“বলিউডৰ বলিষ্ঠ অভিনেতা তথা মডেল মিলিন্দ সুমনৰ পত্নী অংকিতা কোঁৱৰে নিজৰ ইনষ্টাগ্রাম হেণ্ডেলযোগে উত্তৰ-পূৱ প্ৰান্তৰ লোকসকলৰ সৈতে হোৱা ভেদ-ভাৱৰ কথা মুকলি মুৰীয়াকৈ প্ৰকাশ কৰি দিল্লীৰ এখন সচাঁ ছৱি দাঙি ধৰিছে। অংকিতা কোঁৱৰে কোৱা উত্তৰ-পূৱৰ লোকসকলক তেতিয়াহে ভাৰতীয় বুলি ভাবে যেতিয়া দেশৰ বাবে তেওঁলোকে মেডেল জয় কৰি আনে। স্বাধীনতাৰ ৭৪ বছৰ পাৰ হোৱাৰ পিচতো দিল্লীয়ে উত্তৰ-পূৱক হেয়জ্ঞান কৰি থকাৰ নিৰ্মোহ তথা জীয়া ছৱি দাঙি ধৰিছে অংকিতা কোঁৱৰে” -এক প্ৰেছ বিজ্ঞপ্তিত এনদৰে কয় ৰাজ্যৰ সমন্বয়- সংহতি- ঐক্যতাৰ বৃহৎ অনুষ্ঠান “বহুবাক” (বহুভাষিক সাহিত্য মঞ্চ, অসম)ৰ প্ৰধান সম্পাদক তথা সংবাদ-সাহিত্যালোচনী প্ৰভঞ্জনৰ সম্পাদক দীপক শৰ্মাই। বহুবাকৰ প্ৰধান সম্পাদক শ্ৰীশৰ্মাই কয়- “দিল্লীয়ে সৰ্বদিশতে উত্তৰ-পূৱক মাহী আইৰ দৃষ্টিৰে চাই আহিছে। চৰম প্ৰতাৰণা। কলিজা কাটি খুৱালেও  মৰম-স্নেহৰ আপডাল নকৰে দিল্লীয়ে। উত্তৰ-পূৱৰ জনসাধাৰণে আন্দোলন নকৰিলে একো এটা নাপায়। ই ধ্ৰুৱ সত্য। চিৰ শাশ্বত।” বহুবাকৰ প্ৰধান সম্পাদক দীপক শৰ্মাই আৰু কয়- ১৯৬২ চনত আমাৰ অসমখন দিল্লীয়ে তেতিয়াৰ পূব পাকিস্তান (বৰ্তমান বাংলাদেশ) ক গতাব খুজিছিল। কিন্তু সাংসদ হেম বৰুৱা, লোকপ্ৰিয় গোপীনাথ বৰদলৈৰ দৰে অসমৰ সৱল নেতাৰ কঠোৰ স্থিতি, অপৰিসীম শ্ৰম, ত্যাগৰ বিনিময়ত অসম ৰক্ষা পৰিছিল। কিমান দুৰ্ভাগ্য আমি অসম তথা উত্তৰ-পূৱৰ জনসাধাৰণ। আমি সমগ্র অসমৰ জনসাধাৰণ দল-মত- সংগঠন নিৰ্বিশেষে একত্রিত হ’ব লাগে। জাতি-জনগোষ্ঠী নিৰ্বিশেষে উত্তৰ-পূৱৰ জনসাধাৰণ একত্রিত হ’ব লাগে।” অংকিতা কোঁৱৰৰ মনোভাৱক একে মুখে শলাগিছে বিষ্ণুপ্ৰিয়া মণিপুৰী সাহিত্য পৰিষদৰ সভাপতি দিলস লক্ষ্মীন্দ্ৰ সিংহ, গাৰো সাহিত্য সভাৰ সভাপতি সৰোজ চাংমা, নিখিল ৰাভা লেখিকা সমাৰোহ সমিতিৰ সভানেত্রী ড০ মলিনা দেৱী ৰাভা, গুৱাহাটী উচ্চ ন্যায়ালয় বাৰ এচচিয়েছনৰ সচিব প্ৰধান জিতেন পায়েং, অসম কবি সমাজৰ প্ৰাক্তন সভাপতি ৰমেন কলিতা, গুৱাহাটী জিলা বড়ো সাহিত্য সভাৰ সম্পাদক গোলাপ বড়ো, বঙাইগাঁৱৰ অভয়াপুৰী মহাবিদ্যালয়ৰ অসমীয়া বিভাগৰ অৱসৰী মুৰব্বী অধ্যাপিকা ড০ মৰমী বৰঠাকুৰ তালুকদাৰ, অখিল ভাৰতীয় সাহিত্য পৰিষদৰ গুৱাহাটী মহানগৰ কমিটিৰ সভাপতি নিশুতি মজুমদাৰ, গুৱাহাটী মহানগৰ কবি কাননৰ সভাপতি কমলজিৎ কলিতা, অসম শিশু সাহিত্য সমাজৰ সহ: সম্পাদক প্ৰদীপ নাৰায়ণ ভট্ট, মানুহ আৰু পৰিৱেশ, অসমৰ সভাপতি কমল চন্দ্র মেধি, জ্ঞান মঞ্জুৰী আলোচনা চক্ৰ , মৰিগাঁৱৰ সভাপতি হৰেন্দ্ৰ বৰা – সম্পাদক জ্যোতিষ বৰ্মন, দক্ষিণ কামৰূপ সচেতন মঞ্চৰ অধ্যক্ষ মদন দাস, বঙৰা আঞ্চলিক মঞ্চৰ সভাপতি গৌৰীকান্ত নাথ, শ্রীমন্ত শংকৰদেৱ সংঘৰ ৰামপুৰ প্ৰাথমিক শাখাৰ উপ- সভাপতি জৱাহৰ মেধি, পৰাগজ্যোতি প্ৰকাশন প্ৰভৃতি দল-সংগঠনে।

 মহাৰত্ন তৈল – গেছ উদ্যোগ ” তেল আৰু প্ৰাকৃতিক গেছ নিগম ” ( অ’ এন জি চি ) অসম সম্পদত একাংশ বহিৰাগত বিষয়াই দীৰ্ঘদিন ধৰি চলাই অহা থলুৱা বিৰোধী ষড়যন্ত্ৰৰ বিৰুদ্ধে পুনৰ গৰজি উঠিল সদৌ শিৱসাগৰ জিলা ছাত্র সন্থা । বি জে পি নেৰ্তৃত্বাধীন চৰকাৰে অইলকে ধৰি অ’ এন জি চি অসম সম্পদৰ কেইবাটাও লাভজনক তৈলক্ষেত্ৰ ইতিমধ্যে বহিৰাগত পুজিপতি গোষ্ঠীক নিলাম কৰি অসমৰ আৰ্থ – সামাজিক বুনিয়াদ ধ্বংসৰ গ্ৰাহলৈ ঠেলি দিয়াৰ পৰৱৰ্তী সময়ত শেহতীয়াকৈ নিগমৰ অসম সম্পদক আশ্চৰ্য জনকভাৱে অইল ইণ্ডিয়া লিমিটেডৰ লগত চামিলকৰণৰ সিদ্ধান্ত বাতিল , থলুৱা নিবনুৱা তথা ঠিকাদাৰ – পৰিয়ালক ভাতে মাৰি ঔষধ যোগানৰ ঠিকা এপ’ল’ গোষ্ঠীক অৰ্পনৰ সিদ্ধান্ত বাতিল , জেম ( GeM ) প’ৰ্টেলৰ জৰিয়তে অ’ এন জি চি ৰ নিবিদা সম্পন্ন কৰি পুজিপতি গোষ্ঠীক ৰঙা দলিচা পাৰি দি থলুৱাৰ স্বাৰ্থ বিঘ্নিত কৰা সিদ্ধান্ত বাতিল , অ’ এন জি চি অসম সম্পদত নিযুক্তি প্ৰক্ৰিয়া মুকলি কৰি স্থানীয় নিবনুৱাক মকৰল কৰা  , নিগমৰ খনন – উৎপাদন এলেকাৰ উন্নয়ন সাধনত কৰ্তৃপক্ষই উদাসীন মনোভাৱ পৰিহাৰ কৰা , শিৱসাগৰ জিলাক তৈল নগৰী হিচাপে ঘোষণা কৰি কাৰ্য ব্যৱস্থা গ্ৰহণ কৰা আদিৰ দাবীত আজি পুনৰবাৰ সদৌ শিৱসাগৰ জিলা ছাত্র সন্থাই অ’ এন জি চি অসম সম্পদৰ নাজিৰাস্থ মুখ্য কাৰ্যালয়ৰ প্ৰৱেশ দ্বাৰত উত্তাল প্ৰতিবাদ সাব্যস্ত কৰি তৈল প্ৰতিষ্ঠানটোৰ থলুৱা বিৰোধী নীতি পৰিহাৰ কৰিবলৈ সকীয়াই দিয়ে ।   জিলাখনৰ শিৱসাগৰ , নাজিৰা , গেলেকী , নামতি , জোকতলি , শিমলুগুৰি , ডিমৌ , দিচাংমুখ , গৌৰীসাগৰ আদি বিভিন্ন আঞ্চলিক ছাত্র সন্থাৰ দুই শতাধিক আছু কৰ্মীয়ে অংশগ্ৰহণ কৰা প্ৰতিবাদী কাৰ্যসূচীত  অ’ এন জি চি অসম সম্পদত থলুৱা স্বাৰ্থ সুৰক্ষিত কৰক , নিযুক্তি প্ৰক্ৰিয়া শীৰ্ঘ্ৰে মুকলি কৰক , অসমৰ অভিযান্ত্ৰিক মহাবিদ্যালয় আৰু কাৰিকৰী শিক্ষা প্ৰতিষ্ঠানৰ পৰা বছৰি নিযুক্তি ব্যৱস্থা কৰক , এপ’ল’ প্ৰতিষ্ঠানক দিয়া ঔষধ যোগানৰ ঠিকা বাতিল কৰক , জেপ প’ট্ৰেলৰ জৰিয়তে বহিৰাগত প্ৰতিষ্ঠানক ঠিকা অৰ্পনৰ ব্যৱস্থা বাতিল কৰি থলুৱা নিবনুৱাক ঠিকা যোগানৰ ব্যৱস্থা কৰি থলুৱা স্বাৰ্থ সুৰক্ষিত কৰক , বহিৰাগত বিষয়াৰ ষড়যন্ত্ৰ বন্ধ কৰক , বহিৰাগত বিষয়াৰ দপদপনি সৰ্য্য কৰা নহব , অ’ এন জি চিৰ গুণ্ডামী সৰ্য্য কৰা নহ’ব আদি বিভিন্ন প্ৰতিবাদী শ্ল’গানেৰে উত্তাল কৰি তোলে নিগমৰ চৌহদ । পিছত সদৌ শিৱসাগৰ জিলা ছাত্র সন্থাৰ সভাপতি মানৱ হাজৰিকা আৰু ভাৰপ্ৰাপ্ত সাধাৰণ সম্পাদক দিপাংকৰ শইকীয়াৰ স্বাক্ষৰিত এখনি বাৰ দফীয়া দাবী চনদ প্ৰদান কৰে অ’ এন জি চি অসম সম্পদৰ কাৰ্যবাহী সঞ্চালকৰ হাতত । উক্ত  চনদত উল্লেখিত দাবী সমূহ ১৫ দিনৰ ভিতৰত কাৰ্যকৰী ব্যৱস্থা গ্ৰহণ নকৰিলে নিগমৰ সমূহ কাম – কাজ এশ ঘণ্টা বন্ধ কাৰ্যসূচী গ্ৰহণ কৰিব বুলি দাবী চনদত লগতে সকীয়াই দিয়ে সদৌ শিৱসাগৰ জিলা ছাত্র সন্থাই । আছুৰ কেন্দ্ৰীয় উপদেষ্টা উদিপ্ত জ্যোতি গগৈ , কেন্দ্ৰীয় কাৰ্যনিৰ্বাহ সমীৰণ ফুকন , জিলা সভাপতি মানৱ হাজৰিকা , ভাৰপ্ৰাপ্ত সাধাৰণ সম্পাদক দিপাংকৰ শ ইকীয়া আদিকে ধৰি ভালেকেইজন বিষয় – ববীয়াই বক্তব্য দাঙি ধৰি অ’ এন জি চি অসম সম্পদৰ থলুৱা বিৰোধী নীতিক তীব্ৰ গৰিহণা দিয়ে ।

বিশ্বনাথ জিলাৰ ইটাখোলাস্থিত গেলাহাটিঙাৰ খেৰবাৰীত এক ইতিহাস বিজড়িত ঠাণ্ডা পানীৰ উঁ‌হক পানী সংৰক্ষণৰ কেন্দ্ৰ হিচাপে গঢ় দিবলৈ দাবী জনাইছে স্থানীয় ৰাইজে। ১৫ নং ৰাষ্ট্ৰীয় ঘাই পথ সংযোগী অসম অৰুনাচল সীমান্তৱৰ্তীৰ চিজুছালৈ যোৱা মূল পথৰ দাঁ‌তিত থকা ঠাণ্ডা পানীৰ উঁ‌হ ওলোৱা দুটাকৈ স্থানত গেলাহাটিঙা বাগিচা কৰ্তৃপক্ষই ৰাইজৰ খোৱা পানীৰ সুবিধাৰ্থে কোঁ‌ৱা ৰিং বহুৱাই দিছিল যদিও বৰ্তমান ৰিং দুটা ভাঙি-চিঙি যোৱা পৰিলক্ষিত হৈছে। ভিতৰুৱা অঞ্চলৰ ঠাই হিচাপে স্থানীয় লোকে প্ৰতি মূহূৰ্তত ঠাণ্ডা পানীৰ উঁ‌হ ওলাই থকাত গোলাঘাটৰ গৰম পানীৰ উঁ‌হৰ দৰে উক্ত স্থানটোকো অলৌকিক বুলি ভাবি আহিছে যদিও অঞ্চলটোৰ ইতিবৃ্‌ত্ত অনুসৰি ১৯৫০ চনৰ অসমত হোৱা বৰ ভুমিকম্পৰ ফলত ঘটা অভিকেন্দ্ৰৰ বাবে কোনো নৈৰ সুতৰ পানী উক্ত স্থানত সকলো সময়তে উলাই থকা দেখা যায়। ঠাইখনৰ স্থানীয় লোকৰ মতে উক্ত স্থানত বুৰ-বুৰকৈ ওলাই থকা পানীৰ উঁ‌হৰ বাবে বৰ্তমান ঠাইখন বুৰবুৰি বুলি পৰিচিত হৈ পৰিছে। খেৰবাৰী বুৰবুৰিৰ ঠাণ্ডা পানীৰ উঁ‌হ বাৰ মাহে নুশুকুৱাকৈ ২৪ ঘন্টাই পানী ওলাই থকাত বহু সময়ত বহু লোকে আচৰ্য প্ৰকাশ কৰাৰ লগতে অলৌকিক ভাবে পূজা অৰ্চনা কৰাও দেখিবলৈ পোৱা যায়। বৰ্তমান উক্ত ঠাণ্ডা ফটফটীয়া দেখাত পৰিস্কাৰ পানীৰ উঁ‌হৰ পৰা উলোৱা পানী নিকটৱৰ্তীত বসবাস কৰা লোকে খোৱা পানী হিচাপে ব্যৱহাৰ,গা ধোৱা,কাপোৰ ধোৱা পানী হিচাপে ব্যৱহাৰ কৰাৰ উপৰিও স্থানীয় লোকসকলৰ নদী ঘাটৰ মাংগলীক কামসমুহ উক্ত উঁ‌হৰ পানীত কৰি অহা দেখা যায়। ইফালে আজি কিছু বছৰ পূৰ্ব্বৰ পৰা উক্ত বুৰবুৰিৰ উঁ‌হৰ পানীত প্ৰতিবছৰে পূজা-অৰ্চনাৰ ঘাট হিচাপে স্থায়ী স্থান হিচাপে স্থাপন কৰা পৰিলক্ষিত হৈছে। দীৰ্ঘকাল ধৰি ঠাইখনত ঠাণ্ডা পানীৰ উঁ‌হে পথচাৰীৰ লগতে স্থানীয় লোকৰ খোৱা পানীৰ অভাব পূৰণ কৰি আহিছে সেইহে ঠাইখন পানী সংৰক্ষণৰ কেন্দ্ৰ হিচাপে গঢ় দিবলৈ বিভাগীয় কৰ্তৃপক্ষক দাবী  জনাইছে স্থানীয় ৰাইজে। 

ৰাজ্যৰ বিভিন্ন প্ৰান্তত খৰাং বতৰে কৃষকসকলৰ মাজত সৃষ্টি কৰা হাহাঁকাৰ অৱস্থাৰ সমান্তৰালভাৱে মহুৰামুখৰ উত্তৰ অংশৰ কৃষক সকলৰ মাজতো পানীত হাঁহ নচৰা অৱস্থাৰ সৃষ্টি কৰিছে৷কৃষি মন্ত্ৰী অতুল বৰাৰ গৃহ সমষ্টি বোকাখাত বিধান সভাৰ মহুৰামুখৰ গেলাবিল নৈৰ উত্তৰ অংশৰ বানক্ষতিগ্ৰস্ত ব্ৰহ্মপুত্ৰৰ কাষৰীয়া অফলা,ৰোহিতা,কেমেৰি,বৰবালি,ভলুকাগুৰি,চেলেক,টিকিৰাই,পাঠৰীকে ধৰি অৰ্ধশতাধিক গাঁৱৰ পথাৰসমুহ উকা হৈ পৰি ৰৈছে পানীৰ অভাৱত৷নৈ পৰীয়া অঞ্চলতোৰ প্ৰধান খেতিতো কৰিবৰ বাবে অতি আগ্ৰহেৰে কৃষক সকলে কপালৰ ঘাম মাটিত পেলাই মাটি চহাই শালি খেতিৰ বাবে প্ৰস্তুত কৰি এতিয়া থমকি ৰ’ব লগাত পৰিছে৷কৃষকসকলে এতিয়া আশাৰে বাট চাই ৰৈছে এজাক বৰষুণলৈ৷কৃষকসকলে চহোৱা মাটি আৰু ক্ৰমান্বয়ে বুঢ়া হব ধৰা কঠীয়াখিনিলৈ চাই হা-হুমুনীয়া কাঢ়ি থকাৰ বাহিৰে একোৱেই কৰাৰ উপায় নথকা অৱস্থাৰ সৃষ্টি হৈছে৷কিয়নো কৰোণাৰ প্ৰকোপৰ বাবে ক্ৰমাগত ভাৱে হোৱা লকডাউননে ইতিমধ্যেই কোঙা কৰা কৃষকসকলে ডিজেলৰ অত্যাধুনিক মূল্যৰ বাবে ডিজেল চালিত পানী পাম্পেৰে খেতি কৰাৰ আশা ইতিমধ্যে ত্যাগ কৰিছে৷ইফালে ২৪ ঘন্টাই বিজুলী যোগানৰ প্ৰতিশ্ৰুতি দিয়া পৰিবৰ্তনকামী চৰকাৰখনৰ বিদ্যুতবিভাগৰ ব্যৰ্থতাইও জ্বলাকলা খোৱাইছে কৃষক ৰাইজক৷কৃষি বিভাগে কৃষক সকলক সুবিধাৰ বাবে চালিত মটৰ দিছে যদিও বিদ্যুতৰ লুকাভাকুৰ বাবে মটৰ সমূহ প্ৰদৰ্শনী হিছাপে পথাৰত ৰখাৰ দৰে হৈ পৰিছে৷এফাল কৰোণাৰ প্ৰকোপ আনফালে খৰাং বতৰে অনাগত দিনবোৰক লৈ অনিশ্চয়তাৰ সৃষ্টি কৰিছে দুখীয়া কৃষক সকলৰ মাজত৷এনে খৰাং পৰিস্থিতিত ৰাজ্যৰ কৃষি বিভাগৰ মন্ত্ৰী তথা স্হানীয় বিধায়ক গৰাকীয়ে কৃষক সকলক কেনেদৰে সকাহ দিব অথবা শক্তি মন্ত্ৰী বিমল বৰাই কি ব্যবস্থা গ্ৰহণ কৰিব সেইয়া লক্ষনীয় হব যদিও কৃষক ৰাইজে সকলো আশা ত্যাগ কৰি এতিয়া অপেক্ষা কৰিছে ভগৱানৰ কৃপা দৃষ্টিৰ ওপৰত৷