নাই  মোমাইতকৈ কণা মোমাই সাৰ,  এই আপ্তবাক্য  শাৰী প্ৰযোজ্য হৈছিল বিগত বছৰৰ মহামাৰী কৰ’নাৰ সময়ত । কিয়নো ৰাজ্য চৰকাৰে মহামাৰী কৰ’নাৰ লকডাউনৰ সময় চোৱাত  প্ৰায় সংখ্যক লোকৰ একাউণ্টত ৫০০ শ টকা দিয়াৰ উপৰিও বিনামূলীয়া চাউল আৰু চৰকাৰী কৰ্মচাৰী সকলৰ পৰাও কিছু সাহাৰ্য্য আগবঢ়োৱা হৈছিল । কিন্তু এইবেলি  বিগত বছৰৰ তুলনাত বহু দৰিদ্ৰ সীমাৰেখাৰ তলৰ লোক সকলৰ মাজত খাদ্য সংকটে দেখা দিছে । বিশেষকৈ নৈশ বাছৰ টিকট কাউন্টাৰত থকা যুৱক,যুৱতী সকলৰ জীৱন আৰু জীৱিকাৰ প্ৰতি প্ৰচণ্ড ভাবুকি কঢ়িয়াই আনিছে । উল্লেখযোগ্য যে ৰৌতা, ধনশ্ৰীঘাট আৰু ওৰাঙত কেইবাটাও নৈশ বাছ সেৱাৰ টিকট কাউন্টাৰ আছে । কাউন্টাৰত টিকট বিক্ৰী নামত নিয়োজিত হৈ থকা বহু যুবক যুৱতীয়ে ইযাৰ পৰা কিছু অংশ লাভ কৰি পৰিয়ালক  পোহ পাল দি অহাৰ লগতে নিতৌ ব্যৱহাৰ্য্য সামগ্ৰী কিনি কোনো মতে যোৰা তাপলি মাৰি চলিছে যদিও এতিয়া দীৰ্ঘ দিন ধৰি নৈশ বাছ বন্ধ হৈ পৰাত তেওঁলোকৰ  অৱস্থা  পানীত হাঁহ নচৰা বিধৰ হৈ পৰিছে ।তেওঁলোকৰ পৰিয়াললৈ নামি আহিছে  ঘোৰ অন্ধকাৰ ।ৰুদ্ধ হৈ পৰিছে যুবক, যুবতী সকলৰ জীৱন আৰু জীৱিকাৰ গতি পথ । কেবল নৈশ  বাছ সেৱাৰ টিকট বিক্ৰী কৰা যুৱক যুৱতী সকলৰে তথৈবচ অৱস্থা নহয ।অনুৰূপ ধৰনেৰে চেলুন, দৰ্জী, ধোৱা, মচি,  প্ৰেছ,  ক্ষুদ্ৰ ক্ষুদ্ৰ  ব্যৱসায়ী প্ৰতিষ্ঠানৰ সৈতে জড়িত থকা যুবক যুবতী সকলৰ মাজত তীব্ৰ খাদ্য সংকটে দেখা দিছে। গতিকে এইসকল ব্যৱসায়ত জড়িত হৈ থকা যুৱক যুৱতী সকলে আৰ্থিক সাহাৰ্য্যৰ বাবে    চৰকাৰৰ মুখলৈ বাদ চাই আছে ।

ওদালগুৰি জিলাৰ ভিতৰতেই মাজবাটৰ নিলগৰ ধনশ্ৰী টি কোম্পানীৰ উল্লেখযোগ্য আৰু  প্ৰশংসনীয়  চাহ বাগিচা হৈছে বাহিপুখুৰী চাহ বাগিচা । বৰ্দ্ধিত মহামাৰী ক’ভিড কালত অসমৰ বহু চাহ বাগিচাৰ  শ্ৰমিকে ক’ৰোণা সংক্ৰান্তত প্ৰচাৰ হৈ থকা কিছুমান উৰা বাতৰিত ভুল গৈ ক’ভিড ১৯ পৰীক্ষাৰ পৰা পলাই ফুৰা ভেকচিন নোলোৱা , পৰীক্ষা নকৰা ,স্বাস্থ্য কৰ্মীক বেয়া ব্যৱহাৰ কৰা দেখা গৈছিল । মাজবাট অঞ্চলত এখন চাহ বাগিচাত কৰোণা টেষ্ট কৰাৰ কথা বুজাবলৈ যাওঁতে স্বাস্থ্য কৰ্মীৰ লগতে আটছা কৰ্মী সকলো অপদস্ত হব লগা হৈছিল । ভয় ,ভাবুকি নীৰৱে সহ্য কৰিব লগীয়া দৰে ঘটনাও সংগঠিত হৈ থকাটো এতিয়া নিত্যনৈমিত্তিক স্বাভাবিক ঘটনা হৈ পৰিছে ৷ কিন্তু এইবোৰ ঘটনাৰ সম্পূৰ্ণ বিপৰীত দৃশ্য দেখা পোৱা গৈছে মাজবাটৰ বাহিপুখুৰী চাহ বাগিছাখনত । চাহ বাগিছা খনৰ চিকিৎসক ,স্বাস্থ্য কৰ্মী ,আশা কৰ্মী , পৰিচালক ও চাহ শ্ৰমিক সকলৰ  প্ৰত্যক্ষ সহযোগত এক সুন্দৰ পৰিবেশৰ সৃষ্টি কৰি কৰি মাৰাত্মক বৰ্দ্ধিত মহামাৰীৰ বিৰুদ্ধে চৰকাৰে জনোৱা আহ্বান মৰ্মে সমূহীয়া ভাবে যুজঁ দিয়াৰ ফলত বাগিছা খন কৰোণা মুক্ত বাগান হিচাপে চিহ্নিত হোৱাৰ পথত ধাৱমান হৈছে । এই বাহিপুখুৰী চাহ বাগিছা খনৰ  মুঠ জনসংখ্যা হৈছে ৪৫০৪ গৰাকী আৰু ইয়াৰে ৩৫১৬ গৰাকী হৈছে বাগিচাখনৰ চাৰিসীমাৰ অন্তৰ্গত বাসিন্দা । ৮২২ টা পৰিয়াল থকা বাগিচাখনত প্ৰথম অৱস্থাত শতাধিক কৰোণা পজিটিভ চিনাক্ত হোৱাত এক হাহাকাৰ অবস্থাৰ সৃষ্টি হৈছিল । শ্ৰমিক সকলেও কৰোণা টেষ্ট কৰোৱাত শংকিত,আতংকিত  হোৱা পৰিলক্ষিত হৈছিল । টেষ্ট কৰিবলৈ অমান্তি হৈছিল । পজিটিভ লোক সকল বাগিচাৰ বাহিৰৰ কো’ভিড কেয়াৰ চেণ্টাৰত যাবলৈ অমান্তি পর্যন্ত হৈছিল । স্বাস্থ্য কৰ্মী ,প্রশাসন , বিজেপি দলৰ কাৰ্য্যকর্তা , বিভিন্ন দল সংগঠনে চলোৱা প্ৰচেষ্টাৰ ফলত এই ধৰণৰ অশান্তময় পৰিবেশৰ পৰা ক্ৰমান্বয়ে এক সুস্থিৰ অৱস্থালৈ ঘূৰাই অনা হৈছিল । আতংকিত হৈ পৰা চাহ শ্ৰমিক সকলক বুজোৱা , ক’ভিড চেণ্টাৰৰ ব্যৱস্থা কৰি বাগিচাখনতেই ৰাখি চিকিৎসা সেৱা আগবঢ়াই খোৱা বোৱাৰ পৰা  আবশ্যক অনুসৰি বিছনা পত্ৰ আদিবোৰৰ  ব্যৱস্থা কৰি দিয়াটো ইমান সহজো নাছিল ৷ যদিও বাগিচাখনৰ শ্ৰমিক সকলৰ পাৰস্পৰিক আৰু উমৈহতীয়া  সক্ৰিয়  সহযোগিতাৰ ফলত অৱশেষত  সকলো কামেই  সহজ ভাবে পৰি চালিত হোৱাৰ ক্ষেত্ৰত যথেষ্ট সহায় হৈছিল । চাহ বাগিচাখনত ইতিমধ্যে এতিয়ালৈ ১৯১১ গৰাকী লোকৰ ক’ভিড পৰীক্ষা কৰোৱা হৈছে  তাৰে কৰোণা ১২৪ গৰাকীৰ দেহত কৰোণা ধৰা পৰিছিল । ইয়াৰে ১২১ গৰাকী ৰোগী সুস্থ হৈ ঘৰলৈ উভতি গৈছে আৰু ৩ গৰাকী এতিয়ালৈ চিকিৎসাধীন হৈ আছে । ওৰাং খণ্ড প্ৰাথমিক স্বাস্থ্য কেন্দ্ৰৰ বিপিএম পংকজ সভাপণ্ডিতৰ সহযোগত বাগিচাখনৰ  একটিং পৰিচালক তিলক চন্দ্ৰ ডেকা, জ্যেষ্ঠ সহঃ পৰিচালক  মোহন শইকীয়া, চিকিৎসক কে পি মিশ্ৰ ,স্বাস্থ্য সহায়ক ,চিবেশ গোৱালা,এ এন এম নিতা দেৱী ,ফাৰ্মাচিষ্ট কে চি ব্ৰহ্ম ,এ এন এম ক্ৰমে  নিৰুপমা চহৰীয়া , মহিমা কুৰ্মী , পিপলিং বড়ো ,আৰু আশা পৰ্যবেক্ষক ববী টিগ্গা  আশা কর্মী ক্ৰমে – আছিচণ তিৰ্কী, দেবয়ন্তী ৰজক, যশোদা লাকড়া , মমি গৌড় , সন্ধ্যা তাঁতি প্ৰমুখ্যে কৰ্মী সকলে অক্লান্ত পৰিশ্ৰম কৰি বাগিছা খনৰ এক সুস্থিৰ  আৰু উন্নত পৰিবেশ উভতাই আনে ।মাজে সময়ে এই বাগিছাখন ওৰাঙৰ স্বাস্থ্য কৰ্মী  ৰঞ্জিত থাপা,অনিল কলিতা, আবু বক্কৰ চিদ্দিক,সঞ্জীৱ তালুকদাৰ,উদয় শংকৰ শৰ্মাআদিয়ে শ্ৰমিক সকলক ক’ভিড টেষ্ট কৰি আহিছে ৷ক’ভিড ১৯ ৰ বিৰুদ্ধে দিনে নিশাই একাকাৰ কৰি যুজঁ দিয়া  কভিড যোদ্ধা শিৱেচ গোৱালাক স্বাস্থ্য ভিভাগৰ তৰফৰ পৰা যোৱা  ১১জুলাইত ওৰাঙৰ কলাগুৰু বিষ্ণুৰাভা স্নাতক মহাবিদ্যালয়ত আয়োজিত জিলা উপায়ুক্ত উপস্থিত থকা এখন সভাত সম্বৰ্ধনাও জনোৱা হৈছে । বাগিছা খনৰ স্বাস্থ্য কৰ্মী সকলৰ এটাই আশা কৰিছে যে কৰোণা মুক্ত  চাহ বাগিছা  লাগে । কভিড হট স্পট হিচাপে চিহ্নিত হোবা চাহ বাগিছাখন স্বাস্থ্য বিভাগ আৰু চাহ বাগিছাৰ কভিড ভেকচিন গ্ৰহন, সুচিকিৎসা,সুব্যবস্থাপনা আৰু  সুদক্ষ পৰিচালনা আদিৰ বাবে দিনক দিনে কভিড সংক্ৰমন ক্ৰমান্বয়ে উন্নতি  দিশত  হ্ৰাস পাবলৈ ধৰিছে ৷এইখন চাহ বাগিছাই কভিডৰ ক্ষেত্ৰত গ্ৰহন কৰা  প্ৰশংসনীয় কাৰ্য্যক ওদালগুৰি জিলা সচেতন নাগৰিক সমিতি,বিটিএডি সাংবাদিক সংস্থাৰ কেন্দ্ৰীয় সমিতিৰ সাধাৰণ সম্পাদক নব কুমাৰ ডেকাই শলাগ লৈ আন্তৰিক ধন্যবাদ জনাইছে ৷

ভাৰতীয় জনতা পাৰ্টীৰ কেন্দ্ৰীয় আৰু ৰাজ্য চৰকাৰৰ সাংসদ ; মন্ত্ৰী তথা বিধায়ক সকলে ঘোষণাৰ উপৰিও ঘোষণা কৰি থকা কামৰূপ জিলাৰ ৪৮ নং বকো বিধানসভা সমষ্টিৰ অতি গুৰুত্বপূৰ্ণ যাতায়তী সমস্যাৰ শালমাৰা পাৰ ঘাট দলং আজিও নিৰ্মাণ নহ’ল। বছৰৰ পাছত বছৰ ধৰি অৱহেলিত হৈ থকা এই অঞ্চলৰ জনসাধাৰণৰ মনৰ বেদনা নুসুনিলে এই বি জে পি চৰকাৰে। উল্লেখ্য যে ; বকো ছমৰীয়া হৈ শালমাৰা পাৰ ঘাটেৰে পুৰাণ মালিবাৰীৰ মাজেদি নগৰবেৰালৈ যোৱা পথটোৰ জলজলি নদীৰ শালমাৰা ঘাটত এখন দলং আজিও নিৰ্মাণ নকৰিলে এই চৰকাৰে। কিন্তু বিধানসভা নিৰ্বাচনৰ পূৰ্বে আৰু লোকসভ তথা পঞ্চায়ত নিৰ্বাচনৰ পূৰ্বেও এই চৰকাৰৰ সাংসদ ; মন্ত্ৰী ; বিধায়ক তথা বি জে পিৰ নেতা পালিনেতাই এই অঞ্চলত নিৰ্বাচনী সভা সমিতি অনুষ্ঠিত কৰি গঞা ৰাইজৰ ভোট ভিক্ষা কৰি ঘোষণা কৰিছিল দলং নিৰ্মাণ কৰি দিয়াৰ। নিৰ্বাচন শেষ ঘোষণাও শেষ। চৰকাৰ গঠন হ’ল ; শাসন চলিল আৰু ভোটৰ নিৰ্বাচন পুনৰ চৰকাৰ গঠন হ’ল তথাপিও দলং নিৰ্মাণৰ কথা নোলাল। প্ৰকাশ্য যে ; ঐতিহ্য মণ্ডিত ছমৰীয়া সত্ৰ আৰু মালিবাৰী সত্ৰ সংযোগী একমাত্ৰ পথৰ মাজত বৃহৎ জলজলি নদী। জলজলি নদীৰ শালমাৰা ঘাটত ৰাইজৰ বিননি শুনিবলৈহে নাই চৰকাৰৰ জনপ্ৰতিনিধি। এই ক্ষেত্ৰত শালমাৰা পাৰ ঘাটত যাতায়তী কৰা লোকসকলে চৰকাৰক আহ্বান জনাইছে অতিশীঘ্ৰে দলং নিৰ্মাণ কৰি দিবলৈ।

ৰাজ্যৰ বিভিন্ন অঞ্চলত চুলাই মদৰ ভাটীত বিয়লিৰ পৰা নিশালৈ হোৱা সুৰাপায়ীৰ ভীৰ আৰু এনে ভীৰৰ পৰাও  ক’ভিডৰ সংক্ৰমণ হয় বুলি মুখ্যমন্ত্ৰী ডঃ হিমন্ত বিশ্ব শৰ্মা আৰু কেবাজনো মন্ত্ৰীয়ে ঘোষণা কৰাৰ পাছত আৱকাৰী বিভাগে ৰাজ্যজুৰি চুলাই মদৰ ভাটীত অভিযান  তীব্রতৰ কৰি তুলিছে । আনহাতে ৰাজ্যৰ  আন আন কেবাখনো জিলাৰ দৰে   আবকাৰী বিভাগৰ  কামৰূপ মহানগৰ জিলাৰ আবকাৰী অধীক্ষক মানৱী দাস আৰু উপ আৱকাৰী অধীক্ষক মৌচুমী কোঁৱৰৰ নিৰ্দেশত  পাণ্ডু আৱকাৰী চক্ৰই কালি মালিগাঁও আৰক্ষী চকীৰ সহযোগত পাহাৰীয়া অঞ্চল ক্ৰমে আডিংগিৰি  আৰু মিঠা আমৰতলত  চুলাই মদৰ ভাটীত এক বৃহৎ অভিযান চলায়   ।  অভিযানত  ১৫ টা  চুলাই মদ প্ৰস্তুত কৰা ভাটী  ধ্বংস কৰা হয় । অৱশ্যে অভিযানত  কোনো লোককে আটক কৰিব পৰা নগলেও প্ৰায়  ৪০০  লিটাৰৰো অধিক  চুলাই মদ , ৬,৬০০  কেজিৰো  অধিক চুলাই মদ প্ৰস্তুত কাৰ্যত ব্যৱহৃত পাছ আৰু   বিভিন্ন সা সঁজুলি জব্দ  কৰা হয় ।উল্লেখযোগ্য যে ১৩ জুলাইতো আৱকাৰী বিভাগে অঞ্চলটোত অভিযান চলাই ১৩ টা চুলাই মদ প্ৰস্তুত কৰা ভাটী  ধংস কৰিছিল ।

ৰাজ্য চৰকাৰে ক’ভিডৰ সামাজিক  সংক্ৰমণ ৰোধৰ বাবে বিগত এপ্ৰিল মাহৰ শেহৰ পৰা সান্ধ্য আইনকে ধৰি  কেতবোৰ বাধা নিষেধ আৰোপ কৰিছে । তাৰ ভিতৰত প্ৰথমটোৱেই হৈছে যিকোনো সমাগম এৰাই চলা  । কিন্ত ৰাজ্যৰ আন ভিতৰুৱা অঞ্চলটো বাদেই খোদ গুৱাহাটী মহানগৰীৰ দীপৰ বিলৰ পাৰত প্ৰাকৃতিক সৌন্দৰ্য উপভোগ কৰাৰ নামত  বিলৰ দক্ষিণ দিশত দৈনিক শ শ লোকৰ সমাগম হোৱা ঘটনাই সচেতন লোক সকলক চিন্তিত কৰি তুলিছে । এই সন্দৰ্ভত দীপৰ বিলৰ গাতে লগা চকৰদৌ কলিতাপাৰা ৰাইজ গয়ৰহৰ কৰ্মকর্তাদ্বয় প্ৰমোদ কলিতা আৰু বিৰাজ কলিতাই ( পৱন )  জানিবৰ দিয়া মতে বিগত প্ৰায় দুমাহ ধৰি সপ্তাহৰ দেওবাৰে পুৱাৰে পৰা সন্ধিয়ালৈ দীপৰ বিলৰ পাৰত থকা বন বিভাগৰ পক্ষী নিৰীক্ষণ স্তম্ভৰ সমীপৰ অংশখিনীত শ শ লোকৰ সমাগম হয় । বিগত এপ্ৰিল মাহৰ শেহৰ পৰা  ক’ভিড প্ৰট’কল বিধি মানি দীপৰ বিল বন্যপ্ৰাণী বনাঞ্চলিক বিষয়াৰ কাৰ্যালয়ে পক্ষী নিৰীক্ষণ চৌহদটো  দর্শনাৰ্থীৰ  বাবে বন্ধ কৰি ৰাখিছে । তাৰ পাছতো দৈনিক শ শ লোকে পক্ষী নিৰীক্ষণ চৌহদৰ আশে পাশে ভিৰ কৰা ঘটনাই স্থানীয় বাসিন্দাক সকলক স্বাভাৱিকতে চিন্তিত আৰু শংকিত কৰি তুলিছে । ইয়াৰ ভিতৰত দেওবাৰে অভূতপূৰ্ব সমাগম হয় ।  লক্ষ্যনীয়ভাবে বিগত বৰ্ষত লকডাউন চলি থকাৰ সময়তো একাংশই এনে ভিৰ কৰিছিল । কিন্তু আজাৰা থানাৰ তদানীন্তন ভাৰপ্ৰাপ্ত বিষয়া জনে এদল আৰক্ষী – চি আৰ পি এফৰ লোকক লগত লৈ এনে সমাগম আঁতৰ কৰিবৰ বাবে কেবাদিনো মৃদু লাঠীচালনাকৰিব লগা হৈছিল । কিন্তু এইবেলি আজাৰা আৰক্ষীয়ে তেনেকোনো ব্যৱস্থা গ্ৰহণ নকৰাত পুনৰ বাধাহীনভাবে গুৱাহাটীৰ বিভিন্ন প্ৰান্তৰ পৰা অহা একাংশ  লোকে ক’ভিড বিধি উলংঘা কৰি বিলৰ পাৰত সমাগম কৰি আহিছে । ফলত তেনে সমাগমৰ পৰা অঞ্চলটোত ক’ভিডৰ  গণ সংক্ৰমণ হব পাৰে বুলি সন্দেহ প্ৰকাশ কৰিছে সচেতন লোকসকলে  । কিন্তু সকলো দেখি শুনিও আৰক্ষী – প্ৰশাসনে নিৰ্বিকাৰ ভূমিকা গ্ৰহণ কৰা ঘটনাই তেনে সমাগম বৃদ্ধিত অৰিহণা যোগাই আহিছে বুলি অভিযোগ উত্থাপিত হৈছে ।