তিনিচুকীয়া জিলাৰ ফিল’বাৰীৰ ৰংপুৰ গাৱঁৰ শংকৰদেৱ প্ৰাথমিক বিদ্যালয়ৰ অৱসৰ গ্ৰহণ কৰা প্রধান শিক্ষক শশীন্দ্ৰ কুমাৰ চুতীয়াক শিল্পী দিৱসৰ লগত সংগতি ৰাখি অনুষ্ঠিত কৰা এক কাৰ্যসূচীত বিদায় সম্বৰ্দ্ধনা জনোৱা হয় । ৰংপুৰ গাওঁবাসীৰ সহযোগত বিদ্যালয় পৰিচালনা সমিতি আৰু প্ৰাক্তন ছাত্ৰ-ছাত্ৰী সকলৰ উদ্যোগত দেওবাৰে অনুষ্ঠিত কৰা কাৰ্যসূচীৰ লগত সংগতি ৰাখি গছ পুলি ৰোপন কৰা হয় ।  অনুষ্ঠানত অৱসৰপ্ৰাপ্ত প্ৰধান শিক্ষক তৰুণ চন্দ্র গায়ন, অৱসৰ প্ৰাপ্ত শিক্ষক কমলা কান্ত চুতীয়া, ভৈৰৱ বৰা, মীৰা চেতিয়া দুৱৰী, মহেন্দ্র দাসৰ লগতে ৰংপুৰ গাৱঁৰ কেইবাজনো বিশিষ্ট ব্যক্তি উপস্থিত থাকে । বিভিন্ন গীত মাতেৰে মুখৰিত হোৱা শিল্পী দিৱস আৰু সম্বৰ্ধনা অনুষ্ঠানৰ  কাৰ্য্যসূচীত ৰংপুৰ গাৱঁৰে ৰাজীৱ লোচন বৰা, তৰুণ চন্দ্র গায়ন, প্ৰিয়ংকা শইকীয়া,  আকাশ কোঁৱৰ আদি মুঠ ৮ গৰাকী লোকে  গছ পুলি ৰোপন কৰে। 

 বিগত বছৰৰ দৰে শিৱসাগৰ চেছ একাডেমীৰ মাডাৰ্চ ফৰামৰ  উদ্যোগত আৰু শিৱসাগৰ চেছ একাডেমীৰ সহযোগত অহা ২৬ জানুৱাৰী গণতন্ত্ৰ দিৱস উপলক্ষে শিৱসাগৰ ছোৱালী কলেজত দিনজোৰাকৈ শিৱসাগৰ জিলাভিত্তিক মুকলি দ্ৰুত দবা প্ৰতিযোগিতাৰ আয়োজন কৰা হৈছে । প্ৰতিযোগিতাৰ নামভৰ্তিৰ মাচুল ২০০ টকা । প্ৰতিযোগীসকলে অহা ২৫ জানুৱাৰীৰ সন্ধিয়া ৭ বজাৰ ভিতৰত শিৱসাগৰ চেছ একাডেমীত নামভৰ্তি নিশ্চিত কৰিব লাগিব । অৰ্থাৎ ২৬ জানুৱাৰীৰ দিনা কোনোধৰণৰ নামভৰ্তি নহ’ব । বয়সৰ প্ৰমাণপত্ৰ দাখিল কৰাটো বাধ্যতামূলক । প্ৰতিযোগিতাখন অনুষ্ঠিত কৰিবৰ বাবে জিলা দবা সন্থাৰ পৰা অনুমতি লোৱা হৈছে। প্ৰতিযোগীসকলে চুইছ লীগ পদ্ধতিৰে দবা ঘড়ীৰ সহায়ত ১০ মিনিট ৩ ছেকেণ্ড ইনক্ৰিমেন্ট সময়ত  ৭ ৰাউণ্ড খেলিব লাগিব। প্ৰতিযোগিতাখন অনুৰ্দ্ধ  ৯, ১৩,আৰু ১৭  বছৰৰ ল’ৰা – ছোৱালীৰ শাখাত খেলুৱা হ’ব । প্ৰতিটো শাখাৰ প্ৰথম চাৰিটা স্থান লাভ কৰা সকলক ট্ৰফী আৰু মানপত্ৰ প্ৰদান কৰাৰ  উপৰিও অংশ গ্ৰহণ কৰা সকলোকে মানপত্ৰ প্ৰদান কৰা হ’ব। 

জামুগুৰিহাটৰ চৰাঞ্চলত আজি এটা গড়েঁ সন্ত্ৰাসৰ সৃষ্টি কৰে।কাজিৰঙা ৰাষ্ট্ৰীয় উদ্যানৰ ষষ্ঠ সংযোজনৰ পৰা খাদ্যৰ সন্ধানত ওলাই আহি জামুগুৰিহাটৰ দীঘলী চাপৰিত আশ্ৰয় লোৱা গড়ঁটোৰ আক্ৰমণত দুটাকৈ গৰু গুৰুত্বৰ ভাৱে আহত হয়।দিনৰ ১২মান বজাত দীঘলী চাপৰিত গড়ঁটো ৰাইজে প্ৰত্যক্ষ কৰাৰ পাছতে হুলস্থূলৰ সৃষ্টি কৰাত ভয়ত দিকবিদিক হেৰুৱাই খঙাল ৰূপ ধাৰণ কৰা গড়ঁটোৱে এফালৰ পৰা আক্ৰমণ কৰিবলৈ উদ্যত হয়।গড়ঁৰ আক্ৰমণত দুটাকৈ গৰু গুৰুত্বৰভাৱে আহত হয়।ৰাইজে বনবিভাগক আৱগত কৰাত ঘটনাস্হলীত বনবিভাগৰ লোক উপস্থিত হৈ গড়ঁটো বনাঞ্চললৈ ওভতাই পঠাবলৈ চেষ্টা চলাই যদিও সন্ধিয়া পৰ্যন্ত বনবিভাগৰ লোক সফল হোৱা নাই। ইফালে আন্ধাৰ হৈ অহাৰ পাছত গড়ঁৰ ভয়ত অঞ্চটোৰ ৰাইজ আতংকিত হৈ পৰিছে। 

নাগৰিকত্ব সংশোধনি আইন ২০১৯ৰ বিৰুদ্ধে দেশৰ উচ্চতম ন্যায়ালয়ত দাখিল হোৱা গোচৰ সমূহৰ ক্ষিপ্ৰতাৰে মীমাংসা কৰাৰ আহ্বানৰে উচ্চতম ন্যায়ালয়ৰ মুখ্য ন্যায়াধীশলৈ আবেদন পত্ৰ প্ৰেৰণ কৰিছে সদৌ অসম সাংবাদিক সন্হা চমুকৈ আজুৱে ৷ দেওবাৰে বিয়লি সাংবাদিক সংস্হাটোৰ তেজপুৰস্হিত মুখ্য কাৰ্যালয়ত এখন সংবাদ মেলত এই কথা প্ৰকাশ কৰিছে সংগঠনটোৰ সভাপতি পংকজ নাথে৷সাংবাদিক সংস্হাটোৰ বিত্তীয় সম্পাদক মিন্টু হেমৰম,কেন্দ্ৰীয় কাৰ্যনিৰ্বাহক সদস্য দিব্যজ্যোতি নাথ আৰু অপূৰ্ব বৰাৰ অংশগ্ৰহণৰে অনুষ্ঠিত সংবাদ মেলখনত নাথে কয় যে নাগৰিকত্ব সংশোধনি আইন ২০১৯ বাতিলৰ দাবীত উচ্চতম ন্যায়ালয়ত বহু সংখ্যক গোচৰ দাখিল হৈছে আৰু পঞ্জীয়নভুক্ত অসমৰ এই গোচৰ সমূহ উচ্চতম ন্যায়ালয়ে আছুতীয়াকৈ ৰাখিছে৷কিন্তু আছুতীয়াকৈ থকা এইসমূহ গোছৰৰ শুনানি গ্ৰহণত পলম হোৱা বুলি মন্তব্য কৰি নাথে কয় যে এই বাবেই শুনানি শীঘ্ৰেই গ্ৰহণ কৰাৰ বাবে উচ্চতম ন্যায়ালয়ৰ মুখ্য ন্যায়াধীশক আবেদন জনাই শণিবাৰে পত্ৰ প্ৰেৰণ কৰিছে আজুৱে৷নাথে এই আইনখন ৰাজ্যখনৰ খিলঞ্জীয়া লোকৰ বাবে অতি বিপদজনক বুলি অভিহিত কৰি এই ক্ষেত্ৰত উচ্চতম ন্যায়ালয়ক ৰাজ্যৰ খিলঞ্জীয়া লোকৰ সকলোধৰণৰ নিৰাপত্তা নিশ্চিত কৰিবলৈ আহ্বান জনায়৷তেওঁ লগতে কয় যে পত্ৰ প্ৰেৰণৰ এই সিদ্ধান্ত আজুৰ আজাৰাত অনুষ্ঠিত মধ্যকালীন অধিবেশনত লোৱা হৈছিল৷

হোজাই জিলাৰ ডিমাছা সকলে উদযাপন কৰিছে পৰম্পৰাগত বিহু। ভোগালী বিহুৰ বতৰত হোজাই জিলাত বসবাস কৰা ডিমাছা গাওঁসমূহতো অতি উলহ মালহেৰে উদযাপন কৰিছে বিহু। মূলত হোজাই জিলাত বসবাস কৰা ডিমাছা সম্প্ৰদায়ৰ বিভিন্ন গাওঁৰ লোকসকলে মাঘ বিহুৰ দিনাখনৰে পৰা পৰম্পৰাগত বিহু উদযাপন পৰ্ব আৰম্ভ হয়। বিশেষকৈ শিঙজুৰি, নাঙলভাঙা, বৰ্মন পথাৰ, ৰাইকটা, কোমোৰাকটা, চন্দনপূৰ, নভঙা, কেন্দুগুৰীকে আদিকৰি ডিমাছা সম্প্ৰদায়ে বসবাস কৰা গাওঁ বিশেষে বেলেগ বেলেগ দিনত বিহু উদযাপন কৰা পৰিলক্ষিত হয়।সেই মৰ্মে শনিবাৰে কোমোৰাকটা গাঁওতো ডিমাছা সকলে অতি উলহ মালহেৰে উৎযাপন কৰিছে পৰম্পৰাগত বিহু। বিহু উদযাপনৰ বাবে উদ্যোক্তা সকলে অতি সুন্দৰকৈ বাইখ (নৃত্য পৰিবেশন কৰা ঘৰ) সজাই তুলে আৰু উক্ত বাইখ ঘৰত ডিমাছা সাজ পৰিধান কৰি পুৰুষ-মহিলা, সৰু-বৰ সকলোৱে অতি আনন্দৰে ডিমাছা সকলৰ পৰম্পৰাগত বাইডিমা (পৰম্পৰাগত ডিমাছা নৃত্য) পৰিবেশন কৰে। উক্ত স্থানত হোৱা বিহুত গাওঁ তথা অনান্য অঞ্চলৰ প্ৰায় পাচঁ শতাধীক লোকে ওৰে নিশা পৰম্পৰাগত নৃত্যত অংশ গ্ৰহণ কৰে। মহামাৰি ক’ৰোনাৰ পিছত গাওঁত উদযাপন কৰা বিহুত সহস্ৰাধীক দৰ্শক লোকে অংশগ্ৰহণ কৰাত উৎফুল্লিত উদ্যোক্তা সমিটিৰ অনিতা ফুৰা আৰু চুইটি ডাউলাগুফুে ৰাইজৰ সহযোগে অনাগত দিনত আৰু দুগুনে বিহু উদযাপ কৰিবলৈ শক্তি যোগাব বুলি উল্লেখ কৰে। অনুষ্ঠানৰ শেষত ৪ টা কেটেগুৰিত শ্রেষ্ট বিজয়ী জুতিক পুৰস্কাৰ প্ৰদান কৰা হয়।