অনলাইন বাৰ্তা : পিএছ টিভি ম’বাইল এপ, পিএছ টিভি নামৰ ইউটিউব চেনেল ফেচবুক পেজ ব্যৱহাৰ কৰি জাকিৰ নায়কে যুৱ সমাজৰ উদ্দেশ্যে জেহাদী ভাষণ দিছে ৷ কেন্দ্ৰৰ ওচৰত এই ৰিপৰ্ট জমা দিছে ইণ্টেলিজেণ্ট ব্যুৰই ৷ জাকিৰ নায়কৰ সকলো মিডিয়া নিষিদ্ধ কৰিবলৈ আৰম্ভ কৰিছে কেন্দ্ৰীয় চৰকাৰে ৷ আগতে পিএছ টিভি নিষিদ্ধ কৰিছিল চৰকাৰে ৷ এই চেনেলৰ জৰিয়তে পলাতক জাকিৰ নায়কে যুৱ সমাজক কট্টৰপন্থী জেহাদি হোৱাৰ আহ্বান জনাইছিল বুলি অভিযোগ উঠিছিল ৷ পিএছ টিভি বন্ধ পোৱাৰ পাচত ছ’চিয়েল মিডিয়াক হাথিয়াৰ কৰিছে জাকিৰ নায়কে ৷ ছ’চিয়েল মিডিয়াত এটাৰ পাচত এটাকৈ প্ৰৰোচনামূলক ভিডিঅ’ আপলোড কৰিছে এই ইছলামিক ধৰ্মগুৰুৱে ৷ তাৰ পৰা হিংসা বিয়পাইছে বুলি জনাইছে আইবিয়ে ৷ জানিব পৰা মতে গৃহ মন্ত্ৰালয়ৰ সৈতে আলোচনাত বহিছিল আইবি, এনআইএসহ দেশৰ একাধিক চোৰাংচোৱা সংস্থা ৷ তাতেই আইবিয়ে ৰিপৰ্ট জমা দিয়ে ৷ কোৱা হৈছে দেশৰ সৌহাৰ্দ্য পৰিৱেশ নষ্ট কৰাৰ চেষ্টা কৰিছে জাকিৰ নায়কে৷ দেশৰ বাহিৰত থাকি একাধিক মিডিয়া প্লেটফৰ্মত নিয়মিত প্ৰৰোচনামূলক ভিডিঅ’ আপলোড কৰিছে জাকিৰ নায়কে ৷ ফলত হিংসাৰ বাতাবৰণ সৃষ্টি হৈছে ৷

গেলেকী : নাজিৰা সমষ্টিৰ গাতে লাগি থকা আমগুৰি সমষ্টিৰ বাট-পথৰ উন্নয়ণৰ ফোপোলাস্বৰূপ উদঙালে; স্থানীয় গাওঁবাসী ৰাইজে। পথলৈ ওলাই আহিল শ-শ গাওঁবাসী ৰাইজ। বিধায়ক তথা চৰকাৰৰ ওপৰত ক্ষোভ গঁঞা ৰাইজৰ। এজাক বৰষুণতে পথৰ দূৰৱস্থাত ভুগিবলগীয়া হোৱাত বোকাময় পথত ২৪ ছেপ্তেম্বৰৰ দিনা ভূঁই ৰুই প্ৰতিবাদ কৰি ৰাজপথলৈ ওলাই আহিল আমগুৰিৰ ম’ৰাবজাৰ গাঁও পঞ্চায়তৰ অন্তৰ্গত ঢেকীয়াল গাওঁবাসী। সম্প্ৰতি স্বাধীনতাৰ ৭৪ বছৰৰ পাছতো চেউনী আলি বৰুৱা কুৰি সংযোগী প্ৰায় দুই কি’লমিটাৰ পথটোৰ দূৰৱস্থাই জলাক’লা খুৱাইছে ৰাইজক। পথটোত নচলে ১০৮ জৰুৰী কালিন সেৱা অথবা অন্য কোনো বাহন। পঞ্চায়তে কোনো দিনেই মেৰামতিৰ বাবে গুৰুত্ব নিদিয়া পথটিৰ দূৰৱস্থাৰ বাবেই চিকিৎসালয়লৈ যাব নোৱাৰা ৰোগীৰ মৃত্যু পৰ্য্যন্ত হৈছে বুলি আভিযোগ আনিছে অঞ্চলবাসীয়ে।চাৰিখন গাঁৱৰ ৰাইজৰ একমাত্ৰ পথৰ লগতে আমগুৰি সমষ্টিৰ অন্যতম গুৰুত্বপূ্ৰ্ণ পথটিৰ দূৰৱস্থাই অঞ্চলটোৰ ৰাইজক জীয়াতু ভোগাইছে ৷

গেলেকী : নাজিৰা আৰু আমগুৰি দুয়োটা সমষ্টিত আছুৰ প্ৰতিবাদী কাৰ্যসূচী। ২৪ ছেপ্তেম্বৰৰ আবেলি পৰত তথা সদৌ শিৱসাগৰ জিলা ছাত্ৰ সন্থাৰ আহ্বানত কৃষক বিৰোধী কৃষি আইন-২০২০ বাতিলৰ দাবীত চৰকাৰৰ বিৰুদ্ধে জংগী প্ৰতিবাদ সাব্যস্ত। চাউল, দাইল, আলু, পিয়াঁজ আৰু তেল অত্যাৱশ্যকীয় সামগ্ৰীৰ তালিকাৰ পৰা প্ৰত্যাহাৰ কৰা সিদ্ধান্তৰ প্ৰতিবাদত নাজিৰা, লাকুৱা, মথুৰাপুৰ, আমগুৰি আঞ্চলিক ছাত্ৰ সন্থাই দুয়োখন নগৰৰ বিভিন্ন প্ৰান্তত প্ৰধানমন্ত্ৰী নৰেন্দ্ৰ মোডীৰ প্ৰতিকৃতি দাহ কাৰ্যসূচী ৰূপায়ন কৰি জংগী প্ৰতিবাদ সাব্যস্ত কৰে ৷ কাৰ্যসূচীত আছুৰ ভাৰপ্ৰাপ্ত সভাপতি জ্যোতি প্ৰসাদ কলিতা ভাৰপ্ৰাপ্ত সাধাৰণ সম্পাদক সুমন কলিতা মহকুমাৰ ছাত্ৰ সন্থাৰ কাৰ্য নিৰ্বাহক সদস্য নন্দন মালাকাৰ উপস্থিত থাকে ৷

দৈনন্দিন বাৰ্তা ডেস্ক : ধুবুৰী জিলাৰ গৌৰীপুৰ আৰক্ষী থানাৰ ভাৰপ্ৰাপ্ত আৰক্ষী বিষয়া সত্যজিৎ বৰঠাকুৰে দীৰ্ঘদিন ধৰি চলাই আহিছে বৃহৎ উৎকোচৰ ৰমৰমীয়া বেহা। যাৰ ফলত গোচৰীয়া আৰু অপৰাধীয়ে দুয়ো পক্ষই দিব লাগিছিল লাখ লাখ টকাৰ উৎকোচ। এশ গৰু মাৰিলে বাঘৰো মৰণ। ঠিক তেনেদৰে গৌৰীপুৰ আৰক্ষী থানাৰ ভাৰপ্ৰাপ্ত আৰক্ষী বিষয়া সত্যজিৎ বৰঠাকুৰৰ বাবে নামি আহিল এক প্ৰলয়ংকাৰী বিপদ। হয়। এটা গোচৰ মীমাংসাৰ বাবে ভাৰপ্ৰাপ্ত আৰক্ষী বিষয়া সত্যজিৎ বৰঠাকুৰে দাবী কৰিছিল এক লাখ টকা। উক্ত উৎকোচৰ ধন লোৱাৰ সময়তে দুৰ্নীতি নিবাৰণ শাখাৰ হাতত হাতে লোটে ধৰা পৰে অ’চি সত্যজিৎ বৰঠাকুৰ। উল্লেখ্য যে, অ’চি সত্যজিৎ বৰঠাকুৰে নিজ গা ঢাকিবলৈ বলিৰ পঠা সজালে উপ পৰিদৰ্শক আবুল কালাম আজাদক। বৰঠাকুৰে উৎকোচ লৈ দুৰ্নীতি নিবাৰণ শাখাৰ উমান পাই লগে লগে গৌৰীপুৰ টাউন উপ-পৰিদৰ্শক আবুল কালাম আজাদৰ ওচৰত উৎকোচ লোৱা ধন জমা দিয়াৰ লগে লগেই দুৰ্নীতি নিবাৰণ শাখাৰ লোকৰ লগতে ধুবুৰী জিলাৰ এছপি আনন্দ মিশ্ৰৰ সজাতি দলে অতৰ্কিতে গ্ৰেপ্তাৰ কৰে। উক্ত দুৰ্নীতি পৰায়ণ আৰক্ষী বিষয়া সত্যজিৎ বৰঠাকুৰক গ্ৰেপ্তাৰ কৰাত উৎফুল্লিত হৈ পৰিছে সমগ্ৰ গৌৰীপুৰবাসী ৰাইজে।

উজনি-মাজুলী : ৰাজ্যৰ আন জিলাৰ লগতে মাজুলী জিলাতো বুধবাৰে ক’ভিড-১৯ অতিমাৰী প্ৰতিৰোধৰ বাবে জনসাধাৰণৰ মাজত সজাগতা বৃদ্ধিৰ উদ্দেশ্যে জিলা স্বাস্থ্য বিভাগে ক’ভিড-১৯ সজাগতা সমদল উলিয়ায়। কমলাবাৰী খণ্ড প্ৰাথমিক স্বাস্থ্য কেন্দ্ৰৰ পৰা কমলাবাৰী চহৰৰ মাজেৰে উলিওৱা এই ক’ভিড-১৯ সজাগতা সমদল অংশগ্ৰহণে উদ্বোধন কৰে মাজুলীৰ অতিৰিক্ত উপায়ুক্ত (স্বাস্থ্য) অৰিন্দম বৰুৱাই। মাজুলী জিলা স্বাস্থ্য বিভাগৰ যুটীয়া সঞ্চালক ডাঃ নীলকান্ত দলেই নেতৃত্ব দিয়া এই সজাগতা সমদলত স্বাস্থ্য বিভাগৰ বিষয়া-চিকিৎসক, নাৰ্চ-স্বাস্থ্যকৰ্মী, আশাকৰ্মীসকলে ভাগ লয়।