নগাঁও,১৯ নৱেম্বৰ : বি টি চি ৰ নিৰ্বাচনক লৈ তুংগত উঠিছে ৰাজনৈতিক দল সমূহৰ প্ৰচাৰ। বিশেষকৈ সমাগত বিধানসভা নিৰ্বাচনক লৈ  ৰাজ্যত বিভিন্ন ৰাজনৈতিক দলৰ মাজত তৎপৰতা বৃদ্ধি পোৱাৰ  সময়তেই  বি টি চিৰ নিৰ্বাচনক লৈ ৰাজ্যৰ ৰাজনীতি অধিক গৰম হৈ পৰা পৰিলক্ষিত হৈছে । শাসকীয় দল বিজেপিৰ প্রভাবশালী আৰু বাকপটু মন্ত্ৰী ডঃ হিমন্ত বিশ্ব শৰ্মাই  বি টি চিত নিৰ্বাচনী প্ৰচাৰ চলাবলৈ গৈ বি পি এফ দলৰ প্ৰধান হাগ্ৰাম মহিলাৰীৰ লগতে বি পি এফ দলক আক্ৰমণৰ লক্ষ্য কৰি লয়। মন্ত্ৰী ডঃ শৰ্মাই বি টি চি প্ৰধান হাগ্ৰাম মহিলাৰীৰ ভেটি কঁপাই  আগন্তুক নিৰ্বাচনত বি টি চিত বিজেপিয়ে অকলেই চৰকাৰ গঠন কৰিব বুলিও হুংকাৰ দিয়ে। ইপিনে হাগ্রামা মহিলাৰীয়েও নিৰ্বাচনী সভাসমূহত তীক্ষ্ণ বাক্য বানেৰে মন্ত্ৰী ডঃ হিমন্ত বিশ্ব শৰ্মাক প্ৰত্যুত্তৰ দি নিৰ্বাচনী প্ৰচাৰ আকৰ্ষনীয় কৰি তুলিছে ।  বিজেপি আৰু বি পি এফৰ নেতাৰ এনে বাকযুদ্ধৰ মাজতে আজি নগাঁৱৰ খগেন মহন্ত প্ৰেক্ষাগৃহত অনুষ্ঠিত  ‘জল জীৱন  মিছন’ নামৰ এক অনুষ্ঠানত অংশগ্ৰহণ কৰে ৰাজ্যৰ জন স্বাস্থ্য কাৰিকৰী বিভাগৰ মন্ত্ৰী ৰিহন দৈমাৰীয়ে । চৰকাৰী কাৰ্যসূচীত অংশগ্ৰহণ কৰি মন্ত্ৰী ৰিহন দৈমাৰীয়ে বি টি চি নিৰ্বাচনক লৈ সাংবাদিকৰ আগত বিশেষ মন্তব্য কৰাৰ পৰা বিৰত থাকে।   বি টি চি নিৰ্বাচনক লৈ সাংবাদিকে কৰা এক প্ৰশ্নৰ উত্তৰত মন্ত্ৰী দৈমাৰীয়ে মাথো কয় : বিটিচিত পুনৰ হাগ্ৰামা মহিলাৰীৰ নেতৃত্বতেই চৰকাৰ গঠন হব আৰু তাত কোনো সন্দেহ নাই ।

উজনি মাজুলী, ১৯ নৱেম্বৰঃ বিশ্বৰ  অন্যতম অৰাজনৈতিক ছাত্র সংগঠন অখিল ভাৰতীয় বিদ্যাৰ্থী পৰিষদ ,মাজুলী জিলা সমিতিৰ উদ্যোগত বুধবাৰে উজনি মাজুলী খেৰকটীয়া মহাবিদ্যালয়ৰ প্ৰেক্ষাগৃহত দিনজোৰা কাৰ্যসূচীৰে এখনি জিলা জনজাতি ছাত্ৰ সন্মিলন অনুষ্ঠিত হয় । বৰ্তমান সময়ত অসমৰ জনজাতীয় ছাত্ৰ-ছাত্ৰী সকল সকলো দিশৰ পৰাই পিছ পৰি ৰোৱা পৰিলক্ষিত হয়। তাৰ প্ৰতি লক্ষ্য ৰাখি ৰাষ্ট্ৰঃ হিতৰ বাবে কাম কৰি অহা বৃহৎ ছাত্ৰ সংগঠনটোৱে এলানি দীঘলীয়া কাৰ্যসূচীৰে মাজুলীৰ গণ্যমান্য ব্যক্তি সকলৰ উপস্থিতিৰে সন্মিলনখনি অনুষ্ঠিত কৰে। মাজুলী জিলাৰ ৬ টা শাখাৰ সকলো কাৰ্য্যকৰ্তাৰ লগতে পৰিষদৰ শুভাকাংক্ষী সকলে ব্যৱস্থাপনাৰ দায়িত্ব লোৱা কার্যসূচীটিৰ আদৰণি ভাষণেৰে আঁত ধৰে বিদ্যাৰ্থী পৰিষদৰ একালৰ সক্ৰিয় কাৰ্য্যকৰ্তা অনন্যা বৰুৱাই। পুৱা ৬ বজাত নতুন বজাৰৰ বিশিষ্ট সমাজ সেৱক কপিল কুমাৰ বৰাই আঁত ধৰা স্বচ্ছতা অভিযানৰ দ্বাৰা আৰম্ভ হোৱা সভাখনিত উপস্থিত থাকে বিদ্যাৰ্থী পৰিষদৰ উত্তৰ পূৱৰ ক্ষেত্ৰীয় সাংগঠনিক সম্পাদক নীৰৱ ঘিলানী ,অখিল ভাৰতীয় বিদ্যাৰ্থী পৰিষদ, মাজুলী জিলাৰ সভাপতি তথা মাজুলীৰ অন্যতম শিক্ষানুষ্ঠান ৰঙাচাহী মহাবিদ্যালয়ৰ অধ্যক্ষ ডঃ নৱ কুমাৰ গাম ,অ’.এন.জি. চি. অসম সম্পদৰ অধ্যক্ষ ও কেন্দ্ৰীয় কাৰ্যকৰী সমিতিৰ ৰাষ্ট্ৰীয় সভাপতি পোনাৰাম মিলি , টি.এম.পি.কে. মাজুলী জিলাৰ সভাপতি ৰাজু চিন্তে ,উজনি মাজুলী খেৰকটিয়া মহাবিদ্যালয়ৰ অধ্যক্ষা কুসুম দত্ত , মাজুলী বিদ্যাৰ্থী পৰিষদৰ ফুলনি শাখাৰ উপ:সভানেত্রী পাৰুল বৰা মিলি , অধিবক্তা তথা ৰঙাচাহী শাখাৰ সভাপতি মনোজ্যোতি মিলি। ভাষণ সম্পৰ্কত সাংগঠনিক সম্পাদক গৰাকীয়ে বিদ্যাৰ্থী পৰিষদৰ কাৰ্যকলাপৰ লগতে ছাত্ৰ-ছাত্ৰী সকলৰ শাৰীৰিক, মানসিক, বৌদ্ধিক বিকাশৰ জৰিয়তে কেনেদৰে দেশ মাতৃৰ হিতৰ বাবে সেৱা আগবঢ়াব পাৰি লগতে জনজাতি ছাত্ৰ-ছাত্ৰী সকলৰ উত্তৰণৰ দিশত ভাষণ প্ৰদান কৰে। উপস্থিত থকা বিশিষ্ট ব্যক্তি সকলে বিভিন্ন বিষয়ত বক্তব্য আগবঢ়ায়। তাৰ পিছতে কৃষ্টি-সংস্কৃতিৰ ভঁৰাল মাজুলীৰ উদীয়মান কলা-কুশলী সকলে মিছিং,দেউৰী,সোনোৱাল কছাৰী,নেপালী বিভিন্ন জনজাতীয় নৃত্য পৰিবেশন কৰে। দিনজোৰা কাৰ্য্যসূচীৰ অন্তত মাজুলীৰ সকলো কাৰ্য্যকৰ্তাই পৰিষদৰ বিভিন্ন শ্লো-গানেৰে সভাগৃহ উলাহ-উদ্দীপনাময় পৰিবেশৰ সৃষ্টি কৰে। বৰ্ণাঢ্য কাৰ্য্যসূচীটিৰ শেষত মাজুলী অখিল ভাৰতীয় বিদ্যাৰ্থী পৰিষদৰ সম্পৰ্ক প্ৰমুখ ভাৰ্গব প্ৰতীম বৰুৱাই শলাগৰ শৰাই আগবঢ়োৱাৰ পাছত “বন্দে মাতৰম”গীত পৰিবেশন কৰি সভাৰ সফল সমাপ্তি কৰে।

নগাঁও,২০নবেম্বৰ : অনন্তবন শিশু সাহিত্য বঁটাপ্ৰাপক বিশিষ্ট শিশু সাহিত্যিক মনোৰমা ভূঞাৰ আঠাইশতম গ্ৰন্থ জ্ঞানমালিনী আজি আকাশবাণী নগাঁও কেন্দ্ৰৰ প্ৰাংগণত উন্মোচন কৰে বিশিষ্ট শিশু সাহিত্যিক কাৰুণ্য ভট্টাচাৰ্যই । আকাশবাণী নগাঁও কেন্দ্ৰৰ মুৰব্বী পল্লৱী কলিতা, জ্যেষ্ঠ ঘোষক চিদানন্দ দেৱ গোস্বামী, প্ৰচাৰণ কাৰ্যবাহী গৌতম নাথ, ৰহা মহাবিদ্যালয়ৰ অৱসৰপ্ৰাপ্ত অধ্যক্ষ দীপ্তি দেৱী শৰ্মা, অৱসৰপ্ৰাপ্ত অধ্যাপক যতীন্দ্ৰ কুমাৰ পাৰৈ, ৰহা উচ্চতৰ মাধ্যমিক বিদ্যালয়ৰ অৱসৰপ্ৰাপ্ত অধ্যক্ষ বিজয়া গগৈ, সাহিত্যিক দূৰ্গেশ্বৰ বৰকটকী, নগাঁও জিলা কবি সন্মালনৰ উপদেষ্টা পুতুলী মুদৈ, নগাঁও জিলা কবি সন্মিলনৰ সম্পাদক পৱন শৰ্মা, পদ্ম পাতৰ, প্ৰসেণজিত ৰয়, শংকৰ দাস, প্ৰদীপ বৰা, সাংবাদিক ৰাহুল দেৱ বৰদলৈ, নাচিৰ উদ্দিন আহমেদ, নাট্যকাৰ দীপক নাথ, হাচিনা মমতাজ, কৃষ্ণ দৈমাৰী, যুৱ সাহিত্যিক ৰূপম নাথ প্ৰমূখ্যে ব্যক্তিসকলৰ উপস্থিতিত অনুস্থিত গ্ৰন্থ উন্মোচনী সভাখনৰ আঁত ধৰে মদাৰজ্যোতিয়ে । উল্লেখ্য , জ্ঞানমালিনীৰ উন্মোচনী কাৰ্যসূচী অহা পঁচিশ নৱেম্বৰৰ পুৱা ৯.১৫ বজাত আকাশবাণী নগাঁও কেন্দ্ৰযোগে সম্প্ৰচাৰ হ’ব ।