নাজিৰা : কভিড-১৯ ৰোগৰ চিকিৎসাৰ বাবে চৰকাৰী চিকিৎসালয়লৈ যোৱাৰ দিহা কৰাৰ লগতে এই ৰোগৰ আচৰণ বিধি অনুসৰি চিনাক্ত ৰোগীক কোনো নিৰোগী ব্যক্তিৰ সংস্পৰ্শলৈ অহাৰ পূৰ্বেই চিকিৎসালয় গৈ পোৱাৰ বাবে তৎপৰতা এতিয়া ক্ৰমাৎ শিথিল হোৱাৰ দিশত। এই বিষয়ে চিনাক্ত ৰোগীয়ে চৰকাৰী চিকিৎসা কৰ্মীৰ পৰা ক্ষন্তেক পাছতে এম্বুলেন্স আহি পোৱাৰ প্ৰতিশ্ৰুতি পোৱাৰ পাছত কভিড পৰীক্ষা কৰাৰ স্থানত অপেক্ষা কৰি বিফল হয়। পৰৱৰ্ত্তী সময়ত আক্ৰান্ত ব্যক্তিয়ে নিজে ফোন কৰিও ১০৮ সেৱাৰ এম্বুলেন্সৰ সঁহাৰি বিচাৰি সোণকালেই আহি পোৱাৰ প্ৰতিশ্ৰুতি লাভ কৰে ঠিকেই। পিছে ১০৮ ব্যৱস্থাপনাৰ পৰা ৰোগীৰ সৈতে যোগাযোগ কৰা কৰ্তৃপক্ষ আৰু এম্বুলেন্সত কৰ্মৰত সকলৰ মাজত ক্ৰমাৎ এতিয়া যোগসূত্ৰ হেৰাই যোৱাৰ উপক্ৰম হোৱাৰ বাবেই বিগত তিনিদিন ধৰি ৰোগীজনৰ কাষ নেপালেহি এম্বুলেন্স সেৱা। উপান্ত আক্ৰান্ত জনে নিজৰ গৃহত উপস্থিত হৈ হোম কোৱাৰেন্টাইনৰ ব্যৱস্থা নিজে কৰি লয়। এই সন্দৰ্ভত খেলুৱা খণ্ড প্ৰাথমিক স্বাস্থ্য কেন্দ্ৰত পৰীক্ষা কৰোৱা গড়গাঁৱৰ বাসিন্দা ৫২ বছৰীয়া প্ৰৱাল খাটনিয়াৰে নিজ গৃহতে গৃহ নিলগীকৰণ হৈ ৰোৱাৰ বিষয়ে খেলুৱা খণ্ড প্ৰাথমিক স্বাস্থ্য বিষয়াৰ যোগেদি শিৱসাগৰ জিলাৰ স্বাস্থ্য বিভাগৰ যুটীয়া সঞ্চালকলৈ প্ৰেৰণ কৰা এখন পত্ৰত এই বিষয়ে অৱগত কৰাৰ লগতে যোৱা ১৮ ছেপ্টেম্বৰতে কভিড পজিটিভ প্ৰমাণ হোৱা আৰু দীঘলীয়া অপেক্ষাৰ লগতে পৰৱৰ্ত্তী গৃহ নিলগীকৰণ হোৱাৰ কথা ২১ ছেপ্টেম্বৰৰ পত্ৰযোগে প্ৰকাশ কৰিছে। এই ঘটনাই একমাত্ৰ নহয় চিনাক্ত ৰোগীৰ ক্ৰমাৎ অক্সিজেনৰ মাত্ৰা কমি উঠা অৱস্থাত এম্বুলেন্স অহাৰ আশাত কেইবাঘণ্টাও ৰৈ থকাৰ পাছত ৰোগীৰ আত্মীয়ই মহিলা ৰোগীক নিজা বাহনেৰে নাজিৰাৰ পৰা শিৱসাগৰ কভিড চিকিৎসালয়ত ভৰ্ত্তি কৰাবলৈ আগবঢ়া অৱস্থাত আন শীৰ্ষস্থানীয় ব্যক্তিৰ নিৰ্দেশতহে অৱশেষত ১০৮ এম্বুলেন্স আহি পোৱাৰ দৰে পৰিস্থিতি দৃশ্যমান হৈছে। স্বাস্থ্য বিভাগে কভিড যোদ্ধা হিচাপে অনেকজন ব্যক্তিক সমুখৰ যোদ্ধা হিচাপে সম্বৰ্দ্ধনা, প্ৰশংসা কৰি মনোবল ধৰি ৰখাৰ ব্যৱস্থা কৰাৰ পাছতো খোদ আতুৰ সময়ত আশা কৰি ৰোৱা এম্বুলেন্স খনৰ চালক আৰু চিকিৎসা কৰ্মীক কিয় একে সময়তে সক্ৰিয় কৰি ৰাখিব পৰা নাই ? নে হাত চাপৰি প্ৰশংসাৰে উপচাই ৰখাৰ পাছত এম্বুলেন্স চলিবলৈ প্ৰয়োজনীয় ডিজেলৰ যোগান হ্ৰাস নতুবা ব্যয় সংকোচনৰ নামত কভিড যোদ্ধাৰ প্ৰাপ্য সুবিধাতো হাত ধৰা হৈছে ? জনসাধাৰণৰ মাজত প্ৰশ্ন উঠিছে।

নাজিৰা : কালি চিপিআই ৰাজ্য পৰিষদৰ আহ্বান মৰ্মে ৰাজ্যজুৰি ২০ দফীয়া জনস্বাৰ্থ দাবীচনদৰ ভিত্তিত বিভিন্ন জিলা আৰু মহকুমা সদৰত তিনিঘণ্টীয়া অৱস্থান ধৰ্মঘট পালন কৰা হয় ৷ ইয়াৰ অংশস্বৰূপে নাজিৰা নাট্যমন্দিৰ প্ৰাঙ্গণত চিপিআই নাজিৰা মহকুমা পৰিষদৰ উদ্যোগত ভালে সংখ্যক কৰ্মকৰ্তাই বিভিন্ন শ্ল’গান দি পৰিৱেশ উত্তাল কৰি তোলে ৷ অৱস্থান ধৰ্মঘট স্থলিত অংশগ্ৰহণ কৰি চিপিআই ৰাষ্ট্ৰীয় পৰিষদৰ সদস্য তথা জিলা সম্পাদক কনক গগৈয়ে দাবী সমূহৰ তাৎপৰ্য ব্যাখ্যা কৰে আৰু চৰকাৰৰ অসম বিৰোধী কৃষক বিৰোধী শ্ৰমিক বিৰোধী যুৱ-ছাত্ৰ আৰু মহিলা বিৰোধী কামকাজক চোকা সমালোচনা কৰে ৷ প্ৰধানমন্ত্ৰী নৰেন্দ্ৰ মোদীৰ মইমতালিয়ে গ্ৰহণ কৰা সিদ্ধান্ত সমূহেই দেশৰ আজি এই অৱস্থা বুলি কৈ তেখেতক সংবিধান সংসদীয় ব্যৱস্থাত বিশ্বাস ৰাখি কাম কৰিবলৈ কয় আৰু গণতন্ত্ৰ ৰক্ষা কৰিবলৈ আহ্বান জনায় ৷ ৰাজ্যসভাত পাছ কৰা আইন কেইখনৰ কৃষক বিৰোধী দফা সমূহ বাতিল কৰিবলৈও দাবী জনায় ৷ ইয়াৰ উপৰিও কা বাতিল আৰু অখিল গগৈক মুক্তি দিয়াকে ধৰি EIA -২০২০, NEP -২০২০ ত থকা জনগণ বিৰোধী দফা সমূহ বাতিল কৰিবলৈ দাবী জনায় ৷ মহকুমা সম্পাদক যোগেন চেতিয়াই আঁত ধৰা অৱস্থানস্থলিত চিপি নেতা ৰুহিত বড়া মহিলা নেত্ৰী ৰাণু বৰুৱাকে ধৰি ভালেকেইজন নেতা কৰ্মীয়ে অংশগ্ৰহণ কৰে ৷

অনলাইন বাৰ্তা : কৰোনা মহামাৰীৰ পৰা নিজে সুস্থ হৈ আন দুগৰাকী ব্যক্তিৰ জীৱন ৰক্ষাৰ ক্ষেত্ৰত এচাম ব্যক্তিয়ে প্লাজমা দান দি মহানুভৱতাৰ পৰিচয় দাঙি ধৰিছে ৷ তেনে এচাম ব্যক্তিক বাৰুকৈয়ে শলাগ লৈছে গুৱাহাটীৰ লায়ঞ্ছ ক্লাবে ৷ সোমবাৰে গুৱাহাটী মহানগৰীৰ হোটেল অৰনেটত অনুষ্ঠিত এক গাম্ভীৰ্যপূৰ্ণ অনুষ্ঠানত প্লাজমা দান ব্যক্তিক সম্বৰ্ধনা জনোৱা হয় ৷ লায়ঞ্ছ ক্লাবৰ সভাপতি নিৰুকাব্ৰাৰ পৌৰহিত্যত অনুষ্ঠিত হোৱা সভাখনত বিশিষ্ট অতিথি হিচাপে গুৱাহাটী উন্নয়ন মন্ত্ৰী সিদ্ধাৰ্থ ভট্টাচাৰ্য উপস্থিত থাকি কয় যে কভিড ১৯ পৰা নিজে সুস্থ হৈ আন দুগৰাকী কভিদ ৰোগীক জীৱন ৰক্ষাৰ বাবেই প্লাজমা দান কৰিলে, তেওঁলোক সচাকৈয়ে মানবীয়তাৰ সম্পূৰ্ণ নিদৰ্শন দাঙি ধৰিছে ৷ এই সকল ব্যক্তি মানৱ সমাজৰ এক আদৰ্শ স্বৰূপ ব্যক্তি বুলি উল্লেখ কৰে ৷ তেওঁ লগতে প্লাজমা দান কৰা ব্যক্তি সকলক ধন্যবাদ জ্ঞাপন কৰে৷ উল্লেখ্য যে অনুষ্ঠানত প্লাজমা দান কৰা ব্যক্তি ক্ৰমে হীৰকজ্যোতি দাস, ধৰ্মাকান্ত মেধি, মৃনাল দাস, দেৱশিষ পাল, ফাজুলুল কৰিম, তৰুণ কুমাৰ, সুৰুজ বাছফৰক সম্বৰ্ধনা জনোবা হয় ৷ সম্পাদক ৰুপা সাগৰ, উপদেষ্টা কমল জৈন অনুষ্ঠানত উপস্থিত থাকি প্লাজমা দান কৰা ব্যক্তি সকলক অশেষ ধন্যবাদ জ্ঞাপন কৰে ৷

গেলেকী : নাজিৰা সমষ্টিৰ বিধায়ক ও ৰাজ্যৰ বিৰোধী দলৰ দলপতি দেৱব্ৰত শইকীয়াৰ প্ৰতিক্ৰিয়া। বিগত ৭ এপ্রিল তাৰিখে বিশ্বনাথ চাৰিআলিৰ মধুপুৰত আৰক্ষীৰ উপস্থিতিত চৌকত আলি নামৰ ব্যক্তি জন নির্য্যাতিত হৈছিল। এই সন্দৰ্ভত বিধায়ক দেৱব্ৰত শইকীয়াই যোৱা ১২ এপ্রিল ২০১৯ তাৰিখে এক অভিযোগ ৰাষ্ট্ৰীয় মানৱ অধিকাৰ আয়োগৰ ওচৰত দাখিল কৰিছিল। ইয়াৰ ভিত্তিত অহা ২৪ অক্টোবৰ ২০২০ তাৰিখৰ ভিতৰত ভুক্তভূগী চৌকত আলীক এক লাখ টকাৰ ক্ষতিপূৰণ দিবলৈ ৰাষ্ট্ৰীয় মানৱ অধিকাৰ আয়োগে অসম চৰকাৰৰ মুখ্য সচিবক নির্দেশ দিছে। সম্প্ৰতি এই গোটেই বিষয়টোৰ সন্দৰ্ভত বিধায়ক দেৱব্ৰত শইকীয়াই আজি এক প্ৰেছ বিজ্ঞপ্তি জড়িয়তে সংবাদ-মাধ্যমৰ আগত নিজৰ প্ৰতিক্ৰিয়া প্ৰকাশ কৰিছে।

গেলেকী : নাজিৰা মহকুমা নাতিদূৰৈৰ নামতোলাত চৰকাৰী আঁচনিৰ ব্যাপক প্ৰভাৱ। সোণাৰি সমষ্টিৰ বিধায়িকা নৱনীতা সন্দিকৈয়ে ১৯ ছেপ্তেম্বৰৰ দিনা নিজা বিধায়ক পুঁজিৰ দ্বাৰা নিৰ্মাণ হ’ব লগা টাওকাক পঞ্চায়তৰ অন্তৰ্গত নামতোলা মধ্য ইংৰাজী বিদ্যালয়ৰ চাৰি সীমাৰ দেৱাল, নামতোলা যুৱ সংঘৰ গৃহ আৰু মুখ্যমন্ত্ৰীৰ আছুতীয়া পুঁজিৰ দ্বাৰা নিৰ্মাণ হ’ব লগা হাতীকেম্প স্বৰ্গীয় বগাধৰ গগৈ ঘাটৰ নিৰ্মাণৰ আধাৰশিলা স্থাপন কৰে। নামতোলা মধ্য ইংৰাজী বিদ্যালয়ৰ খেলপথাৰত এই উপলক্ষে আয়োজিত এক অনুষ্ঠানত বিধায়িকা সন্দিকৈৰ সৈতে উপস্থিত থাকে আঞ্চলিক পঞ্চায়তৰ সদস্য বিটু মিত্ৰ আৰু টাওকাক পঞ্চায়তৰ সভানেত্ৰী নিতুমণি প্ৰধান। উল্লেখ্য যে নামতোলা মধ্য ইংৰাজী বিদ্যালয়ৰ চাৰি সীমাৰ দেৱাল নিৰ্মাণৰ বাবে মুঠ চাৰি লাখ, নামতোলা যুৱ সংঘৰ গৃহ নিৰ্মাণৰ বাবে মুঠ দুই লাখ পঞ্চাশ হাজাৰ আৰু হাতীকেম্প স্বৰ্গীয় বগাধৰ গগৈ ঘাটৰ নিৰ্মাণৰ বাবে মুঠ বাৰ লাখ টকা আবন্টন দিছে বিধায়িকা গৰাকীয়ে। আনহাতে কংগ্ৰেছৰ দখলত থকা চুবুৰীয়া নাজিৰা সমষ্টি উন্নয়নৰ নামত চৰম অৰাজগতাই বিৰাজ কৰিছে।