আজি মৰিগাঁও জিলাৰ ভূৰাগাঁও থানাত দিনৰ ১০.১৫ মিনিটত উপস্থিত হয় মাননীয় অসমৰ মুখ্যমন্ত্ৰী হিমন্ত বিশ্ব শৰ্মা ডঙৰীয়া। মূখ্যমন্ত্ৰী গৰাকীৰ লগতে উপস্থিত থাকে অসম আৰক্ষীৰ সঞ্চালকপ্ৰধান ভাষ্কৰ জ্যোতি মহন্ত,সাংসদ তথা বিজেপিৰ ৰাষ্ট্ৰীয় সম্পাদক দিলীপ শইকীয়া। মৰিগাঁও জিলাৰ ভূৰাগাঁও থানা অন্তৰ্গত বালিডোংগা গাঁৱৰ পথাৰৰ মৰাপাট খেতিত উদ্ধাৰ হৈছিল ৯ বছৰীয়া শিশুটিৰ মৃতদেহ। মৃত কিশোৰী গৰাকী নাম ছুমি আনছাৰী। যোৱা ২০জুন দেওবাৰে কোনো অচিনাক্ত লোকে ধৰ্ষণ কৰি মৰাপাট খেতিত নিশংস ভাৱে হত্যা কৰিছিল শিশুটিক। আজি শিশুটিৰ পৰিয়ালৰ কাষত উপস্থিত মূখ্যমন্ত্ৰী হিমন্ত বিশ্ব শৰ্মা। মূখ্যমন্ত্ৰী গৰাকীয়ে ভূৰাগাঁও আৰক্ষী থানাত উপস্থিত  হৈ হত্যাকাণ্ডৰ বলি হোৱা কণমাণি শিশুৰ পিতৃ-মাতৃৰ লগত আলোচনাত মিলিত হৈ ঘটনা সন্দৰ্ভত বুজ লোৱাৰ লগতে শোকসন্তপ্ত পৰিয়ালটিক সমবেদনা জ্ঞাপন কৰে।এক প্ৰশ্নৰ উত্তৰত মন্ত্রী গৰাকীয়ে কয় যে যোৱা কালি লাহৰীঘাটৰ কাঠনিত সংঘটিত হোৱা ৮ বছৰীয়া কন্যা শিশুৰ ধৰ্ষণকাৰীৰ আচামীক কৰায়ত্ত কৰা হৈছে। 

 চিৰিয়েল কিলাৰ হিচাপে পৰিগণিত হোৱা অসম আৰক্ষীৰ মষ্ট ৱাণ্টেড বুবু কোঁৱৰক পৰহি অসম আৰক্ষীয়ে অসম নাগালেণ্ড সীমান্তবৰ্তী গেলেকী দেওপানী সমীপৱৰ্তী অঞ্চলত গুলীয়াই হত্যা কৰা ঘটনাৰ প্ৰতিক্ৰিয়া বৰ্তমানেও অব্যাহত আছে। বিগত দুই দলকৰো অধিক কাল ৰাজ্যত ৪২ টাকৈ হত্যাৰ সৈতে জড়িত ” জল্লাদ” ৰূপী বুবু কোঁৱৰ জড়িত আছিল একাধিক অপৰাধজনিত ঘটনাত। ড্ৰাগছৰ সৰবৰাহৰপৰা, নিষিদ্ধ ঘোষিত সংগঠনলৈ মাৰণাস্ত্ৰ যোগান, গাড়ী চুৰি, ডকাইতি আদিৰ দৰে ঘটনাৰে অসম আৰক্ষীৰ বাবে মূৰৰ কামোৰণি সদৃশ হৈ পৰা বুবু কোঁৱৰে শেহতীয়াকৈ “পংখী” নামৰ এগৰাকী যুৱতীৰ সহযোগত উজনিত চলাই গৈছিল হানী ট্ৰেপিঙৰ জাল।কুখ্যাত অপৰাধী বুবু কোঁৱৰ অসম আৰক্ষীৰ এনকাউন্টাৰত নিহত হোৱাৰ পিছতেই বহু ভুক্তভগী পৰিয়ালে ন্যায় পোৱা বুলি অনুভৱ কৰিছে। সমগ্ৰ অসমৰ লগতে জন্মস্থান শিৱসাগৰ জিলাতো বুবুৰ  অপৰাধৰ তালিকা দীঘলীয়া। আমগুৰি ব্লক কংগ্ৰেছৰ সাধাৰণ সম্পাদক তথা  আঞ্চলিক পঞ্চায়তৰ সভাপতি , হালোৱাটিং আৰক্ষী থানাৰ অন্তৰ্গত নামতি নতুন লুণপুৰীয়াৰ নিবাসী হেমন্ত বৰুৱাক ২০০৮ চনৰ ২৯ জুলাইত হত্যা কৰা ঘটনাৰ মূল অভিযুক্ত আছিল বুবু কোঁৱৰ ।পত্নী বিমি বৰুৱাৰ সন্মুখতে নৃশংসভাৱে গুলিয়াই হত্যা কৰিছিল বুবু কোঁৱৰে ।এই হত্যাকাণ্ডত বুবু কোঁৱৰে ২ লাখ টকা চুপাৰি লৈ গুলীয়াই হত্যা কৰা বুলি অভিযোগ উঠিছিল।যোৱা ১৩ বছৰে হেমন্ত বৰুৱা পৰিয়ালে ন্যায় লাভ নকৰিলে যদিও মূল হত্যাকাৰী অৱশেষত আৰক্ষীৰ গুলীত মৃত্যু হয়। এই মৃত্যুত পৰিয়ালটোৱে ন্যায় পোৱা বুলি প্ৰকাশ কৰে। ইফালে ২০০৩ বৰ্ষত শিৱসাগৰ জিলাৰ গেলেকী দোলাকাষৰীয়াৰ ডিম্বেশ্বৰ কোঁৱৰৰ ঘৰত বুবুৱে সংঘটিত কৰা লোমহৰ্ষক ডকাইতি কাণ্ডৰ কথা সোঁৱৰি পৰিয়ালটোৱে এতিয়াও শিহৰিত হৈ উঠে। ডিঙিত ডেগাৰ আৰু বন্দুক লগাই বুবু কোঁৱৰে ডিম্বেশ্বৰ কোঁৱৰৰ ঘৰৰপৰা এখন গাড়ী, টিভি আৰু নগদ ধন লুটি নিছিল। আনকি ডিম্বেশ্বৰ কোঁৱৰৰ পুত্ৰকো অপহৰণৰ চেষ্টা চলাইছিল দূধৰ্ষ বুবুৱে। অৱশেষত আৰক্ষীৰ গুলীত অপৰাধ জগতৰ অঘোষিত সম্ৰাটস্বৰূপ বুবু কোঁৱৰৰ মৃত্যুত স্বস্তি অনুভৱ কৰিছে ভূক্তভোগী সকলে। ইফালে অসম আৰক্ষীয়ে নাগালেণ্ডৰ দিশৰপৰা ড্ৰাগছ আৰু মাৰণাস্ত্ৰ সহ আহি থকা অৱস্থাত বাটত ভেটাভেটি হৈ ৰখাবলৈ চেষ্টা কৰাত বুবুৱে অসম আৰক্ষীক আক্ৰমণ কৰাত উক্ত আক্ৰমণৰ প্ৰত্যুত্তৰ দিয়াত বুবু নিহত হয় বুলি সদৰী কৰিলেও এইয়া এক পৰিকল্পিত হত্যাকাণ্ড বুলি অভিযোগ কৰিছে বুবুৰ পিতৃ লোহিত কোঁৱৰে। পিতৃৰ ভাস্য অনুসৰি জেলৰপৰা ওলাই বিগত এটা মাহ আমগুৰিৰ ৰতনপুৰীয়াৰ নিজা বাসগৃহতে আছিল বুবু। পৰহি বিয়লি ৩ বজাত কোনো অজ্ঞাত লোকে ফোন কৰি বুবুক মাতি পঠিওৱাত ঘৰত কাম কৰা এজন  যুৱকৰ স্কুটীখন লৈয়েই ওলাই গৈছিল। পিতৃৰ অভিযোগ অনুসৰি ঘৰৰপৰা মাতি নি পৰিকল্পিতভাৱে হত্যা কৰা হৈছে তেওঁৰ পুত্ৰক। অৱশ্যে বুবুৰ মৃত্যুৰ বাতৰিয়ে হাঁহি বিৰিঙাইছে বুবুৰ ত্ৰাসৰ বলি হোৱা অসংখ্যজনৰ মুখত।কত গল বুবুৰ আনজন সহযোগী? : -ইফালে এম্বুচৰ সময়ত বুবুৰ সৈতে স্কুটীত আৰু এজন যুৱক প্ৰতক্ষ্য কৰা বুলি অসম আৰক্ষীয়ে সদৰী কৰিছে যদিও আনজন সহযোগী কত গল বা কোন আছিল সেইয়া এতিয়াও জানিব পৰা হোৱা নাই। আৰক্ষীয়ে গুলীয়াগুলিৰ সময়তে বুবুৰ সহযোগী জন পলাই যোৱাৰ সন্দেহ প্ৰকাশ কৰিছে। বৰ্তমানে সহযোগী জনক বিচাৰি আৰক্ষীয়ে অভিযান অব্যাহত ৰাখিছে।

আছে গৰু নাবাই হাল ,হোৱাতকৈ নোহোৱাই ভাল ।এই আপ্ত বাক্য শাৰী এতিয়া আখৰে আখৰে  প্ৰযোজ্য হৈছে জনস্বাস্থ্য কাৰিকৰী বিভাগত। প্ৰণিধান যোগ্য যে ওদালগুৰি জিলা ,টংলা জনস্বাস্থ্য কাৰিকৰী বিভাগ উপ সংমণ্ডল  অধীনত কেবল ওৰাং, ৰৌতা আৰু মাজবাটত অঞ্চলতে  কুৰি খনৰো অধিক জনস্বাস্থ্য কাৰিকৰী বিভাগৰ  পানী যোগান কেন্দ্ৰ  দীৰ্ঘদিন ধৰি বিকল হৈ আছে । কোটি কোটি টকা ব্যয় কৰাৰ পিছতো  জিলা খনৰ ওৰাং, ৰৌতা আৰু মাজবাটৰ ভিন্ন এলেকাত  অঞ্চল সমুহৰ ৰাইজক এটুপাল বিশুদ্ধ খোৱা পানী যোগান ধৰাৰ নামত পলাশ বস্তি, দফলা পোটা, নাহৰ ঝাৰ, পাঠকপুৰ ,গৰৈ মাৰী,মেৰাবিল, চিলংখুটি,ৰঙাপানী,ৰৌতা বাগান, ৰৌ মাৰী, কলবাৰী, শইকীয়া চুবুৰী,গেলাবিল ইত্যাদি   কুৰি খনৰো অধিক পানী যোগান কেন্দ্ৰ স্থাপন কৰা হৈছিল । কিন্তু স্থাপন কৰা দিনৰে পৰা ৰাইজে এই কেন্দ্ৰ সমুহৰ জৰিয়তে আজি পৰ্য্যন্ত এটুপাল বিশুদ্ধ খোৱা পানী পাবলৈ সক্ষম নহল । বৰঞ্চ বিভাৰ্গীয কৰ্তৃপক্ষই কোটি কোটি  টকা খৰছ কৰি নিৰ্মাণ কৰা এই পানী যোগান কেন্দ্ৰ সমূহ  এতিয়া জহি খহি যোৱাৰ ফলত  মুল্যবান সম্পদ সমূহ এপদ এপদকৈ তাতে নোহোৱা হবলৈ আৰম্ভ কৰিছে ।তথাপি বিৰ্ভাগীয়  কৰ্তৃপক্ষই পানী যোগান কেন্দ্ৰ কেইটা কাৰ্য্যক্ষম কৰি তোলাৰ বাবে কোনো ব্যৱস্থা গ্ৰহণ নকৰিলে । কিন্তু এই খিনিতে উল্লেখ যোগ্য আৰু পৰিতাপৰ কথা যে ওৰাং, ৰৌতা আৰু  মাজবাট বৃহৎ  এলেকাক সামৰি স্থাপন কৰা ওৰাং জনস্বাস্থ্য কাৰিকৰী বিভাগৰ কাৰ্যালয়টো ওৰাঙৰ পৰা  স্থানান্তৰ কৰি মঙলদৈত  স্থাপন কৰাৰ ক্ষেত্ৰত বিৰ্ভাগীয বিষয়া সকল কিন্তু পিছ পৰি নাথাকিল । ওৰাঙত থকা কাৰ্য্যালয়টো কৰ্মচাৰী সকলৰ সুন্দৰ আবাস গৃহ,বিষয়া সকলৰ কাৰ্যালয়, গুদামঘৰ ইত্যাদি সকলো বোৰ সুবিধা থকাৰ পাছতো কি উদ্দেশ্যত ওৰাঙৰ জনস্বাস্থ্য কাৰিকৰী বিভাগৰ কাৰ্যালয়টো মঙলদৈ স্থানান্তৰ কৰা হল সেযা এক নুবুজা সাঁথৰ হৈয়ে থাকিল । ওদালগুৰি জিলাৰ টংলা জনস্বাস্থ্য কাৰিকৰী বিভাগৰ অন্তৰ্গত থকা ওৰাং জনস্বাস্থ্য কাৰিকৰী বিভাগৰ কাৰ্যালয়টো মঙলদৈৰ পৰা পুনৰ ওৰাঙত স্থাপন কৰা আৰু কোটি কোটি টকা খৰচ কৰাৰ পিছতো  ওৰাং, ৰৌতা ,মাজবাটত  বিকল হৈ থকাৰ বিশুদ্ধ খোৱা পানী যোগান কেন্দ্ৰ সমূহ অতি শীঘ্ৰে কাৰ্যক্ষম কৰি তুলিবলৈ বিৰ্ভাগীয কৰ্তৃপক্ষক মাজবাটবাসী ৰাইজে দাবী উত্থাপন কৰিছে ।