দৈনন্দিন বাৰ্তা সেৱাঃ অহা সপ্তাহত ভাৰত ভ্ৰমণলৈ আহিব আমেৰিকাৰ বৈদেশিক মন্ত্ৰী মাইক পম্পিয়’ আৰু প্ৰতিৰক্ষা মন্ত্ৰী মাৰ্ক এস্পৰ। মঙলবাৰে এই কথা সদৰী কৰিলে আমেৰিকাৰ প্ৰতিৰক্ষা মন্ত্ৰী গৰাকীয়ে। ভাৰত-চীনৰ মাজত চলি থকা বিবাদৰ লগতে গুৰুত্বপূৰ্ণ বিভিন্ন বিষয়ক লৈ আলোচনা কৰিৰ এই ভ্ৰমণকালত।

ভাৰতৰ সন্দৰ্ভত আমেৰিকাৰ প্ৰতিৰক্ষা মন্ত্ৰী গৰাকীয়ে ‘ভাৰত বিশ্বৰ সৰ্ববৃহৎ গণতান্ত্ৰিক দেশ। ইয়াত বহুত প্ৰতিভাশালী লোক আছে আৰু তেওঁলোকে হিমালয়ত প্ৰতিদিনে চীনৰ আক্ৰমক স্থিতিৰ সৈতে মোকাবিলা কৰে’ বুলি উল্লেক কৰে। ভাৰত-চীনৰ মাজত উত্তেজনা বৃদ্ধি পোৱাৰ সময়তে আমেৰিকাৰ দুই মন্ত্ৰীৰ আগমনে আমেৰিকা আৰু ভাৰতৰ মাজত সম্পৰ্ক শক্তিশালী কৰিব বুলি আশা কৰা হৈছে।

দৈনন্দিন বাৰ্তা সেৱাঃ বুধবাৰে সমগ্ৰ দেশৰ লগতে অসমতো পালন কৰা হৈছে আৰক্ষী স্মৃতি দিৱস। দেশৰ হকে নিষ্ঠাসহকাৰে কৰ্তব্য পালন কৰি আত্মবলিদান দিয়া আৰক্ষী বিভাগৰ বীৰ জোৱান সকলক শ্ৰদ্ধাৰে সোৱঁৰিলে প্ৰতিজন ভাৰতীয়ই। আজি দিল্লীত দেশৰ প্ৰধানমন্ত্ৰী আৰু গৃহমন্ত্ৰীয়ে বীৰ আৰক্ষী জোৱানসকলক স্মৰণ কৰি শ্ৰদ্ধা নিবেদন কৰে।

অসমত কেন্দ্ৰীয়ভাৱে কাহিলীপাৰাস্থিত চতুৰ্থ আৰক্ষী বেটলিয়নত পালন কৰা হয় আৰক্ষী স্মৃতি দিৱস। অনুষ্ঠানত আৰক্ষী সঞ্চালক প্ৰধান ভাস্কৰ জ্যোতি মহন্ত, ৰাজ্যৰ মুখ্য সচিব কুমাৰ সঞ্জয় কৃষ্ণ উপস্থিত থাকে।

দৈনন্দিন বাৰ্তা সেৱাঃ দেশৰ পৰা ক’ৰ’না আঁতৰি যোৱা নাই বুলি দেশবাসীক সম্বোধি মঙলবাৰে প্ৰধানমন্ত্ৰী নৰেন্দ্ৰ মোডীয়ে দিয়া ভাষণক লৈ বিৰোধী শিবিৰ আক্ৰমণাত্মক হৈ উঠা পৰিলক্ষিত হৈছে। দেশৰ প্ৰধান বিৰোধী দল কংগ্ৰেছে প্ৰধান মন্ত্ৰীৰ ভাষণ দেশবাসীক নালাগে, কেৱল সঠিক সমাধানৰহে প্ৰয়োজন বুলি মন্তব্য কৰে।

কংগ্ৰেছ মুখপাত্ৰ ৰণদীপ সুৰজেৱালা আৰু পৱন খেড়াই কয়, ‘কৃপা কৰি দেশবাসীক জনাওক যে মহামাৰী কেনেদৰে নিয়ন্ত্ৰণ হ’ব আৰু অৰ্থনীতি কিদৰে পুনৰুদ্ধাৰ হ’ব?

তেওঁলোকৰ ওচৰত ইয়াৰ কিবা সমাধান আছে নে ইয়াৰ বাবে ভগৱানক দোষ দিব’। ‘ক’ৰ’নাৰ বিৰুদ্ধে যুঁজ চলি থকাৰ সময়ত আমাৰ নেতা অন্তৰ্ধান হয়। তেওঁলোকে কেৱল টিভিত উপদেশ দিবলৈ আহে’। দেশৰ প্ৰধানমন্ত্ৰী গৰাকীয়ে মঙলবাৰে ক’ৰ’না প্ৰতিৰোধৰ স্বাৰ্থত ক’ভিড প্ৰটক’ল মানি চলিবলৈ দেশবাসীক তেখেতৰ ভাষণৰ জৰিয়তে আহ্বান জনাইছিল।

দৈনন্দিন বাৰ্তা সেৱাঃ আজি পৰ্যটকৰ বাবে মুকলি কৰা হ’ব বিশ্ব ঐতিহ্যক্ষেত্ৰ কাজিৰঙা ৰাষ্ট্ৰীয় উদ্যান৷ ৰাজ্যৰ মুখ্যমন্ত্ৰী সৰ্বানন্দ সোণোৱালে ১১ বজাত কঁহৰা বনাঞ্চলৰ মিহিমুখত আনুষ্ঠানিকভাৱে কাজিৰঙা ৰাষ্ট্ৰীয় উদ্যানখনৰ দ্বাৰ মুকলি কৰি কাঠপাৰালৈকে উদ্যান দৰ্শন কৰিব৷ মুকলি কৰা অনুষ্ঠানত উপস্থিত থাকিব গ্ৰামোন্নয়ন মন্ত্ৰী নৱ দলে, বন মন্ত্ৰী পৰিমল শুক্লবৈদ্য, কৃষি মন্ত্ৰী অতুল বৰাৰ লগতে জলসম্পদ মন্ত্ৰী কেশৱ মহন্ত। লকডাউনত বিপৰ্যয়ৰ সন্মুক্ষীণ কাজিৰঙাৰ পৰ্যটন উদ্যোগ। হোটেল-ৰেষ্টুৰেন্ট-লজ-ধাৱা-জীপ- চাফাৰীৰ ব্যৱসায়ৰ লগত জড়িত বহু লোক কৰ্মহীন হৈ পৰিছিল। আশা কৰা হৈছে ৰাষ্ট্ৰীয় উদ্যানখন আজি পৰ্যটকৰ বাবে মুকলি কৰাৰ ফলত কিছু লোকে পুনৰ সংস্থাপন পাবলৈ সক্ষম হব।