দেৰগাঁৱৰ ঐতিহাসিক আজাদ পুস্তকালয়ৰ  উদ্যোগত পুস্তকালয়ৰ এগৰাকী  প্ৰতিষ্ঠাপক ,দেৰগাঁৱৰ সুসন্তান  তথা অসমৰ জাতীয় কবি আখ্যায়িত নীলমণি ফুকনৰ  ৮৯ সংখ্যক ওপজাদিন ১০ছেপ্টেম্বৰত দিনজোৰা কাৰ্যসূচীৰে ক’ভিড  নীতি মানি  উদযাপন  কৰা হয়। এই উপলক্ষে পুৱা জাতীয় কবি গৰাকীৰ ৰচিত কবিতা আবৃত্তি প্ৰতিযোগিতা অনুষ্ঠিত হয়। বিয়লি মুকলি সভা,  গ্ৰন্থ উন্মোচন , বঁটা বিতৰণী অনুষ্ঠান অনুষ্ঠিত হয়।সম্পাদক ৰাজেন পূজাৰীয়ে আঁতধৰা মুকলি সভাত সভাপতিত্ব কৰে আজাদ পুস্তকালয় ঐতিহ্য স্মাৰক সমিতিৰ সভাপতি অধ্যাপক পদ্মলোচন নাথে। সভাত মুখ্য বক্তা হিচাপে  বিশিষ্ট কবি অজিত গগৈ, বিশিষ্ট অতিথি হিচাপে  বিশিষ্ট কবি, সমালোচক  নাজিৰা মহাবিদ্যালয়ৰ অধ্যাপক  ৰাজীৱ বৰা, বিশিষ্ট ঔপন্যাসিক , গল্পকাৰ জুৰি বৰা বৰগোহাঞি, বিশিষ্ট সমাজকৰ্মী নুৰুল চুলতান আদি ব্যক্তি সকল উপস্থিত থাকে ।বিশিষ্ট অতিথিৰ ভাষণত কবি অজিত গগৈয়ে নীলমণি ফুকনৰ অৱদান ব্যক্ত কৰি অসমীয়া কাব্য সাহিত্যত তেখেতৰ অৱদান একক আৰু অনন্য বুলি অভিমত ব্যক্ত কৰে।এই অনুষ্ঠানত জাতীয় কবি গৰাকীৰ  পুত্ৰ  কবি -সুলেখক অমিতাভ ফুকনৰ ৰচিত  ” মই দেখা নীলমণি’ শীৰ্ষক  জীৱন আধাৰিত   গ্ৰন্থখনি পঢ়ুৱৈ সমাজলৈ আগবঢ়াই দিয়ে কবি নীলমণি ফুকনৰ ভাতৃ  তৰুণ ফুকনে।উল্লেখযোগ্য যে, বনলতা প্ৰকাশনে প্ৰকাশ কৰা এই গ্ৰন্থখন অসমীয়া সাহিত্যৰ লগতে সামাজিক ইতিহাসৰ কিছু তথ্য ৰ উৎস হৈ পৰিছে। সহজ সৰল কবিজনাৰ কিছু অনাৱস্কৃত দিশো উন্মোচিত হোৱা গ্ৰন্থখনত কবিৰ আত্মজীৱনী ত প্ৰকাশ নোহোৱা বহুতো কথাই সন্নিবিষ্ট হৈছে।আজাদ পুস্তকালয়ৰ উদ্যোগত কুৰালগুৰি উ:মা:বিদ্যালয়ৰ অধ্যক্ষা জ্যোতিকুমাৰী শৰ্মাৰ সম্পাদনাত  ই-আলোচনী  ” আজাদ ” ৰ প্ৰথম সংখ্যাটো  নীলমণি ফুকনৰ ওপজাদিনৰ বিশেষ সংখ্যা ৰূপে  প্ৰকাশ কৰা হয়।গাৰ্গী ভূঞাৰ” বাখৰু”এই সভাতেই উন্মোচন কৰা হয় ।সভাত চিত্ৰাংকণ প্ৰতিযোগিতা আৰু কবিতা আবৃত্তি প্ৰতিযোগিতাৰ বিজয়ী প্ৰতিযোগী সকলকো বঁটা প্ৰদান ক’ৰা হয়। আজাদ পুস্তকালয় প্ৰাঙ্গণত  আয়োজন কৰা আজিৰ অনুষ্ঠানত কবি যুতিমালা বৰঠাকুৰকে ধৰি কেইবাগৰাকী ছাত্র ছাত্ৰীয়ে নীলমণি ফুকনৰ কবিতা আবৃত্তি কৰে।আৰম্ভণিতে আজাদ পুস্তকালয় চৌহদত বৃক্ষ ৰোপন কৰে নীলমণি ফুকণৰ ভাতৃ তৰুণ ফুকণে।কভিদ নীতি মানি অনুষ্ঠানত যথেষ্ট সংখ্যক ৰাইজে ভাগ লয়।

হোজাই জিলা উপায়ুক্তৰ কাৰ্যালয়ৰ সভাগৃহত আজি এখন গুৰুত্বপূৰ্ণ পৰ্যালোচনা সভা অনুষ্ঠিত হয় ৷ সভাত ৰাজ্যৰ বন ও পৰিৱেশ বিভাগৰ মন্ত্ৰী তথা হোজাই জিলাৰ অভিভাৱক মন্ত্ৰী পৰিমল শুক্লবৈদ্যৰ লগতে যমুনামুখ সমষ্টিৰ বিধায়ক ছিৰাজুদ্দিন আজমল, হোজাই সমষ্টিৰ বিধায়ক ৰামকৃষ্ণ ঘোষ আৰু লামডিং সমষ্টিৰ বিধায়ক শিবু মিশ্ৰ উপস্থিত থাকে ৷ আজিৰ পৰ্যালোচনা সভাত হোজাই জিলা উপায়ুক্ত অনুপম চৌধুৰী , জিলা আৰক্ষী অধীক্ষক বৰুণ পুৰকায়স্থৰ লগতে জিলাখনৰ সকলো বিভাগৰ মুৰব্বী বিষয়াসকল উপস্থিত আছিল । সভাত মন্ত্ৰী পৰিমল শুক্লবৈদ্যই জিলাখনৰ কোভিড ভেকচিনৰ পৰা আৰম্ভ কৰি জিলাখনৰ সকলো বিভাগৰ উন্নয়নমূলক কাম কাজৰ ওপৰত পৰ্যালোচনা কৰে ৷ মন্ত্ৰীগৰাকীয়ে ক্ষীপ্ৰ গতিত উন্নয়নমূলক কাম কাজ কৰাৰ নিৰ্দেশ প্ৰদান কৰে। লগতে কাম সমূহ নিয়াৰিকৈ হৈছে নাই , সেইবোৰ বিভাগীয় বিষয়াসকলক তদাৰক কৰাৰ নিৰ্দেশ দিয়ে ৷ উপায়ুক্তৰ কাৰ্যালয়ত পৰ্যালোচনা সভাত অতিৰিক্ত উপায়ুক্ত সকলৰ লগতে খণ্ড উন্নয়ন বিষয়া, ৰাজহচক্ৰ বিষয়াৰ ৰাজনৈতিক দলৰ প্ৰতিনিধিসকল উপস্থিত আছিল ৷ সভাৰ পিছত মন্ত্ৰী গৰাকীয়ে সংবাদ মাধ্যমৰ আগত কয় – আজি মই উপায়ুক্তৰ লগতে তিনিও গৰাকী বিধায়ক, সাংসদৰ প্ৰতিনিধি, এগৰাকী অভিভাৱক সচিব , বিজেপিৰ হোজাই জিলা সভাপতি আৰু অগপৰ হোজাই জিলা সভাপতিৰ লগতে ১২ টা বিভাগৰ বিষয়া সকলৰ লগত মিলিত হৈ আলোচনা কৰিছো ৷ বিগত সময়ছোৱাত আঠাইকেইটা বিভাগত চলি থকা উন্নয়নমূলক কাম কাজ বোৰ  আমি চালি-জাৰি চাইছো আৰু যিবোৰ আধৰোৱা হৈ আছে বা নতুনকৈ আৰম্ভ হবলগীয়া কামবোৰ শীঘ্ৰে আৰম্ভ কৰাৰ নিৰ্দেশ দিয়া হৈছে ৷ সভাত উপায়ুক্ত অনুপম চৌধুৰীৰ লগতে জিলা পৰিষদৰ সভানেত্ৰীকো দ্বায়িত্ব দিয়া হৈছে ৷ সাংবাদিকৰ প্ৰশ্নৰ উত্তৰত মন্ত্ৰী গৰাকীয়ে কয় – জৰাজীৰ্ণ বাট পথৰ কাম শীঘ্ৰে আৰম্ভ হব, বিশেষকৈ কৃষৰ সাৰৰ নাটনি বুলি অভিযোগ উঠিছে, সাৰৰো শীঘ্ৰে ব্যৱস্থা কৰা হব ৷ লগতে মন্ত্ৰী গৰাকীয়ে কয়- যিসকল লোকে মাটি বেচা কিনাৰ অনুমতি লাভ কৰা নাই, সেইসকল লেকৰ কাৰণে অসমৰ মুখ্যমন্ত্ৰী ড৹ হিমন্ত বিশ্ব শৰ্মাই ভাল খবৰ আনি আছে ৷ অলপতে মুখ্যমন্ত্ৰী গৰাকীয়ে গুৱাহাটীত ৰাজ্যৰ ৰাজহ চক্ৰ বিষয়া, অতিৰিক্ত উপায়ুক্ত সকলৰ লগত আলোচনাত মিলিত হৈছে, সেই সমস্যাবোৰ শীঘ্ৰে সমাধান হবলৈ গৈ আছে বুলি অভিভাৱক মন্ত্ৰী পৰিমল শুক্লবৈদ্যই মন্তব্য কৰে ৷

বৰ্তমান সময়ত বন্ধন বেংককে ধৰি আন আন মাইক্ৰফাইনেন্স পৰা লোন লৈ গাৱঁৰ মহিলাসকলে বিভিন্ন জনে বিভিন্ন ক্ষেত্ৰত কৰ্ম সংস্কৃতিৰে অৰ্থনৈতিক ভাৱে স্বাৱলম্বী হবলৈ সক্ষম হৈছে ৷চহৰ অঞ্চলৰ লগতে গাৱঁৰ মহিলাসকলে নিজৰ ভৰিত নিজে থিয় দিবলৈ আৰম্ভ কৰিছে । বেংককে ধৰি আন আন মাইক্ৰফাইনেন্স পৰা লোন লৈ এতিয়া বিভিন্ন জনে বিভিন্ন ব্যৱসায় আৰম্ভ কৰিছে ৷কিছুমানে যদি গাহৰি পালনেৰে স্বাৱলম্বী হৈছে আন কোনোৱাই আকৌ গেলামালৰ ব্যৱসায় কৰি স্বাৱলম্বী হোৱা দেখা গৈছে ৷ এনে সময়তে উল্লেখনীয় কথা এই যে বৰ্তমানৰ মুখ্যমন্ত্ৰী ড° হিমন্ত বিশ্ব শৰ্মাই বন্ধন বেংককে ধৰি মাইক্ৰফাইনেন্সৰ পৰা লোন লোৱা মহিলা সকলৰ ঋণ মাফ কৰাৰ বিষয়ে কিছু চৰ্ত বান্ধি দিছে ৷কিন্তু এই চৰ্ত মতে লোন মাফ নলৈ নিয়মিত কিস্তি পৰিশোধ কৰি শূণ্যৰ পৰা স্বাৱলম্বী হোৱা কিছু মহিলাৰ স্বাৱলম্বী হোৱাৰ আৰঁৰ কাহিনী লৈ আজি আমাৰ বিশেষ প্ৰতিবেদন।বিভিন্নজনৰ দৰে গুৱাহাটীৰ বাসিন্দা ৰেখা দাস নামৰ মহিলাগৰাকীও বন্ধন বেংকৰ লোণ লৈ নিজে নিজৰ ভৰিত থিয় হোৱাৰ প্ৰয়াস কৰিছে ৷প্ৰথমে ১২ হেজাৰ টকাৰে লোনটো আৰম্ভ কৰিছিল ৰেখা দাসে ৷ সেই লোনেৰে ৰেখাই ফুটফাটত এখন ক্ষুদ্ৰ দোকান আৰম্ভ কৰিছিল আৰু এই দোকানৰ পৰাই তেওঁলোকৰ ঘৰ চলিছিল ।এনেদৰেই তেওঁ লোন বৃদ্ধি কৰি পাছলৈ তেওঁৰ সেই ক্ষুদ্ৰ দোকান খন নিৰ্মাণ কৰি এখন ডাঙৰ দোকান বনাবলৈ সক্ষম হ’ল ।বন্ধনৰ পৰা লোন লৈ ৰেখা দাসে প্ৰথমে দুচকীয়া গাড়ীৰ পৰা তিনিচকীয়া অ’টও কিনিবলৈও সক্ষম হৈছে ।কেইবাবছৰো লোনৰ টকাৰে ব্যৱসায় কৰাৰ ওপৰিও নিয়মিত কিস্তি পৰিশোধ কৰি আছে ৰখাই ৷ৰেখাই আমাৰ সাংবাদিকৰ আগত কয় যে ‘,বন্ধনৰ পৰা মই বহুত সহায় পাইছোঁ । সেই বাবে বন্ধন মই কেতিয়াও এৰিব নুখুজোঁ ।”মুখ্য মন্ত্ৰী হিমন্ত বিশ্ব শৰ্মাই মহিলাসকলক মাইক্ৰফাইনেন্সৰ লোন লোৱা বন্ধ কৰি দিব কোৱাৰ সন্দৰ্ভত ৰেখাই কয়, “কিস্তি দি থাকিম আমাক লোন লাগিব কাৰণ এই লোনৰ জৰিয়তে আমি বহুত সহায় পাইছোঁ । বেলেগ বেংকত লোন এটা লব গলে আমাৰ বহুত অসুবিধা হয় ।কিন্তু বন্ধন বেংকত আমি অতি সহজে লোন পাও আৰু ইমান দিনে এনেদৰেই লোন লৈ আমি সফল হৈছোঁ।সেই কাৰণে মই ভাবো যে বন্ধনৰ পৰা আমি একো অপকাৰ নহয় উপকাৰ হে পাইছো ।”

বৰ্তমানলৈকে ৰেখাই বন্ধনৰ কিস্তি চলাই আছে আৰু তেওঁৰ কিস্তি শেষ হোৱাত তেওঁ এতিয়া পুনৰ লোন লব বিচাৰে।

গোলাঘাটত পুনৰ শ্বহীদ কুশল কোঁৱৰ অসামৰিক চিকিৎসালয়ৰ পৰা পলায়ন কৰিছে এজন দুধৰ্ষ অপৰাধীয়ে ।অভিযোগ অনুসৰি  আৰক্ষীৰ হেমাহিৰ বাবেই কটকটীয়া বেষ্টনীৰ পৰা পলায়ন কৰিবলৈ সুবিধা পাই  দুধৰ্ষ অপৰাধী বিমান বৰাই।জানিব পৰা মতে, হত্যা,অপহৰণ,ডকাইতি আদি নানান গোচৰত অভিযুক্ত বোকাখাতৰ এই কুখ্যাত অপৰাধীটো। একাধিক গোচৰত অভিযুক্ত অপৰাধীটো  ২০১৬ চনৰ পৰাই গোলালাঘাটৰ লগতে উজনি অসমৰ বিভিন্ন ঠাইত অপৰাধৰ বৃহৎ সাম্ৰাজ্য গঢ়ি তুলিছিল । আৰক্ষী সূত্ৰে প্ৰকাশ যে  ২০১৭ চনত ৰুজু হোৱা এই গোচৰ সন্দৰ্ভত বোকাখাত আৰক্ষীয়ে গ্ৰেপ্তাৰ কৰিছিল কুখ্যাত অপৰাধীটোক। দীৰ্ঘদিন ধৰি গোলাঘাট জিলা কাৰাগাৰৰ কয়দী আছিল বিমান।যোৱা ৩১ আগষ্ট তাৰিখে কিছু শাৰিৰীক অসুস্থতাৰ বাবে গোলাঘাটৰ শ্বহীদ কুশল কোঁৱৰ অসামৰিক চিকিৎসালয়ৰ কাৰাবন্দী চিকিৎসা কক্ষত ভৰ্তি কৰোৱা হৈছিল অপৰাধীটোক। ৭ ছেপ্টেম্বৰত চিকিৎসকৰ পৰামৰ্শ অনুসৰি এক্সৰে কৰিবলৈ বুলি কাৰাবন্দী কক্ষৰ পৰা এক্সৰে চেন্টাৰলৈ নিয়া হৈছিল বিমানক।আৰু তাতেই সংঘটিত হ’ল ঘটনাটো।আৰক্ষীৰ হেমাহি আৰু গাফিলতিৰ বাবেই এক্সৰে কক্ষৰ পৰা পলায়ন কৰিছিল কুখ্যাত অপৰাধীটোৱে । উল্লেখযোগ্য যে  আৰক্ষীয়ে সমগ্ৰ ঘটনাটোত কোনো প্ৰতিক্ৰিয়া প্ৰকাশ নকৰি মৌন হৈ থকা পৰিলক্ষিত হৈছিল।অৱশ্যে সংবাদ মাধ্যমে সকলো কথা জানিব পৰাত আৰক্ষীয়ে তৎপৰতা দেখুওৱা পৰিলক্ষিত হৈছে।অভিযোগ অনুসৰি  চিকিৎসালয়খনৰ আৰক্ষী আউটপোষ্টত থকা আৰক্ষীয়ে কৰা কামৰ গাফিলতিৰ বাবেই দুধৰ্ষ অপৰাধীটো পলাবলৈ সক্ষম হ’য়।

 নগাঁও জিলা বন সংমণ্ডল বিষয়া ভাস্কৰ ডেকাৰ এক বিশেষ নিৰ্দেশ মৰ্মে সদৰ বনাঞ্চলিক বিষয়া জয়ন্ত গোস্বামীৰ নেতৃত্বত যোবা এটি অভিযানকাৰী দলে  জিলাখনৰ জুৰীয়া মাহগুৰি অঞ্চলৰ পৰা দুটাকৈ অবৈধ কাঠফলা মিল জব্দ কৰিবলৈ সক্ষম হয় ৷ অভিযোগ অনুসৰি আজি দীৰ্ঘদিনৰ পৰি জুৰীয়া মাহগুৰি অঞ্চলত চিয়াজুল ইছলাম নামৰ এজন ব্যক্তিয়ে এই অবৈধ কাঠমিলৰ ব্যৱসায় চলাই আহিছিল ৷ অভিযানত বন বিভাগৰ কেইবাগৰাকী বন বিষয়া- বনকৰ্মী উপস্থিত থাকে ৷

উচ্চ শিক্ষিত যুৱকৰ মৰ্মবেদনাই সকলোকে মৰ্মাহত  কৰি তুুলিছে । চাকৰিৰ মোহ ত্যাগ কৰি কৃষি কাৰ্যৰে নিজকে স্বাৱলম্বী কৰি তোলাৰ লক্ষ্যৰে নিজৰ সমস্ত সাচতীয়া ধন কৃষি কৰ্মত লগাই আজি তেনেই লাওলোৱা এইজন উচ্চ শিক্ষিত যুৱক । উল্লেখযোগ্য যে অসম অৰুণাচল সীমান্তৰ ছিজুছাৰ তালৰ টেচী নামৰ এইজন উচ্চ শিক্ষিত যুৱকে নিজকে স্বাৱলম্বী কৰি তোলাৰ লক্ষ্যৰে বিগত ২০১৯  চনত ছিজুছাৰ মনাইত ২৫ বিঘা মাটিত আৰম্ভ কৰে নেমু খেতি । নিজৰ সাচতীয়া ধনৰ উপৰিও স্হানীয় বিভিন্ন উৎসৰ পৰা কেইবা লাখ টকা ধাৰে লৈ  পাহাৰ ভাঙি আৰম্ভ কৰে নেমু খেতি । সমান্তৰাল ভাৱে নেমু খেতিৰ মাজে মাজে ৰোপন কৰে কেইবাশতাধিক তামোল পুলি । লহপহকৈ বাঢ়ি অহা তথা নেমু গছবোৰত লোমেলোমে নেমু লাগিবলৈ ধৰাৰ সময়তে দেশত দেখা দিয়া কভিত-১৯ ৰ বাবে বন্ধ হৈ পৰে সকলোবোৰ ব্যাবসায় বানিজ্য । এনে পৰিপেক্ষিত নেমুগছত লোমেলোমে লাগি থকা হাজাৰ হাজাৰ নেমু গছতে নষ্ট হবলৈ ধৰে । নেমু বজাৰত বিক্ৰী কৰি নিজকে স্বনিৰ্ভৰশিল কৰি তোলাৰ বিপৰীতে ক’ভিডসৃষ্ট পৰিবেশৰ বাবে এটা টকাৰো নেমু বিক্ৰী কৰিব নাপালে । গছৰ তলতে পকি গেলি পৰি থকা নেমুৰ দৃশ্য সচাই হৃদয় বিদাৰক । অৰুণাচলৰ পাকেকেচাং জিলাৰ ১২ নং পাকেকেচাং সমষ্টিৰ অন্তৰ্গত মনাইত উচ্চ শিক্ষিত যুৱক জনৰ আজিৰ অৱস্হাই স্বাভাৱিকতে সকলোৱে দুখ প্ৰকাশ কৰিছে যদিও স্থানীয় বিধায়ক গৰাকীয়ে এই সন্দৰ্ভত এইজন কৃষকৰ মৰ্ম বেদনা উপলব্ধি কৰাৰ আশা প্ৰকাশ কৰিছে স্থানীয় ৰাইজে ‌ । উল্লেখ্য যে এইগৰাকী আগ্ৰহী কৃষক টেচীয়ে নেমু খেতিৰ উপৰিও জলকীয়া খেতি ৪ বিঘাও আছে যদিও সেয়াও ধাৰাসাৰ বৰষুণে নষ্ট কৰি থৈছে । তদুপৰি এইজন উচ্চ শিক্ষিত কৃষকে বিগত ৮ বছৰ ধৰি মুঠ ১৬ বিঘা মাটিত ৰাবাৰ খেতি কৰি আছে যদিও সেই খেতিৰ পৰা ফুটা কড়ি এটাও লাভ কৰা নাই। এনে এজন কৃষকক চৰকাৰেও সহায় কৰাৰ প্ৰয়োজন আছে বুলি বিবেচিত হৈছে। গতিকে ৰাজ্য খনৰ মুখ্যমন্ত্ৰী প্ৰেমা খান্ডুয়ে এনে ধৰনৰ শিক্ষিত যুৱ কৃষক সকলক কৃষিৰ প্ৰতি আগ্ৰহী কৰি তোলাৰ বাবে বিত্তীয় সকাহ দিবলৈ স্থানীয় সচেতন ৰাইজে আহ্বান জনাইছে । 

মাজুলীত সংঘটিত মৰ্মান্তিক ঘটনাৰ পিছতে এতিয়া দৰঙ জিলাৰ ছিপাঝাৰ সমষ্টিৰ অন্তৰ্গত কুৰুৱাৰ আও পুৰণি জাহাজক লৈ উত্তপ্ত পৰিস্থিতিৰ সৃষ্টি হৈছে । দীৰ্ঘদিনীয়া দাবীৰ অন্তত কুৰুৱা বাসীক এখন নতুন জাহাজ  প্ৰদান কৰা হৈছিল যদিও পুনৰ মাজুলীলৈ উক্ত জাহাজখন স্থানান্তৰ কৰিবলৈ সিদ্ধান্ত গ্ৰহণ কৰিছে। ইয়াৰ পিছতে আজি  পুৱাৰ ভাগত উক্ত জাহাজঘাটত কুৰুৱাৰ স্থানীয় লোকৰ উপৰিও আছু গোটৰ জৰিয়তে আবদ্ধ কৰা হয় এখন যাত্ৰী ভৰ্তি জাহাজ। ইয়াৰ পিছতে এক উত্তপ্ত পৰিস্থিতিৰ সৃষ্টি হয় জাহাজঘাটত। কুৰুৱাৰ পৰা গুৱাহাটীলৈ যোৱা এই জাহাজখনত নাই কোনোধৰণৰ অত্যাধুনিক লাইফ জেকেত এই দাবী কুৰুৱা আঞ্চলিক ছাত্ৰ সন্থাৰ।

ৰাজ্য জুৰি বেংক  প্ৰৱঞ্চনা চলাই থকা তিনি দুধৰ্ষ  প্ৰৱঞ্চকক গ্ৰেপ্তাৰ কৰিলে গোলাঘাট আৰক্ষীয়ে । প্ৰৱঞ্চক তিনিটা নাম হ’ল  চায়িদ আহমেদ লস্কৰ ,নুৰ আহমেদ বৰভূঞা আৰু মতিবুৰ ৰহমান চৌধুৰী । ইয়াৰে দুজনক গুৱাহাটী আৰু এজনক হোজাইৰ পৰা গ্ৰেপ্তাৰ কৰে গোলাঘাট আৰক্ষীয়ে । উল্লেখযোগ্য যে গোলাঘাটৰ এখন মহাবিদ্যালয়ৰ অধ্যক্ষ বেংক একাউণ্টৰ  পৰা ১৩ লাখ টকা  হৰলুকী কৰিছিল  এই তিনি অপৰাধীয়ে । এ.টি. এমত পইচা উলিওৱাৰ সময়ত কৌশলেৰে এ.টি.এম কাৰ্ডৰ জৰিয়তে প্ৰৱঞ্চনা আৰম্ভ কৰিছিল  প্ৰৱঞ্চকৰ দলটোৱে । অধ্যক্ষ জনৰ একাউন্ট পৰা অনলাইন যোগে বেংকৰ পৰা 13 লাখ টকা হৰলুকী কৰি বিভিন্ন অনলাইন চাইটত অনলাইন শ্বপিং কৰিছিল প্ৰৱঞ্চক কেইটাই । অধ্যক্ষ গৰাকীৰ ধন হৰলুকী গোচৰৰ ভিত্তিত গোলাঘাট আৰক্ষীয়ে তদন্ত চলাই এই দুধৰ্ষ প্ৰৱঞ্চক কেইটাক গ্ৰেপ্তাৰ কৰিবলৈ  সক্ষম হয় । প্ৰৱঞ্চক কেইটা ঘৰ হোজাই জিলাত বুলি আৰক্ষীয়ে জানিব দিয়ে । এই প্ৰৱঞ্চক কেইটাৰ লগত বহিৰাজ্যৰ প্ৰৱঞ্চকৰ  সম্পৰ্ক থকা বুলি জানিব দিছে গোলাঘাট আৰক্ষীয়ে । প্ৰৱঞ্চক কেইটাৰ  পৰা এখন FORD কোম্পানীৰ বিলাসী গাড়ী , বহুতো মোবাইন ফোন, বেংক পাছবুক ,লেপটপ, ৫৯ খন ডেবিট কাৰ্ড, ছিমকাৰ্ডৰ লগতে বহুতো আপত্তিজনক নথী পত্ৰ জব্দ কৰে আৰক্ষীয়ে । ঘটনাৰ সন্দৰ্ভত আৰক্ষীয়ে অধিক তথ্যৰ  বাবে সোধ -পোচ আৰম্ভ কৰিছে ।প্ৰৱঞ্চক কেইটাৰ পৰা আৰক্ষীয়ে বৰ্ত্তমান পৰ্যন্ত ৩ লাখ টকা উদ্ধাৰ কৰিবলৈ সক্ষম হয় । ৰাজ্য জুৰি প্ৰৱঞ্চনাৰ জাল মেলিছিল প্ৰৱঞ্চকৰ দলটোৱে ।

ক্ৰমাৎ খালী হৈ পৰাৰ উপক্ৰম ঘটিছে নাজিৰা মহকুমা সদৰৰ বুকু। নগৰ আৰু মহকুমা হিচাপে গুৰুত্ব বৰ্দ্ধন কৰি অহা নাজিৰা মহকুমা সদৰৰ জনস্বাস্থ্য কাৰিকৰী বিভাগৰ সংমণ্ডলীয়  কাৰ্য্যালয়টো নতুনকৈ ঘোষিত চৰাইদেউ জিলাৰ সদৰ সোণাৰীলৈ স্থানান্তৰ ঘটোৱাৰ চূড়ান্ত পদক্ষেপত উদ্বিগ্ন হৈ পৰিছে নাজিৰা মহকুমাৰ গাঁও-ভূইৰ হাজাৰ হাজাৰজন লোকৰ লগতে নাজিৰা আৰু শিমলুগুৰি নগৰৰ আবাসীসকলো । আনহাতে চৰকাৰেও এনে এক হঠকাৰী সিদ্ধান্ত কেবিনেটৰ যোগেদি প্ৰকাশ ঘটোৱাই নহয় খোদ জনসাধৰণৰ অজ্ঞাতেই ৰূপায়ণ কৰিবলৈ বিভাগীয়  প্ৰস্ত্ততি অগ্ৰগতি ঘটাই কাইলৈৰপৰা নাজিৰাৰ জনস্বাস্থ্য কাৰিকৰী বিভাগৰ কাৰ্য্যবাহী অভিযন্তাক সোণাৰিলৈ লৈ যোৱাৰ বাবে পূৰ্ণ প্ৰস্ত্ততি সম্পন্ন কৰিছে । এই সন্দৰ্ভত নাজিৰাত সাংগঠনিক ভেটি থকা দুই এক সংগঠনে ইতিমধ্যে প্ৰশাসনৰ যোগেদি অসম চৰকাৰৰ জনস্বাস্থ্য কাৰিকৰী বিভাগৰ মুখ্য অভিযন্তা(গুৱাহাটী) , অতিৰিক্ত মুখ্য অভিযন্তা(নগাঁও) , অধীক্ষক অভিযন্তা (ডিব্ৰুগড়)লৈ প্ৰশাসনৰ জড়িয়তে স্মাৰক পত্ৰ প্ৰদান কৰিছে  ।  চৰকাৰে গোপনেই কাৰ্য্যালয়টো সোনাৰিলৈ স্থানান্তৰ ঘটোৱাৰ প্ৰস্ত্ততি যিকোনো প্ৰকাৰে স্থগিত কৰাৰ দাবী জনাই আজি নাজিৰা জনস্বাস্থ্য কাৰিকৰী বিভাগৰ কাৰ্য্যালয়ৰ  প্ৰৱেশ পথতে প্ৰতিবাদী আন্দোলন কৰি বহি পৰে নাজিৰা, শিৱসাগৰ, ডিব্ৰুগড়, তিনিচুকীয়া জনস্বাস্থ্য কাৰিকৰী ঠিকাদাৰ সমিতিৰ বিষয়ববীয়া সকল । সদস্য সকলে অনতিপলমে চৰকাৰী এনে ষড়যন্ত্ৰ প্ৰত্যাহাৰৰ দাবী জনায় বিভাগটোৰ ওচৰত । নৱগঠিত চৰাইদেউ জিলাত এটি নতুন কাৰ্য্যালয় স্থাপিত হওক  চৰকাৰে তাৰ বাবে কাৰ্য্যব্যৱস্থা গ্ৰহণ কৰক । ঠিকাদাৰ সকলে সেই কাৰ্যক সমৰ্থন জনাব । আনহাতে বিগত চাৰিটাকৈ দশক ধৰি নাজিৰা মহকুমাৰ সদৰত উপযুক্ত ৰাজহ ভূমিৰ আৱন্টনেৰে চলি ৰোৱা চৰকাৰী জনস্বাস্থ্য বিভাগটো স্থানান্তৰ কৰি নাজিৰাৰ গাঁও আৰু নগৰৰ সৰ্বসাধাৰণ ৰাইজৰ ক্ষোভৰ উদ্গীৰণ ঘটাই  এক ভুল ধাৰণাৰ জন্ম দিব বিচাৰিছে বি জে পিৰ চৰকাৰে । নাজিৰাৰ কাৰ্য্যালয়টো নতুনকৈ ঘোষিত জিলা চৰাইদেউলৈ তুলি নিয়া কাৰ্য্য কোনো প্ৰকাৰে গ্ৰহণ নকৰে বুলি নাজিৰা, শিৱসাগৰ, ডিব্ৰুগড়, তিনিচুকীয়া জনস্বাস্থ্য কাৰিকৰী ঠিকাদাৰ সমিতিৰ সম্পাদক অপূৰ্ব লাহনে নিজ সংগঠনৰ স্থিতি দোহাৰে  । তেওঁ কয় যে ১০ ছেপ্টেম্বৰত তেওঁলোকে প্ৰতিবাদী আন্দোলন কৰিছে আৰু প্ৰতিটো বিভাগীয় স্তৰলৈকে স্মাৰক পত্ৰ প্ৰদানৰ দিহা কৰিছে । বি জে পি চৰকাৰে নতুনকৈ বিভাগীয় সংমণ্ডল সৃষ্টি কৰাৰ পৰিৱৰ্ত্তে চুবুৰীয়া মহকুমাৰ প্ৰতিষ্ঠিত কাৰ্য্যালয়টোকে নতুন জিলালৈ স্থানান্তৰ ঘটোৱা কাৰ্য্যই বিৰূপ প্ৰতিক্ৰিয়া সৃষ্টিয়েই নহয় নাজিৰা মহকুমাৰ শশ নিবনুৱাৰ ভটিয়নী সংস্থাপনক ধূলিস্যাৎ কৰিব । সম্পাদক অপূৰ্ব লাহনে নাজিৰাৰ ৰাইজে ৰাজনীতিৰ উৰ্দ্ধত থাকি স্থানীয় সম্পদ বিয়োগ ঘটোৱা কাৰ্য্যৰ প্ৰতিবাদ জনাব বুলি কয় । সমিতিৰ স্মাৰক পত্ৰ নাজিৰাৰ মহকুমা প্ৰশাসনৰ হৈ অতিৰিক্ত সহকাৰী আয়ুক্ত প্ৰীতম গগৈয়ে গ্ৰহণ কৰে ।  শনি আৰু দেওবাৰৰ বন্ধৰ দিনত কাৰ্য্যালয় তুলি লৈ যোৱাৰ ব্লু-প্ৰিণ্টঃনাজিৰা মহকুমা বাসীৰ চল্লিশ বছৰে চলাই অহা এটুপি খোৱা পানীৰ বাবে কৰা সংগ্ৰামক ওচৰৰপৰা সমৰ্থন যোগাবলৈ প্ৰতিষ্ঠিত জনস্বাস্থ্য কাৰিকৰী  বিভাগৰ সংমণ্ডলীয় কাৰ্য্যালয় নিজ মহকুমাৰ কেন্দ্ৰ স্থলৰ পৰা হেৰাই যোৱাৰ আবেগত নাজিৰাৰ ৰাইজৰ বাধাৰ সন্মুখীন হোৱাৰ আশংকা কৰি শনিবাৰ আৰু দেওবাৰৰ বন্ধৰ দিনকে বিভাগটোৱে  গোপনে ঠিৰাং কৰা বুলি এক সূত্ৰত প্ৰকাশ । সেই সূত্ৰে মাহৰ দ্বিতীয় শনিবাৰ ১১ ছেপ্টেম্বৰত কাৰ্যবাহী অভিযন্তাক সোণাৰিত যোগদানৰ বাবে ৰেহ-ৰূপ প্ৰস্ত্তত হৈ উঠা বুলি অৱগত হোৱা ঠিকাদাৰ সমিতিয়ে আজি কাৰ্য্যবাহী দণ্ডাধীশ তথা নাজিৰাৰ অতিৰিক্ত সহকাৰী আয়ুক্ত প্ৰীতম গগৈৰ আগত এনে কোনো কাৰ্য্য প্ৰশাসনক প্ৰশ্ৰয় নিদিবলৈ আহ্বান জনায় । ১১ ছেপ্টেম্বৰত কোনো অচিলাৰেই যাতে গোপনে ফাইল আৰু কাৰ্য্যালয়ৰ সম্পদ স্থানান্তৰ কৰিব নোৱাৰে তাৰ বাবে ঠিকাদাৰ সমিতিয়েও গণতান্ত্ৰিক প্ৰতিৰোধ গঢ়ি ৰাখিব বুলি জনায় । উল্লেখযোগ্য যে একে স্থানৰে সমীপতে অৱস্থিত নাজিৰা জনস্বাস্থ্য কাৰিকৰী বিভাগৰ উপ-সংমণ্ডলীয় কাৰ্য্যালয়টিও শিৱসাগৰৰ উপসংমণ্ডলৰ লগত জাপি দিবলৈ ওলাইছে বি জে পি নেতৃত্বাধীন ৰাজ্য চৰকাৰ । 

হোজাই জিলাৰ ডবকা ৰাজহ চক্ৰৰ অন্তৰ্গত কপাহবাৰী,পাবিজুৰী,কৰৈয়ুনী পদুম পুখুৰী , উত্তৰ ডিমৰু পাৰ আদি কৰি কেইবাখন গাৱৰ ৰাইজ বানপানীৰ কবলত পৰি হাহাকাৰ কৰিব লগীয়া হৈছে। হাজাৰ হাজাৰ বিঘা কৃষি ভূমি বানপানীৰ কবলত পৰি খেতি-বাতি বিনষ্ট হোৱা পৰিলক্ষিত হৈছে। বানপানীৰ ফলত বিদ্যুৎৰ খুটা পানীত পৰি বিদ্যুৎ বিচ্ছিন্ন হৈ আছে এই বৃহত্তৰ  অঞ্চলটোত। কিন্তু ৰাইজৰ দুৰ্যোগৰ সময়ত ৰাইজৰ কাষত নাই স্থানীয় বিধায়ক ছিৰাজ উদ্দিন আজমলৰ তথা চৰকাৰৰ আমোলা বিষয়া কৰ্মচাৰী সকল। নিৰ্বাচনৰ সময়ত সমষ্টিবাসী ৰাইজক উন্নতিৰ ফুলজাৰি মাৰি সাধাৰণ ৰাইজৰ পৰা ভোট আদায় কৰি এক প্ৰকাৰ নিৰুদ্দেশ হৈ আছে এ আই ইউ ডি এফ দলৰ বিধায়ক ছিৰাজ উদ্দিন আজমল৷ উপায়ন্তৰ হৈ সংবাদ মাধ্যমৰ জৰিয়তে ভুক্তভোগী ৰাইজে সহায় বিচাৰি স্থানীয় বিধায়কৰ লগতে চৰকাৰক কাতৰ আহ্বান জনায়।