নাগৰিকত্ব সংশোধনি আইন ২০১৯ৰ বিৰুদ্ধে দেশৰ উচ্চতম ন্যায়ালয়ত দাখিল হোৱা গোচৰ সমূহৰ ক্ষিপ্ৰতাৰে মীমাংসা কৰাৰ আহ্বানৰে উচ্চতম ন্যায়ালয়ৰ মুখ্য ন্যায়াধীশলৈ আবেদন পত্ৰ প্ৰেৰণ কৰিছে সদৌ অসম সাংবাদিক সন্হা চমুকৈ আজুৱে ৷ দেওবাৰে বিয়লি সাংবাদিক সংস্হাটোৰ তেজপুৰস্হিত মুখ্য কাৰ্যালয়ত এখন সংবাদ মেলত এই কথা প্ৰকাশ কৰিছে সংগঠনটোৰ সভাপতি পংকজ নাথে৷সাংবাদিক সংস্হাটোৰ বিত্তীয় সম্পাদক মিন্টু হেমৰম,কেন্দ্ৰীয় কাৰ্যনিৰ্বাহক সদস্য দিব্যজ্যোতি নাথ আৰু অপূৰ্ব বৰাৰ অংশগ্ৰহণৰে অনুষ্ঠিত সংবাদ মেলখনত নাথে কয় যে নাগৰিকত্ব সংশোধনি আইন ২০১৯ বাতিলৰ দাবীত উচ্চতম ন্যায়ালয়ত বহু সংখ্যক গোচৰ দাখিল হৈছে আৰু পঞ্জীয়নভুক্ত অসমৰ এই গোচৰ সমূহ উচ্চতম ন্যায়ালয়ে আছুতীয়াকৈ ৰাখিছে৷কিন্তু আছুতীয়াকৈ থকা এইসমূহ গোছৰৰ শুনানি গ্ৰহণত পলম হোৱা বুলি মন্তব্য কৰি নাথে কয় যে এই বাবেই শুনানি শীঘ্ৰেই গ্ৰহণ কৰাৰ বাবে উচ্চতম ন্যায়ালয়ৰ মুখ্য ন্যায়াধীশক আবেদন জনাই শণিবাৰে পত্ৰ প্ৰেৰণ কৰিছে আজুৱে৷নাথে এই আইনখন ৰাজ্যখনৰ খিলঞ্জীয়া লোকৰ বাবে অতি বিপদজনক বুলি অভিহিত কৰি এই ক্ষেত্ৰত উচ্চতম ন্যায়ালয়ক ৰাজ্যৰ খিলঞ্জীয়া লোকৰ সকলোধৰণৰ নিৰাপত্তা নিশ্চিত কৰিবলৈ আহ্বান জনায়৷তেওঁ লগতে কয় যে পত্ৰ প্ৰেৰণৰ এই সিদ্ধান্ত আজুৰ আজাৰাত অনুষ্ঠিত মধ্যকালীন অধিবেশনত লোৱা হৈছিল৷
নগাঁৱৰ হালোৱাগাঁৱত সাহিত্য সভাৰ উদ্যোগত শিল্পী দিৱস উদযাপন শতাধিক গণ্য-মান্য ব্যক্তিক সম্বৰ্ধনা : গ্ৰন্থ উন্মোচন
নগাঁও জিলা সাহিত্য সভাৰ উদ্যোগত ও চলচলি শাখা সাহিত্য সভাৰ সৌজন্যত আৰু অসম নাট্য সন্মিলনৰ চলচলি শাখাৰ সহযোগত আজি বঢ়মপুৰৰ সমীপৰ হালোৱাগাঁও ৰাজহুৱা প্ৰেক্ষাগৃহত দিনযোৰা কাৰ্য্যসূচীৰে শিল্পী দিৱস উদযাপন কৰা হয় । এই উপলক্ষে বিয়লি নগাঁও জিলা সাহিত্য সভাৰ ভাৰপ্ৰাপ্ত উপ-সভাপতি, বিশিষ্ট লেখক থগিত চন্দ্ৰ মহন্তৰ সভাপতিত্বত এখনি মুকলি সভা অনুষ্ঠিত হয় । স্থানীয় কলা-কুশলীৰ দ্বাৰা “চিৰ চেনেহী মোৰ ভাষা জননী ” গীত পৰিবেশনেৰে আৰম্ভ হোৱা মুকলি সভাখনৰ শুভ উদ্বোধন কৰে অসম সাহিত্য সভাৰ নগাঁও আঞ্চলিকৰ সম্পাদক মৃণাল কুমাৰ হাজৰিকাই । চলচলি শাখা সাহিত্য সভাৰ সম্পাদক প্ৰান্তিক গোস্বামীয়ে আঁত ধৰা সভাখনত সভাৰ উদ্দেশ্যে বাখ্যা কৰে জিলা সাহিত্য সভাৰ সম্পাদক ৰেৱত কুমাৰ হাজৰিকাই । সভাত নিৰ্দিষ্ট বক্তা হিচাপে বিশিষ্ট সাহিত্যিক মিলেশ্বৰ পাতৰে অংশগ্ৰহণ কৰি জ্যোতিপ্ৰসাদ আগৰৱালাৰ জীৱন দৰ্শনৰ ওপৰত আলোকপাত কৰি কয় যে , জ্যোতিপ্ৰসাদ আগৰৱালা আছিল অসমৰ জাতিসত্বা গঢ়াৰ এগৰাকী অগ্ৰণী পুৰুষ । গীতৰ কথাৰে , নাটকৰ ভাষাৰে , চলচ্চিত্ৰৰ চিত্ৰনেৰে ৰূপকোঁৱৰে জাতীয় চেতনা জাগ্ৰত আৰু নতুন অভিধা সৃষ্টি কৰিছিল । বৰ্তমান অসমীয়া জাতি উটি-ভাঁহি গৈছে । জ্যোতিপ্ৰসাদ আগৰৱালাই সংস্কৃতি কৰিছিল আৰু আমি অসমীয়া মানুহে বহুজনেই দু-সংস্কৃতি কৰি আছো । এই সভাতে লেখিকা অমিয়া গোস্বামীৰ দ্বাৰা ৰচিত “বিয়ানাম ” নামৰ গ্ৰন্থখনি উন্মোচন কৰে অসম সাহিত্য সভাৰ কেন্দ্ৰীয় কাৰ্যনিৰ্বাহক ভৱেশ মেধিয়ে । ইয়াৰ উপৰি সভাতে চলচলিকে ধৰি অঞ্চলটোৰ কলা-সংস্কৃতিকে ধৰি বিভিন্ন ক্ষেত্ৰৰ সৈতে জড়িত জ্যেষ্ঠ ব্যক্তি ক্ৰমে গোলাপ বৰা , লচিকান্ত শইকীয়া , মনেশ্বৰ বৰা , পদ্মৰাম বৰা , তৰুণ শইকীয়া, গোলাপ সূতকে ধৰি শতাধিক গণ্য-মান্য ব্যক্তিক উদ্যোক্তাসকলৰ ফালৰ পৰা সম্বৰ্ধনা জনোৱা হয় । সভাত বিশিষ্ট অভিনেত্ৰী আশা বৰদলৈ , শিশু সাহিত্যিক দুলাল বৰা , কলংপাৰ শাখা সাহিত্য সভাৰ সভাপতি শৈলেন্দ্ৰ গোস্বামী , প্ৰণৱ কুমাৰ বৰা আদিকে প্ৰমুখ্যে কৰি বহু গণ্য-মান্য ব্যক্তি ও কেইবাশতাধিক লোক উপস্থিত থাকে । সভাৰ পূৰ্বে জ্যোতি সংগীত প্ৰতিযোগিতাত প্ৰথম , দ্বিতীয় আৰু তৃতীয় স্থান প্ৰাপ্ত ক্ৰমে সুকন্যা শইকীয়া , খ্যাতি বৰা , স্তুতিৰঞ্জনা বৰা আৰু কবিতা আবৃত্তি প্ৰতিযোগিতাত প্ৰথম , দ্বিতীয় আৰু তৃতীয় স্থান লাভ কৰা ক্ৰমে কস্তুৰী দেৱী , পংখি বৰা আৰু চানডুবি বৰাক পুৰস্কাৰ প্ৰদান কৰা হয় । ইফালে নিশালৈ লেছেৰী সাংস্কৃতিক আৰু ক্ৰীড়া বিকাশ গোষ্ঠীৰ ব্যৱস্থাপনাত বাৰেৰহনীয়া সাংস্কৃতিক অনুষ্ঠান অনুষ্ঠিত হয় । ইয়াৰ পূৰ্বে পুৱা ভাগত সাংস্কৃতিক শোভাযাত্ৰাৰে কাৰ্যসূচী শুভাৰম্ভ হোৱা পিছত অসম সাহিত্য সভাৰ পতাকা উত্তোলন কৰে চলচলি শাখা সাহিত্য সভাৰ সভাপতি আব্দুৰ ৰহিম হাজৰিকাই । ইয়াৰ পিছত আদৰণি সমিতিৰ সভাপতি প্ৰভাত চন্দ্ৰ দাসৰ দ্বাৰা স্মৃতি তৰ্পনৰ অন্তত জ্যোতিপ্ৰসাদ আগৰৱালাৰ কবিতা আবৃত্তি আৰু জ্যোতি সংগীত প্ৰতিযোগিতা অনুষ্ঠিত হয় ।
তেজপুৰ সাহিত্য সভাৰ শিল্পী দিৱস
তেজপুৰ সাহিত্য সভাৰ উদ্যোগত আজি শিল্পী দিৱস উদযাপন কৰা হয় । তেজপুৰৰ বিশিষ্ট ব্যক্তি সকলে আজি পুৱাই আহি তেজপুৰ সাহিত্য সভাত উপস্থিত হৈ মহান শিল্পী ৰূপকোঁৱৰ জ্যোতি প্ৰসাদ আগৰৱালাক শ্ৰদ্ধাঞ্জলি নিবেদন কৰে । পোনতে বন্তি প্ৰজ্বলন কৰে জিলা সভাপতি বাসুদেৱ শৰ্মা তেজপুৰ সাহিত্য সভাৰ উপসভাপতি ৰুমা দেৱী উপদেষ্টা মৃণালী চেতিয়াই । বিশিষ্ট ব্যক্তি সকল শৈলজা পদ্মাপতি, মাধৱ দাস, নলিনী বৰুৱা, বেণুধৰ কাকতি , ৰবীন শৰ্মা, ঐশ্বয্য কাকতি, ড° অৱনী কুমাৰ শৰ্মা, চালাতুল আলম, অৰুণ নাথ, কৃষ্ণা দাস নাথ, মনোমতী কুৰ্মী, ড°চাৰু চহৰীয়া নাথ, জগন্নাথ বৰা, সচ্চিদানন্দ বৰা, অজিত দাস, ভবানন্দ দাস, বংকিম শৰ্মা, বৃন্দাবন গোস্বামী, ভুবন গগৈ, দিলীপ বৰা, শান্তনু মহন্ত, ভূপেন শৰ্মা, কামাল ৰচিদ আহমেদ, জয়ন্ত কাকতি, তাজ হুচেইন, সঞ্জয় কৃষ্ণ গোঁহাই বৰুৱা, মৃগেন বৰা, পুলিন ভট্টাচাৰ্য, ৰমেশ কলিতা, তৰুণ লহকৰ, বাৰ্লিন শইকীয়া, ভূপেন কটকী, বিশ্ব বড়ো, ময়ুৰ কাঞ্চন বৰা আদিকে ধৰি তেজপুৰৰ সমাজ সাহিত্য সাংস্কৃতিক আৰু সংবাদ ক্ষেত্ৰ খনৰ অগ্ৰণী ব্যক্তি সকলে মহান শিল্পী গৰাকীক শ্ৰদ্ধাঞ্জলি নিবেদন কৰে । শিল্পীসচ্চিদানন্দ বৰা, অন্বেষা কাঞ্চন বৰা, বিতোপন বৰা, অশ্লেষা কৌশিক, সীমান্ত কাকতি, অজিত দাস, কামাল ৰচিদ আহমেদ, ইধা ভৰদ্বাজ, হৰ্ষিতা কাশ্যপ আদি শিল্পী সকলে জ্যোতি সংগীত পৰিবেশন কৰে । ইয়াৰ লগতে তেজপুৰ সাহিত্য সভাৰ মহিলা সদস্য সকলে সমবেত সংগীত পৰিবেশন কৰে । আঁত ধৰে সম্পাদক দেৱব্ৰত শৰ্মাই । উপসভানেত্ৰী ৰুমা দেৱীয়ে শিল্পী দিৱসৰ তাৎপৰ্যৰ সন্দৰ্ভত বক্তব্য প্ৰদান কৰে।
মঙলদৈ মহাবিদ্যালয়ৰ বাকৰিত ন-পুৰনি NCCৰ সতিৰ্থ সন্মিলন
ৰাষ্ট্ৰীয় শিক্ষাৰ্থী বাহিনী, যাক শিক্ষাৰ কমাৰ শাল বুলি কলেও ভুল নহয় ৷ এই এন চি চিৰ পৰাই ছাত্ৰছাত্ৰীয়ে আহৰন কৰিব পাৰে জীৱন সলনি কৰিব পৰা এক শিক্ষা ৷ য’ত সৃষ্টি কৰিব পাৰে আত্মবিশ্বাস, সময়নুবৰ্তীতা, ব্যক্তিত্ব, অনুশাসন,কৰ্তব্য, দায়িত্ব, সমাজ সেৱাৰ মনোভাৱ তথা সবল নেতৃত্ব দিব পৰা এজন সুদক্ষ নাগৰিক ৷
মঙলদৈ মহাবিদ্যালয়ত এন চি চি সন্মিলনৰ বিভিন্ন কাৰ্যসূচীৰ পিচত অনুষ্ঠিত কৰে এন চি চি ন পুৰনি সতিৰ্থ সন্মিলন ৷ এই সন্মিলনত অংশগ্ৰহণ কৰি প্ৰাক্তন শিক্ষাৰ্থী তথা বিশিষ্ট সাংবাদিক গনেশ দত্তই মহাবিদ্যালয়ৰ পুৰনি স্মৃতি ৰোমন্থন কৰি প্ৰতিবছৰে এই সন্মিলনখন অনুষ্ঠিত কৰিবলৈ পৰামৰ্শ আগবঢ়াই ৷ মঙলদৈ মহাবিদ্যালয়ৰ ছোৱালী গোটৰ তত্ত্বাৱধায়ক মেজৰ ড° ৰেনু হাজৰিকাই কবিতা আবৃত্তি আৰু শিবিৰত ঘটা কিছুমান অভিজ্ঞতা বিষয়ে আলোকপাত কৰে ৷ আনহাতে মহাবিদ্যালয় ল’ৰা গোটৰ তত্ত্বাৱধায়ক তথা ৰক্ত দাতা মেজৰ হৰিমন ডেকাই নিজৰ কাৰ্যকালত হোৱা বিভিন্ন শিবিৰৰ অভিজ্ঞতা আৰু স্মৃতি ৰোমন্থন কৰি আৱেগিক আৰু নষ্টালজিক হৈ পৰাৰ লগতে ছাত্ৰছাত্ৰী সকলক পৃথিৱীৰ আটাইতকৈ সুখি ব্যক্তি বুলি মত প্ৰকাশ কৰে ৷ এই সন্মিলন খনি পৰিচালনা কৰে শিক্ষাৰ্থী বাহিনীৰ অন্যতম সদস্য কুশল ডেকাই ৷
মঙলদৈ মহাবিদ্যালয়ৰ পৰা নামখলাৰ সাংবাদিক দ্বীপেন ডেকাৰ ৰিপৰ্ট ৷ ডি বি নিউজ ৷ ১৬ জানুৱাৰী ৷
হোজাইৰ ডিমাছা সম্প্ৰদায়ৰ লোকে উদযাপন কৰিছে বিহু
হোজাই জিলাৰ ডিমাছা সকলে উদযাপন কৰিছে পৰম্পৰাগত বিহু। ভোগালী বিহুৰ বতৰত হোজাই জিলাত বসবাস কৰা ডিমাছা গাওঁসমূহতো অতি উলহ মালহেৰে উদযাপন কৰিছে বিহু। মূলত হোজাই জিলাত বসবাস কৰা ডিমাছা সম্প্ৰদায়ৰ বিভিন্ন গাওঁৰ লোকসকলে মাঘ বিহুৰ দিনাখনৰে পৰা পৰম্পৰাগত বিহু উদযাপন পৰ্ব আৰম্ভ হয়। বিশেষকৈ শিঙজুৰি, নাঙলভাঙা, বৰ্মন পথাৰ, ৰাইকটা, কোমোৰাকটা, চন্দনপূৰ, নভঙা, কেন্দুগুৰীকে আদিকৰি ডিমাছা সম্প্ৰদায়ে বসবাস কৰা গাওঁ বিশেষে বেলেগ বেলেগ দিনত বিহু উদযাপন কৰা পৰিলক্ষিত হয়।সেই মৰ্মে শনিবাৰে কোমোৰাকটা গাঁওতো ডিমাছা সকলে অতি উলহ মালহেৰে উৎযাপন কৰিছে পৰম্পৰাগত বিহু। বিহু উদযাপনৰ বাবে উদ্যোক্তা সকলে অতি সুন্দৰকৈ বাইখ (নৃত্য পৰিবেশন কৰা ঘৰ) সজাই তুলে আৰু উক্ত বাইখ ঘৰত ডিমাছা সাজ পৰিধান কৰি পুৰুষ-মহিলা, সৰু-বৰ সকলোৱে অতি আনন্দৰে ডিমাছা সকলৰ পৰম্পৰাগত বাইডিমা (পৰম্পৰাগত ডিমাছা নৃত্য) পৰিবেশন কৰে। উক্ত স্থানত হোৱা বিহুত গাওঁ তথা অনান্য অঞ্চলৰ প্ৰায় পাচঁ শতাধীক লোকে ওৰে নিশা পৰম্পৰাগত নৃত্যত অংশ গ্ৰহণ কৰে। মহামাৰি ক’ৰোনাৰ পিছত গাওঁত উদযাপন কৰা বিহুত সহস্ৰাধীক দৰ্শক লোকে অংশগ্ৰহণ কৰাত উৎফুল্লিত উদ্যোক্তা সমিটিৰ অনিতা ফুৰা আৰু চুইটি ডাউলাগুফুে ৰাইজৰ সহযোগে অনাগত দিনত আৰু দুগুনে বিহু উদযাপ কৰিবলৈ শক্তি যোগাব বুলি উল্লেখ কৰে। অনুষ্ঠানৰ শেষত ৪ টা কেটেগুৰিত শ্রেষ্ট বিজয়ী জুতিক পুৰস্কাৰ প্ৰদান কৰা হয়।
উজনি মাজুলী শিলিখাগুৰি ৰূপকোঁৱৰ মিলন সংঘৰ সামাজিক নাটক মঞ্চস্থৰ আয়োজন
উজনি মাজুলীৰ শিলিখাগুৰি গাঁৱৰ ৰূপকোঁৱৰ মিলন সংঘৰ উদ্যোগত চাৰিদিনীয়া কাৰ্যসূচীৰে শিল্পী দিৱস উদযাপনৰ আয়োজন কৰা হৈছে। ১৭ জানুৱাৰী দিনা শিল্পী দিৱস উপলক্ষ্যে পৰিৱেশ নিকাকৰণৰ পাছতে অৱসৰপ্ৰাপ্ত অধ্যক্ষ সোমেশ্বৰ কলিতাই বৃক্ষৰোপন আৰু সভাপতি বুদ্ধিন শইকীয়াই সংঘৰ পতাকা উত্তোলন কৰাৰ পাছতে অৱসৰপ্ৰাপ্ত প্ৰধান শিক্ষক যোগেশ্বৰ বৰুৱাই স্মৃতিতৰ্পণ কৰে। পৰবৰ্তী সময়ত সংঘৰ হাতেলিখা আলোচনী ‘জ্যোতিপ্ৰপাত’ উন্মোচন কাৰ্যসূচী পালন কৰা হয় ৷ অৱসৰপ্ৰাপ্ত প্ৰধান শিক্ষক বিপিন চন্দ্ৰ বৰুৱাৰ তত্বাৱধানত সংঘটোৰ সাহিত্য সম্পাদক ৰঞ্জন শইকীয়াই সম্পাদনা কৰা দ্বিবাৰ্ষিক হাতেলিখা আলোচনীখন অবসৰপ্ৰাপ্ত প্ৰধান শিক্ষক বিপিন চন্দ্ৰ হাজৰিকাই উন্মোচন কৰে। ‘জৈৱ-বৈচিত্ৰ্য’ সম্পৰ্কীয় মূল বিষয়বস্তুৰে সংঘৰ যুৱ-চেমনীয়া সদস্যসকলে হাতেৰে লিখি প্ৰস্তুত কৰি উলিওৱা আলোচনীখনৰ মূল বিষয়বস্তুক উন্মোচনী সভাত উপস্থিত সকলোৱে সময়োপযোগী হৈছে বুলি প্ৰকাশ কৰে। পৰবৰ্তী সময়ত সংঘৰ পৰম্পৰানুযায়ী ২০২০ বৰ্ষত উচ্চ মাধ্যমিক শিক্ষান্ত পৰীক্ষাত সুখ্যাতিৰে উৰ্ত্তীণ হোৱা শিলিখাগুৰি গাঁৱৰ কৃতি ছাত্ৰ-ছাত্ৰী লক্ষ্যজিত শইকীয়া, প্ৰিঞ্চিপ্ৰিয়া কলিতা, বিষ্ণুপ্ৰসাদ হাজৰিকা আৰু উচ্চতৰ মাধ্যমিক শিক্ষান্ত পৰীক্ষাত সুখ্যাতিৰে উৰ্ত্তীণ হোৱা প্ৰণিতা ফুকন, বিতুমনি শইকীয়া আৰু অপূৰ্ব শইকীয়াক সম্বৰ্ধনা পত্ৰ, কলম আৰু কিতাপৰ টোপোলাৰে অভিনন্দন জনোৱা হয় ৷ সম্পাদক বিচিত্ৰ শইকীয়াই আঁতধৰা অনুষ্ঠানটিত কেইবাজনো গন্যমান্য ব্যক্তি আৰু সম্বৰ্ধনা গ্ৰহণ কৰা ছাত্ৰ-ছাত্ৰীসকলে বক্তব্য আগবঢ়ায়। একে উপলক্ষ্যত ১৮ আৰু ১৯ জানুৱাৰীত বিভিন্ন কাৰ্যসূচী আৰু ২০ জানুৱাৰী তাৰিখৰ নিশালৈ সংঘৰ প্ৰেক্ষাগৃহত গনেশ হাজৰিকাৰ পৰিচালনাৰে এখনি সামাজিক নাটক মঞ্চস্থ কৰাৰ পূৰ্ণায়োজন কৰা হৈছে।
বিশিষ্ট অভিনেতা বিষ্ণু খাৰঘৰীয়ালৈ ২০২০ বৰ্ষৰ আনন্দৰাম ঢেকিয়াল ফুকন বঁটা
নিজৰ সাধনা আৰু প্ৰতিভাৰে ৰাষ্ট্ৰীয় পৰ্যায়ত উজ্বলি উঠা অসমৰ এগৰাকী খ্যাতনামা অভিনেতা বৰেন্য শিল্পী বিষ্ণু খাৰঘৰীয়ালৈ ২০২০ বৰ্ষৰ আনন্দৰাম ঢেকিয়াল ফুকন বঁটা আগবঢ়োৱা হৈছে। নগাঁও চহৰৰ ঐতিহ্যমণ্ডিত আনন্দৰাম ঢেকিয়াল ফুকন মহাবিদ্যালয়ে বিশিষ্ট অভিনেতা গৰাকীলৈ এই বঁটা আগবঢ়ায়।
উল্লেখ্য, যোৱা শতিকাৰ সত্তৰৰ দশকত অভিনয়ৰ ক্ষেত্ৰখনত পদাৰ্পণ কৰা বিষ্ণু খাৰঘৰীয়াই এই পৰ্যন্ত ত্ৰিশ খনতকৈ অধিক ছবিত অভিনয় কৰিছে ৷ তেওঁ ১৯৯৫ আৰু ২০১৩ চনত দুবাৰকৈ ৰাষ্ট্ৰীয় চলিচ্চিত্ৰ বঁটা লাভ কৰাৰ উপৰি ১৯৯৬ চনত ছিংগাপুৰ আন্ত:ৰাষ্ট্ৰীয় চলচ্চিত্ৰ মহোৎসৱত শ্ৰেষ্ঠ অভিনেতাৰ সন্মান লাভ কৰিছিল।
আজি নগাঁও আনন্দৰাম ঢেকিয়াল ফুকন মহাবিদ্যালয়ৰ অধ্যক্ষ ড০ সুৰজিৎ ভাগৱতীয়ে এক প্ৰেছ বিজ্ঞপ্তি যোগে অভিনেতা বিষ্ণু খাৰঘৰীয়াক ২০২০ বৰ্ষৰ আনন্দৰাম ঢেকিয়াল ফুকন বঁটাৰ বাবে মনোনীত কৰাৰ বিষয়ে জানিবলৈ দিয়ে ৷ চলিত বৰ্ষৰ ফেব্ৰুৱাৰী মাহৰ প্ৰথম সপ্তাহত বিশিষ্ট অভিনেতা গৰাকীক এই বঁটা প্ৰদান কৰা হ’ব ৷
উল্লেখ্য যে, ২০১৭ বৰ্ষৰ পৰা ধাৰাবাহিকভাৱে নগাঁৱৰ আনন্দৰাম ঢেকিয়াল ফুকন মহাবিদ্যালয়ে ৰাজ্যৰ বিভিন্ন ক্ষেত্ৰৰ বৰেণ্য ব্যক্তিসকলক এই বঁটা প্ৰদান কৰি আহিছে ৷ ২০১৭ বৰ্ষত এই বঁটাৰ বাবে মনোনীত কৰা হৈছিল বিশিষ্ট কৃষি বিজ্ঞানী ড৹ বিদ্যুৎ শৰ্মাক ৷ আনহাতে ২০১৮ আৰু ১৯ বৰ্ষত এই বঁটা ক্ৰমে ভাষাবিদ মাহেন্দ্ৰ পাদুং আৰু মানৱ অধিকাৰ কৰ্মী বীৰুবালা ৰাভাক প্ৰদান কৰা হৈছিল ৷ ২০২০ বৰ্ষৰ বাবে এই বঁটা বিশিষ্ট অভিনেতা বিষ্ণু খাৰঘৰীয়াক প্ৰদান কৰিবলৈ পাই মহাবিদ্যালয়খনৰ পৰিয়ালে গৌৰৱ অনুভৱ কৰা বুলি অধ্যক্ষ ড৹ সুৰজিৎ কুমাৰ ভাগৱতীয়ে সাংবাদিকৰ আগত মন্তব্য কৰে ।
বন্ধ কৰি দিয়া হ’ল আমিনুল ইছলামৰ ফেচবুক পেজ
বন্ধ হ’ল AIUDFৰ নেতা আমিনুল ইছলামৰ ফেচবুক পেজ ।
ফেচবুক কৰ্তৃপক্ষই বন্ধ কৰিলে নেতাগৰাকীৰ ৩টাকৈ ফেচবুক পেজ ।
ফেচবুক পেজ বন্ধ হোৱাত সৰৱ আমিনুল ইছলাম ।
বিষয়টোক লৈ উদ্বেগ প্ৰকাশ AIUDFৰ ।
BJPৰ বিৰুদ্ধে ষড়যন্ত্ৰৰ অভিযোগ নেতাগৰাকীৰ ।
ফেচবুক কৰ্তৃপক্ষক কাৰণ দৰ্শোৱাৰ জাননী আমিনুল ইছলামৰ ।
অন্যথা ন্যায়ালয়ৰ কাষ চাপিব আমিনুল ইছলাম ।
সাৱধান : এইবাৰ আইচক্ৰীমত ক’ভিড-১৯
সমগ্ৰ বিশ্বতেই ইতিমধ্যে আৰম্ভ হৈছে কৰ’ণা ভাইৰাছ ভেকচিনৰ টিকাকৰণ প্ৰক্ৰিয়া। টিকাকৰণৰ সময়তেই সকলোকে শংকিত কৰি পোহৰলৈ আহিছে এক ভয়ংকৰ ঘটনা।
এইবাৰ আইচক্ৰীমৰ মাজত ওলাল কৰ’ণা ভাইৰাছ। চীনৰ টিয়ানজিন নগৰাঞ্চলত পোহৰলৈ আহিছে এই ভয়ংকৰ ঘটনা। এই ঘটনাই চিন্তিত কৰি তুলিছে চীনৰ স্বাস্থ্যকৰ্মীৰ লগতে প্ৰশাসনক। প্ৰায় ৪,৮৩৬টা আইচক্ৰীমৰ বাকচত ধৰা পৰিছে ক’ভিড ১৯। আইচক্ৰীমখিনি টিয়ানজিন ডাকিয়া অ’ডাও ফুড কোম্পানীৰ বুলি জনাইছে প্ৰশাসনে। এই তথ্য পোহৰলৈ অহাৰ পাছৰে পৰা চিন্তিত হৈ পৰিছে চীনৰ সাধাৰণ জনতা।
উল্লেখ্য যে ইতিমধ্যে ২০৮৯টা আইচক্ৰীমৰ বাকচ জব্দ কৰিছে প্ৰশাসনে। কিন্তু ঘটনাৰ পূৰ্বেই ১৮১২টা বাকচ বিভিন্ন অঞ্চললৈ মুকলি কৰি দিয়াৰ লগতে ৯৩৫টা বাকচ স্থানীয় বজাৰলৈও প্ৰেৰণ কৰে কোম্পানীটোৱে। কিন্তু সৌভাগ্যক্ৰমে প্ৰায় ৬৫টা বাকচহে বৰ্তমানলৈকে বিক্ৰী হৈছে বুলি জনাইছে প্ৰশাসনে। আনহাতে ১,৬৬২ গৰাকী কৰ্মচাৰীক কোৱাৰেণ্টাইন তথা ক’ভিড টেষ্টৰ নিৰ্দেশ দিছে প্ৰশাসনে।
হয়তো আপুনি নিবিচাৰে ! কিন্ত গৰিষ্ঠসংখ্যক দেশবাসীয়ে পুনৰ প্ৰধানমন্ত্ৰীৰ ৰূপত বিচাৰে মোদীক
আগন্তুক লোকসভা নিৰ্বাচনত গৰিষ্ঠসংখ্যক দেশবাসীয়ে পুনৰ দেশৰ প্ৰধানমন্ত্ৰীৰ ৰূপত মোদীকেই পচন্দ কৰে। এই কথা আমি কোৱা নাই । শেহতীয়াকৈ এটা সমীক্ষাত প্ৰকাশ পাইছে এই তথ্য ।
দেশৰ বহুটো গুৰুত্বপূৰ্ণ সমস্যা সমাধানত নৰেন্দ্ৰ মোদী নেতৃত্বাধীন কেন্দ্ৰীয় চৰকাৰ খন সফল হ’ব পৰা নাই যদিও মোদীৰ সলনি আন কোনো নেতাৰ ওপৰতে দেশৰ পৰৱৰ্তী চৰকাৰ খনৰ দায়িত্ব এৰি দিব বিচৰা নাই গৰিষ্ঠসংখ্যক ভাৰতীয়ই ।
‘আইএএনএছ-চি ভোটাৰ ষ্টেট অৱ দ্য নেছন’ৰ সমীক্ষাত প্ৰকাশ পোৱা অনুসৰি দেশৰ ৫৯.২২ শতাংশ লোকে মোদীক পুনৰ প্ৰধানমন্ত্ৰী হিচাপে বিচাৰে ।
মোদীৰ নেতৃত্বতে দেশে প্ৰগতিৰ পথত আগুৱাই যাবলৈ সক্ষম হ’ব বুলি এইসকল লোকে বিশ্বাস কৰে । মোদীয়ে দেশত আত্মনিৰ্ভৰশীলতাৰ পথলৈ আগুৱাই নিয়াত সহায় কৰিব পাৰিব বুলি এইসকল লোকে বিশ্বাস কৰে ।
সমীক্ষাটোৰ তথ্য অনুসৰি হিমাচল প্ৰদেশ আৰু ওড়িশাত মোদীৰ জনপ্ৰিয়তা যথেষ্ঠ বেছি । দেশৰ ১০ খন ৰাজ্যৰ ৬৫ শতাংশ লোকে মোদীক পুনৰ প্ৰধানমন্ত্ৰীৰ ৰূপত বিচাৰে ।
জম্মু-কাশ্মীৰতো মোদীৰ জনপ্ৰিয়তা আশাপদক । কাশ্মীৰত ৪৬.৭৪ শতাংশ লোকে মোদীক প্ৰধানমন্ত্ৰী হিচাপে পচন্দ কৰে ।
আনহাতে, সমীক্ষাত ম্লান পৰা দেখা গৈছে কংগ্ৰেছ নেতা ৰাহুল গান্ধী জনপ্ৰিয়তা । জনপ্ৰিয়তাৰ দিশত ৰাহুল আছে দ্বিতীয় স্থানত । ৰাহুল গান্ধীক দেশৰ ২৫.৬২ শতাংশ লোকে প্ৰধানমন্ত্ৰী হিচাপে পচন্দ কৰে বুলি সমীক্ষাটোত প্ৰকাশ পাইছে ।
সমীক্ষাটোত কোৱা হৈছে যে, কেৰালা আৰু তামিলনাডুত ৰাহুলৰ কিছু জনপ্ৰিয়তা নথকা নহয় । দেশৰ আন ৰাজ্যত ৰাহুল গান্ধীৰ জনপ্ৰিয়তাৰ গ্ৰাফডাল তেনেই নিম্নগামী যদিএ কেৰালাত ৫৪.২৮ শতাংশ লোকে ৰাহুলক প্ৰধানমন্ত্ৰী হিচাপে পচন্দ কৰে। লগতে তামিলনাডুৰ ৪৮.২৬ শতাংশ লোকে ৰাহুলক প্ৰধান মন্ত্ৰী হিচাপে বিচাৰে।