দৈনন্দিন বাৰ্তাৰ সেৱা, মঙলদৈ, ১০ নৱেম্বৰঃ পোহৰৰ উৎসৱ দিপাৱলী সমাগত৷ মঙলদৈ মহিলা সমাজৰ দ্বাৰা পৰিচালিত  মঙলদৈ কস্তুৰী শিশু গৃহৰ আবাসী সকলে দিপাৱলীত ব্যৱহাৰ কৰিবৰ বাবে প্ৰস্তুত কৰিছে ভিন্ন ৰঙী মাটিৰ চাকি। দীপাৱলীৰ সময়ত চিনৰ বহুৰঙী লাইট আটচবাজীৰে বজাৰ ভৰি পৰে ,এনে লাইট আৰু আটচবাজি য়ে আমাৰ পাৰিপাৰ্শ্বিক পৰিবেশ বিনষ্ট কৰি আহিছে। তেনে সময়তে মঙলদৈস্থ কস্তুৰী শিশু গৃহৰ চৌদ্ধ  গৰাকী আবাসীয়ে প্ৰস্তুত কৰি উলিয়াইছে ভিন্ন ৰঙী মাটিৰ চাকি। আবাসী সকলে প্ৰস্তুত কৰা এই  ভিন্ন ৰঙী মাটিৰ চাকিয়ে ইতিমধ্যে ৰাইজক আকৰ্ষিত কৰিবলৈ সক্ষম হৈছে। বহু জনে আহি ক্ৰয় কৰিছে এনে ৰঙ বিৰঙৰ  চাকি।

এনে ভিন্ন ৰঙী  চাকি বিক্ৰী পোৱা ধনেৰে অবাসী সকলৰ ব্যৱহৃত  বিভিন্ন শিল্প কৰ্মত লাগতিয়াল সামগ্ৰী সমুহ ক্ৰয় কৰে বুলি শিশু গৃহৰ অধিক্ষক ৰস্মিৰেখা শৰ্মাই জনাই। শিশু গৃহৰ অধিক্ষক ৰস্মিৰেখা শৰ্মাই জনোৱা মৰ্মে এই গৃহৰ আবাসী সকলে পঢ়া শুনাৰ উপৰিও বিভিন্ন সৃষ্টি মুলক কামত ব্যস্ত থাকে, দিপাৱলী উপলক্ষে বিগত তিনি বছৰ ধৰি এনে ধৰনে ভিন্ন ৰঙী মাটিৰ চাকি প্ৰস্তুত কৰি আহিছে আৰু এই চাকিয়ে ক্ৰতাৰ সমাদৰ লাভ কৰিছে। সমাগত দিপাৱলীৰ সামগ্ৰী ক্ৰয়ৰ বাবে গ্ৰাহকৰ দুগুণ আগমন আৰু চীনা সামগ্ৰী বর্জনৰ আহ্বানেৰে অবাসী সকলে দুগুণ উৎসাহেৰে প্ৰস্তুত কৰিছে চাকি৷

দৈনন্দিন বাৰ্তাৰ সেৱা, মৰাণ, ১০ নৱেম্বৰঃ মহাৰাষ্ট্ৰ মুখ্যমন্ত্ৰী জুমুঠি জ্বলিল উজনি অসমৰ মৰাণত। চৰাইদেউ জিলাৰ মৰাণত আজি অখিল ভাৰতীয় বিদ্যাৰ্থীৰ পৰিষদৰ চৰাইদেউ জিলাৰ মৰাণ নগৰৰ সমিতিৰ  উদ্যোগত ষড়যন্ত্ৰ মূলক ভাবে আটক কৰা জেষ্ঠ সাংবাদিক অৰ্ণৱ গোস্বামীৰ মুক্তিৰ দাবীত মৰাণ সোণাৰি পথ অৱৰোধ কৰি উদ্ধৱ থাকৰেৰ প্ৰতিমূৰ্তি জুমুঠি দাহ কৰি সাংবাদিক গৰাকীৰ মুক্তিৰ দাবী জনায়। প্ৰতিবাদীসকলে মহাৰাষ্ট্ৰ চৰকাৰ মুৰ্দাবাদ, উদ্ধৱ থাকৰে মুৰ্দাবাদ, শিৱ সনা  মুৰ্দাবাদ আদি প্ৰতিবাদী শ্ল’গানেৰে মৰাণৰ আকাশ-বতাহ কপাই তোলে।

উল্লেখ্য যে, প্ৰায় দুবছৰৰ পূৰ্বে মহাৰাষ্ট্ৰত সংঘটিত হোৱা এক আত্মহত্যাৰ ঘটনাত সাংবাদিক অৰ্ণৱ গোস্বামীৰ নাম সাঙোৰ খোৱাৰ অভিযোগ উত্থাপিত হৈছিল যদিও তথ্য প্ৰমাণৰ অভাৱত সেই সময়ত মুম্বাইৰ আৰক্ষীয়ে তেওঁৰ বিৰুদ্ধে উঠা অভিযোগৰ ফাইল বন্ধ কৰি দিছিল। কিন্তু শেহতীয়াকৈ আত্মহত্যা কৰা ইন্টেৰিয়ৰ ডিজাইনাৰ অন্বয় নায়কৰ পৰিয়ালৰ আবেদনৰ ভিত্তিত শিৱসেনা নেতৃত্বাধীন মহাৰাষ্ট্ৰ চৰকাৰে তদন্ত পুনৰ মুকলি কৰাৰ নিৰ্দেশ দিয়াৰ পিছতে যোৱা ৪ নৱেম্বৰ তাৰিখে মুম্বাই আৰক্ষীয়ে আটক কৰিছিল অৰ্ণৱক।

দৈনন্দিন বাৰ্তাৰ সেৱা, মৰাণ, ১০ নৱেম্বৰঃ নাগৰিকত্ব সংশোধনী আইন কা বাতিলৰ দাবীত আৰু তাই আহোমক জনজাতিকৰণ কৰা দাবীত মৰাণৰ খোৱাঙত খোৱাং চাৰিআলিত ৩৭নং ৰাষ্ট্ৰীয় ঘাইপথৰ দাঁতিত আটাছুৱে ২ ঘন্টীয়া অৱস্থান ধৰ্মঘট কাৰ্যসূচী ৰূপায়ণ কৰি উত্তাল প্ৰতিবাদ সাব্যস্ত কৰে। সদৌ তাই আহোম ছাত্ৰ সন্থাৰ খোৱাং আঞ্চলিক সমিতিৰ উদ্যোগত আজি দিনৰ ১১ বাজৰ পৰা ১ বজালৈ  ৰূপায়ণ কৰা দুঘন্টীয়া এই প্ৰতিবাদী কাৰ্যসূচীত পৰিবৰ্তনকামী বিজেপিৰ চৰকাৰৰ বিৰুদ্ধে বিভিন্ন প্ৰতিবাদী শ্ল’গানেৰে আকাশ-বতাহ কপাই তোলে।

যদি ২০২১ চনৰ বিধানসভাৰ নিৰ্বাচনৰ পূৰ্বে তাই আহোমক জনজাতিকৰণ প্ৰদান নকৰে আৰু অসমীয়া জাতিধ্বংসী আইন কা বাতিল নকৰে তেন্তে ২০২১  চনৰ বিধানসভাৰ নিৰ্বাচন বিজেপি দলক এসেকা দিব বুলি সকিয়নী প্ৰদান কৰিছে। কাৰ্যসূচী অন্তত প্ৰতিবাদী সকলে আটাছুৰ খোৱাং আঞ্চলিক সমিতিৰ সভাপতি ৰাজীৱ গগৈ আৰু সম্পাদক সুজিৎ চাংমাইৰ স্বাক্ষৰিত এক স্মাৰক পত্ৰ মৰাণ ৰাজহ চক্ৰৰ বিষয়া যোগেদি ভাৰতৰ প্ৰধান মন্ত্ৰী আৰু অসমৰ মুখ্যমন্ত্ৰীলৈ প্ৰেৰণ কৰে।

প্ৰতিবাদী কাৰ্যসূচীত আটাছুৰ ডিব্ৰুগড় জিলা সমিতিৰ সভাপতি নিপন ফুকনে নেতৃত্বত প্ৰদান কৰে। অৱস্থান ধৰ্মঘট কাৰ্যসূচীত আটাছুৰ বিষয়-ববীয়াসকলৰ উপৰিও আছু ডিব্ৰুগড় জিলা সমিতিৰ সহকাৰী সম্পাদক ৰাহুল কোঁৱৰ, আহোম জাতীয় গণ মঞ্চ, অসমৰ কেন্দ্ৰীয় সমিতিৰ সহকাৰী সম্পাদক অকণ ভূঞা, টাইপাৰ মৰাণ মহকুমা সমিতিৰ কাৰ্যকৰী সভাপতি গিৰিণ বৰগোঁহাইকে প্ৰমুখ্য কৰি ভালেমান বিশিষ্ট ব্যক্তিয়ে অংশ গ্ৰহণ কৰি পৰিবৰ্তনকামী চৰকাৰৰ কটু সমালোচনা কৰে।                   

দৈনন্দিন বাৰ্তাৰ সেৱা, মৰাণ, ১০ নৱেম্বৰঃ ডিব্ৰুগড় জিলাৰ ১১৫ নং মৰাণ বিধানসভা সমষ্টিত অন্তৰ্গত মৰাণ নগৰৰ মাজ-মজিয়া পৰা নিতাই সংযোগী পথৰ প্ৰথম আঢ়ৈ কিলোমিটাৰ পথ মেৰামতি বাবে গড়-কাপ্তানী বিভাগে আবন্টন দিয়া ৩৮ লাখ টকাৰ কাম ডিব্ৰুগড়ৰ ৰাজীৱ গগৈ নামৰ এজন ঠিকাদাৰে অতি নিম্ন মানদণ্ডৰে নিৰ্মাণ কৰাত আজি স্থানীয় ক্ষোভিত ৰাইজে পথৰ নিৰ্মাণ কাৰ্য বন্ধ কৰি দিছে।

নতুনকৈ কাৰ্পেটিং কৰা পথটো মাছৰ বাকলি দৰে নিৰ্মাণৰ পাছতেই চটাচত এৰি যোৱাত স্থানীয় ৰাইজৰ চকু কপালত উঠে আৰু ক্ষোভিত হৈ পৰে। ৰাইজৰ অভিযোগ মৰাণ সমষ্টি বিধায়ক চক্ৰধৰ গগৈক, বিভাগীয় অভিযন্তাক কমিচন দি ঠিকাদাৰে অতি নিম্ন মানদণ্ডৰে পথটো নিৰ্মাণ কৰোঁতে বিজেপিৰ পালিনেতাসকলে সমষ্টিত  উন্নয়ন হৈছে বুলি ঢাক-ঢোল বজোৱা কাৰ্যক কটুৰ সমালোচনা কৰিছে ক্ষোভিত ৰাইজে। পথ নিৰ্মাণ কৰোতে নিম্ন মানদণ্ড হৈছে বুলি স্বীকাৰ কৰে ঠিকাদাৰৰ মহৰীয়ে আৰু পুনৰ নিৰ্মাণ কৰা প্ৰতিশ্ৰুতি প্ৰদান কৰে।

দৈনন্দিন বাৰ্তাৰ সেৱা, মহুৰামুখ, ১০ নৱেম্বৰঃ ঐক্যবদ্ধ, আপোচহীন, প্ৰগতিশীল, জাতীয়তাবাদী চিন্তাক মূলমন্ত্ৰ হিচাপে লৈ আগবঢ়া কৃষক মুক্ত আৰু ৭০ জাতীয় জনগোষ্ঠীয় সংগঠনৰ ঐৰসত ভূমিষ্ঠ হোৱা “ৰাইজৰ দল”ৰ আজি বোকাখাত বিধান সভা সমষ্টিৰ আহ্বায়ক সমিতিখন গঠন কৰা হয়৷ এই উপলক্ষে বোকাখাতৰ পুৱতি সাহিত্য সভা ভৱনত আয়োজিত সভাত সভাপতিত্ব কৰে গোলাঘাট জিলা কৃষক মুক্তি সংগ্ৰাম সমিতিৰ সভাপতি ধৰ্মেশ্বৰ শইকীয়াই আৰু উদ্দেশ্য ব্যাখ্যা আগবঢ়াই গোলাঘাট জিলা ৰাইজৰ দলৰ আহ্বায়ক ৰতন দাৱে৷

সভাত ৰাইজৰ দলৰ ৰাজ্যিক আহ্বায়ক প্ৰবীন দাস, গোলাঘাট জিলা ৰাইজৰ দলৰ মুখ্য আহ্বায়ক প্ৰাঞ্জল গগৈ, বিদ্যুত মহন্ত, ৰাজ্যি আহ্বায়ক ধ্ৰুৱ ভৰালী, ছাত্ৰ মুক্তি সংগ্ৰাম সমিতিৰ সম্পাদক বিদ্যুত শইকীয়া, এনচিপিৰ নেতা মৃদুল শইকীয়াই সভাত উপস্থিত থাকি ভাষণ প্ৰদানক কৰে৷ বোকাখত সমষ্টিৰ বিভিন্ন প্ৰান্তৰ পৰা অহা ডেৰ শতাধিক লোকৰ উপস্থিতিত ৩০ জন ব্যক্তিক মুখ্য আহ্বায়ক হিচাপে লৈ ১০১ জনীয়া বোকাখাত সমষ্টি “ৰাইজৰ দল”ৰ সমিতিখন গঠন কৰা হয়৷

দৈনন্দিন বাৰ্তাৰ সেৱা, গুৱাহাটী, ১০ নৱেম্বৰঃ আজি অসম গণ পৰিষদত আনুষ্ঠানিক ভাৱে যোগদান কৰে অসম সাহিত্য সভাৰ প্ৰাক্তন সভাপতি তথা প্ৰাক্তন ছাত্ৰনেতা  ডঃ পৰমানন্দ ৰাজবংশীয়ে। অগপৰ মূখ্য কাৰ্যলয় আমবাৰীত হাতীৰ পিঠিত উঠিল পৰমানন্দ। পৰমানন্দ ৰাজবংশীক গণ পৰিষদ দলৰ মজিয়ালৈ আদৰণি জনায় অসম গণ পৰিষদ সভাপতি অতুল বৰা, কাৰ্যকৰী সভাপতি কেশৱ মহন্তৰ লগতে অগপৰ জেষ্ঠ নেতা তথা মন্ত্ৰী ফণীভূষণ চৌধুৰীয়ে।

আগন্তুক ৰাজ্যৰ বিধানসভা নিৰ্বাচনত প্ৰতিদ্বন্দ্বিতা কৰাৰ লক্ষ্যৰে অসম সাহিত্য সভাৰ প্ৰাক্তন সভাপতি গৰাকীয়ে অসম গণ পৰিষদত যোগদান কৰা বুলি ৰাজনৈতিক মহলত ব্যপক চৰ্চা লাব কৰিছে। আজি ৰাজবংশীৰ লগত দৰং জিলাৰ চিপাঝাৰ সমষ্টিৰ ৰাজবংশীৰ বহু সমৰ্থকে অসম গণ পৰিষদত যোগদান কৰে। আনহাতে এক সূত্ৰৰ পৰা জানিব পৰা মতে আগন্তুক বিধানসভা নিৰ্বাচনত চিপাঝাৰ সমষ্টিৰ পৰা পৰমানন্দ ৰাজবংশীয়ে প্ৰতিদ্বন্দিতা কৰাৰ কৰিব।

আনহাতে অসম গণ পৰিষদৰ মিত্ৰ দল ভাৰতীয় জনতা পাৰ্টীৰ বৰ্তমানৰ চিপাঝাৰ সমষ্টিৰ বিধায়ক বিনন্দ কুমাৰ শইকীয়াই ৰাজবংশীৰ নিৰ্বাচনী অংকত আউল লগোৱাৰ সম্ভাৱনা প্ৰকট হৈ পৰিছে। এতিয়া নিৰ্বাচনত চিপাঝাৰ সমষ্টিত কি নিৰ্বাচনী সমীকৰণ সেয়া লক্ষ্যনীয় হব।