ধুবুৰী জিলাৰ শালকোচা আৰক্ষী চকীৰ দৈনিক নাকা অভিযানত কেটেলা পহু সহ দুই চোৰাং চিকাৰীক আটক হোৱা ঘটনাই তীব্ৰ চাঞ্চল্য সৃষ্টি হৈছে।উল্লেখ্য যে চিকাৰী দুজনে শালকোচাৰ ৰেনী বিলৰ পৰা দুটা কেটেলা পহু চিকাৰ কৰি এখন বেগত ভৰাই বাইকেৰে লৈ আহিছিল। পিছত শালকোচা আৰক্ষীৰ দৈনিক নাকা অভিযানত বাইক সহ দুজন চোৰাং চিকাৰী আৰু মৃত কেটেলা পহু দুটা উদ্ধাৰ কৰে। আটকাধীন চিকাৰী দুজন ক্ৰমে মনোজ মুচাহাৰী আৰু কাৰ্তিক মুচাহাৰী বুলি জানিব পৰা গৈছে।

পিছত শালকোচা আৰক্ষীয়ে মৃত কেটেলা পহু দুটা শালকোচা বন বিভাগক গতাই দিয়ে।

গোৱালপাৰা জিলাৰ লক্ষীপুৰ বনাঞ্চলৰ দাঁতিকাষৰীয়া গাওঁসমুহত অব্যাহত আছে বন্যবস্তীৰ সন্ত্ৰাস।বন্যহস্তীৰ জাকে বিভিন্ন গাঁৱত এতিয়ালৈ একাধিকবাৰ ভাঙি পেলালে কেবাটাও পৰিয়ালৰ বাসগৃহ । পৰহি নিশাওঁ লক্ষীপুৰ বনাঞ্চলিক কার্যালয়ৰ অধীনৰ মেধিপাৰা প্ৰথম খণ্ড মদকপাৰা গাঁৱত বন্যহস্তীৰ জাঁকে তাণ্ডৱ চলায়।প্ৰায় ৪০ টাকৈ বৃহত বন্যহস্তীৰ জাঁকটোৱে নিশা মেধিপাৰা গাঁৱত সোমাই আঠ টাকৈ পৰিয়ালৰ ঘৰ -বাৰী ভাঙি পেলোৱাৰ লগতে ধান চাউল খাই তহিলং কৰি পেলায়।ফলত এতিয়া সর্বহাৰা হৈ পৰিছে নিৰীহ পৰিয়ালকেইটা।সম্প্ৰতি আশ্ৰয়হীন পৰিয়ালকেইটা এমুঠি আহাৰৰ বাবে হাহাকাৰ কৰিবলগীয়া হৈছে।একপ্ৰকাৰ জীৱন আৰু সম্পত্তিৰ নিৰাপত্তাহীনতাত দিন পাৰ কৰিব লগীয়া হৈছে শংকিত গাঁৱবাসীয়ে।

ইপিনে বন্যহস্তীৰ জাঁকটোক যথাস্থানত খেদি পঠিওৱাৰ ক্ষেত্রত বন বিভাগে লোৱা নাই যথোচিত পদক্ষেপ।সর্বস্বান্ত এই পৰিয়ালকেইটাই চৰকাৰৰ ওছৰত জনাইছে সহায়ৰ বাবে আবেদন

কামৰূপ জিলাৰ হাজোৰ এজন অপহৃত ছাত্ৰৰ মৃতদেহ পুঠিমাৰী নৈৰ পাৰত উদ্ধাৰ হোৱা এক চাঞ্চল্যকৰ ঘটনাই অঞ্চলজুৰি তীব্ৰ চাঞ্চলৰ সৃষ্টি কৰিছে। অপহৰনৰ এদিন পিছত মৃতদেহ উদ্ধাৰ হোৱা ছাত্ৰ জন হৈছে হাজো আৰক্ষী থানাৰ অন্তৰ্গত একাদিৰ মগুৰ আলীৰ পুত্ৰ তথা  দক্ষিণ শিংৰা কোৱৰপুৰ আঞ্চলিক হাইস্কুলৰ নৱম শ্ৰেণীৰ ছাত্ৰ ৰফিকুল ইছলাম(১৬) আৰু অপহৰন কৰি মুক্তিপন নিদিয়াৰ বাবে নৃশংস ভাৱে হত্যাকাণ্ড সংঘটিত কৰি আৰক্ষীৰ হাতত কৰায়ত্ত হোৱা পাচ নৰপিশাচ হৈছে হাজো- একাদিৰ লাডেন ওৰফে আজিজুৰ ৰহমান (২১) আৰু চুমন ওৰফে ছফিকুল হ’ক(২২),ৰঙিয়া-কত্তাখাটৰ আচিফ আলী(২১),ৰঙিয়া- কেন্দুকোনাৰ তফিকুল ইছলাম(২১)আৰু বৰশিলৰ ৰাহুল আলী(২২)। ঘটনা সংক্ৰান্তত জানিব পৰা মতে,যোৱা ১৫ মে’ৰ সন্ধিয়া পিতৃৰ সৈতে একাদি চ’ক- বজাৰত থকা ব্যৱসায়িক প্ৰতিষ্ঠান বন্ধ কৰি নিজ গৃহলৈ যাবলৈ ওলোৱা মূহুৰ্ততে এখন চাৰিচকীয়া বাহন তেওঁৰ ওচৰত ৰয় আৰু ৰফিকুল ইছলাম নামৰ ছাত্ৰ জনক উঠাই লৈ যায়। এই ঘটনা পিতৃয়ে প্ৰত্যক্ষ কৰে যদিও কোনো বন্ধুৰ সৈতে ফুৰিবলৈ যোৱা বুলি ভাৱিছিল যদিও নিশা ঘৰলৈ উভতি আহি নোপোৱাত পৰিয়ালৰ লোক চিন্তিত হৈ পৰে।

ইয়াৰ পিছত ওচৰ-চুবুৰীয়া, ইষ্ট-কুটুমৰ ওচৰত সা-খবৰ কৰি কোনো সম্ভেদ নোপোৱাত ১৬ মে’ৰ পুৱা পৰিয়ালৰ লোকে হাজো আৰক্ষী থানাত এজাহাৰ দাখিল কৰে। তেনে সময়তে ছাত্ৰ ৰফিকুল ইছলামৰ মোবাইল ফোনৰে কোনো অচিনাক্ত দূৰ্বৃত্তই তেওঁক অপহৰন কৰাৰ কথা অৱগত কৰি মুক্তিপন দহ লাখ টকা দাবী কৰি দিনৰ বাৰ বজাত আদায় দিবলৈ কয় আৰু পিছত পুনৰ ফোন কৰি তিনি বজাৰ ভিতৰত ফোন যোগে যোগাযোগ কৰি আদায় দিবলৈ কয়। এই ঘটনাৰ পিছতে ৰফিকুল ইছলাম অপহনকাৰীৰ কবলত পৰাৰ কথা জ্ঞাত হৈ পৰিয়ালৰ লোক অধিক চিন্তিত হৈ আৰক্ষীৰ ওচৰ চাপে। ততালিকে হাজো আৰক্ষীয়ে মোবাইলৰ লোকেচন উলিয়াই পাচ অপহৰনকাৰী ক্ৰমে হাজো-একাদিৰ লাডেন ওৰফে আজিজুৰ ৰহমান, চুমন ওৰফে ছফিকুল হ’ক, ৰঙিয়া-কৰ্ত্তাখাটৰ আচিফ আলী, কেন্দুকোনাৰ তফিকুল ইছলাম আৰু বৰশিলৰ ৰাহুল আলীক কৰায়ত্ত কৰিবলৈ সক্ষম হয় আৰু পাচ অপহৰনকাৰীৰ স্বীকাৰোক্তিৰ ভিত্তিত কমলপুৰৰ পুঠিমাৰী নৈৰ পাৰত অপহৃত ৰফিকুল ইছলামৰ মৃতদেহ উদ্ধাৰ কৰে। এই ঘটনা সদৰী হোৱাৰ পিছত মৃত ৰফিকুল ইছলামৰ পৰিয়ালত এক শোকাকুল পৰিবেশে সৃষ্টি কৰে। ইপিনে এই ঘটনা পোহৰলৈ অহাৰ লগে লগে একাদিৰ প্ৰায় ডেৰ শতাধিক স্থানীয় লোকে হাতে হাতে প্লেকাৰ্ড লৈ ৰফিকুল ইছলামৰ হত্যাকাৰীৰ ফাচীৰ দাবীত হাজো আৰক্ষী থানাৰ সমীপত এক উত্তাল পৰিবেশ সৃষ্টি কৰে আৰু ছব্বিশ ঘন্টাৰ ভিতৰত দোষীক কৰায়ত্ত কৰাত আৰক্ষীৰ শলাগ লয়।

মৰিগাও জিলাৰ মায়ং ৰাজহ চক্ৰৰ অন্তৰ্গত বিভিন্ন খেতি পথাৰ বানৰ কবলত।আজি কেইবাদিন ধৰি নেৰা নেপেৰা বৰষুনৰ ফলত বৃদ্ধি হোৱা ব্ৰহ্মপুত্ৰ আৰু কপিলি নৈয়ৰ বাৰনী পানীয়ে ঠায়ে ঠায়ে খেতি পথাৰ বুৱাই পেলাইছে । বিশেষকৈ মায়ং পুখৰীয়া আৰু ঘগুৱা মৌজাৰ অন্তৰ্গত বহু খেতি পথাৰ বানৰ কবলত। কৃষক ৰাইজে শস্য সমূহৰ পৰা অধিক লাবাম্বীত হোৱাৰ আশাত খেতি কৰিছিল। কিন্তু খেতি সমূহ চপোৱাৰ সময়তে বাঢ়নী পানীয়ে বিস্তাৰ খতি সাধন কৰিছে ।যাৰ ফলত কৃষকৰ আশাত চেচা পানী পৰা পৰিলক্ষিত হৈছে। আৰু কোনোমতে কৃষক সকলে তৌলোংগা নাওৰে পানীৰ পৰা বড়োধান আৰু মাকৈ সমূহ উঠাবলৈ চেষ্টা কৰিছে যদিও বহুত লোকচানৰ সন্মুখীন হৈছে।

আনহাতে মায়ঙৰ বিভিন্ন গাঁও ক্ৰমে , বৰকুৰাণী, গাগলমাৰী, আশিগড়, বৰবড়ী , খাটবড়ী, কৰতিপাম , গৰমাৰী , ঝাৰগাঁও আদি অন্যান্য অঞ্চলৰ বিভিন্ন খেতিৰ শস্যৰ বিস্তাৰ ক্ষতি সাধন হৈছে বুলি কৃষক সকলে মত পোষণ কৰে ।