গুৱাহাটীৰ পশ্চিম প্ৰান্তৰ আজাৰা কাঁহিকুছিস্থিত ৰাজ্যিক পঞ্চায়ত আৰু গ্ৰামোন্নয়ন প্ৰতিষ্ঠানৰ ( এছ আই পি আৰ ডি )  অধীনৰ সম্প্ৰসাৰণ প্ৰশিক্ষণ কেন্দ্ৰত ( ই টি চি ) উদ্যোগ আৰু বাণিজ্য বিভাগৰ উদ্যোগত ২৪ ছেপ্টেম্বৰৰ পৰা আৰম্ভ হৈছে  ২৫ দিনীয়া এক  দক্ষতা বিকাশৰ প্ৰশিক্ষণ কাৰ্যসূচী । প্ৰশিক্ষণ কাৰ্যসূচীত , চৰাইদেউ  আৰু  শিৱসাগৰ জিলাৰ ২৫ জনী নিৰ্বাচিত  যুৱতী –  মহিলাই ভাগ লৈছে । কাৰ্যসূচীত ভাগ লোৱা মহিলা সকলক হস্ততাঁত , সূতা ৰং কৰা পদ্ধতি , সাজ পোচাক তৈয়াৰ কৰা , বেগ বনোৱা আদিৰ প্ৰশিক্ষণ দিয়া হৈছে ।  প্ৰশিক্ষণ কাৰ্যসূচীৰ ১৮ অক্টোবৰত সামৰণি পৰিব ।  । আনহাতে চৰাইদেউ  জিলাৰ সোণাৰী সমষ্টিৰ বিধায়ক ধৰ্মেশ্বৰ কোঁৱৰে  ৫ অক্টোবৰত এছ আই পি আৰ ডি চৌহদলৈ আহি  মহিলা সকলৰ প্ৰশিক্ষণ কাৰ্যৰ বুজ লয় । বিধায়ক কোঁৱৰক সংগ দিয়ে  উদ্যোগ আৰু বাণিজ্য বিভাগৰ উপ সঞ্চালক মঞ্জুৰাণী গগৈ , এছ আই পি আৰ ডিৰ  অধীনৰ ই টি চিৰ অধ্যক্ষ  লালৰেম চিয়ামী , উপ সঞ্চালক অনুপম দত্ত আৰু নৱজ্যোতি কোঁৱৰ , ফেকাল্টি সদস্যত্ৰয় ডঃ ৰিদীপ বৰা , মনোৰঞ্জন চৌধুৰী আৰু গীতাশ্ৰী দাস , প্ৰশিক্ষণৰ  তত্বাৱধায়কদ্বয় আৰু ই টি চিৰ গাণনিক হেমেন বৈশ্য আৰু মনজিৎ পাঠকে । আনহাতে বিধায়ক কোঁৱৰে প্ৰশিক্ষণত  ভাগ লোৱা মহিলা সকলৰ সৈতেও মত বিনিময় কৰাৰ লগতে তেওঁলোকে প্ৰশিক্ষণত লাভ কৰা অভিজ্ঞতাৰে আগন্তক দিনত যাতে আত্মনিৰ্ভৰশীল হব পাৰে তাৰ কামনা কৰে ।

বিহালী আঞ্চলিক পঞ্চায়ত উন্নয়ন পুঁজি আঁচনিৰ অধীনত নিৰ্মাণ হোৱা বিহালী খণ্ড উন্নয়নৰ  নৱনিৰ্মিত  ভৱনটি বুধবাৰে বিহালী সমষ্টিৰ বিধায়ক ৰঞ্জিত দত্তই শুভ উদ্বোধন কৰে।উদ্বোধন সময়ত  উপস্থিত থাকে   খণ্ড উন্নয়ন বিষয়া দেৱাশীষ গোস্বামী,আঞ্চলিক পঞ্চায়তৰ সভানেত্ৰী গীতা দাস  বিহালী খণ্ড উন্নয়ন কাৰ্য্যালয়ৰ সহকাৰী কাৰ্যবাহী অভিযন্তা ভূপেন বৰুৱা, অভিযন্তা কুশল বৰা লগতে  বিষয়া কৰ্মচাৰী,আঞ্চলিক পঞ্চায়তৰ সদস্য,সদস্যাসকল প্ৰমুখ্যে বশিষ্ট ব্যক্তি সকল । ইফালে বিধায়ক গৰাকীয়ে উদ্বোধন কৰি ক খণ্ড উন্নয়ন কাৰ্যালয়টোৰ নিৰ্মাণে উন্নয়নমূলক কাম কাজত অধিক গতিশীলতা আনিব লগতে ৰাইজো যথেষ্ঠ উপকৃত হ’ব বুলি আশা প্ৰকাশ কৰে।লগতে বিধায়ক গৰাকীয়ে উন্নয়ন খণ্ডৰ চৌহদত লখিমী আত্ম সহায়ক গোট,শুকানসূঁতি ৰ দ্বাৰা আৰম্ভ কৰা “খাদ্য বিপনী” খনৰো শুভ উদ্বোধন কৰে। 

চৰাইদেউৰ সাপেখাতীত সংঘটিত হ’ল এক জঘণ্য কাণ্ড ৷ পাষান পিতৃৰ কামনাৰ বলি হ’ল এগৰাকী ১৪ বছৰীয়া কিশোৰী ৷ অসম অৰুণাচল সীমান্তৱৰ্তী চৰাইপুঙ আৰক্ষী থানা এলেকাৰ নগাহাট ডাবলু হাবি গাওঁত সংঘটিত হৈছে এই জঘণ্য কাণ্ড । পাষাণ পিতৃ চিমন ধনি (৫৮) য়ে নিজা তোলনীয়া কন্যাৰ ওপৰত চলাইছিল নিৰ্যাতন ৷ ঘৰত কোনো নথকাৰ মুহুততেই পাষান পিতৃয়ে কন্যাৰ ওপৰত চলাই আহিছিল নিৰ্যাতন ৷ কিশোৰী গৰাকী স্বাস্থ্যৰ কিছু অৱনতি ঘটাত মাতৃয়ে ১ অক্টোবৰত সাপেখাতীত স্বাস্থ্য পৰীক্ষা কৰাত চিকিৎসকে কিশোৰী গৰাকী ৭ মাহৰ অন্তসত্বা বুলি জানিব দিয়াত সমগ্ৰ ঘটনাটো পোহৰলৈ আহে ৷ উক্ত দিন ধৰি সম্প্ৰতি পলাতক হৈ আছে পাষান পিতৃ গৰাকী । কিশোৰীগৰাকীৰ ন্যায় বিচাৰি পত্নীয়ে কাষ চাপিব আৰক্ষীৰ ৷

গুৱাহাটীৰ সাহিত্যানুষ্ঠান “সাহিত্য চৰ্চা কেন্দ্ৰ, অসমে  প্ৰতি বছৰে একোজন প্ৰতিভাবান যুৱ লেখকক সাহিত্য চৰ্চাৰ ক্ষেত্ৰত উদগণি যোগোৱাৰ বাবে “সাহিত্য বঁটা” প্ৰদান কৰি আহিছে ৷  সেই অনুসৰি সাহিত্য চৰ্চা কেন্দ্ৰ, অসমে বিগত ২০১৯ বৰ্ষৰ বাবে এই বঁটা প্ৰতিভাবান লেখক নীলোৎপল বৰুৱালৈ আগবঢ়োৱাৰ কথা ঘোষণা কৰা হৈছে। কৰোনা মহামাৰীজনিত কাৰণত বঁটা প্ৰদান অনুষ্ঠানটো যথা সময়ত অনুষ্ঠিত নোহোৱাত এইবাৰ ১১ অক্টোবৰৰ দিনা আজাৰাত অনুষ্ঠিত হ’বলগীয়া “শৰতৰ দুপৰীয়া” অনুষ্ঠানত বঁটাটি আনুষ্ঠানিকভাৱে নীলোৎপল বৰুৱাক প্ৰদান কৰা হ’ব। উল্লেখযোগ্য যে নীলোৎপল বৰুৱাক বাদুংদুপ্পা কলা কেন্দ্ৰৰ প্ৰতিষ্ঠাপক আণ্ডাৰ দ্যা শাল ট্ৰিৰ বাবে বিখ্যাত প্ৰয়াত শুক্ৰাচাৰ্য ৰাভাৰ জীৱন ভিত্তিক উপন্যাস “শুক্ৰাচাৰ্য ৰাভাঃ যাত্ৰা আৰু মাত্ৰাৰ” বাবে সাহিত্য চৰ্চা কেন্দ্ৰই এই বঁটাৰ বাবে মনোনীত কৰে। নীলোৎপল বৰুৱাৰ এই উপন্যাসখন ইতিমধ্যে ইংৰাজী ভাষালৈও অনূদিত হৈছে। যুৱ লেখক সাহিত্যিক নীলোৎপল বৰুৱাৰ প্ৰতিভাৰ স্বীকৃতি স্বৰূপে তেওঁলৈ এই বঁটাটি প্ৰদানৰ কথা ঘোষণা কৰি সাহিত্য চৰ্চা কেন্দ্ৰৰ যুটীয়া সম্পাদক ড০ ভৱেশ দাস আৰু ড০ পৰিতোষ চক্ৰৱৰ্তীয়ে জনায় যে একেটা অনুষ্ঠানতে সাহিত্য অকাডেমীৰ অনুবাদ বঁটা বিজয়ী দিগন্ত বিশ্ব শৰ্মা আৰু কামেশ্বৰ ব্ৰহ্মকো সম্বৰ্ধনা জনোৱা হ’ব।উল্লেখযোগ্য যে শুক্ৰাচাৰ্য ৰাভা: যাত্ৰা আৰু মাত্ৰা শীৰ্ষক গ্ৰন্থখনৰ বাবে অসম সাহিত্য সভাই নীলোৎপল বৰুৱাক কলাগুৰু বিষ্ণুপ্ৰসাদ ৰাভা বঁটা ২০২০ প্ৰদান কৰিছিল।শুক্ৰাচাৰ্য ৰাভা, যাত্ৰা আৰু মাত্ৰা গ্ৰন্থখন ইতিমধ্যে ইংৰাজী ভাষালৈ -Sal Soul Sukracharjya নামৰে অনূদিত হৈছে। অসমীয়া নাটকৰ নতুন সম্পৰীক্ষা, প্ৰয়াত শুক্ৰাচাৰ্য ৰাভাৰ ফিজিকেল থিয়েটাৰ শৈলীক লৈ এক নতুন ধাৰাৰ বিষয়ে লিখা গ্ৰন্থখন দেশ বিদেশৰ সমালোচকৰ দ্বাৰা চৰ্চিত হৈছে।

ভ্ৰাম্যমাণ থিয়েটাৰৰ এসময়ৰ প্ৰখ্যাত অভিনেতা, গীতিকাৰ, সুৰকাৰ, সংগীত শিল্পী তথা গোকুল পাঠকৰ বৈঠকীৰ সংগী বিজনী নিবাসী হৰেন দাসলৈ আগবঢ়োৱা হৈছে ২০২১বৰ্ষৰ “লোকসংগীত শিৰোমণি গোকুল পাঠক বঁটা”। এই কথা জানিবলৈ দিছে গোকুল পাঠক স্মৃতি সুৰক্ষা সমিতিৰ প্ৰচাৰ সম্পাদক কমলেশ বৈশ্যই ৷ ১৪ অক্টোবৰত পালন কৰা হ’ব বৰপেটাৰ মহীৰূহ শ্ৰীশ্ৰীমথুৰা দাস বুঢ়াআতা বঁটাপ্ৰাপক, বিষ্ণুৰাভা বঁটা প্ৰাপক , বৰপেটা সত্ৰৰ ইতিহাস প্ৰণেতা লোকসংগীত শিৰোমণি শিল্পী সাহিত্যিক গোকুল পাঠকৰ জন্মদিন ৷ উক্ত দিনাই বৰপেটা সাহিত্য সভা ভৱনত অনুষ্ঠিত হ’বলগীয়া এটা  অনুষ্ঠানত ভ্ৰাম্যমাণ থিয়েটাৰৰ শিল্পী হৰেন দাসক এই বঁটা আনুষ্ঠানিকভাৱে প্ৰদান কৰা হ’ব বুলি তেওঁ জানিবলৈ দিয়ে ৷  উল্লেখ্য যে ২০১৩ বৰ্ষৰপৰা আৰম্ভ কৰা লোকসংগীত শিৰোমণি শ্ৰীগোকুল পাঠক বঁটা প্ৰতিবছৰে অসমৰ সাহিত্য, কলা সংস্কৃতিৰ আজীৱন সেৱক- সেৱিকালৈ প্ৰদান কৰাৰ ব্যৱস্থা হৈছে।২০১৩ বৰ্ষত প্ৰথমবাৰৰ বাবে এই বঁটা প্ৰদান কৰা হয় লোকশিল্পী তপন চন্দ্ৰ ভৰালীক।২০১৪ বৰ্ষত এই বঁটা প্ৰদান কৰা হয় কামৰূপী লোকগীত ৰেডিঅ’ আৰু মঞ্চৰ মাধ্যমেৰে জনপ্ৰিয় কৰি তোলা সুপ্ৰসিদ্ধ গায়ক ডিম্বেশ্বৰ দাস, ২০১৫ বৰ্ষত সত্ৰীয়া সংস্কৃতিৰ একান্ত সেৱক জগন্নাথ বায়ন, ২০১৬ বৰ্ষত অসমৰ বিশিষ্ট সংগীত শিল্পী সুদক্ষিণা শৰ্মা,২০১৭ বৰ্ষৰ বাবে অসমৰ বিশিষ্ট সংগীত শিল্পী অসম জীয়াৰী স্বনামধন্য অৰ্চনা মহন্ত, ২০১৮ বৰ্ষৰ বাবে কামৰূপী লোকসংগীতৰ শিল্পী স্নেহলতা, ২০১৯ বৰ্ষত বিশিষ্ট গীতিকাৰ সুধীৰ দাস,২০২০ বৰ্ষত কামৰূপী লোকসংগীতৰ বিশিষ্ট শিল্পী ধনদা পাঠক আৰু এইবছৰ ভ্ৰাম্যমাণ থিয়েটাৰৰ এসময়ৰ প্ৰখ্যাত শিল্পী গোকুল পাঠকৰ সংগী হৰেন দাসক এই বঁটাৰ বাবে নিৰ্বাচন কৰা হয়। ১৪ অক্টোবৰত শিল্পী , সাহিত্যিক গোকুল পাঠকৰ ৯৬ সংখ্যক জন্মদিন বিশেষ দিন হিচাপে উদযাপন কৰাৰ বাবে ইতিমধ্যেই প্ৰস্তুতি আৰম্ভ কৰিছে গোকুল পাঠক স্মৃতি সুৰক্ষা সমিতিয়ে। স্মৃতি সুৰক্ষা সমিতিৰ সহকাৰী সম্পাদক নাৰায়ণ পাঠকে সকলোৰে সহায় সহযোগিতা তথা উপস্থিতি কামনা কৰিছে।

ভাৰতবৰ্ষৰ প্ৰধানমন্ত্ৰী নৰেন্দ্ৰ মোডীৰ ৭১ তম জন্ম জয়ন্তীৰ পালন কৰাৰ পিছত ইয়াৰ লগত সংগতি ৰাখি ভাৰতীয় জনতা পাৰ্টীয়ে ২‍১ দিনীয়াকৈ এক সেৱা আৰু সমৰ্পণৰ কায্যসূচী হাতত লৈছে। এইকাৰ্যসূচীৰ অংশ হিচাপে কালি বিজেপিৰ ৰাজ্যিক সংখ্যালঘু মৰ্চাৰ এটি সঁজাতী দলে কামৰূপ জিলাৰ বকো সমষ্টিৰ নগৰবেৰা, কালুবাৰী, পথালিপাৰা, বৰুৱা-বালিঝাৰ আদি বিভিন্ন ঠাইত একাংশ বিশেষভাৱে সক্ষম লোকৰ মাজত হুইল চেয়াৰ, ট্ৰাই চাইকেল, শ্ৰৱন সহায়ক,  চকুৰ যন্ত্ৰ আদি বিভিন্ন সামগ্ৰী বিতৰণ কৰে। সঁজাতী দলটোৱে প্ৰধান নৰেন্দ্ৰ মোডীৰ জন্ম দিন উপলক্ষে তেওঁৰ সুস্বাস্থ্য আৰু দীৰ্ঘায়ু কামনা কৰি সেৱাৰ মনোভাৱেৰে দৰিদ্ৰ, নিৰীহ, নিপীড়িত লোকক সহায়ৰ বাবেই ওলাই অহাৰ কথা অৱগত কৰাৰ লগতে আগন্তক সমায়ত পৰ্যায় ক্ৰমে সমগ্ৰ অসমতে ৰাইজক সহায়ৰ বাবে পদক্ষেপ হাতত লব বুলি কয়। সঁজাতী দলটোত বিজেপিৰ ৰাজ্যিক সংখ্যালঘু মৰ্চাৰ সভাপতি শান্তিয়াজ কুজুৰ, উপ-সভাপতি ক্ৰমেখলিলুৰ ৰহমান, তবিবুৰ ৰহমান, খাইৰুল ইছলাম, আব্দুছ ছালাম, অঞ্জুমা বেগম,সাধাৰণ সম্পাদকদ্বয় ছহিদুল ইছলাম,মোস্তাফ উদ্দিন আহমেদ, কাৰ্যালয় সম্পাদক যশপাল সিঙ, কাৰ্যনিৰ্বাহক সদস্য ওচমান গনি, আলাউদ্দিন আৰু ইলিয়াছ আলী উপস্থিত থাকে ।

-গোলাঘাটত বহু দৰিদ্ৰ লোকে এটা ঔষধ বিচাৰি হাবাথুৰি খোৱাৰ সময়তে পোহৰলৈ আহিছে অন্য এক  ঘটনা।জানিব পৰা মতে গোলাঘাটৰ শ্বহীদ কুশল কোঁৱৰ অসামৰিক চিকিৎসালয়ৰ গুদামত বহু মূল্যবান ঔষধ পচিব ধৰিছে।যি ঘটনাই এতিয়া সৰ্বত্ৰে পতিক্ৰিয়াৰ সৃষ্টি কৰিছে।ভুক্তভোগী ৰাইজৰ অভিযোগ অনুসৰি ৰাইজে চৰকাৰে প্ৰদান কৰা ঔষধ বিচাৰি গলে দিবলৈ অপাৰগ হোৱা চিকিৎসাকৰ্মী সকলে গুদামত এনে বহু মূল্যবান ঔষধ নষ্ট কৰি দিয়া পৰিলক্ষিত হৈছে।ফলত ম্যাদ উকলি যোৱা এই ঔষধ সমূহ পচিবলৈ আৰম্ভ কৰিছে আৰু চিকিৎসালয় কৰ্তৃপক্ষৰ নিৰ্দেশমৰ্মে এই ঔষধসমূহ পেলাই দিয়া দেখিবলৈ পোৱা গৈছে। কাৰ গাফিলতিত এনেদৰে গুদামত ঔষধ পচিবলৈ ধৰিছে সেই লৈ এতিয়া সৰৱ হৈ পৰিছে বিভিন্ন দল-সংগঠন। অতি সোনকালে এই ঘটনাৰ উচিত তদন্ত বিচাৰি দোষীক শাস্তি প্ৰদান কৰিবলৈ চৰকাৰক দাবী উত্থাপন কৰিছে।ইফালে সচেতন মহলেও এই ঘটনাৰ উচিত তদন্তৰ দাবী তুলিছে।