সোণতলী, ১৮ ছেপ্টেম্বৰঃ দক্ষিণ কামৰূপৰ বকো সমষ্টিৰ অন্তৰ্গত পানীখাইতীত আজি ব্ৰহ্মপুত্ৰৰ ভয়ংকৰ খহনীয়া আৰম্ভ হৈছে ৷ উল্লেখ্য যে বিগত দিনৰ ব্ৰহ্মপুত্ৰৰ প্ৰৱল গৰাখহনীয়াৰ ফলত সোণতলীৰ লটুৰাদিয়া, ১নং, ২নং জ্যোতিয়াদিয়া, বৰদিয়া নয়াপাৰা, লটুৰটাৰীকে ধৰি কুৰিখনৰো অধিক গাঁও ইতিমধ্যে ব্ৰহ্মপুত্ৰত বিলীন গৈছে ৷ আনহাতে বিগত ২০১৭ চনত সোণতলীৰ পানীখাইতীত গৰাখহনীয়া প্ৰতিৰোধৰ বাবে জিঅ’বেগৰ আঁচনি ৰূপায়ন কৰা হৈছিল। জলসম্পদ বিভাগে পানীখাইতী অঞ্চলটোত প্ৰায় ১৪ কোটি টকা ব্যয় সাপেক্ষে জিঅ’ বেগৰ জৰিয়তে এই গৰাখহনীয়া প্ৰতিৰোধৰ কাম কৰিছিল ৷ পানীখাইতীত সেইসময়ত জিঅ’বেগৰ জৰিয়তে গৰাখহনীয়া প্ৰতিৰোধৰ কাম অতি নিম্নমানৰ হোৱাৰ অভিযোগ উত্থাপিত হৈছিল। সেইসময়ত পানীখাইতী অঞ্চলটোত জিঅ’বেগৰ নিম্নমান কাম কৰাত উক্তস্থানত আজি দুপৰীয়াৰ পৰা ব্ৰহ্মপুত্ৰৰ ভয়ংকৰ খহনীয়া আৰম্ভ হৈছে ৷ ফলত জলসম্পদ বিভাগৰ ১৪ কোটি টকীয়া জিঅ’ বেগ পানীত উটি যোৱাৰ লগতে ব্ৰহ্মপুত্ৰৰ খহনীয়াই অঞ্চলটোত ভয়ংকৰ ৰূপ ধাৰণ কৰিছে। ইপিনে চপৰা-চপৰে খহা মাটিয়ে জিঅ’বেগৰ জৰিয়তে খহনীয়া প্ৰতিৰোধ কৰিব নোৱাৰাত অঞ্চলবাসীয়ে বিষয়টো বিভাগীয় কৰ্তৃপক্ষক অৱগত কৰিছে যদিও এই বাতৰি লিখা পৰলৈকে কোনো লোক সেইস্থানলৈ যোৱা নাই।

তিনিচুকীয়া : কাগজ কল বচাওক, শ্ৰমিক বচাওক মূল দাবীৰ ভিত্তিত ৰাজ্যিক কাৰ্যসূচীৰ অংশ হিচাপে এ.আই.চি.চি.টি.ইউ আৰু নিখিল ভাৰত ছাত্ৰ সন্থা(আইছা) ই যৌথভাৱে আজি তিনিচুকীয়াৰ থানা চাৰিআলিত দাবী দিৱস পালনৰ অৰ্থে ধৰ্ণা কাৰ্যসূচী ৰূপায়ণৰ পিছত তিনিচুকীয়াৰ ৰাজহ চক্ৰ বিষয়াৰ জৰিয়তে অসমৰ মুখ্যমন্ত্ৰীলৈ স্মাৰকপত্ৰ প্ৰেৰণ কৰা হয় বুলি এ.আই.চি.চি.টি.ইউৰ ৰাজ্যিক সম্পাদক সুভাষ সেন আৰু আইছাৰ জিলা সম্পাদক সূৰয মাহালিয়ে জানিবলৈ দিয়ে। স্মাৰকপত্ৰৰ মূল দাবীসমূহ হৈছে কেৰালা চৰকাৰৰ দৰে অসম চৰকাৰেও ২০১৫ চনৰ অক্টোবৰ মাহৰ পৰা বন্ধ হৈ থকা কাছাৰ পেপাৰ কল আৰু ২০১৭ৰ মাৰ্চ মাহৰ পৰা বন্ধ হৈ থকা নগাঁও কাগজ কল দুটাক ৰাজহুৱা খণ্ডতে পুনৰুজ্জীৱিত কৰাৰ কাৰণে উদ্যোগ লওক, শ্ৰমিক কৰ্মচাৰীৰ ৪৫ মাহৰ দৰমহা মোকলাই দিয়ক, বন্ধ কাগজ কল খোলা হ’ব বুলি বিজেপিয়ে দিয়া নিৰ্বাচনী প্ৰতিশ্ৰুতি ৰক্ষা কৰক, ৰাজ্য চৰকাৰে ২১ ছেপ্তেম্বৰৰ আগত কাগজ কল দুটা পুনৰুজ্বীৱিতকৰণৰ নিৰ্দ্দিষ্ট প্ৰস্তাৱ এনচিএলটি লৈ প্ৰেৰণ কৰক, সংস্থাপন বন্ধ নহয় ন ন সংস্থাপন ক্ষেত্ৰ সৃষ্টি কৰক, বিত্ত মন্ত্ৰী হিমন্ত বিশ্ব শৰ্মাই সদ্যহতে ঘোষণা কৰা ১২ হাজাৰ কোটি টকা পেকেজৰ পৰা কেৱল ১২শ কোটি টকা কাগজ কল দুটাক উৎপাদনক্ষম কৰাৰ কাৰণে ব্যয় কৰক, আৰু সদ্দিচ্ছা প্ৰকাশ কৰক ইত্যাদি। আজিৰ কাৰ্যসূচীত নেতৃত্ব দিয়াসকলৰ ভিতৰত প্ৰগতিশীল নাৰী সন্থাৰ জিলা সম্পাদিকা তথা ৰাজ্য সমিতিৰ সদস্যা শিখা দাস, আইছাৰ জিলা সভাপতি বিশাল কল, মনোজ হাজৰিকা, সুখু মাহালি আৰু ব্ৰীজ প্ৰধান আদি। যৌথ বিবৃতিটোত উল্লেখ কৰা হয় যে মিল দুটা বন্ধ হৈ পৰাৰ ফলত প্ৰায় ৪৪০০ জন শ্ৰমিক কৰ্মচাৰীৰ জীৱনে অন্ধকাৰ ভৱিষ্যতৰ দিশে গতি কৰিছে। তদুপৰি পৰোক্ষভাৱে শ শ ঠিকাদাৰ, হাজাৰ হাজাৰ বাঁহ খেতিয়ক আৰু বাঁহ সৰবৰহকাৰী আৰু আন আন সামগ্ৰীৰ যোগান ধৰোতা সৰ্বমুঠ প্ৰায় দুই লাখ মানুহৰ জীৱনলৈ গভীৰ অমানিশা নামি আহিছে। জাগীৰোড আৰু পাঁচগ্ৰামৰ টাউনশ্বিপ দুখনো লাহে লাহে ধ্বংসস্তূপত পৰিণত হোৱাৰ পথত। আটাইতকৈ মৰ্মান্তিক বিষয় হৈছে ৪৫ মাহ ধৰি দৰমহা নোপোৱাৰ ফলত এজন বিষয়া সহ ৩ জনে আত্মহত্যা কৰিছে আৰু চিকিৎসা তথা খাদ্যৰ অভাৱত আৰু ৬৮ জন সহ সৰ্বমুঠ ৭১ জনৰ মৃত্যু হৈছে। উল্লেখযোগ্য যে ৰাজ্যিক উদ্যোগ মন্ত্ৰীয়ে এবাৰ বিধানসভাত কাগজ কল দুটাৰ কাৰণে ১৯০০ কোটি টকা মোকলাই দিয়া হ’ব বুলি প্ৰতিশ্ৰুতি দিয়া সত্বেও সকলো ফুটুকাৰ ফেন হ’ল। অতি ক্ষীণ হ’লেও আশাৰ কথা যে নেচনেল কোম্পানী ল ট্ৰাইবুনেলে মিল দুটাৰ ভৱিষ্যৎ নিৰূপণৰ বাবে চূড়ান্ত ৰায় দিয়াৰ তাৰিখ ২১ ছেপ্তেম্বৰলৈকে পিছুৱাই দিছে আৰু ৰাজ্য চৰকাৰে এক মাহৰ সময় বিচাৰিছে। ৰাজ্য চৰকাৰে মিল দুটাক পুনৰুজ্জীৱিত কৰণেৰে যুৱক যুৱতীৰ কৰ্ম সংস্থানৰ দুৱাৰ মুকলি কৰিব বুলি শ্ৰমিক কৰ্মচাৰী, ৰাইজ আৰু নিবনুৱা যুৱক-যুৱতীয়ে আশাৰে বাট চাই আছে বুলিও বিবৃতিটোত আশাবাদ ব্যক্ত কৰা হৈছে।

টিংখাং : ডিব্ৰুগড় জিলাৰ জয়পুৰ শিক্ষা খণ্ডৰ অন্তৰ্গত নাওজান মজলীয়া বিদ্যালয়ৰ প্ৰধান শিক্ষক বিদুৰ প্ৰসাদ শৰ্মালৈ শিক্ষা আৰু ডিব্ৰুগড় জিলা প্ৰশাসনে আগবঢ়াইছে কৃতী শিক্ষকৰ বঁটা। শিক্ষা জগতলৈ প্ৰশংসনীয় অৱদান আৰু উল্লেখনীয় সেৱাৰ স্বীকৃতি সৰূপে আদৰ্শ শিক্ষক বিদুৰ প্ৰসাদ শৰ্মাক কৃতী শিক্ষকৰ সন্মান প্ৰদান কৰি যোৱা ৫ ছেপ্টেম্বৰ ডিব্ৰুগড় জিলা অধিবিদ্যা পৰিষদৰ সভাকক্ষত অনুষ্ঠিত এক গাম্ভীৰ্যপূৰ্ণ অনুষ্ঠানত শৰ্মাক প্ৰশাসনৰ তৰফৰ পৰা সম্বৰ্ধনা জনায়। ডিব্ৰুগড় জিলা কেন্দ্ৰীয় শিক্ষক দিৱসৰ উপলক্ষে অনুষ্ঠিত উক্ত অনুষ্ঠানতে জিলাখনৰ বহুকেইগৰাকী কৃতী শিক্ষক-শিক্ষয়িত্ৰীক সম্বৰ্ধনা জনোৱা হয়। টিংখাঙৰ শুকানী গাঁৱত জন্মগ্ৰহণ কৰা বিদুৰ প্ৰসাদ শৰ্মাৰ পিতৃৰ নাম দুৰ্গা প্ৰসাদ শৰ্মা আৰু মাতৃৰ নাম ৰেনুকা দেৱী।শৰ্মাই ১৯৯২ চনত প্ৰথম টিংখাঙৰ শ্ৰীশ্ৰীমাধৱদেৱ মধ্য ইংৰাজী বিদ্যালয়ত বিজ্ঞান শিক্ষক ৰূপে নিযুক্তি লাভ কৰিছিল। পৰৱৰ্তী সময়ত তেওঁ ১৯৯৫ চনৰ জানুৱাৰীত নাওজান মজলীয়া বিদ্যালয়লৈ বদলি হয় আৰু ২০০৫ চনৰ ছেপ্টেম্বৰ মাহত তেওঁ বিদ্যালয়খনৰ প্ৰধান শিক্ষক ৰূপে কাৰ্যভাৰ গ্ৰহণ কৰে। তেখেতে শিক্ষকতাৰ লগতে বিভিন্ন কাকত আলোচনীত লেখা মেলা কৰাৰ উপৰি স্হানীয় বিভিন্ন অনুষ্ঠান-প্ৰতিষ্ঠানৰ সৈতে জড়িত। তেখেতে বৰ্তমান তিলৈ নগৰ সাৰ্বজনীন শিবালয় পৰিচালনা সমিতিৰ উপ সভাপতি হিচাপে সুদীৰ্ঘ ১০ বছৰ ধৰি কাৰ্যনিৰ্বাহ কৰি থকাৰ লগতে তিলৈনগৰ দুৰ্গা মন্দিৰ পৰিচালনা সমিতি, ভানু অধ্যয়ন চক্ৰ, সাহিত্য সভা, ক্ৰীড়া প্ৰকল্প, বিজ্ঞান শিক্ষক সন্হা, স্থানীয় বিভিন্ন জনগোষ্ঠীৰ অনুষ্ঠান, শিশু সমাৰোহ, বিহু সন্মিলন আৰু অন্যান্য অনুষ্ঠান-প্ৰতিষ্ঠানৰ সৈতে জড়িত।