিক ঘাটি৷ সম্প্রতি নিংছিত পিপল্ছ লিবাৰেচন আর্মী (পি এল এ)ৰ ৫২নং আৰু ৫৩নং মাউণ্টেইন ইনফেণ্ড্রী ব্রিগেডৰ মুখ্য কার্যালয় আছে৷
বেইজিঙে বিগত প্রায় এটা দশক ধৰি সীমান্ত সংলগ্ণ নিংছিৰ সামৰিক ঘাটি আৰু চীনা সৈন্যবাহিনীৰ মূল কেন্দ্রসমূহৰ মাজত ৰে’ল–ঘাইপথেৰে সংযোগ স্থাপনৰ চেষ্টা অব্যাহত ৰাখিছে৷ নিংছিত ইতিপূর্বৰে পৰা এটা বিমানবন্দৰ আছে৷ সেই বিমানবন্দৰটো অসামৰিক বিমানৰ লগতে সামৰিক বাহিনীয়েও ব্যৱহাৰ কৰে৷ মন কৰিবলগীয়া যে ৰাষ্ট্রপতি ঝি জিনপিঙে লাছা–নিংছি ৰে’লপথটো চীনৰ নিৰাপত্তাৰ বাবে অতি গুৰুত্বপূর্ণ হ’ব বুলি ইতিমধ্যে মন্তব্য কৰিছে৷ সামৰিক কৌশলগত দিশৰ সমান্তৰালভাৱে অর্থনৈতিকভাৱেও চীনৰ বাবে অতি গুৰুত্বপূর্ণ ৰে’ল প্রকল্পটো আৰম্ভ কৰা হৈছিল ২০১৪ চনত৷ ৪৩৫ কিলোমিটাৰ দৈর্ঘ্যৰ ৰে’লপথছোৱাৰ ৭৫ শতাংশই দলং অথবা সুৰংগ৷ লাছাৰ পৰা নিংছিলৈ নির্মাণ কৰা হৈছে মুঠ ৪৭টাকৈ সুৰংগ৷ প্রকল্পটো আৰম্ভ কৰাৰ পৰাই দিনে–নিশাই ২০ হাজাৰ শ্রমিক আৰু অভিযন্তাই ইয়াৰ নির্মাণকার্যত ব্রতী হৈছিল৷ য’ত ব্যয় হৈছে ৫.৭ বিলিয়ন মার্কিন ডলাৰ৷ অৰুণাচল প্রদেশ সীমান্তত ৰঙা চীনৰ এনে তৎপৰতা তথা যুদ্ধংদেহি মনোভাবক এতিয়া দিল্লীয়ে কিদৰে গ্রহণ কৰে বা কেনেধৰণৰ ব্যৱস্থা লয়, সেয়া লক্ষণীয় হ’ব৷
এছবিআইৰ ধন উলিওৱাৰ নতুন নিয়ম বলৱৎ ১ জুলাইৰ পৰা
ভাৰতীয় ষ্টেট বেংক চমুকৈ এছ বি আয়ে বেছিক ছেভিংছ বেংক ডিপ’জিট (বি এছ বি অ’) একাউণ্টৰ গৰাকীৰ বাবে অহা ১ জুলাইৰ পৰা নতুন নিয়ম বলৱৎ কৰিব৷ এই একাউণ্টৰ গৰাকীয়ে ধন উলিওৱাৰ ক্ষেত্রত সংশোধিত নতুন নিয়ম অনুসৰি গ্রাহকগৰাকীয়ে মাহত চাৰিবাৰ বিনামূলীয়াকৈ ধন উলিয়াব পাৰিব৷ বেংক একাউণ্ট থকা শাখা তথা এ টি এমৰ পৰা গ্রাহকজনে মাহত চাৰিবাৰ বিনামূলীয়াকৈ নগদ ধন উলিয়াব পাৰিব৷ ইয়াৰ পিছত পৰৱর্তী ধন একাউণ্ট থকা শাখা বা এ টি এমৰ পৰা উলিয়ালে প্রতিবাৰতে ১৫ টকাৰ লগতে জি এছ টি ভৰিব লাগিব৷ তেনেদৰে আন বেংকৰ এ টি এমৰ পৰা ধন উলিয়ালে জি এছ টি আৰু ১৫ টকা ভৰিব লাগিব৷ আনপিনে চেকবুকৰ ক্ষেত্রতো নতুন সংশোধিত নিয়ম বলৱৎ হ’ব৷ এজন গ্রাহকে এটা বিত্তীয় বর্ষত বিনামূলীয়াকৈ চেকবুকৰ ১০খন ব্যৱহাৰ কৰিব পাৰিব৷ পৰৱর্তী ১০খন ব্যৱহাৰত গ্রাহকে ৪০ টকা আৰু জি এছ টি ভৰিব লাগিব৷ পাছলৈ ২৫খন ব্যৱহাৰত গ্রাহকে ৭৫ টকা আৰু জি এছ টি ভৰিব লাগিব৷ জৰুৰীকালীন চেকবুকৰ ক্ষেত্রত ১০খন অথবা পাছলৈ ৫০ টকা আৰু জি এছ টি ভৰিব লাগিব৷
অহা বর্ষত নৌসেনাত অন্তর্ভুক্ত হ’ব থলুৱাভাৱে নির্মিত আইএনএছ বিক্রান্ত
প্রথম ‘মেড ইন ইণ্ডিয়া’ যুদ্ধ বিমান পৰিবাহী জাহাজ আই এন এছ বিক্রান্ত অহা বর্ষত নৌসেনাত আনুষ্ঠানিকভাৱে অন্তর্ভুক্ত কৰা হ’ব৷ শুকুৰবাৰে কেন্দ্রীয় প্রতিৰক্ষা মন্ত্রী ৰাজনাথ সিঙে ছাউডার্ন নেভেল কমাণ্ড পৰিদর্শন কৰি এই ঘোষণা কৰিছে৷ দেশৰ স্বাধীনতাৰ ৭৫সংখ্যক বার্ষিকী উপলক্ষে আই এন এছ বিক্রান্ত নৌসেনাত অন্তর্ভুক্ত কৰা হ’ব৷ আই এন এছ বিক্রান্তক ইণ্ডিজিনিয়াছ এয়াৰক্রাফট কেৰিয়াৰ–১ তথা আই এ চি–১ বুলিও জনা যায়৷