গুৱাহাটীৰ শিল্পগ্রামত অনুষ্ঠিত এক অনুষ্ঠানত প্রতিভাসম্পন্ন যুৱ মুকাভিনয় শিল্পী মিনাংক ডেকালৈ ভাৰত চৰকাৰৰ উত্তৰ-পূব ক্ষেত্র সাংস্কৃতিক কেন্দ্রৰ ২০২১-২০২২বর্ষৰ ‘যুৱ প্রতিভা শিল্পী বঁটা’ প্রদান কৰা হয়। অনুষ্ঠানত নাগালেণ্ডৰ ৰাজ্যপাল তথা উত্তৰ-পূব ক্ষেত্র সাংস্কৃতিক কেন্দ্রৰ অধ্যক্ষ লা গণেশনে বঁটা প্রাপ্ত সকলো শিল্পীকে আনুষ্ঠানিকভাবে বঁটা প্রদান কৰে। আৰম্ভণিতে উত্তৰ পূৱ ক্ষেত্র সাংস্কৃতিক কেন্দ্রৰ সঞ্চালক ডা৹ প্রসন্ন গগৈয়ে আদৰণি ভাষণ দিয়ে। এই বঁটাত মানপত্র, ২০ হাজাৰ টকাৰ লগতে অংগবস্ত্র আগবঢ়োৱা হয়। যশস্বী মুকাভিনয় শিল্পী মইনুল হকৰ তত্ত্বাবধানত মূকাভিনয়ৰ পাঠ গ্রহণ মিনাংক ডেকাই ব্যতিক্ৰমী ৰূপেৰে মুকাভিনয়ক ৰাইজৰ মাজলৈ লৈ গৈছে।

উল্লেখযোগ্য যে মিনাংক ডেকাৰ উদ্যোগতেই ভাৰতৰ পৰা মুকাভিনয়ৰ প্ৰথম খন আন্তঃৰাষ্ট্ৰীয় পত্ৰিকা প্ৰকাশ পাইছে। ইয়াৰ উপৰিও কোভিড মহামাৰীৰ সময়তো মুকাভিনয়ৰ জৰিয়তে মানুহৰ মাজত ব্যতিক্রমী ৰূপেৰে সজাগতা সৃষ্টি কৰা মিনাংক ডেকাই আছিল একমাত্ৰ মুকাভিনয় শিল্পী। ইয়াৰ উপৰিও পথ সুৰক্ষা, এইডছ, কেঞ্চাৰ, SAVE DEEPOR BEEL, স্বচ্ছতা, Cyber crime , Child marriage, Drugs, ইত্যাদি বহু উল্লেখনীয় বিষয় লৈ মিনাংক ডেকাই সজাগতা সৃষ্টিৰ প্ৰয়াস কৰি আহিছে। অসমৰ বহু ঠাইৰ লগতে দিল্লী, ভুবনেশ্বৰ,কলকাতা,ৰাজস্থান ইত্যাদিত মুকাভিনয় পৰিবেশন কৰি সমাদৰ বুটলিবলৈ সক্ষম হৈছে। গুৱাহাটীৰ পশ্চিম বৰাগাঁওৰ বাসিন্দা মিনাংক ডেকাই বৰ্তমান বহু অনুষ্ঠান প্ৰতিষ্ঠানত মুকাভিনয় প্ৰশিক্ষক ৰূপে কৰ্মৰত হৈ আছে।

সদৌ অসম সংবাদকর্মী সন্থাৰ ষষ্ঠ বার্ষিক অধিৱেশন দেওবাৰে গুৱাহাটীৰ চানমাৰিস্থিত পেন্সনাৰ ভৱনত অনুষ্ঠিত হয়। সন্থাৰ পতাকা উত্তোলন কৰে সন্থাৰ সভাপতি সুদীপ্ত সৰকাৰে। বস্তি প্ৰজ্বলন কৰে জ্যেষ্ঠ সদস্য যোগকান্ত পূজাৰীয়ে। সাধাৰণ সম্পাদক দীপক কুমাৰ দাসে সম্পাদকীয় প্রতিবেদন পাঠ কৰে। বিগত বৰ্ষৰ আয়-ব্যয়ৰ হিচাপ দাখিল কৰে কোষাধ্যক্ষ নীলকান্ত নাথে। মুকলি সভাৰ মুখ্য বক্তা হিচাপে উপস্থিত থাকে বিশিষ্ট সমাজকর্মী, সমালোচক ময়ূৰ বৰা প্ৰতিজন অসাংবাদিক সংবাদকর্মীক একোজন ৰণুৱা বুলি কয় ময়ূৰ বৰাই।

সভাত বিশিষ্ট অতিথি হিচাপে অংশগ্ৰহণ কৰে জ্যেষ্ঠ সাংবাদিক মুনীন বায়নে। সভাত সন্থাৰ মুখপত্র ‘প্ৰয়াস’ৰ বৰ্দ্ধিত কলেৱৰৰ দ্বিতীয় সংস্কৰণ উন্মোচন কৰা হয়। সভাত সন্থাৰ ২৩ জনীয়া নতুন কমিটী গঠন কৰা হয়।

কামৰূপ জিলাৰ জিলা আয়ুক্ত কীৰ্তি জল্লীয়ে আজি আমিনগাঁৱৰ সংহত জিলা আয়ুক্ত কাৰ্যালয় চৌহদত আয়োজিত এক অনুষ্ঠানত আগন্তুক লোকসভা নিৰ্বাচনৰ বাবে কামৰূপ নিৰ্বাচনী জিলাৰ নিৰ্বাচনী শুভংকৰ প্ৰতীক ৰূপে পুৰুষ শুভংকৰ প্ৰতীক ‘লুইত’ আৰু মহিলা শুভংকৰ প্ৰতীক ‘কামৰূপা’ৰ শুভ উন্মোচন কৰে। নিৰ্বাচনত ভোটাৰৰ অংশগ্ৰহণ বৃদ্ধি সম্পৰ্কে সজাগতা সৃষ্টিৰ লক্ষ্যৰে কামৰূপ জিলাত আৰম্ভ হোৱা পদ্ধতিগত ভোটাৰ শিক্ষা আৰু নিৰ্বাচনী প্ৰক্ৰিয়াত অংশগ্ৰহণ (SVEEP ) কাৰ্যসূচীৰ অধীনত দুষ্প্ৰাপ্য বৰমূৰীয়া কাছৰ আৰ্হিৰে এই শুভংকৰ প্ৰতীক প্ৰস্তুত কৰা হৈছে। উল্লেখ্য যে হাজোৰ হয়গ্ৰীৱ মাধৱ মন্দিৰ চৌহদত পোৱা দুষ্প্ৰাপ্য এই বৰমূৰীয়া কাছবিধ কামৰূপ জিলাৰ বাবে এক গৌৰৱৰ প্ৰতীক। জিলাখনৰ চহকী ঐতিহ্যৰ তাৎপৰ্য্য বহন কৰা দুষ্প্ৰাপ্য এই বৰমূৰীয়া কাছবিধক আৰ্হি ৰূপে লৈ এই শুভংকৰ কাৰ্টুনিষ্ট প্ৰদীপ নাথে ডিজাইন কৰি উলিয়াইছে।

শুভংকৰ উন্মোচনৰ উপৰি কামৰূপ নিৰ্বাচনী জিলাৰ তৰফৰ পৰা আজি গায়ক কুমাৰ ভবেশ আৰু অভিনেতা, পৰিচালক আৰু প্ৰযোজক ৰাজকুমাৰ ঠাকুৰীয়াক জিলাখনৰ নিৰ্বাচনী ব্ৰেণ্ড এম্বেছাদৰ ৰূপে নিযুক্তি দিয়া হয়। আজি কামৰূপ জিলা দিৱস উপলক্ষে সংহত জিলা আয়ুক্তৰ কাৰ্যালয় চৌহদত আয়োজিত দিনজোৰা কাৰ্যসূচীতে এই শুভংকৰ উন্মোচন আৰু ব্ৰেণ্ড এম্বেচেদৰৰ নিযুক্তি দিয়া হয়। উল্লেখ্য যে প্ৰতিবছৰে ৩১ মাৰ্চৰ দিনটো কামৰূপ জিলা দিৱস ৰূপে উদযাপন কৰি অহা হৈছে। আজি এই কামৰূপ জিলা দিৱস উদযাপন কাৰ্যসূচীৰ শুভাৰম্ভ পুৱাৰ ভাগত সংহত জিলা আয়ুক্তৰ কাৰ্যালয়ৰ পৰা পচৰীয়াৰ ঐতিহাসিক আলাবৈ ৰণ স্মৃতি ক্ষেত্ৰলৈ এক চাইকেল ৰেলীৰে কৰা হয়। । এই চাইকেল ৰেলীৰ জৰিয়তে পদ্ধতিগত ভোটাৰ শিক্ষা আৰু নিৰ্বাচনী প্ৰক্ৰিয়াত অংশগ্ৰহণ (SVEEP) কাৰ্যসূচীৰ অধীনত ভোটাৰ ৰাইজৰ মাজত নিৰ্বাচনী প্ৰক্ৰিয়াত অংশগ্ৰহণৰ প্ৰয়োজনীয়তা সম্পৰ্কেও প্ৰচাৰ কৰা হয়। কামৰূপ জিলা দিৱস উপলক্ষে জিলা আয়ুক্তৰ কাৰ্যালয় চৌহদত আয়োজিত এক মুকলি সভা সম্বোধন কৰি জিলা আয়ুক্ত কীৰ্তি জল্লীয়ে কয় যে কামৰূপ জিলা দিৱসটি প্ৰতিবছৰে জিলাখনৰ গৌৰৱময় ইতিহাস, সংস্কৃতি আৰু ঐতিহ্যৰ তাৎপৰ্যক প্ৰতিফলিত কৰি উদযাপন কৰি অহা হৈছে।

আগন্তুক লোকসভা নিৰ্বাচনৰ দিন চমু চাপি অহাৰ লগে লগে ভোটাৰ ৰাইজৰ মাজত ভোটদান প্ৰক্ৰিয়াত অংশগ্ৰহণৰ বাবে সজাগতা বৃদ্ধি আৰু সকলোকে নিজৰ গণতান্ত্ৰিক অধিকাৰ দায়িত্বশীলভাৱে ব্যৱহাৰ কৰিবলৈ উৎসাহিত কৰাটো অতি গুৰুত্বপূৰ্ণ হৈ পৰিছে। সেয়েহে জিলা প্ৰশাসনে জিলা দিৱসৰ কাৰ্যসূচীৰ সৈতে সংগতি ৰাখি কেইবালানিও SVEEP কাৰ্য্যসূচীৰ জৰিয়তে ভোটাৰক নিজ সাংবিধানিক অধিকাৰ দায়িত্বশীলভাৱে প্ৰয়োগ কৰিবলৈ উৎসাহিত কৰাৰ দিশত উদ্যোগ গ্ৰহণ কৰিছে । জিলা আয়ুক্তগৰাকীয়ে অহা ৭ মে’ত কামৰূপ নিৰ্বাচনী জিলাৰ বাবে অনুষ্ঠিত হ’বলগীয়া লোকসভা নিৰ্বাচনত সকলোকে নিজৰ বহুমূলীয়া ভোটদান সাৱ্যস্ত কৰি গণতান্ত্ৰিক অধিকাৰ উপভোগ কৰিবলৈও আহ্বান জনায়। অনুষ্ঠানত ভোটাৰ সজাগতা বৃদ্ধি কৰিবলৈ নয়নমণি দাসৰ কথা আৰু সুৰেৰে প্ৰস্তুত ‘গণতন্ত্ৰত ৰাইজেই ৰজা’ শীৰ্ষক এটি নিৰ্বাচনী গীতো জিলা আয়ুক্ত গৰাকীয়ে মুকলি কৰে। জিলা দিৱসৰ কাৰ্যসূচীৰ সৈতে সংগতি ৰাখি ৰক্তদান তথা স্বাস্থ্য পৰীক্ষা শিবিৰ, পথ সুৰক্ষাৰ ওপৰত সজাগতা সৃষ্টিৰ বাবে বাটৰ নাট, সাংস্কৃতিক অনুষ্ঠান আদি কাৰ্যসূচীও অনুষ্ঠিত হয়। অনুষ্ঠানৰ সৈতে সংগতি ৰাখি মুকলি সভাত আইআইটি গুৱাহাটীৰ অধ্যাপক অৰূপজ্যোতি শইকীয়াই কামৰূপ জিলাৰ ঐতিহাসিক পটভূমিৰ ওপৰত বক্তব্য প্ৰদান কৰে।কামৰূপ জিলা দিৱসৰ এই কাৰ্যসূচীত কামৰূপ জিলা পৰিষদৰ মুখ্য কাৰ্যবাহী বিষয়া অৰ্পা বাগলাৰী, জিলা উন্নয়ন আয়ুক্ত সুশান্ত কুমাৰ দত্ত, অতিৰিক্ত জিলা আয়ুক্তসকল ক্ৰমে কমল বৰুৱা, নিত্য বিনোদ ৱাৰী, চন্দনা বৰুৱা, অভিজিৎ গগৈ, পংকজ কুমাৰ নাগবংশী, নিৰ্বাচনী বিষয়া মানস জ্যোতি বৰাৰ লগতে জিলা প্ৰশাসনৰ বিষয়া-কৰ্মচাৰীৰ লগতে স্থানীয় ৰাইজ উপস্থিত থাকে।

সাহিত্য আৰু সংস্কৃতিৰ সমন্বিত চৰ্চাৰ মঞ্চ “কলঙৰ পাৰত সাহিত্য-সংস্কৃতিৰ সমন্বয় মঞ্চ, অসম”ৰ চতুৰ্থ বাৰ্ষিক অধিৱেশন আৰু বঁটা প্ৰদান অনুষ্ঠানটো আজি গুৱাহাটী প্ৰেছ ক্লাবত দিনজোৰা কাৰ্যসূচীৰে অনুষ্ঠিত হৈ যায়।সভাৰ আৰম্ভণিতে বন্তি প্ৰজ্বলন কৰে বিশিষ্ট কবি সাহিত্যিক তথা আইনজীৱি অনন্ত ৰাম মেধিয়ে । আনহাতে গোটৰ সভাপতি ধনেশ্বৰ মালাকাৰৰ সভাপতিত্বত অনুষ্ঠিত সভাখনত উপস্থিত সকলোকে আদৰণি জনায় মুখ্য প্ৰশাসক চবিন চন্দ্ৰ নাথে । সভাৰ আৰম্ভণিতে শিশু নৃত্য শিল্পী অৰ্চিতা বৰুৱা আৰু ৰিয়া বৰাই পৰিৱেশন কৰা দৃষ্টি নন্দন এটি নৃত্যই সকলোকে মুগ্ধ কৰে। সভাত গোটৰ অধিবেশন উপলক্ষে হৈ যোৱা কবিতা আৰু চুটি গল্প প্ৰতিযোগিতাৰ বিজয়ী ক্ৰমে প্ৰথম স্থান লাভ কৰা হিমাজ্যোতি তালুকদাৰ,জুৰি দেৱী(যুটীয়া ভাৱে)। দ্বিতীয় স্থান লাভ কৰা হিমাদ্ৰী দাস, ৰূপাঞ্জলী হাজৰিকা(যুটীয়া ভাৱে)আৰু তৃতীয় স্থান লাভ কৰা কবিতা চহৰীয়া, নূৰুল ইছলাম শ্বেখ ,মিতা শৰ্মা আৰু সঞ্জীৱ বড়োক বঁটা প্ৰদান কৰা হয় ।

আনহাতে গল্পত প্ৰথম স্থান লাভ কৰা মুনমালা শৰ্মা, দ্বিতীয় স্থান লাভ কৰা নিৰুপমা মজুমদাৰ আৰু বীণা হাজৰিকা(যুটীয়া ভাৱে)আকৌ তৃতীয় স্থান লাভ কৰা চোনিয়া মুক্তিয়াৰ আৰু ৰঞ্জন গোস্বামীক (যুটীয়া ভাৱে)।গোটত প্ৰতি বছৰে নিৰ্বাচন কৰা বৰ্ষশ্ৰেষ্ঠ গল্পকাৰ এই বেলি গুৱাহাটীৰ বিশিষ্ট কবি তথা লেখিকা জ্যোৎস্না ৰাণী বেগমলৈ প্ৰয়াত প্ৰতুল চন্দ্ৰ কলিতা সোঁৱৰণী বঁটা প্ৰদান কৰা হয় । বৰ্ষশ্ৰেষ্ঠ কবিতাৰ খিতাপ তথা প্ৰয়াত প্ৰদীপ কুমাৰ নাথ সোঁৱৰণী বঁটা লাভ কৰে নগাঁওৰ বিশিষ্ট কবি তথা লেখিকা অনামিকা পি দেৱীয়ে । আনহাতে সোণাৰাম ৰাজবংশী আৰু চোনিয়া মুক্তিয়াৰে আঁত ধৰা সভাত কবিতাৰ অনুষ্ঠানটো সঞ্চালনা কৰা বিশিষ্ট কবি মহেশ চৌধুৰীয়ে । সভাত নিমন্ত্ৰিত অতিথি হিচাপে বিশিষ্ট লেখিকা মণিকুন্তলা ভট্টাচাৰ্য, অভিনেত্ৰী চেতনা দাস, দৈনন্দিন বাৰ্তাৰ মুখ্য সম্পাদক ডঃ নৰেন হাজৰিকা, বিশিষ্ট কবি লেখক তথা সাংবাদিক আব্দুল আলিম, কবি,সাহিত্যিক তথা আইনজীৱি অনন্ত ৰাম মেধি, গোটলৈ বিভিন্ন অৰিহণা আগবঢ়োৱা প্ৰশাসক,মডাৰেটৰ সোণাৰাম ৰাজবংশী, মিণ্টু দাস, সুজাতা মেধি,কাজললতা মেধি, মামণি কলিতা, পবিত্ৰী ভৰালী,ডাঃ চন্দনা মেধি দাস,মাইটি কাকতি দাস,যমুনা দুলু বৈশ্য, পল্লৱী দাস সৰস্বতী দাস আৰু মণিৰূপা মিশ্ৰলৈ বিশেষ সন্মান প্ৰদান কৰা হয়।

সভাত জুৰিমণি মুদৈ আৰু বিজু ফুকন কলিতাৰ পাচ মিনিটৰ অভিনয়ে সকলোকে অভিভূত কৰে। অসমৰ জনপ্ৰিয় কণ্ঠশিল্পী আৰিফা হুছেইন বৰা আৰু জিতুমণি দাসে গীত পৰিবেশন কৰে ।‌ ৰাকেশ তালুকদাৰৰ “মই তোমাৰ নিঃস্বাৰ্থ আত্মা” নামৰ কাব্য পুথিখন উন্মোচন কৰে দৈনন্দিন বাৰ্তাৰ মুখ্য সম্পাদক ডঃ নৰেন হাজৰিকাই । সভাত কবিতা পাঠ কৰে ক্ৰমে – ৰাজুমণি শ‌ইকীয়া, হিমাক্ষী বৰা,গজেন দাস, সুৰভি মেধি,জ্যোতি মাধৱ, স্বৰ্গৰ্জ্যোতি চেতিয়া,সত্যজিৎ গগৈ, প্ৰতিমা বুঢ়াগোহাঁই,অঞ্জু ভূঞা, উজ্জ্বল জ্যোতি দাস, দুৰ্লভ পৱন বৰুৱা,ৰুবী শ‌ইকীয়া দাস, কাজল লতা মেধি,নৱ ডেকা, পবিত্ৰ কুমাৰ দাস, শংকৰ দাস, আনোৱাৰ হুছেইন,ডাঃ চন্দনা মেধি দাস , চোনিয়া মুক্তিয়াৰ, বুলি বৰা বৰুৱা, ভাৰতী বৰা, সুজাতা মেধি, মাজনী চহৰীয়া , জেউতি শইকীয়া, ৰুবি শইকীয়া দাস, পুবালী শইকীয়া, ৰুপাঞ্জলী হাজৰিকাই। উল্লেখ্য যে দিনৰ ১১ বজাৰ পৰা বিয়লি ৫ বজালৈ অনুষ্ঠিত সভাখন সামগ্ৰিক ভাৱে পৰিচালনা কৰে গোটৰ মুখ্য প্ৰশাসক চবিন চন্দ্ৰ নাথে। অসম সংগীতৰে দিনযোৰা সভাখনৰ সামৰণি পৰে।