কোকৰাঝাৰ জিলাৰ ঐতিহ্যমণ্ডিত দেৱৰগাঁও উচ্চতৰ মাধ্যমিক বিদ্যালয়ত মধ্যাহ্ন ভোজনৰ চাউল পুতি থোৱা কেন্দ্ৰক কৰি বিদ্যালয়খনত আজি উত্তপ্ত পৰিৱেশৰ সৃষ্টি হয় । ছাত্ৰ-ছাত্ৰীক মধ্যাহ্ন ভোজনৰ পৰা বঞ্চনা কৰি মধ্যাহ্ন ভোজনৰ চাউল নিশা গোপনে বিদ্যালয় প্ৰাংগনত পুতি থোৱাক কেন্দ্ৰ কৰি একাংশ অভিভাৱক ক্ষুব্ধ হৈ পৰিছে । ছাত্ৰ ছাত্ৰীৰ পেটৰ ভাত কাঢ়ি নি চাউল পুতি থোৱা দেৱৰগাঁও উচ্চতৰ মাধ্যমিক বিদ্যালয়ৰ অধ্যক্ষ হৰিশ চন্দ্ৰ ছেত্ৰীৰ বিৰুদ্ধে ব্যৱস্থা গ্ৰহণৰ দাবী উত্থাপন কৰিছে একাংশ অভিভাৱকে । উল্লেখ্য যে বিদ্যালয় চৌহদত দূৰ্গোন্ধ বিয়পি পৰাত আৰু বিদ্যালয় পৰিচালনা সমিতিৰ সন্মতিত বিদ্যালয়ৰ অধ্যক্ষই নিশা হাজিৰা লগাই মধ্যাহ্ন ভোজনৰ ১৭ কুইণ্টলকৈ চাউল পুতি থোৱা বিষয়ে গম পাই আজি একাংশ অভিভাৱকে সাংবাদিকক অৱগত কৰে আৰু মাটি খান্দি পচি যোৱা চাউল বাহিৰ কৰে । অভিভাৱকসকলে ক্ষুব্ধ হৈ সংবাদমাধ্যমৰ আগত কয় যে বিদ্যালয়খনৰ অধ্যক্ষই ছাত্ৰ ছাত্ৰীক নিয়মিতভাৱে মধ্যাহ্ন ভোজন পৰিৱেশন নকৰে । ৩৩২ জন ছাত্ৰ ছাত্ৰী থকা আৰু ছজনকৈ ৰান্ধনী আৰু সহায়িকা থকা বিদ্যালয়খনত এনেদৰে মধ্যাহ্ন ভোজনৰ চাউল পুতি থোৱাক কেন্দ্ৰ কৰি প্ৰতিক্ৰিয়াৰ সৃষ্টি হৈছে । ইপিনে বিদ্যালয়খনৰ অধ্যক্ষ হৰিশ চন্দ্ৰ ছেত্ৰীৱে কয় যে খোৱাৰ বাবে অনুপযোগী হোৱা চাউলখিনি বিদ্যালয় পৰিচালনা সমিতিৰ প্ৰস্তাৱ আৰু সিদ্ধান্তমৰ্মে চাউলখিনি পুতি থোৱা হৈছিল বুলি মন্তব্য কৰে । উক্ত চাউলখিনি ২০১৯ চনৰ আছিল বুলি মন্তব্য কৰি অধ্যক্ষই গুদামঘৰৰ আন্ত:গাঁথনি সন্দৰ্ভতো তীব্ৰ অসন্তুষ্টি প্ৰকাশ কৰে । বিভাগীয়ভাৱে নিৰ্মান কৰা গুদালঘৰৰ আন্তগাঁথনি মুঠেই সন্তোষজনক নহয় আৰু পানী নিগৰি আহি চাউল নষ্ট হয় বুলি মন্তব্য কৰি চাউলৰ গুদামঘৰত নিগনিৰ উপদ্ৰৱৰ বাবে চাউল নষ্ট হোৱা বুলি মন্তব্য কৰি অধ্যক্ষই বেয়া হোৱা চাউলখিনি ছাত্ৰ -ছাত্ৰীক খুৱাই ছাত্ৰ ছাত্ৰীক মাৰি পেলাব নোৱাৰে বুলি মন্তব্য কৰিছে । তদুপৰি ৰান্ধনি আৰু সহায়িকা কেতিয়াবা নাহে  যাৰ পৰিণতিতে চাউল ৰাহী হৈ নষ্ট হয় বুলি মন্তব্যৰে ৰান্ধনি – সহায়িকাৰ ওপৰত অধ্যক্ষৰ নিয়ন্ত্ৰণ নাথাকে আৰু ৰান্ধনি নাহিলে অধ্যক্ষই ৰান্ধি খুয়াব নেকি বুলি প্ৰশ্নও উত্থাপন কৰে অধ্যক্ষই । ইপিনে বিটিচৰ শিক্ষা বিভাগৰ সঞ্চালক জেপি ব্ৰহ্মই ঐতিহ্যমণ্ডিত দেৱৰগাঁও উচ্চতৰ মাধ্যমিক বিদ্যালয়ত মধ্যাহ্ন ভোজনৰ চাউল পুতি থোৱা ঘটনাৰ তদন্ত কৰা হব বুলি মন্তব্য কৰি ইতিমধ্যে কাৰণ দৰ্শোৱাৰ জাননি জাৰি কৰা হৈছে বুলি মন্তব্য প্ৰকাশ কৰিছে ।

-ডিগবৈ বন সংমণ্ডলৰ অধীনৰ লেখাপানী আঞ্চলিক বন বিভাগে আজি এক গোপন সূত্ৰৰ ভিত্তিত তদন্ত চলাই বালিজান সংৰক্ষিত বনাঞ্চলৰ পৰা প্ৰায় ৩০ চি এফটি চোৰাং কাঠ আৰু এটা অত্যাধুনিক চেইন-স্ব জব্দ কৰিবলৈ সক্ষম হয়। অবৈধ ভাৱে কাটি মজুদ কৰি ৰখা কাঠখিনিৰ গৰাকীক অৱশ্যে বন বিভাগে আটক কৰিবলৈ সক্ষম নহল।তিনিদিন নেৰানেপেৰা তদন্তৰ অন্তত কাঠখিনি জব্দ কৰিবলৈ সক্ষম হৈছে বন বিভাগ।ডিগবৈ বন সংমণ্ডলৰ অধীনৰ বিশেষকৈ লেখাপানী আৰু জাগুন সংৰক্ষিত বনাঞ্চলত একাংশ বন দস্যুৱে জধে মধে মূল্যবান গছ সমূহ এফালৰ পৰা কাটি তহিলং কৰি আহিছে।এই ক্ষেত্ৰত লেখাপানী আৰু জাগুন আঞ্চলিক বন বিভাগে দিন ৰাতি একাকাৰ কৰি দায়িত্ব পালন কৰি আহিছে যদিও বন দস্যুক বন বিভাগৰ গতি বিধিৰ খবৰ যোগান ধৰা দালাল কেইজনমানৰ বাবেই আজি পৰ্যন্ত বন দস্যু কেইটা আটক কৰিব পৰা নাই বন বিভাগে।এই ক্ষেত্ৰত বনাঞ্চল সমূহ ৰক্ষা কৰাৰ স্বাৰ্থত অসম চৰকাৰ তথা বিভাগীয় মন্ত্ৰী জনে কিছু অত্যাধুনিক প্ৰযুক্তিৰ ব্যৱস্থা কৰাৰো প্ৰয়োজনীয়তা আছে। যদি এনেধৰণেই বন বিভাগৰ বিষয়া কৰ্মচাৰীয়ে দায়িত্ব পালন কৰিব লগীয়া হয় তেন্তে কোনো কাৰণতে নিমিত্ত মাত্র কেইজনমান বিষয়া কৰ্মচাৰীৰে এক বৃহত্তৰ মাটিকালিৰে পৰিবেষ্টিত বনাঞ্চল ৰক্ষা কৰাটো অসম্ভৱ হিচাপে এদিন প্ৰমাণিত হোৱাটো নিশ্চিত।

 অসমত গো-সুৰক্ষা আইনেও নাকী লগাব পৰা নাই অবৈধ গৰু সৰবৰাহত। দৈনিক আৰক্ষীৰ চকুৰ আগেদিয়ে অবৈধভাৱে সৰবৰাহ হৈ গৰু। চৰকাৰৰ কঠোৰ আইনৰ পিছতোঅপৰাধীয়ে বুঢ়া আঙুলি দেখুৱাই ৰাজ্যত অব্যাহত ৰাখিছে গো-ধনৰ অবৈধ সৰবৰাহ। উজনিৰ বিভিন্ন স্থানৰ পৰা সাতত্ৰিশ নম্বৰ ৰাষ্ট্ৰীয় পথেৰে এতিয়াও চলি আছে গো-ধনৰ অবৈধ সৰবৰাহ। দেওবাৰে জখলাবন্ধা আৰক্ষী নিৱেশৰ অধীনৰ বাগৰি আৰক্ষী চকীয়ে অবৈধভাৱে সৰবৰাহ কৰা গাড়ীসহ গৰু জব্দ কৰাৰ কৰাৰ লগতে অবৈধ সৰবৰাহত জড়িত ৭ জনকৈ লোকক আটক কৰিবলৈ সক্ষম হয়। এ. এচ. ০২ চি. চি. ৬৩৩৬, এ. এচ. ০২ চি. চি. ১১৬৫, এ. এচ. ০২ বি. ৩৯০৫ আৰু এ. এচ. ০২ বি. চি. ৩৯১৫ নম্বৰৰ গাড়ীকেইখনে উজনিৰ পৰা চামগুৰিৰ বিভিন্ন অঞ্চললৈ উপযুক্ত নথি-পত্ৰ অবিহনে সৰবৰাহ কৰোতে বাগৰিত জখলাবন্ধা আৰু বাগৰি আৰক্ষীৰ জালত পৰে ৩৬ টা গৰুসহ গাড়ীকেইখন। অবৈধ সৰবাহৰ লগত জড়িত চামগুৰি আৰক্ষী নিৱেশ এলেকাৰ কনুৱামাৰীৰ জাকাৰিয়া হুছেইন, বৰমাবিলৰ জান্নাতুল হ’ক, ইব্ৰাহিম আলি, নুৰ মহম্মদ, জমিৰ হুছেইন, বাহাৰুল ইচলাম আৰু বৰমাৰ খলিলুৰ ৰহমান বুলি চিনাক্ত কৰা হৈছে। মাজে-মাজে আৰক্ষীৰ সক্ৰিয়তাত এনে অপৰাধী কৰায়ত্ব হোৱা দেখা যায় যদিও দৈনিক গৰু সৰবৰাহৰ বিৰুদ্ধে চৰকাৰী আইনে কাৰ্য‍্যকৰী ভূমিকা ল’ব পৰা নাই।

 অসমৰ কৃষকৰ পৰা কেন্দ্ৰীয় চৰকাৰে  সময়মতে  ধান সংগ্ৰহ কৰাৰ লগতে ইয়াত থকা ভাৰতীয় খাদ্য নিগমৰ ( এফ চি আই ) ভঁৰালত খাদ্য মজুতকৰণৰ ক্ষমতা বৃদ্ধি কৰিব । এই ঘোষণা কৰিছে  কেন্দ্ৰীয় খাদ্য আৰু  অসামৰিক যোগান , বন আৰু পৰিবেশ মন্ত্ৰণালয়ৰ ৰাজ্যিক মন্ত্ৰী অশ্বিনী কুমাৰ চৌবেৰ । ১৯ নৱেম্বৰত মুখ্যমন্ত্ৰী ডঃ হিমন্ত বিশ্ব শৰ্মাক   তেওঁৰ দিছপুৰস্থিত চৰকাৰী বাসগৃহত সাক্ষাৎ কৰি এই ঘোষণা কৰিছে কেন্দ্ৰীয় মন্ত্ৰী অশ্বিনী কুমাৰ চৌবেই । কেন্দ্ৰীয় মন্ত্ৰী চৌবেই মুখ্যমন্ত্ৰী ডঃ শৰ্মাক সাক্ষাৎ কালত কয় কেন্দ্ৰীয় চৰকাৰে অসমৰ কৃষক সকলৰ উন্নয়নৰ  লগতে তেওঁলোকৰ আয় বৃদ্ধি কৰাৰ কাৰণে দৃঢ়প্ৰতিজ্ঞ । এই উদ্দেশ্য আগত ৰাখিয়ে কেন্দ্ৰীয় চৰকাৰে  কৃষকৰ ধান সংগ্ৰহ কৰাৰ লগতে এফ চি আইৰ ভঁৰালত মজুতকৰণৰ ক্ষমতা বৃদ্ধিৰ সিদ্ধান্ত গ্ৰহণ কৰিছে । ইতিমধ্যে এই প্ৰক্ৰিয়া আৰম্ভ হোৱা বুলিও কেন্দ্ৰীয় মন্ত্ৰী চৌবেই  মুখ্যমন্ত্ৰী ডঃ শৰ্মাক অৱগত কৰে । আনহাতে মুখ্যমন্ত্ৰী ডঃ শৰ্মায়ো এই ক্ষেত্রত ৰাজ্য চৰকাৰৰ ফালৰ পৰা কেন্দ্ৰক সকলো ধৰণৰ সহায় – সহযোগিতা আগবঢ়াব বুলি ব্যক্ত কৰে । উল্লেখযোগ্য যে ইয়াৰ পূৰ্বে সিদিনা কেন্দ্ৰীয় মন্ত্ৰী গৰাকীয়ে অসম চৰকাৰৰ খাদ্য আৰু অসামৰিক মন্ত্ৰী ৰঞ্জিত কুমাৰ দাসৰ সৈতে গুৱাহাটীৰ কাষৰীয়া চাংসাৰী ৰেল ষ্টেচনৰ সমীপত থকা এফ চি আইৰ ভঁৰাল পৰিদৰ্শন কৰি মজুতকৰণৰ ক্ষমতা বৃদ্ধি কৰাৰ বাবে বিষয়া সকলক নিৰ্দেশ দিয়ে ।

ধুবুৰী ফলিমাৰী গাওঁ পঞ্চায়তৰ অন্তৰ্গত কুন্তীৰ চৰত দীৰ্ঘ দিন ধৰি পাৰঘাটৰ জমৰ যাতনাত ভুগিব লগা হৈছে স্থানীয় ৰাইজ।
ধুবুৰীৰ পৰা মাত্ৰ চাৰিশ মিটাৰ দূৰত্বত কুন্তিৰ চৰ গাওঁ, কিন্তু ভাৰত স্বাধীন হোৱাৰ পাছৰে পৰা এই খন গাওঁৰ মানুহে এনেদৰে যাতায়ত কৰিব লগা হৈছে। খৰালীৰ সময়ত এই খন বাঁহৰ দলংৰে প্ৰায় চাৰিটা গাঁওৰ মানুহে অহা যোৱা কৰে আৰু বাৰিষাৰ সময়ত বহুতো দুখ কষ্টৰে টুলুংঙা নাওঁৰে পৰ হ’ব লগা হয় আৰু পূৰ্বতে বহুতো দূৰ্ঘটনা। সংগঠিত হৈছিল। কিন্তু নিৰ্বাচন অহাৰ লগে লগে প্ৰতিটো ৰাজনৈতিক দলৰ ৰথী মহাৰথী সকলে এই খন দলং নিৰ্মাণ কৰাৰ প্ৰতিশ্ৰুতি দিয়ে, কিন্তু নিৰ্বাচনী শেষ হোৱাৰ লগে লগে সকলো প্ৰতিশ্ৰুতি পাহৰি যায়। ধুবুৰীৰ সাংসদ মৌলানা বদৰুদ্দিন আজমল আৰু স্থানীয় বিধায়ক নজৰুল হকে কেইবা বাৰো এই খন দলং নিৰ্মাণ কৰি দিয়াৰ প্ৰতিশ্ৰুতি দিছিল, কিন্তু আজি লৈকে দলং নিৰ্মাণ নহ’ল। সেয়ে স্থানীয় ৰাইজে অসম চৰকাৰক এই খন দলং নিৰ্মাণ কৰি দিয়াৰ বাবে বিনম্র অনুৰোধ জনায়।

তেলৰ অভাৱত ধুবুৰীত বন্ধ হ’ল ৰপেক্স আৰু MV  প্ৰতিমা নামৰ দুখন  জাহাজ। , জাহাজ বন্ধ হোৱাৰ ফলত পূৰ্ণ সুযোগ গ্ৰহণ কৰিছে লেছিয়ে । ব্ৰহ্মপুত্ৰৰ বুকুত ভয়ংকৰ নাও চলাচল অব্যাহত । নদী পথত প্ৰায় চাৰি শতাধিক যাত্ৰীলৈ বিকল । কথামপি প্ৰান ৰক্ষা পৰিল চাৰি শতাধিক যাত্ৰীৰ । তিনি ঘন্টাৰ মূৰত ভয় সংকাৰ মাজেৰে ধুবুৰীৰ পাৰঘাটত উপস্থিত যন্ত্ৰচালিত নাও । ধুবুৰীৰ বাবে যোগান ধৰা দুখন কৈ জাহাজ বন্ধ হৈ পৰাৰ ফলত যাত্ৰী সকলৰ মাজত এক হাহাকাৰ সৃষ্টি হৈছে । ইয়াৰ ওপৰিও যাত্ৰী সকলৰ অভিযোগ অনুসৰি তেলৰ অভাৱত আৰু ষড়যন্ত্ৰ কৰি বন্ধ কৰি দিয়াৰ অভিযোগ উত্থাপন কৰিছে যাত্ৰী সকলে, যাৰ বাবে যাত্ৰী সকলৰ যাতায়তৰ সুবিধাৰ প্ৰতি লক্ষ্য ৰাখি পুনৰ ধুবুৰী জিলা উপায়ুক্তৰ লগতে অসম চৰকাৰক উক্ত জাহাজ দুখন ব্ৰহ্মপুত্ৰ নদী পথত  চলাচল কৰাৰ বাবে দাবী জনায় যাত্ৰী সকল।