নলবাৰী : নলবাৰীত গো মাংস কেন্দ্ৰ কৰি উত্তেজনায় পৰিবেশৰ সৃষ্টি । চাৰিজনকৈ যুৱকে গো মাংস ৰন্ধাৰ হৈ উত্তম মাধ্যম সোধালে ৰাইজে । ঘটনা অনুসৰি আজি নলবাৰী জিলাৰ চাৰমিনাৰ চকৰ সমীপত থকা ৰেল লাইনৰ গেট অপাৰেটিং কাৰ্যালয়ৰ নিচেই ওচৰতে ৰেলৱে ঠিকাদাৰ অধীনস্থ চাৰিজন কৰ্মচাৰীয়ে মুকলি ভাৱে গো মাংস বনাই আছিল । ৰঙিয়া নিবাসী হিচাপে পৰিচয় দিয়া চাৰি কৰ্মচাৰী নাম ক্ৰমে ইমাম হুচেইন,আজাদ আলী,চাইনুল হক আৰু চাইজুদ্দিন আলী । মন কৰিবলগীয়া বিষয় যে ৰেলৱে গেট অপাৰেটিং কাৰ্যালয়টোৰ লগত লাগি আছে শ্ৰী শ্ৰী মা দূৰ্গাৰ এটি অতিকৈ উক্ত স্হানটিৰ প্ৰসিদ্ধ পুৰণি মন্দিৰ । যুৱক কেইজনে গো মাংস বনাই থকাৰ কথা স্হানীয় ৰাইজে অৱগত হোৱাৰ পিছত উক্ত ঠাইত উপস্থিত হয় যুৱক কেইজনক উত্তম মাধ্যম দিয়ে । আনহাতে সংবাদ মাধ্যমৰ আগত যুৱক কেইজনে গো মাংস বনাই থকা বুলি প্ৰকাশ কৰে । এই ঘটনা বতাহৰ দৰে বিয়পাৰ পিছত নলবাৰীৰ সৰ্বসাধাৰণ ৰাইজৰ লগতে একাংশ দল সংগঠনে ব্যাপক প্ৰতিক্ৰিয়া ব্যক্ত কৰিছে । পিছত ঘটনাস্থলীত নলবাৰী পুলিচ উপস্থিত হৈ চাৰিওজন যুৱককে কৰায়ত্ত কৰি নলবাৰী সদৰ থানাক লৈ আহে । উল্লেখযোগ্য যে এই ঘটনা সংঘটিত হোৱা ঠাইখিনিৰ নিচেই ওচৰতে স্থানীয় বিধায়ক অশোক শৰ্মাৰ বাসগৃহ ।
অনলাইন দবা অলিম্পিয়াডৰ ফাইনেলত ভাৰত : টাইব্ৰেকত ভাৰতৰ হাতত পৰাস্ত পোলেণ্ড
দৈনন্দিন বাৰ্তা ডেস্ক : পোলেণ্ডক টাইব্ৰেকত পৰাস্ত কৰি ভাৰত ফাইনেলত উপনীত হ’ল অনলাইন দবা অলিম্পিয়াডত৷ ভাৰত মেচখনত ২-১ত জয়ী হয়৷ এই ক্ষেত্ৰত সম্পূৰ্ণ কৃতিত্ব কনেৰু হাম্পিৰ৷ নিয়মীত খেলত দুয়োটা দলেই এটা এটা ৰাউণ্ডত জিকিছিল৷ তাৰ পাচত বিশ্ব ৰেপিড চেম্পিয়ন হাম্পিয়ে টাইব্ৰেক বা আৰ্মাগেডনত স্নায়ু যুঁজত পোলেণ্ডৰ মোনিকা ছোকোক পৰাস্ত কৰে৷ আনহাতে ৰাছিয়া-আমেৰিকাৰ খেলত যি জয়ী হ’ব তেওঁৰ বিৰুদ্ধে ভাৰতে খেলিব৷ উল্লেখ্য যে প্ৰথম ৰাউণ্ডত ভাৰত পোলেণ্ডৰ লগত ২-৪ত পিছুৱাই আছিল৷ দ্বিতীয় ৰাউণ্ডত ৪.৫–১.৫ জয়ী হৈ মেচ ঘুৰাই আনে৷ টাইব্ৰেকৰ বাবে বাকী আছিল হাম্পি৷ প্ৰথম ৰাউণ্ডত পৰাজয় হোৱাৰ পাচত দ্বিতীয় ৰাউণ্ডত ৭৮টা মুভত জে কে ডুডাক হৰুৱাই প্ৰাক্তন বিশ্ব চেম্পিয়ন বিশ্বনাথন আনন্দে৷ কেপ্টেইন বিদিত গুজৰাটী আৰু ডি হাৰিকাও দ্বিতীয় ৰাউণ্ডত জয়ী হয়৷ উল্লেখ্য যে অনলাইন দবা অলিম্পিয়াডত ভাৰতে পূৰ্বে ব্ৰঞ্জৰ পদক লাভ কৰিছিল৷ এইবাৰ প্ৰথমবাৰৰ বাবে সোণ বা ৰূপৰ বাবে যুঁজ কৰিব ৷
দিল্লীত ৪২ কোটি টকাৰ সোণৰ বাৰ জব্দ
দৈনন্দিন বাৰ্তা ডেস্ক : ৰাজহ চোৰাংচোৱা সঞ্চালকালয় (ডিআৰআই)ৰ তৰফৰ পৰা দেশৰ ৰাজধানীত শুকুৰবাৰে ৪২ কোটি টকাৰ ৫০৪ টা চোৰাং সোণৰ বাৰ জব্দ কৰাৰ লগতে আঠজন লোকক গ্ৰেপ্তাৰ কৰে ৷ উল্লেখ্য যে ডিব্ৰুগড়-নতুন দিল্লী ৰাজধানী এক্সপ্ৰেছত দিল্লী ৰে’লৱে ষ্টেচনত আঠজন যাত্ৰী নামে ৷ তেওঁলোকৰ পৰা ৫০৪ টা সোণৰ বাৰ উদ্ধাৰ কৰে ৷ এইদৰে ডিআৰআইৰ এজন বিষয়াই কয় ৷ এই সোণৰ বাৰবোৰ যাত্ৰী কেইজনে পৰিধান কৰা বিশেষ ধৰণেৰে প্ৰস্তুত কৰা পোচাকত লুকুৱাই অনা হৈছিল আৰু ভুৱা আধাৰ কাৰ্ডৰ দ্বাৰা ভ্ৰমণ কৰিছিল ৷ চোৰাংচোৱাৰ পৰা পোৱা ইংগিত মতে উদ্ধাৰ হোৱা সোণৰ বাৰবোৰ বিদেশী চিহ্ন আছে ৷ মণিপুৰৰ মোৰেৰ আন্তৰ্জাতিক সীমান্তৰ পৰা ম্যানমাৰৰ পৰা ভাৰতলৈ পঠোৱা হৈছিল আৰু গুৱাহাটীৰ পৰা চলাচল কৰা ছিণ্ডিকেটে দিল্লী, কলকাতা আৰু মুম্বাইলৈ প্ৰেৰণৰ চেষ্টা কৰিছিল ৷ সেইবোৰ নগৰত ইয়াৰ গহনা বিশেষভাৱে সমাদৃত ৷ উল্লেখ্য যে জব্দ কৰা সোণৰ বাৰবোৰ ৯৯.৯ শতাংশ বিশুদ্ধ ৷ ইয়াৰ ওজন ৮৩.৬২১ কিলোগ্ৰাম ৷ বজাত ইয়াৰ মূল্য ৪২ কোটি টকা ৷ এই আঠ চোৰাং ব্যৱসায়ীক ১৯৬২ চনৰ শুল্ক আইনত গ্ৰেপ্তাৰ কৰা হৈছে ৷ তেওঁলোকক ন্যায়িক জিম্মাত লৈ অনুসন্ধান অব্যাহত ৰাখিছে ৷
ভিডিঅ’ কলেৰে অৰ্জুন বঁটা গ্ৰহণ লাভলীনাৰ
দৈনন্দিন বাৰ্তা ডেস্ক : যদি পৰিস্থিতি স্বাভাৱিক হয়, তেন্তে তেওঁ দিল্লীৰ ৰাষ্ট্ৰপতি ভৱনত ভাৰতৰ ৰাষ্ট্ৰপতিৰ হাতৰ পৰা সন্মানিত অৰ্জুন পুৰস্কাৰ গ্ৰহণ কৰিলেহেতেন ৷ শনিবাৰে অসমৰ ২২ বছৰীয়া বক্সাৰ লাভলীনা বৰগোহাঁইয়ে পিপিই পৰিধান কৰি পাটিয়ালাৰ পৰা চণ্ডীগড়লৈ যায় ৷ তাতে তেওঁ জুমৰ জৰিয়তে প্ৰথম দূৰৱৰ্ত্তী ৰাষ্ট্ৰীয় ক্ৰীড়া পুৰস্কাৰ অনুষ্ঠানত অংশ লয় ৷ ভিডিঅ’ কলৰ জৰিয়তে তেওঁ অৰ্জুন বঁটা গ্ৰহণ কৰে ৷ জুলাই মাহত পৰিকল্পনা মতে হোৱা নাছিল ৷ টকীয়ত বিশ্বৰ বৃহত্তম ক্ৰীড়া ইভেণ্টত অংশ লোৱাৰ পৰিৱৰ্তে তেওঁ অসমৰ নিজৰ গাঁৱৰ ঘৰলৈ ঘুৰি গৈছিল ৷ দেখিবলৈ পাইছিল খেতিপথাৰত পানী ৷ কিন্তু অসমৰ পৰা অলিম্পিকলৈ নিৰ্বাচিত হোৱা প্ৰথম মহিলা লাভলীনাই কয় যে তেওঁ হতাশ হৈছিল ৷ উল্লেখ্য যে আঠ বছৰৰ আগতে অসমৰ গোলাঘাট জিলাৰ ভিতৰুৱা বৰমুখী গাঁৱৰ পৰা যাত্ৰা আৰম্ভ কৰিছিল ৷ বক্সিং ৰিঙত বিৰোধী এজন বা কিছু বয়স্ক পুৰুষতন্ত্ৰই হওক, এয়া শিকাইছে ৫ ফুট ১১ ইঞ্চি উচ্চতাৰ লাভলীনাই তেওঁৰ পদক্ষেপে ৷ সাধাৰণ পৰিস্থিতিত মই ৰাষ্ট্ৰপতি ভৱন যাব পাৰিলোহেতেন৷ ৰাষ্ট্ৰপতিৰ লগত এখন ফটোত উঠিবলৈ পালোহেঁতেন ৷ কিন্তু কালি মই অনুশীলনৰ বাবে পিপিই পৰিধান কৰি চণ্ডীগড় গৈছিলো৷ সেয়া ঠিকেই আছিল ৷ যেতিয়া অলিম্পিক বাতিল কৰিলে, তাৰ পাচত মই হতাশ অনুভৱ কৰিলো ৷ মই অনুশোচনা কৰিলো যে মই খেল উন্নতিৰ বাবে এই বছৰটো ব্যৱহাৰ কৰিম ৷
৭ ছেপ্টেম্বৰৰ পৰা মুকলি মেট্ৰ’ ৰে’ল
দৈনন্দিন বাৰ্তা ডেস্ক : দেশত শিক্ষানুষ্ঠান পুনৰ খোলাৰ লগতে ছুইমিং পুল, ক্ৰীড়া, বিনোদন আদি পুনৰ আৰম্ভ কৰাক লৈ দেশত চৰ্চা হৈ আছিল ৷ সেই সকলো চিন্তা চৰ্চাৰ অৱসান ঘটাই জনোৱা হ’ল অহা ৩০ ছেপ্টেম্বৰ পৰ্যন্ত দেশজুৰি কনটেনমেণ্ট জ’নত লকডাউন চলি থাকিব ৷ ইয়াৰ বাদে আনলক ৪ৰ নীতি নিৰ্দেশনা প্ৰকাশ কৰা হৈছে ৷ অহা মাহৰ পৰা বহু ক্ষেত্ৰতে শিথিলতা আনিছে কেন্দ্ৰই ৷ উল্লেখ্য যে আন্তঃৰাজ্যিক পৰিবহণ বা মানুহৰ যাতায়াতৰ ক্ষেত্ৰত বিধি নিষেধ নাথাকিব ৷ আনহাতে যাতায়াতৰ বাবে কোনো বিশেষ পাছৰ প্ৰয়োজন নহ’ব৷ অৱশ্যে আন্তৰ্জাতিক উৰণ যাত্ৰাৰ অনুমতি দিয়া হোৱা নাই ৷ ইয়াৰ লগতে সাধাৰণ মানুহক স্বস্তি দি অহা ৭ ছেপ্টেম্বৰৰ পৰা মেট্ৰ’ ৰে’ল সেৱা আৰম্ভ কৰিব ৷ তদুপৰি অহা ৩০ ছেপ্টেম্বৰ পৰ্যন্ত শিক্ষানুষ্ঠান বন্ধ থাকিব ৷ ৰাজ্য আৰু কেন্দ্ৰীয় শাসিত অঞ্চলক অনুমতি দিয়া হৈছে অহা ২১ ছেপ্টেম্বৰলৈকে কনটেণ্টমেণ্ট এলেকাৰ বাহিৰৰ শিক্ষানুষ্ঠানত অনলাইন ক্লাছৰ বাবে ৫০ শতাংশ শিক্ষক আৰু শিক্ষাৰ্থী যাব পাৰিব ৷ কনটেণ্টমেণ্ট জ’নক বাদ দি সকলোতে নৱমৰ পৰা দ্বাদশ শ্ৰেণীৰ ছাত্ৰ-ছাত্ৰী শিক্ষানুষ্ঠানলৈ যাব পাৰিব ৷ এই ক্ষেত্ৰত শিক্ষক-শিক্ষয়িত্ৰীয়ে ছাত্ৰ-ছাত্ৰীৰ ওপৰত দৃষ্টি ৰাখিব লাগিব ৷ বিদ্যালয়লৈ সন্তানক পঠোৱাৰ বিষয়ে অভিভাৱকে লিখিত দিব লাগিব৷ সামাজিক, শিক্ষামূলক, ক্ৰীড়া, সাংস্কৃতিক, ৰাজনৈতিক, বিনোদন আৰু ধৰ্মীয় অনুষ্ঠান ২১ ছেপ্টেম্বৰৰ পৰা ১০০ জন লোক সমবেত হ’ব পাৰিব ৷ সকলোতে মাস্ক পৰিধান কৰাৰ লগতে সামাজিক দূৰত্ব মানি চলিব লাগিব ৷ চিনেমা হল, থিয়েটাৰ, বিনোদন উদ্যান, ছুইমিং পুল খুলিব পাৰিব ৷ উল্লেখ্য যে মেট্ৰ’ৰ সকলো যাত্ৰী আৰু ৰে’ল কৰ্মীয়ে মাস্ক পৰিধান কৰাটো বাধ্যতামূলক ৷ ষ্টেচনত আবৰ্জনা বা থু পেলালে জৰিমনা ভৰিব লাগিব ৷
তাই আহোম ছাত্ৰ সন্থাৰ টিংখাং আঞ্চলিক সমিতিৰ পুনৰ গঠন
টিংখাং,২৯ আগষ্ট : সদৌ তাই আহোম ছাত্ৰ সন্থা (আটাছু)ৰ ডিব্ৰুগড় জিলা সমিতিৰ অন্তৰ্গত নাহৰকটীয়া মহকুমা সমিতিৰ অধীনৰ টিংখাং আঞ্চলিক তাই আহোম ছাত্ৰ সন্থাৰ নৱম দ্বি-বাৰ্ষিক প্ৰতিনিধি সভা আজি অনুষ্ঠিত হৈ যায় । সভাত উপস্থিত থাকে আটাছু, কেন্দ্ৰীয় সমিতিৰসভাপতি লিটুল বুঢ়াগোহাঁই কেন্দ্ৰীয় সমিতিৰ সহকাৰী সম্পাদক দেৱজিৎ গগৈ কেন্দ্ৰীয় সমিতিৰ সাংগঠনিক সম্পাদক ভাস্কৰ বৰুৱা ডিব্ৰুগড় জিলা সমিতিৰ সভাপতি নিপন ফুকন, যুটীয়া সম্পাদক তপন গগৈ, নাহৰকটীয়া মহকুমাৰ সভাপতি-সম্পাদক, মৰাণ মহকুমাৰ সভাপতি-সম্পাদক, কেইবাখনো আঞ্চলিক সমিতিৰ সভাপতি-সম্পাদক প্ৰমুখ্য কৰি বিষয়-ববীয়াৰ লগতে টিংখাং আঞ্চলিক তাই আহোম ছাত্র সন্থাৰ প্ৰায় চৈধ্যখন (১৪) শাখা সমিতিৰ সভাপতি-সম্পাদক, আৰু প্ৰতিনিধিসকলে অংশগ্ৰহণ কৰি প্ৰতিনিধি সভাখন সাফল্য মণ্ডিত কৰি তোলে । সভাত অভিজিত গগৈক সভাপতি আৰু বিদ্যুৎ গগৈ আৰু ডুৰিণ গগৈক যুটীয়া সম্পাদক হিচাবে লৈ এখন শক্তিশালী টিংখাং আঞ্চলিক তাই আহোম ছাত্ৰ সন্থা পুনৰ গঠন হয়।
লোকসভা, ৰাজ্য-স্থানীয় নিৰ্বাচনৰ বাবে সাধাৰণ ভোটাৰ তালিকা : এক দেশ এক নিৰ্বাচনৰ লক্ষ্যৰে এখোজ আগুৱালে কেন্দ্ৰ
দৈনন্দিন বাৰ্তা ডেস্ক : এক দেশ এক নিৰ্বাচনৰ লক্ষ্যত আন এক পদক্ষেপ আগুৱাই গ’ল কেন্দ্ৰ ৷ প্ৰধানমন্ত্ৰী কাৰ্যালয়ৰ সূত্ৰত প্ৰকাশ, সম্প্ৰতি পঞ্চায়ত পৰ্যায়ৰ পৰা লোকসভা পৰ্যন্ত দেশত এখনেই নিৰ্বাচনৰ তালিকা তৈয়াৰৰ বাবে গুৰুত্বপূৰ্ণ সভা হৈছে ৷ এই বিধি কাৰ্যকৰী কৰিবলৈ সংশ্লিষ্ট সংবিধান সংশোধন আৰু প্ৰয়োজনীয় পদক্ষেপৰ বিষয়ে এই সভাত আলোচনা কৰা হৈছে ৷ সংবিধান অনুযায়ী, দেশৰ স্থানীয় নিৰ্বাচন অৰ্থাৎ পঞ্চায়ত আৰু পৌৰসভা নিৰ্বাচন প্ৰক্ৰিয়াৰ সম্পূৰ্ণ দায়িত্ব থাকে ৰাজ্যিক নিৰ্বাচনী আয়ুক্তৰ ওপৰত ৷ এই স্থানীয় নিৰ্বাচনৰ বাবে চূড়ান্ত ভোটাৰ তালিকাও তৈয়াৰ কৰে ৰাজ্যিক নিৰ্বাচনী আয়ুক্তই ৷ তাত কেন্দ্ৰীয় নিৰ্বাচনী আয়ুক্তৰ কোনো হস্তক্ষেপ বা অধিকাৰ নাথাকে ৷ এই পদ্ধতি সলনি কৰিব বিচাৰিছে মোডী চৰকাৰে ৷ যোৱা ১৩ আগষ্টত এই লৈ সভা হয় প্ৰধানমন্ত্ৰী কাৰ্যালয়ত ৷ প্ৰধানমন্ত্ৰীৰ প্ৰধান সচিব পি কে মিশ্ৰৰ নেতৃত্বত সভাত এই সংক্ৰান্তত সংবিধান সংশোধনী লৈ আলোচনা হয় বুলি জানিব পৰা গৈছে ৷ ভাৰতীয় সংবিধানৰ ২৪৩ কে ধাৰাত পঞ্চায়ত নিৰ্বাচনৰ কথা কোৱা হৈছে ৷ ২৪৩ জেড-এ ধাৰাত কোৱা হৈছে পৌৰসভা নিৰ্বাচনৰ বিষয় ৷ এই দুই ধাৰা অনুযায়ী পঞ্চায়ত আৰু পৌৰসভা নিৰ্বাচন পৰিচালনৰ আৰু ভোটৰ তালিকাৰ ভাৰ ন্যস্ত কৰা হৈছে ৰাজ্যিক নিৰ্বাচনী আয়ুক্তৰ ওপৰত৷ লগতে কোৱা হৈছে, আয়োগৰ প্ৰধান অৰ্থাৎ ৰাজ্যিক নিৰ্বাচনী আয়ুক্ত নিয়োগ কৰে ৰাজ্যপালে ৷ ২৪৩ জেড-এ ধাৰাত পৌৰ নিৰ্বাচন একেদৰেই পৰিচালনা কৰাৰ কথা কোৱা হৈছে ৷ সংবিধানৰ এই দুই ধাৰা সংশোধন কৰি স্থানীয় নিৰ্বাচনকো কেন্দ্ৰীয় নিৰ্বাচনী আয়ুক্তৰ আওতাত অনাৰ বিষয়ে গুৰুত্বপূৰ্ণ অগ্ৰগতি লাভ কৰিছে বুলি ১৩ আগষ্টৰ এই সভাৰ সূত্ৰত প্ৰকাশ ৷ তদুপৰি ৰাজ্য চৰকাৰবোৰে যাতে কেন্দ্ৰীয় নিৰ্বাচনী আয়োগৰ ভোটাৰ তালিকাক লৈ নিৰ্বাচন প্ৰক্ৰিয়া পৰিচালনাৰ ব্যৱস্থা কৰে সেই বিষয়ে ৰাজ্যবোৰক আবেদন জনোৱা হ’ব বুলি সভাত সিদ্ধান্ত লৈছে ৷ ২০১৪ চনত প্ৰথমবাৰ কেন্দ্ৰত ক্ষমতাত আহাৰ সময়ত বিজেপি তথা নৰেন্দ্ৰ মোডী চৰকাৰে ‘এক দিশ এক নিৰ্বাচন’ৰ তত্ব আনিছিল ৷ ইয়াৰ অৰ্থ, পঞ্চায়ত-পৌৰসভাৰ পৰা বিধানসভা বা লোকসভা সকলো নিৰ্বাচন একেলগে ৫ বছৰৰ বাবে অনুষ্ঠিত কৰাৰ পক্ষে মত দিছিল প্ৰধানমন্ত্ৰীয়ে নিজেও ৷ বহু সভাত এই কথা প্ৰচাৰ কৰিছিল নৰেন্দ্ৰ মোডীয়ে ৷
স্কুটী বিচাৰি মুখ্যমন্ত্ৰীলৈ পত্ৰ নগাঁৱৰ বহু মেধাৱী ছাত্ৰীৰ
নগাঁও,২৯আগষ্ট: “আমাক স্কুটী লাগিবই, আমাক বঞ্চিত নকৰিব” এই আহ্বানৰেই মুখ্যমন্ত্ৰীলৈ পত্ৰ প্ৰেৰণ কৰিলে নগাঁৱৰ বহু মেধাৱী ছাত্ৰীয়ে। নগাঁৱৰ আনন্দৰাম বৰুৱা জুনিয়ৰ কলেজত এখন সংবাদমেলৰ আয়োজন কৰি ২০১৮-১৯ বৰ্ষত প্ৰথম বিভাগত উৰ্ত্তীণ হোৱা ছাত্ৰী সকলে বৰ্তমানৰ শিক্ষামন্ত্ৰী ড° হিমন্ত বিশ্ব শৰ্মাক স্কুটী প্ৰদান কৰিবৰ বাবে আহ্বান জনায়। মেধাৱী ছাত্ৰী সকলে কয়, “২০২১ৰ নিৰ্বাচনৰ বাবে এতিয়া ছাত্ৰী সকলক স্কুটী দিয়াৰ কথা চৰকাৰে কৈছে। কিন্তু আমাৰ দিনত কিয় নিদিলে। আমাতকৈ আগত উৰ্ত্তীণ হোৱা ২০১৭ৰ বৰ্ষৰ ছাত্ৰীসকলক দিয়া হ’ল। সেয়ে আমাক বঞ্চিত নকৰিব। আমাক স্কুটী দিবই লাগিব। এয়া আমাৰ প্ৰাপ্য।” লগতে ছাত্ৰীসকলে কয় যে চাইকেল কংগ্ৰেছৰ হে আঁচনি আছিল। স্কুটী দিম বুলি বিজেপিয়েহে কৈছিল। সেয়ে চৰকাৰখনক প্ৰতিশ্ৰুতি ৰক্ষা কৰিবলৈ আহ্বান জনায়। উল্লেখযোগ্য যে, সিদ্ধাৰ্থ ভট্টাচাৰ্যই শিক্ষামন্ত্ৰীৰ দায়িত্ব লোৱাৰ পিছতে স্কুটীৰ পৰিৱৰ্তে চাইকেল প্ৰদানৰ কথা ঘোষণা কৰিছিল। সংবাদমেলৰ পিছতে ২০১৮-১৯বৰ্ষৰ বঞ্চিত ছাত্ৰী সকলে স্কুটী প্ৰদানৰ দাবীৰে মুখ্যমন্ত্ৰীলৈ নগাঁও জিলা উপায়ুক্তৰ জৰিয়তে এখন স্মাৰক পত্ৰও প্ৰেৰণ কৰে। আনহাতে, মেধাৱী ছাত্ৰী সকলে আক্ষেপেৰে কয় “আমি উৰ্ত্তীণ হোৱাৰ সময়ত কোনো নিৰ্বাচন নাছিল বাবেই আমি বঞ্চিত হ’লো। কিন্তু আমাতকৈ ছিনিয়ৰ আৰু জুনিয়ৰ সকলে নিৰ্বাচন সমাগত হোৱাৰ বাবেই এই আঁচনি লাভ কৰিলে।”
১০০ বছৰৰ পাচত আবিষ্কাৰ : নতুন প্ৰজাতিৰ চগাৰ সন্ধান অৰুণাচলত
দৈনন্দিন বাৰ্তা ডেস্ক : পাঁচটা পখিলা আৰু চগ গৱেষকৰ এটা দলে এটা নতুন প্ৰজাতিৰ চগাৰ সন্ধান পাইছে আৰু অৰুণাচল প্ৰদেশৰ টেল বন্যপ্ৰাণী অভয়াৰণ্যত এক শতাব্দীৰো বেছি সময় ভাৰতত নেদেখা আন এটা প্ৰজাতি আবিষ্কাৰ কৰিছে ৷ আগষ্ট মাহৰ শেষৰ ফালে ডেৰাদুনৰ টিটলি ট্ৰাষ্টৰ দুজন, বেংগালুৰুৰ নেচনেল চেণ্টাৰ ফৰ বায়’লজিকেল ছায়েন্সৰ দুজন আৰু পুনেৰ এজন গৱেষকে দুটা প্ৰজাতি আবিষ্কাৰ কৰে ৷ নিউজীলেণ্ডৰ অকলেণ্ডৰ জীৱ-জন্তু সম্পৰ্কীয় বিজ্ঞানৰ পত্ৰিকা জুটাস্কাত চলিত সপ্তাহত এই আবিষ্কাৰ হোৱা প্ৰজাতিৰ বিষয়ে প্ৰকাশ কৰিছে ৷ ‘আমি যি নতুন চগাৰ প্ৰজাতি আবিষ্কাৰ কৰিছো সেয়া বিৰল প্ৰজাতিৰ ‘মেটালোলোফিয়া’ৰ অন্তৰ্গত, যাৰ যোগেদি মাত্ৰ ১৬টা প্ৰজাতি বিশ্বজুৰি আৰু ভাৰতত তিনিটা পৰিচিত’ ৷ টিটলি ট্ৰাষ্টৰ সঞ্জয় ছন্ধিয়ে কয়, টেল বন্যপ্ৰাণী অভয়াৰণ্যত যেতিয়া আবিষ্কাৰ হৈছিল তাৰ পাচত আমি ইয়াৰ নামকৰণ কৰিছো ‘মেটালোলোফিয়া টেলেনিছিছ’ ৷ জুটাস্কাত প্ৰকাশ পোৱা মতে ‘মেটালোলোফিয়া টেলেনিছিছ’ প্ৰজাতিটো অন প্ৰজাতিৰ পৰা ওপৰ ফালে আগত ডিম্বাকৃতিৰ ক’লা ধৰণৰ চিন আছে আৰু হিণ্ডিঙত সৰু দাগ পৃথককৈ আছে ৷ গৱেষকসকলে ইয়াৰ দুটা নমুনা সংগ্ৰহ কৰিছে ৷ উল্লেখ্য যে এই প্ৰজাতি আগতে আন মাহত আন ক’তো দেখিবলৈ পোৱা নাযায় ৷ ইয়াৰ জীৱন বুৰঞ্জী জানিব পৰা নাই৷ আনহাতে গৱেষকসকলে অভয়াৰণ্যখনৰ পৰা ‘মেটালোলোফিয়া অপালিনা’ নামৰ আনটো প্ৰজাতিৰ তিনিটা নমুনা সংগ্ৰহ কৰে৷ ইয়াৰে দুটা নমুনা ১৮৮৬ আৰু ১৮৮৯ চনত ছিক্কিমত শেষবাৰ দেখা গৈছিল ৷ এই প্ৰজাতিটো ১৮৯৩ চনত নেপালত দেখা গৈছিল৷ অৰুণাচল প্ৰদেশৰ সুৱনশিৰি জিলাৰ পৰা তিনিটা ‘মেটালোলোফিয়া অপালিনা’ নামৰ প্ৰজাতিটো সংগ্ৰহ কৰে ৷
ক’ৰোনাৰ বাবেই প্ৰথমবাৰলৈ ৰাষ্ট্ৰীয় ক্ৰীড়া দিৱসৰ ভাৰ্চুৱেল অনুষ্ঠান : পুৰস্কাৰ প্ৰাপ্তৰ সম্পূৰ্ণ তালিকা
দৈনন্দিন বাৰ্তা ডেস্ক : ক’ৰোনাৰ বাবেই প্ৰথমবাৰলৈ ৰাষ্ট্ৰীয় ক্ৰীড়া দিৱসত ভাৰ্চুৱেল অনুষ্ঠানৰ যোগেদি সন্মানিত কৰা হ’ল ভাৰতীয় ক্ৰীড়াবিদক৷ এই মহামাৰীত খেলুৱৈসকলৰ আত্মবিশ্বাস ভাঙি নপৰে তাত বিশ্বাস ৰাষ্ট্ৰপতি ৰামনাথ কোবিন্দৰ ৷ বৰং সংক্ৰমণৰ পাচত জগত সভাত নিজকে স্বমহিমাৰে প্ৰতিষ্ঠা কৰিব বুলি আশা কৰিছে ৷ উল্লেখ্য যে পূৰ্বতে ঘোষিত হৈছিল ৰাজীৱ গান্ধী খেলৰত্ন, অৰ্জুন, দ্রোণাচার্যসহ সকলো পুৰস্কাৰ প্ৰাপকৰ তালিকা ৷ শনিবাৰে ভাৰ্চুৱেল অনুষ্ঠানত দেশক গৌৰাৱাম্বিত কৰা ক্ৰীড়াবিদক সন্মানিত কৰে ৰাষ্ট্ৰপতিয়ে ৷ উল্লেখ্য যে ক’ৰোনাৰ বাবে অনুষ্ঠানত উপস্থিত থাকিব নোৱাৰিলে মল্লযোদ্ধা ভিনেশ ফোগাটসহ তিনিজান ক্ৰীড়াবিদ ৷ মণিকা বাত্ৰা, দ্যুতি চান্দক পুৰস্কৃত কৰাৰ পাচত দেশৰ সকলো ক্ৰীড়া তাৰকাক ধন্যবাদ জনাই ৰাষ্ট্ৰপতিয়ে ৷ আত্মবিশ্বাসেৰে ৰাষ্ট্ৰপতিয়ে কয়, ক’ভিড-১৯ৰ বাবে খেল বিশ্বত বৃহৎ প্ৰভাৱ পৰিছে ৷ অলিম্পিক পিছুৱাই গৈছে ৷ তথাপি আমাৰ বিশ্বাস এই মহামাৰীয়ে ক্ৰীড়াবিদৰ ছন্দ কাঢ়ি নিব নোৱাৰে ৷ খেলে দেশৰ অগ্ৰগতি ঘটাব ৷ ফিটনেছ থাকিলে পাৰফৰ্মমেন্স, সকলো দিশত উন্নতি হয় ৷ আশা কৰো ২০২৮ চনৰ অলিম্পিকত সকলোৱে দেশৰ বাবে শ্ৰেষ্ঠতা উজাৰি দিব ৷ তাতেই আমি বিশ্বৰ শ্ৰেষ্ঠ ১০ পদক জয়ী দেশৰ অন্যতম হ’ব পাৰিম ৷ ইপিনে খেলৰত্নৰে সন্মানিত হোৱাৰ পাচত টুইট কৰি উল্লাস প্ৰকাশ কৰে ৰোহিত শৰ্মাই ৷ তেওঁ জনায়, দেশৰ হৈ খেলিবলৈ পোৱাত তেওঁ গৰ্বিত ৷ এই সন্মানে আগন্তুক দিনত খেলাত অনুপ্ৰেৰণা যোগাব ৷ আনহাতে পুৰস্কাৰপ্ৰাপক সকলক টুইট কৰি শুভেচ্ছা জনায় মাষ্টাৰ ব্লাষ্টাৰ শচীন তেণ্ডুলকাৰে ৷ মেজৰ ধ্যানচান্দৰ জন্ম বাৰ্ষিকী উপলক্ষে প্ৰতিবছৰে ২৯ আগষ্ট দিনটোত ৰাষ্ট্ৰীয় ক্ৰীড়া দিৱস হিচাপে পালন কৰা হয় ৷ এই দিনটোক কিংবদন্তি খেলুৱৈজনক স্মৰণ কৰি তেওঁক শ্ৰদ্ধা জনাই কেইটামান টুইট কৰে প্ৰধানমন্ত্ৰী নৰেন্দ্ৰ মোডীয়ে ৷ ভাৰতীয় ক্ৰীড়াত তেওঁৰ অৱদানৰ কথা উল্লেখ কৰে প্ৰধানমন্ত্ৰীয়ে৷ আনহাতে ধ্যানচান্দক ভাৰতৰত্নৰে বিভূষিত কৰিবলৈ দাবী কৰে প্ৰাক্তন অপেনাৰ বীৰেন্দ্ৰ সেৱাগে ৷ উল্লেখ্য যে এইবাৰ ৰাষ্ট্ৰীয় ক্ৰীড়া দিৱসৰ পুৰস্কাৰ প্ৰদান অনুষ্ঠানত ৬৫ গৰাকী ক্ৰীড়াবিদ উপস্থিত থাকে৷ ক’ৰোনাৰ বাবে আয়োজিত ভাৰ্চুৱেল অনুষ্ঠান দেশৰ কেইবা ঠাইত উপস্থিত থাকে ৷ ফলত এইবাৰ ৰাষ্ট্ৰপতি ভৱনৰ দৰবাৰ হলৰ ৰঙা দলিচাত খেলুৱৈসকল উপস্থিত থাকিবলৈ নাপালে ৷ মন কৰিব লগা যে এইবাৰ ভাৰতীয় ক্ৰীড়া প্ৰাধিকৰণে ৭৬ গৰাকী ক্ৰীড়াবিদক বিভিন্ন পুৰস্কাৰৰ বাবে বাছনি কৰিছিল ৷ এই পুৰস্কাৰ বিতৰণ অনুষ্ঠানটো বেংগালুৰু, পুনে, শনিপাত, চণ্ডীগড়, কলকাতা, লক্ষ্ণৌ, দিল্লী, মুম্বাই, ভূপাল, হায়দৰাবাদ আৰু ইটানগৰত আয়োজন কৰা হয়৷ দুৰদৰ্শনৰ কেমেৰা ক্ৰুৰ দ্বাৰা অনুষ্ঠানটো সম্পন্ন কৰা হয় ৷
এইবাৰ পুৰস্কাৰ প্ৰাপকসকল হ’ল-
ধ্যানচান্দ বঁটা : এথলেটিকছত ক্ৰমে কুলদিপ সিং ভুল্লাৰ, জিনচী ফিলিপছ, বেডমিণ্টনত ক্ৰমে প্ৰদীপ শ্ৰীকৃষ্ণ গান্ধে, ট্ৰুপটি মুৰগুনডে, বক্সিঙত ক্ৰমে এন উষা, লখা সিং, ফুটবলত সুখবিন্দৰ সিং ছান্দো, হকীত অজিত সিং, কাবাদিত মনপ্ৰিত সিং, পেৰা এথলেটিকছত জে ৰঞ্জিত কুমাৰ, পেকা বেডমিণ্টনত সত্যপ্ৰকাশ তিৱাৰী, ৰয়িঙত মনজিৎ সিং, সাঁতোৰত প্ৰয়াত শ্ৰী শচীন নাগ, টেনিছত নন্দন পি বল, মল্লযুদ্ধত নেত্ৰপল হুদা ৷
অৰ্জুন বঁটা : আৰ্চাৰিত অতনু দাস, এথলেটিকছত দ্যুতি চান্দ, বেডমিণ্টনত ক্ৰমে সৎয়ুক ছাইৰাজ ৰনকিৰেড্ডী, চিৰাগ চন্দ্ৰশেখৰ ছেথি, বাস্কেটবলত ভিনেশ ভৃগুবংশী, বক্সিঙত ক্ৰমে ছুবেদাৰ মণীশ কৌশিক, লাভলীনা বৰগোঁহাই, ক্ৰিকেটত ইশান্ত শৰ্মা, ইকুইষ্ট্ৰিনত শ্বাৱন্ত অজয় অনন্ত, ফুটবলত সন্দেশ যিনগাম, হকীত ক্ৰমে আকাশদীপ সিং, দীপিকা, কাবাদীত দিপক, খো খোত খালে ছাৰিকা ছুধাকৰ, ৰয়িঙত দত্ত বদন ভূকানাল, শ্বুটিঙত ক্ৰমে মানু ভাকৰ, সৌৰভ চৌধুৰী, টেবুল টেনিছত মাধুৰীকা সুহাছ পাটকাৰ, টেনিছত দিভিজ শ্বাৰান, উইণ্টাৰ স্প’ৰ্টছত শিৱ খেছহাভান, মল্লযুদ্ধত ক্ৰমে দিব্যা কেকৰান, ৰাহুল আৱাৰে, পেৰা ছুইমিঙত সুয়াশ নাৰায়ণ যাদৱ, এথলেটিকছত ছনদীপ পাৰা, পেৰা শ্বুটিঙত মণীশ নাৰৱাল ৷
ধ্যানচান্দ বঁটা (নিয়মীয়া শাখা) : হকীত জুদে ফেলিক্স ছীবাষ্টাইন, মাল্লাখাম্বত যোগেশ মালভিয়া, শ্বুটিঙত যশপাল ৰানা, পেৰা বেডমিণ্টনত গৌৰৱ খান্না ৷
ধ্যানচান্দ বঁটা (জীৱনজোৰা শাখা) : আৰ্চাৰীত ধৰ্মেন্দ্ৰ তিৱাৰী, এথলেটিকছত পুৰুষোত্তম ৰায়, বক্সিঙত শিৱ সিং, হকীত ৰমেশ পাঠানিয়া, কাবাদীত কৃষাণ কুমাৰ হুদা, পেৰা ভাৰ উত্তোলনত বিজয় বালচন্দ্ৰ মুনিশ্বৰ, টেনিছত নৰেশ কুমাৰ, মল্লযুদ্ধত প্ৰকাশ দাহিয়া ৷
ৰাজীৱ গান্ধী খেলৰত্ন : ক্ৰিকেটত ৰোহিত শৰ্মা, পেৰা এথলেটিকছত মাৰিয়াপ্পান টি, টেবুল টেনিছত মণিকা বাট্ৰা, মল্লযুদ্ধত ভিনেশ আৰু হকীত ৰাণী ৷