লখিমপুৰ

সমগ্ৰ বিশ্বজুৰি ক’ৰোনা ভাইৰাছে সন্ত্ৰাসৰ সৃষ্টি কৰিছে। এই ভাইৰাছত ভাৰতবৰ্ষৰ লগতে ইয়াৰ বহু লোক সংক্ৰমণৰ বলি হৈছে৷ এই পর্যন্ত ৰাজ্যখনত শতাধিক লোক আক্ৰান্ত হোৱাৰ বিপৰীতে ৪১ জনে আৰোগ্য লাভ কৰিছে। ৰাজ্যখনৰ অন্যান্য জিলাৰ লগত সংগতি ৰাখি লখিমপুৰ জিলাৰ স্বাস্থ্যকৰ্মীসকলেও নিজ নিজ অঞ্চলত কঠোৰ পৰিশ্ৰম কৰি আহিছে। এইক্ষেত্ৰত লখিমপুৰ জিলা প্ৰশাসন আৰু জিলা স্বাস্থ্য অভিযানৰ সহযোগত স্বাস্থ্যকৰ্মীসকলৰ মনোবল বৃদ্ধিৰ বাবে এক পদক্ষেপ হিচাপে মঙলবাৰে জিলা উপায়ুক্ত ডাঃ জীৱন বি আৰু জিলা যুটীয়া স্বাস্থ্য সেৱা সঞ্চালক ডাঃ গুনীন কুমাৰ গগৈয়ে লখিমপুৰ জিলাৰ অন্তৰ্গত নাওবৈচা প্ৰাথমিক স্বাস্থ্য কেন্দ্ৰত এক সম্বৰ্দ্ধনা কাৰ্যসূচীত অংশগ্ৰহণ কৰে। অনুষ্ঠানটোত আশাকৰ্মী, আশা ছুপাৰভাইজাৰ, এএনএম, এমপিডব্লিউ, লেৱৰেটৰি টেকনিছিয়ান আদিকে ধৰি মুঠ ১১ জন স্বাস্থ্যকৰ্মীক জিলা উপায়ুক্ত ডাঃ জীৱন বিয়ে একোখনকৈ মানপত্ৰৰে সম্বৰ্ধনা জ্ঞাপন কৰে। পৰৱৰ্তী সময়ত জিলাৰ সকলো খণ্ড প্ৰাথমিক পৰ্যায়ত একোখনকৈ মানপত্ৰ প্ৰদানেৰে কৰ্মক্ষেত্ৰত ইতিমধ্যে অৰিহণা যোগোৱা হ’ব বুলি জিলা যুটীয়া স্বাস্থ্য সেৱা সঞ্চালক ডাঃ গুনীন কুমাৰ গগৈয়ে জনাইছে৷

টিংখাং

ৰাজ্যখনত আফ্ৰিকান ছোৱাইন ফিভাৰত আক্ৰান্ত হৈ গাহৰিৰ অপমৃত্যু হোৱাত উজনি অসমৰ গাহৰি পালকসকলে বিস্তৰ ক্ষতিৰ সন্মুখীন হ’ব লগাত পৰিছে। সম্প্ৰতি উজনি অসমৰ প্ৰায় সকলোবোৰ জিলাতে গাহৰিৰ মাংসৰ ব্যৱসায় নিষিদ্ধ হৈ আছে। অসম চৰকাৰে গাহৰিৰ দেহত আফ্ৰিকান ছোৱাইন ফিভাৰত সংক্ৰমণ ধৰা পৰা পাছতে গাহৰি মাংসৰ বেচা কিনাত নিষিদ্ধ ঘোষণা কৰিছিল। ইয়াৰ পাছৰে পৰা বজাৰত মুকলিকৈ গাহৰিৰ মাংসৰ বেচা কিনা সম্পূৰ্ণভাৱে বন্ধ হৈ আছে। অৱশ্যে ভিতৰুৱা কেতবোৰ ঠাইত একাংশলোকে চোৰাংকৈ গাহৰিৰ মাংসৰ ৰমৰমীয়া চলাই থকা বুলি জানিব পৰা গৈছে।পূৰ্বৰ তুলনাত গাহৰি মাংসৰ চাহিদা যথেষ্ট হ্ৰাস পোৱাৰ লগতে ব্যাপক হাৰত মাংসৰ দাম কমি আহিছে। জানিব পৰা মতে ৰাজ্যখনত আফ্ৰিকান ছোৱাইন ফিভাৰৰ সংক্ৰমণৰ আগলৈকে প্ৰতি কিল’গ্ৰাম গাহৰি মাংস দুশ ষাঠি টকাৰ পৰা দুশ আশী টকা পৰ্যন্ত দৰত বিক্ৰী হৈছিল। বৰ্তমান বজাৰত মুকলিভাৱে বিক্ৰী বন্ধ হৈ থকাৰ বাবে চোৰাংভাৱে কম মূল্যত গাহৰিৰ মাংস বিক্ৰী হৈ আছে বুলি জানিব পৰা গৈছে। জানিব পৰা মতে প্ৰতি কিল’গ্ৰাম গাহৰিৰ মূল্য এশ টকাৰ পৰা ডেৰশ টকালৈ হ্ৰাস পাইছে।ফলত গাহৰিৰ পালকসকলে ব্যাপক লোকচানৰ সন্মুখীন হ’ব লগা হৈছে। আনহাতে একাংশ চতুৰ ব্যৱসায়ীয়ে আফ্ৰিকান ছোৱাইন ফিভাৰৰ আতংক বিয়পাই উজনিত গাঁৱে গাঁৱে ব্যাপকহাৰত গাহৰিৰ নিধন যজ্ঞ চলাই থকা বুলি জানিব পৰা গৈছে। এই নিধন কৰা গাহৰি বিলাকৰ মাংস কম মূল্যত চোৰাংভাৱে ঠায়ে ঠায়ে বিক্ৰী কৰি আছে। গাহৰিৰ মাংস গোপনে উজনিৰ বিভিন্ন জিলাত সৰবৰাহ হৈ থকাৰ কথা জানিব পৰা গৈছে।অবাধে চলি থকা গাহৰি মাংসৰ ব্যৱসায় ৰোধৰ বাবে আৰক্ষীয়ে কঠোৰ পন্থা অৱলম্বন কৰা পৰিলক্ষিত হৈছে। জানিব পৰা মতে আৰক্ষীয়ে ইতিমধ্যে মাংসৰ চোৰাং ব্যৱসায়ত জড়িত কেবাজনো লোকক আটক কৰিবলৈ সক্ষম হৈছে। উল্লেখ্য যে আফ্ৰিকান ছোৱাইন ফিভাৰৰ সংক্ৰমণৰ ফলত শিৱসাগৰ, ধেমাজি, লখিমপুৰ, ডিব্ৰুগড়ৰ জিলাৰ বৃহৎ সংখ্যক আক্ৰান্ত হৈ অপমৃত্যু হয়। মৃত গাহৰিসমূহ নৈপৰীয়া একাংশ লোকে দিচাং, দিহিং, ব্ৰহ্মপুত্ৰকে ধৰি বহুকেইখন নৈ পেলাই দিছিল।ৰাজ্যখনৰ গাহৰি পালকসকলে ব্যাপক ক্ষতিৰ সন্মুখীন হোৱাৰ পাছতো চৰকাৰীভাৱে কোনোধৰণৰ সাহায্য লাভ কৰা নাই। এই সন্দৰ্ভত চৰকাৰক উপযুক্ত পদক্ষেপ গ্ৰহণ কৰি ক্ষতিগ্ৰস্ত লোকসকলক সাহায্য প্ৰদান কৰিবলৈ সচেতন মহলে আহবান জনাইছে। ৰাজ্যৰ বহু গ্ৰাম্য সমাজত গাহৰি পালনৰ জৰিয়তে স্বাৱলম্বী হৈ পৰিয়ালক পোহপাল দি আহিছে। তদুপৰি বহু নিবনুৱাই সম্পূৰ্ণ বিজ্ঞান সন্মত পদ্ধতিৰে ব্যৱসায়িকভাৱে গাহৰি পালন কৰি নিজৰ লগতে আন বহুতে কৰ্মসংস্থাপনৰ ব্যৱস্থা কৰিছে। সম্প্ৰতি ৰাজ্যখনত আফ্ৰিকান ছোৱাইন ফিভাৰৰ সংক্ৰমণৰ বাবে গাহৰি পালকসকল গভীৰ সংকটৰ সন্মুখীন হ’ব লগা হৈছে। ইয়াৰ প্ৰভাৱ ৰাজ্যৰ অৰ্থনীতিতো পৰাৰ সম্ভাৱনা আছে। কিয়নো ৰাজ্যখনৰ লগতে গাহৰিৰ মাংসই চুবুৰীয়া নাগালেণ্ড আৰু অৰুণাচল প্ৰদেশতো চাহিদা পূৰণ কৰি আহিছিল। জানিব পৰা মতে অসমৰ লগতে চুবুৰীয়া ৰাজ্যকেইখনলৈ প্ৰতি সপ্তাহত দুখন বিশেষ ৰেলেৰে উত্তৰ প্ৰদেশ, বিহাৰ আদিৰ পৰা বৃহৎ সংখ্যক গাহৰি আমদানি কৰা হয়।

নাজিৰা

ক’ভিড-১৯ মহামাৰী প্ৰতিৰোধৰ বাবে সতৰ্কতামূলক ব্যৱস্থা স্বৰূপে ৰাজ্য চৰকাৰে প্ৰতিখন জিলাৰ প্ৰতিটো অঞ্চলত জনসাধাৰণৰ ঘৰে ঘৰে স্বাস্থ্য বিভাগৰ নিৰীক্ষণ গোটৰ দ্বাৰা ঘৰতে প্ৰতিজন ব্যক্তিৰ স্বাস্থ্য পৰীক্ষা কৰি জ্বৰ, কাঁহ ইত্যাদিৰ লক্ষণ থকা লোকৰ কভিড টেষ্টৰ ব্যৱস্থা কৰিছে যদিও বহু অঞ্চলত পৰ্যাপ্ত স্বাস্থ্য কৰ্মী আৰু উপযুক্ত সা-সৰঞ্জামৰ অভাৱত এনে ব্যৱস্থা সঠিকভাৱে কাৰ্যকৰী নোহোৱা পৰিলক্ষিত হৈছে৷ চলিত মে’ মাহৰ প্ৰথম সপ্তাহত শিৱসাগৰ জিলাৰ উপায়ুক্তৰ দ্বাৰা জিলা পৰিষদৰ মুখ্য কাৰ্যবাহী বিষয়াৰ লগতে নাজিৰা, আমগুৰি, ডিমৌ আৰু শিৱসাগৰ ৰাজহ চক্ৰ বিষয়া সকললৈ প্ৰেৰিত এছভিচি ১০/কভিড ১৯/২০২০ নং পত্ৰ যোগে ৬/৫/২০২০ তাৰিখৰ পৰা জিলাখনৰ প্ৰতিখন গাঁও-চহৰ অঞ্চলত স্বাস্থ্য বিভাগৰ নিৰীক্ষণ গোটেে ভ্ৰমণ কৰি জ্বৰ-কাঁহ ইত্যাদিৰ লক্ষণ থকা ব্যক্তিসকলক ঘৰতেে স্বাস্থ্য পৰীক্ষা কৰাৰ কথা উল্লেখ কৰি পঞ্চায়ত কৰ্মী আৰু গাঁওবুঢ়াসকলক এনে নিৰীক্ষণ গোটক সকলো প্ৰকাৰে সহহযোগিতা আগবঢ়াবলৈ নিৰ্দেশ দিয়াৰ উপৰি ৰাইজৰ মাজত এই বিষয়ে প্ৰচাৰ চলাবৰ কাৰণে অনুৰোধ কৰা হৈছিল যদিও নাজিৰাত এনে নিৰীক্ষণ গোটৰ কাৰ্যসূচী ভেকোভাওনাত পৰিণত হোৱাহে পৰিলক্ষিত হৈছে৷ নাজিৰা নগৰ আৰু ইয়াৰ দাঁতিকাষৰীয়া অঞ্চলত কোনো ব্যক্তিৰ জ্বৰ-কাঁহ আদিৰ পৰীক্ষা নকৰাকৈ আশা কৰ্মী আৰু নাৰ্চে ঘৰে ঘৰে লোকপিয়লৰ দৰে কেৱল ব্যক্তিৰ নাম আৰু বয়সৰ  তালিকা প্ৰস্তুত কৰি প্ৰতিটো ঘৰৰ সন্মুখত ভিজিটেড বুলি কাৰ্ড এখন আাঁৰিয়েই এনে স্বাস্থ্য নিৰীক্ষণ গোটৰ দায়িত্ব সামৰা কাৰ্যই সমগ্ৰ বিষয়টোকেই উদ্দেশ্যেহীন কৰি তোলা দেখা গৈছে৷ এই সন্দৰ্ভত এই প্ৰতিবেদকে এজন গাঁওবুঢ়াসহ দুগৰাকীমান সংশ্লিষ্ট ব্যক্তিৰ লগত যোগাযোগ কৰাত তেওঁলোকে উপযুক্ত সা-সৰঞ্জামৰ অভাবৰ লগতে ভয়াবহ কভিড-১৯ৰ  পৰা নিজকে সুৰক্ষিত নকৰাকৈ  তৃণমূল পৰ্যায়ৰ কৰ্মীসকলে এই মহামাৰীৰ সময়ত ঘৰে ঘৰে গৈ  বেমাৰী ব্যক্তি বিচাৰি ফুৰাটো  বা স্বাস্থ্য পৰীক্ষা কৰাটো ভয়াবহ কথা আৰু ই তেওঁলোকৰ জীৱনৰ প্ৰতিও এক ভাবুকিস্বৰূপ বুলি কোৱা কথা সঁচাই এক চিন্তনীয় বিষয়, এইক্ষেত্ৰত চৰকাৰ তথা উৰ্ধতন কৰ্তৃপক্ষই জৰুৰীভাৱে বিহিত ব্যৱস্থা গ্ৰহণ কৰাৰ প্ৰয়োজনীয়তা আহি পৰিছে।