শিৱসাগৰ জিলাৰ লাকুৱাৰ ৰজাবাৰী প্ৰাথমিক বিদ্যালয়ত চাহ বাগিচাৰ ৰাইজক লগত লৈ শিক্ষক, ছাত্ৰ-ছাত্ৰীসকলে উদযাপন কৰে ৰাইজৰ উৎসৱ৷ মূলত স্থানীয় অভিভাৱক আৰু ৰাইজক লগত লৈ বিদ্যালয়ৰ লগত এক সুসম্পৰ্ক গঢ়ৰ মানসেৰে অনুষ্ঠিত কৰা এই উৎসৱত ছাত্ৰ-ছাত্ৰীসকলে নিজৰ নিজৰ প্ৰতিভা সমূহ বিকাশ কৰাৰ সুবিধা পায়৷

পথালিগড় সমল কেন্দ্ৰৰ অন্তৰ্গত ১২ খন বিদ্যালয়ৰ অংশগ্ৰহণণেৰে অনুষ্ঠিত কৰা ৰাইজৰ উৎসৱৰ লগত সংগতি ৰাখি ছাত্ৰ-ছাত্ৰীসকলৰ মাজত বিভিন্ন প্ৰতিযোগিতাও অনুষ্ঠিত হয়৷

ছাত্ৰ-ছাত্ৰীসকলে অনুষ্ঠানত সুন্দৰ গীত নৃত্য আদি প্ৰদৰ্শন কৰে৷ইয়াৰ লগত সংগতি ৰাখি এখনি সভা অনুষ্ঠিত হয়৷৷

-দিলীপ হাজৰিকা, নাজিৰা

ধেমাজি জিলাৰ গোগামুখৰ আগশাৰীৰ মহিলা স্বেচ্ছাসেৱী সংস্থা মিমে আজন ৰুৱাদ কেবাং চমুকৈ মাৰ্কে দুখীয়া জনসাধাৰণক সহায় কৰি  অন্যন্য নিৰ্দশন ডাঙি ধৰিছে৷ বিগত কৰ‘ণা ভাইৰাইছৰ সময়তে মানৱ সেৱাৰ হকে আত্মপ্ৰতিষ্ঠা হোৱা  স্বেচ্ছাসেৱী সংস্থা মাৰ্কে ইতিমধ্যে বহু মানৱ দৰদী কাৰ্যসূচী ৰূপায়ণ কৰি ৰাইজৰ প্ৰশংসা লাভ কৰিছে৷ 

তেওঁলোকৰ মানৱ দৰদী কাৰ্যসূচী হিচাপে দেওবাৰে ধেমাজি জিলাৰ পুৰণা পাৰঘাটৰ এক অনুষ্ঠানত  ১৪ গৰাকী দুখীয়া শ্ৰেণীৰ লোকক বাইচাইকেল আৰু ২৬ গৰাকী দুখীয়া পৰিয়ালক ২৬টা ৰাঁচ বিতৰণ কৰে৷ দেশৰ ৰাজধানী দিল্লীস্থিত অৰ্কিড চ’ছিয়েল এণ্ড এডুকেশ্বন ট্ৰাষ্টৰ আৰ্থিক সহযোগিতাত উক্ত বাইচাইকেল আৰু ৰাজসমূহ  বিতৰণ কৰা হয়। 

উক্ত বাইচাইকেল আৰু ৰাজসমূহৰ বিতৰণ কাৰ্যসূচী শুভাৰম্ভ কৰে অৰ্কিড চ’ছিয়েল এণ্ড এডুকেশ্বন ট্ৰাষ্টৰ সভাপতি মনোৰঞ্জন দলেয়ে৷ চাইকেল বিতৰণ অনুষ্ঠান শুভাৰম্ভ কৰি  অৰ্কিডৰ সভাপতি মনোৰঞ্জন দলেয়ে কয়-যদিও আমাৰ মুখ্য কাৰ্যালয় দিল্লীত আছে কিন্তু আমাৰ জনসেৱামূলক কৰ্মসূচীসমুহ অসমত বেছিকৈ ৰূপায়িত হয় ৷  আমি অসমৰ বিভিন্ন স্থানত দুখীয়া জনসাধাৰণক আৰ্থিক সাহায্য আৰু বিভিন্ন সামগ্ৰী বিতৰণ কৰি আহিছোঁ ৷  আগন্তুক দিনত আমাৰ জনহিতৈষী কাম আৰু দ্ৰুত হ’ব ৷ 

তেওঁ মাৰক’ক ভূয়সী প্ৰশংসা কৰি দোহাৰে যে মাৰ্কে বহু ভিতৰুৱা গাঁৱত বহু দৰিদ্ৰ শ্ৰেণীৰ লোকক সহায় কৰি আহিছে৷ বিশেষকৈ মহিলা সবলীকৰণৰ ক্ষেত্ৰত মাৰ্কে ৰূপায়ন কৰা আঁচনিসমূহ অতি উত্তম হৈছে৷ মাৰ্কে লিংগ বৈষম্য দূৰীকৰণটো বিশেষভাৱে সফল হৈছে বুলি তেওঁ দোহাৰে৷ অনুষ্ঠানত  উদ্দেশ্য ব্যাখ্য কৰে মাৰ্কৰ সভানেত্ৰী লীনা পেগুৱে৷ অনুষ্ঠানটোৰ সামগ্ৰীক পৰিচালনা কৰে মাৰ্কৰ সম্পাদিকা বীনা পেগুৱে৷ উল্লেখ্য যে, ক’ৰণা ভাইৰাছৰ সময়ত মানুহৰ দুৰ্দশা দেখি মাৰ্ক নামৰ স্বেচ্ছাসেৱী সংস্থাটো জন্ম হৈছিল৷

বৰ্ণ বৈষম্য আৰু লীংগ বৈষম্য সমাজৰ পৰা নোহোৱা কৰিবৰ বাবে আৰু দৰিদ্ৰজনক সহায়ৰ হাত আগবঢ়োটোৱে মাৰ্কৰ লক্ষ্য বুলি মাৰ্কৰ কৰ্মীসকলে দোহাৰে৷ গোগামুখ অঞ্চলত বৰ্তমান মাৰ্কৰ জনপ্ৰিয়তা দ্ৰুত গতিত বৃদ্ধি পাইছে৷ গোগামুখ পুৰণা পাৰঘাটক সামৰি গঠন কৰা মাৰ্কে বৰ্তমান গোগামুখৰ ৫-৬ খন গাঁৱক সামৰি লৈছে৷ মাৰ্কৰ এই মানৱ দৰদী কাৰ্যসূচীত উপস্থিত থাকে মাৰ্কৰ অন্যতম উপদেষ্টা ৰাজু দলে, বিদ্যাৱতী পেগু, নাহৰবাৰী পঞ্চায়তৰ আঞ্চলিক সদস্য কমল চন্দ্ৰ দলে, পাৰঘাট প্ৰাথমিক বিদ্যালয়ৰ প্ৰধান শিক্ষক কেশৱ পাইট আদিয়ে৷

চোৱাল্লিশ বছৰীয়া আমাৰ সপোন পূৰণ হ’ল’–শ্বহীদ ভাতৃ কামেশ্বৰ তালুকদাৰ।
সৰুপেটাৰ বি এইচ বি মহাবিদ্যালয়ত খৰ্গেশ্বৰ তালুকদাৰৰ আবক্ষ মূৰ্তি উন্মোচন।

‘১৯৭৯ চনৰ ১০ ডিচেম্বৰৰ দিনটোত ঘৰৰ পৰা ওলাই যোৱা আমাৰ ককাইদেউগৰাকী জীবিত অৱস্থাত আৰু ঘৰলৈ ঘূৰি নাহিল।আহিল নিঠৰ দেহ এটি হৈ। তাৰ পিছতেই ককাইদেউৰ এসময়ৰ শিক্ষাগ্ৰহণস্থলী বি এইচ বি মহাবিদ্যালয় চৌহদত ককাইদেউৰ এক আবক্ষ মূৰ্তি স্থাপনৰ চিন্তাই আমাক আমনি দি আহিছিল।কিন্তু আমাৰ সেই চিন্তাক আজি সাঁকাৰ প্ৰদান কৰিলে মহাবিদ্যালয়খনত অধ্যয়ন কৰি যোৱা একাংশ ছাত্ৰ-ছাত্ৰীয়ে।আমি হিয়া উবুৰিয়াই তেওঁলোকৰ কামৰ প্ৰশংসা কৰিছো।তেওঁলোকৰ এনে বদান্যতাৰ আমি শলাগ লৈছো।আজি আমি অজস্ৰজনৰ সম্মুখত ককাইদেউৰ আবক্ষ মূৰ্তি নিজ হাতে উন্মোচন কৰিবলৈ পাই নিজকে ধন্য মানিছো।’এই মন্তব্য ‘অসম আন্দোলন’ৰ প্ৰথমগৰাকী শ্বহীদ খৰ্গেশ্বৰ তালুকদাৰৰ কনিষ্ঠ ভাতৃ কামেশ্বৰ তালুকদাৰৰ।আজি সৰুপেটাৰ বি এইচ বি মহাবিদ্যালয়ৰ ১৯৯২-৯৫ স্নাতক শিক্ষাবৰ্ষৰ ৩৭ গৰাকী ছাত্ৰ-ছাত্ৰীয়ে তেওঁলোকৰ নিজৰ গাঁঠিৰ ধন খৰছ কৰি ভৱানীপুৰৰ বিশিষ্ট ভাস্কৰ্য শিল্পী হৰেকৃষ্ণ তালুকদাৰৰ হতুৱাই নিৰ্মাণ কৰি উলিওৱা আৰু এক মাঙ্গলিক পৰিবেশৰ মাজত মূৰ্তিটো উন্মোচন কৰাৰ পিছতেই শ্বহীদ ভাতৃগৰাকীয়ে নিজৰ মনৰ অনুভৱ এনেদৰে ব্যক্ত কৰে।

আনহাতে শ্বহীদ ভাতৃগৰাকীয়ে ভৱানীপুৰ-মানাহ ৰাষ্ট্ৰীয় উদ্যান সংযোগী পৰ্যটকসকলৰ আহ-যাহৰ বাবে নিৰ্মিত পথটি শ্বহীদগৰাকীৰ নামেৰে নামাঙ্কিত কৰাৰ ব্যৱস্থা কৰিবলৈও অনুষ্ঠানত উপস্থিত থকা ভৱানীপুৰ সমষ্টিৰ বিধায়ক ফণীধৰ তালুকদাৰক আহ্বান জনায়।উল্লেখ্য,বিগত বৰ্ষৰ ৩০ এপ্ৰিল তাৰিখে মহাবিদ্যালয়খনৰ ডিজিটেল প্ৰেক্ষাগৃহত আয়োজিত এখন সহপাঠী সন্মিলনত মহাবিদ্যালয়খনৰ প্ৰাক্তন ছাত্ৰ তথা বৰ্তমান ‘দৈনিক অসম’ কাকতৰ জ্যেষ্ঠ সাংবাদিক-লেখক জিতেন্দ্ৰ কুমাৰ চৌধুৰীয়ে মহাবিদ্যালয় চৌহদত শ্বহীদ খৰ্গেশ্বৰ তালুকদাৰৰ আবক্ষ মূৰ্তি স্থাপনৰ উদ্দেশ্যেৰে এক প্ৰস্তাৱ আগবঢ়াইছিল।সেই সময়ত উপস্থিত মহাবিদ্যালয়খনৰ একালৰ ছাত্ৰ-ছাত্ৰী সুনন্দ দাস,জুনু দেৱী,তুলিকা দাস,সঞ্জীৱ কুমাৰ তালুকদাৰ,সুনীল উজীৰ,ধঞ্জিতা দাস,লুনা চৌধুৰী, বুলু তালুকদাৰ,ড০ গৌতম চন্দ্ৰ দাস, মঞ্জু দেৱী,তপন বৰ্মন,যোগেন বৰ্মণ আৰু বিশ্ব তালুকদাৰকে আদি কৰি উপস্থিত তেতিয়াৰ দুকুৰি ছাত্ৰ-ছাত্ৰীয়ে প্ৰস্তাৱটোলৈ আনন্দেৰে সমৰ্থন আগবঢ়াইছিল।ইয়াৰ পিছতেই মহাবিদ্যালয়খনৰ বৰ্তমানৰ অধ্যক্ষ তথা ‘অসম আন্দোলন’ৰ সৈতে একালত জড়িত ড০ নয়নজ্যোতি দাসে মূৰ্তি স্থাপনৰ ক্ষেত্ৰত সন্মতি প্ৰকাশ কৰিছিল।আনহাতে মহাবিদ্যালয়খনৰ একালৰ ছাত্ৰ ধ্ৰুৱজ্যোতি দাসে আঁত ধৰা অনুষ্ঠানত স্থানীয় বিধায়ক ফণীধৰ তালুকদাৰে শ্বহীদ ভাতৃগৰাকীয়ে জনোৱা আহ্বানলৈ সঁহাৰি জনাই ‘আজিৰে পৰাই পথছোৱাৰ নাম শ্বহীদ খৰ্গেশ্বৰ তালুকদাৰ পথ’ হিচাপে নামাঙ্কিত কৰিবলৈ হাতে-কামে তেওঁ লাগি পৰিব বুলি জানিবলৈ দিয়ে।শ্বহীদগৰাকীৰ আবক্ষ মূৰ্তি উন্মোচনৰ আজিৰ দিনটোক তেওঁ ‘ঐতিহাসিক দিন’ হিচাপেও আখ্যায়িত কৰে।বিধায়ক গৰাকীয়ে শ্বহীদগৰাকীৰ আবক্ষ মূৰ্তিৰ সম্মুখত বন্তি প্ৰজ্বলন কাৰ্যসূচীৰ শুভাৰম্ভও কৰে।দিনৰ প্ৰায় চাৰে এঘাৰ বজাত মহাবিদ্যালয়খনৰ অধ্যক্ষ ড০ নয়নজ্যোতি দাসৰ দ্বাৰা স্মৃতি তৰ্পণ কাৰ্যসূচীৰে আৰম্ভ হোৱা আজিৰ অনুষ্ঠানত অধ্যক্ষ গৰাকীয়েও তেওঁৰ নিজৰ মনৰ অনুভৱ ব্যক্ত কৰে।তেওঁ কয়–খৰ্গেশ্বৰ তালুকদাৰৰ আবক্ষ মূৰ্তি স্থাপনক লৈ আমি উৎসাহী আছিলো।নিজেই তেতিয়াৰ ছাত্ৰ সংগঠনৰ সৈতে জড়িত হৈ আহি আজি বিদ্যায়তনিক দিশৰ সৈতে জড়িত হৈ আছো।খৰ্গেশ্বৰ তালুকদাৰে পঢ়া মহাবিদ্যালয়খনত শ্বহীদগৰাকীৰ এটাও আবক্ষ মূৰ্তি নথকা কথাটোৱে আমাক দুখ দিছিল।

এনে মহান সংকল্প কাৰ্যকৰী কৰাৰ বাবে আমি প্ৰাক্তন ছাত্ৰ-ছাত্ৰীসকললৈ ধন্যবাদ জ্ঞাপন কৰিছো।প্ৰাক্তন ছাত্ৰ-ছাত্ৰীসকলক মহাবিদ্যালয়খনৰ উত্তৰোত্তৰ উন্নতিৰ ক্ষেত্ৰত ভৱিষ্যতলৈও জড়িত হোৱাৰ তেওঁ আহ্বান জনায়।তদুপৰি আজিৰ অনুষ্ঠানৰ আঁত ধৰোতা ধ্ৰুৱজ্যোতি দাসে আগন্তুক ‘শ্বহীদ দিৱস’ মহাবিদ্যালয়খনতে ৰাজহুৱাভাবে অনুষ্ঠিত কৰাৰো প্ৰস্তাৱ আগবঢ়ায়।মহাবিদ্যালয়খনৰ প্ৰাক্তন ছাত্ৰ তথা বিশিষ্ট সাংবাদিক জিতেন্দ্ৰ কুমাৰ চৌধুৰীয়ে তেওঁৰ মনৰ অনুভৱ ব্যক্ত কৰি ‘খৰ্গেশ্বৰ তালুকদাৰক অসমীয়া জাতীয় জীৱনৰ এক সত্বা’ হিচাপে অভিহিত কৰে।তেওঁৰে সৈতে সতীৰ্থসকলে সম্পন্ন কৰা এই কামে তেওঁলোকক জীৱনজুৰি আনন্দদান কৰিব বুলিও তেওঁ মন্তব্য কৰে।অনুষ্ঠানত অসম জাতীয়তাবাদী যুৱ ছাত্ৰ পৰিষদৰ প্ৰাক্তন সহকাৰী সাধাৰণ সম্পাদক বিজন বায়নে মহাবিদ্যালয়খনৰ অধ্যক্ষ ড০ নয়নজ্যোতি দাসৰ বদান্যতাৰ শলাগ লয় আৰু অধ্যক্ষগৰাকীৰ উদ্দেশ্যে যুগুত কৰি অনা এখনি অভিনন্দন পত্ৰ পাঠ কৰাৰ পিছতে অধ্যক্ষগৰাকীৰ হাতত অৰ্পণ কৰে।অনুষ্ঠানত বিশিষ্ট ভাস্কৰ্য শিল্পী হৰেকৃষ্ণ তালুকদাৰেও তেওঁৰ নিজৰ মনৰ অনুভৱ ব্যক্ত কৰে। অনুষ্ঠানত অসম আন্দোলনৰ নিৰ্যাতিত প্ৰবীণ শৰ্মাৰ লগতে সদৌ অসম ছাত্ৰ সন্থাৰ কেন্দ্ৰীয় সমিতিৰ কাৰ্যনিবাহক সদস্য দীপক ঠাকুৰীয়া সমন্বিতে কেইবাগৰাকীকো গামোচাৰে সম্বৰ্দ্ধনা জনোৱা হয়।আজিৰ অনুষ্ঠানত কিশোৰী শিল্পী চবনমা ইয়াছমিন ৰহমানে শিল্পী গপাংক দাস আৰু চন্দন দাসৰ সহযোগত কণ্ঠ নিগৰোৱা ‘শ্বহীদ প্ৰণামো তোমাক/লুইতৰ পাৰৰে তুমি ডেকা ল’ৰা/তুমিয়েতো বুকু পাতি দিলা…’ শীৰ্ষক ভূপেন্দ্ৰ সংগীতটিত কণ্ঠ নিগৰাই অনুষ্ঠানটো আবেগমধুৰ কৰি তোলা পৰিলক্ষিত হয়।

বিশিষ্ট শিক্ষাবিদ, সাহিত্যিক, বুদ্ধিজীৱী ড° নগেন শইকীয়াৰ আজি জন্মদিন।

আছুৰ সাধাৰণ সম্পাদক শংকৰজ্যোতি বৰুৱাই সামাজিক মাধ্যমত ড° নগেন শইকীয়ালৈ শুভেচ্ছা জনোবাৰ লগতে সু-স্বাস্থ্য আৰু দীৰ্ঘায়ু কামনা কৰে।

শংকৰজ্যোতি বৰুৱাই সামাজিক মাধ্যমত লিখে – সদৌ অসম ছাত্ৰ সন্থাৰ অভিভাৱক, বিশিষ্ট শিক্ষাবিদ, সাহিত্যিক, বুদ্ধিজীৱী, অসমৰ জাতীয় জীৱনৰ পুৰোধা ব্যক্তি ড° নগেন শইকীয়া ছাৰৰ আজি ওপজা দিন ৷ ওপজা দিনৰ পৱিত্ৰ ক্ষণত আমি ছাৰলৈ জনাইছো অযুত শুভকামনা লগতে ছাৰৰ সু-স্বাস্থ্য আৰু দীৰ্ঘায়ু কামনা কৰিছোঁ৷

বিগত চাৰিটা বৰ্ষৰ দৰে এইবাৰো তেজপুৰৰ সৰবৰহী ব্যৱসায়ী, বিশিষ্ট ক্ৰীড়াবিদ প্রয়াত পৱন কুমাৰ নাথৰ ওপজা দিনটোৰ লগত সংগতি ৰাখি আয়োজন কৰা ‘যুৱ ব্যৱসায়ী বঁটা’ আৰু ‘বসুধা মিত্র’ উপাধি প্ৰদান অনুষ্ঠানত শনিবাৰে চিৰাং জিলাৰ শান্তিপুৰ শালবাৰী নিবাসী প্ৰগতিশীল যুৱ কৃষক অমৰ সিং বসুমতাৰীক আনুষ্ঠানিক ভাৱে প্ৰদান কৰা হয়।

এই বঁটাত আছে নগদ ধনৰ লগতে এখন প্ৰশস্তি পত্ৰ, আৰু উপহাৰৰ টোপোলা। উল্লেখ্য যে, ২০২০ বৰ্ষত প্রথম বাৰৰ বাবে যুৱ ব্যৱসায়ী বঁটাৰে সন্মানিত কৰা হৈছিল বিশিষ্ট ৰন্ধন বিশেষজ্ঞ তথা উদ্যোগী ব্যক্তি অতুল লহকৰক। ২০২১ বৰ্ষত এই বঁটা আগবঢ়োৱা হৈছিল পথাৰ কন্যা নৱনিতা দাসলৈ, ২০২২ বৰ্ষত আন্তঃৰাষ্ট্ৰীয় খ্যাতিসম্পন্ন প্ৰকৃতিপ্রেমী তথা উদ্যোগী মহিলা ড॰ পূৰ্ণিমা দেৱী বৰ্মনক আৰু ২০২৩ বৰ্ষত মৎস্য উদ্যোগী অনুপ কুমাৰ শৰ্মা লৈ আগবঢ়োৱা হয় এই সন্মান।

মাত্ৰ ৫৬ বছৰ বয়সতে অকালতে কায়িক ভাবে আঁতৰি যোৱা তেজপুৰৰ নিবাসী টাইকোৱাণ্ডোৰ ব্লেকবেল্ট পৱন কুমাৰ নাথৰ স্মৃতিত সৃষ্টি ইণ্টাৰনেচনেল চ’চাইটিৰ উদ্যোগত বিগত চাৰিটা বৰ্ষৰ দৰে এইবাৰো সমাজ হিতৈষী পৱন কুমাৰ নাথৰ জন্মদিনৰ লগত ৰজিতা খুৱাই প্রগতিশীল যুৱ কৃষক অমৰ সিং বসুমতাৰীক তেখেতৰ বাসগৃহতে পৱন কুমাৰ নাথৰ পৰিয়ালে ’যুৱ ব্যৱসায়ী বঁটা’ আৰু ‘ বসুধা মিত্র’ উপাধি প্রদান কৰাৰ লগতে পৱন কুমাৰ নাথৰ কৰ্মৰাজিক সামৰি https://pawankrnath.co.in ৱেবচাইটতো মুকলি কৰে।

সমৰ কলাক মনে – প্রাণে ভালপোৱা এৰাকী ক্রীড়াপ্রমী ব্যক্তি আছিল পৱন কুমাৰ নাথ। দেশৰ বিভিন্ন স্থানত অনুষ্ঠিত ‘সমৰ কলা’ প্ৰতিযোগিতাত অংশগ্ৰহণ কৰি প্রয়াত নাথে সুনাম কঢ়িয়াই আনিছিল ৰাজ্যখনলৈ । অতি ধাৰ্মিক তথা মঠ মন্দিৰ দৰ্শন কৰি ভাল পোৱা মেধাসম্পন্ন ব্যক্তিগৰাকীয়ে , ৰাজ্যখনৰ ব্যৱসায়িক জগতখনতো কম বয়সতে খোপনি পুতিছিল। স্বীকৃতি লাভ কৰিছিল জিলা প্রশাসনৰ ফালৰ পৰা । ২০১৮ বৰ্ষৰ গণৰাজ্য দিৱসৰ দিনটোত শোণিতপুৰ জিলা প্রশাসনে এইগৰাকী উদ্যোগী তথা সফল যুৱ ব্যৱসায়ীক সম্বৰ্ধনা জ্ঞাপন কৰিছিল।

সমাজখনৰ বাবে কিবা এটা কৰাৰ এবুকু হেঁপাহ লৈ বহুজনক স্ব-নিয়োজনৰ বাঁট দেখুৱাই দিয়াৰ লগতে সংস্থাপনো দিছিল পৱন কুমাৰ নাথে ।সেয়েহে সমাজ হিতৈষী পৱন কুমাৰ নাথক পুণ্য জন্মদিনক শ্ৰদ্ধাৰে সোঁৱৰণ কৰি আহিছে পৱন কুমাৰ নাথৰ পৰিয়ালৰ লগতে সৃষ্টি ইন্টাৰনেশ্বনেল চচাইটিয়ে।

এই বঁটা প্ৰদান অনুষ্ঠানত প্ৰয়াত পৱন নাথৰ সহধৰ্মিনী মিনাক্ষী চহৰীয়া নাথ, খুলশালী, জনপ্ৰিয় কন্ঠশিল্পী ড॰ মৌচুমী চহৰীয়া, তেজপুৰৰ সাংস্কৃতিক কৰ্মী তথা বঙাইগাঁও ৰিফাইনেৰী উচ্চতৰ মাধ্যমিক বিদ্যালয়ৰ বিষয় শিক্ষক বিশ্বজ্যোতি শইকীয়া, প্ৰদূষণ নিয়ন্ত্ৰণ পৰিষদৰ শোণিতপুৰ জিলাৰ কাৰ্যবাহী অভিযন্তা জয়ন্ত চহৰীয়া, মনালিছা দাসৰ লগতে স্থানীয় একাংশ ব্যক্তি উপস্থিত থাকে।