কামৰূপৰ বকো সমষ্টিৰ অন্তৰ্গত নগৰবেৰা নদী সংৰক্ষিত বনাঞ্চলিক বিষয়াৰ কাৰ্যালয় সম্প্ৰতি দুৰ্নীতিৰ ভূ-স্বৰ্গত পৰিণত হোৱাৰ অভিযোগ উত্থাপিত হৈছে। বনাঞ্চলিক বিষয়া (ৰেঞ্জাৰ) ভূপেন চন্দ্ৰ দাসৰ বিভিন্ন দুৰ্নীতি-অনিয়ম আৰু লুণ্ঠনৰাজৰ অঘোষিত কাহিনী এটাৰ পিছত এটাকৈ ফাদিল হোৱাত সচেতন মহলৰ চকু কপালত উঠিছে।  দুৰ্নীতিগ্ৰস্ত বন বিষয়া গৰাকীৰ পৃষ্ঠপোষকতাত কাৰ্যালয়ৰ এলেকাধীন  বিভিন্ন এলেকাত দীৰ্ঘদিনৰে পৰা অবৈধ শিল,বালি, চোৰাং কাঠৰ ৰমৰমীয়া ব্যৱসায় চলি থকাৰ গুৰুতৰ অভিযোগ উত্থাপন কৰিছে একাংশ ৰাইজে। অভিযোগ মতে  বিতৰ্কিত বন বিষয়া ভূপেন চন্দ্ৰ দাসক ধনৰে মেনেজ কৰি একাংশ চোৰাং বালি মাফিয়াই কলহী নৈৰ পৰা বালি খনন কৰি দৈনিক লাখ লাখ টকাৰ বালি বিভিন্ন প্ৰান্তত সৰবৰাহ কৰি আহিছে ,আনহাতে বিষয়টোক লৈ বন বিভাগৰ উৰ্দ্ধতম কতৃপক্ষই কোনো গুৰুত্ব প্ৰদান নকৰাত ৰাইজৰ মাজত তীব্ৰ অসন্তুষ্টি দেখা দিছে। জানিব পৰা মতে কলহী নদী আৰু জলজলী নদীত দীৰ্ঘদিনৰে পৰা অবৈধ ভাৱে বালি খনন চলি থকাৰ পিছতো বন বিষয়া ভূপেন চন্দ্ৰ দাসে ৰহস্যজনক ভাৱে কোনো ধৰণৰ ব্যৱস্থা গ্ৰহণৰ ইচ্ছা প্ৰকাশ কৰা নাই। ছমৰীয়া, মালিবাৰী, জাওকাটাদিয়া, ৰাঙ্গাপানী, ৰঙ্গেশ্বৰী আদি অঞ্চলত এই গৰাকী বন বিষয়াৰ ছত্ৰছায়াত নৈৰ পৰা বালি খনন কৰি  নাওঁৰে উঠাই দৈনিক শ শ টেক্টৰ বালি চালান বিহীনভাৱে সৰবৰাহ হোৱাত চৰকাৰে প্ৰতিমাহে লাখ লাখ টকাৰ ৰাজহ পৰ্যন্ত হেৰুৱাব লগা হৈছে বুলিও অভিযোগ একাংশৰ। নগৰবেৰা নদী সংৰক্ষিত বনাঞ্চলিক বিষয়াৰ কাৰ্যালয়ৰ বহু বিতৰ্কিত ঘোচখোৰ বন বিষয়া ভূপেন চন্দ্ৰ দাসে সংশ্লিষ্ট এলেকা সমুহৰ বালি মাফিয়া সকলৰ পৰা মাহিলী কমিছন পোৱাৰ বাবেই মুকলিকৈ এনে ব্যৱসায় নিৰ্বিঘ্নে চলাই যাবলৈ সক্ষম হোৱা বুলিও একাংশই মন্তব্য কৰিছে। নগৰবেৰা নদী সংৰক্ষিত বনাঞ্চলিক কাৰ্যালয়ৰ বিভিন্ন এলেকাত এনে অবৈধ ব্যৱসায় মুক্তভাৱে চলি থকাৰ অন্তৰালত বন বিষয়া গৰাকীৰ জেপলৈ প্ৰতিমাহে সোমোৱা লাখ-লাখ টকা বুলিও অভিযোগ । চৰকাৰৰ লাখ-লাখ টকাৰ ৰাজহ ফাঁকিৰে বিষয়া গৰাকীয়ে উঠিৰজা-বহিৰজা হৈ বিলাসী জীৱন কটাবলৈ সক্ষম হোৱা বুলিও অভিযোগত প্ৰকাশ। শেহতীয়াকৈ বন বিষয়া গৰাকীৰ ছত্ৰছায়াত দীৰ্ঘদিন ধৰি কলহী নদীত অবৈধ বালি খনন অব্যাহত  থকাত স্থানীয় লোকৰ মাজত তীব্ৰ প্ৰতিক্ৰিয়া সৃষ্টি হৈছে। নগৰবেৰা নদী সংৰক্ষিত বনাঞ্চলিক বিষয়া কাৰ্যালয়ৰ অধীনস্থ বিভিন্ন এলেকাত চলি থকা এনে অবৈধ বালি, চোৰাং কাঠ আদিৰ  ব্যৱসায় কঠোৰ হাতেৰে দমন কৰি দুৰ্নীতিগ্ৰস্ত বন বিষয়া গৰাকীৰ বিৰুদ্ধে তদন্ত সাপেক্ষে কঠোৰ ব্যৱস্থা গ্ৰহণ কৰিবলৈ সচেতন ৰাইজে চৰকাৰক দাবী জনাইছে।

স্বাধীনতাৰ দহ বছৰৰ পাছতেই জাঁজীমুখৰ বিভিন্ন এলেকা আৰু বৃহত্তৰ ৰজাবাৰী অঞ্চল সামৰি স্থাপন হৈছিল এখন ৰাজ্যিক পশু চিকিৎসালয় ।পৰবৰ্তী সময়ত টীয়কৰ সুসন্তান তথা সিংহ যুৱক ললিত চন্দ্ৰ ৰাজখোৱাই ইয়াৰ আন্তঃ গাঁথনি উন্নীত কৰিলে । চিকিৎসক সহায়কৰ আবাসগৃহ নিৰ্মান কৰি পশুপালক সকলে যাতে সকলো সময়তে উন্নত চিকিৎসা পাব পাৰে তাৰ সুব্যৱস্থা আছিল। কিন্তু পৰৱৰ্তী সময়ত চিকিৎসালয় খনক কৰ্মচাৰী আৰু  চৰকাৰেও অৱহেলা কৰিলে যাৰ ফলত ইয়াৰ বহু গৃহ ভাগি ছিগি গল। ৰাইজৰ অভাৱ অভিযোগ আৰু আবেদনৰ প্ৰতি সন্মান জনাই তদানীন্তন বিধায়ক মেম্বৰ গৈয়ে চিকিৎসালয় খনৰ উৱলি যোৱা ঘৰ সমূহ মেৰামতি কৰিবলৈ পুঁজি আবণ্টন দিয়াৰ লগতে আধাৰশিলা স্থাপন কৰে । কিন্তু পৰিতাপৰ বিষয় যে যোৱা   ছৱছৰেও সম্পূৰ্ণ নহল টীয়ক ৰজাবাৰী ৰাজ্যিক পশু চিকিৎসালয় খন । ২০১৪ চনতে সেই সময়ৰ বিধায়ক প্ৰয়াত মেম্বৰ গগৈ দেৱৰ তৎপৰতাত আধাশিলা  কৰা এই চিকিৎসালয় খনৰ দুটা ভৱন আজিও অৰ্ধনির্মিত হৈ পৰি আছে । বৃহত্তৰ জাঁজীমুখৰ লগতে পশ্চিম টীয়ক গাঁও পঞ্চায়তৰ অধীনৰ বানাক্ৰান্ত অঞ্চলৰ এইখন একমাত্ৰ পশু চিকিৎসালয়। ১৯৫৭ চনতে প্ৰতিষ্ঠা হোৱা এই চিকিৎসালয় খনৰ দুৰৱস্থাই ৰাইজক বাৰু কৈয়ে  অসুবিধাত পেলাইছিল৷ এটা ভগ্নপ্ৰায় ঘৰত বহু বছৰ বহু কষ্টৰে পশুধনক চিকিৎসা সেৱা আগবঢ়াই অহাৰ বাবেই  নতুনকৈ ডাক্তৰ, কৰ্মচাৰীৰ আবাসগৃহ সংযুক্ত  ৬৫ লাখ টকৰে নিৰ্মাণ কৰা হৈছিল এই চিকিৎলয় গৃহটো ।প্ৰায় ৮০% কাম সম্পূৰ্ণ হোৱাৰ পাছতো ছবছৰে এনেদৰে পৰি থাকিল ঘৰ কেইটা। 
স্থানীয় পশুপালক সকলৰ এটাই প্ৰশ্ন  কিয় সম্পূৰ্ণ হৈ নুঠিল এই ৬৫ লাখ টকীয়া টীয়ক ৰজাবাৰীৰ পশু চিকিৎসালয় খন ? কিয় পলায়ন কৰিলে নিৰ্মাণৰ লগত জড়িত ঠিকাদাৰ  জন ?  কোন কোন বিষয়া কৰ্মচাৰী এই চিকিৎসালয় খনৰ লগত জড়িত আছে ৰাইজে দিনৰ পোহৰত দেখা নাপায় । অসম চৰকাৰৰ পশুপালন মন্ত্ৰীৰ চকু পাৰিবনে এই চিকিৎসালয় খনত ।

ওদালগুৰি জিলাৰ ওৰাং মৌজা এলেকাৰ  ধনশ্ৰী চাহ বাগিছাত ২৯জুনত ৰাতিপুৱা ৫ মান বজাত ২০ কিলোগ্ৰাম গাঞ্জা সহ এজন লোকক আটক কৰিছে মাজবাট আৰক্ষীয়ে । মাজবাট আৰক্ষী থানাৰ ভাৰপ্ৰাপ্ত আৰক্ষী বিষয়া মিন্টু সন্দিকৈয়ে জনোৱা মতে ওৰাং মৌজা এলেকাৰ মাজবাট থানাৰ অন্তৰ্গত ধনশ্ৰী চাহ বাগিচাত  ২৯জুনত  ৰাতিপুৱা ৫ মান বজাত  বিষয়া গৰাকীৰ নেতৃত্বত যোৱা এটি আৰক্ষীৰ দলে অৰুনাচল সীমান্তৱৰ্তী  অঞ্চল পৰা  বাগিছা খনৰ অৰুনাচল  ৰূপা পথেৰে আহি থকা এজন বাইক আৰহীক দেখা পাই ।প্ৰথমে  নম্বৰবিহীন  বাইকত অহা যুবক জনক দেখা পাই আৰক্ষী দলটোৱে ৰবলৈ কৈছিল ।যদিও  যুবক জনে ৰবলৈ অমান্তি হৈছিল । পাছত  বাইকৰ পিচফালে থকা বেগটো তালাচী চলোৱাত যুবক জনৰ উৰহী গছৰ ওৰ ওলাই পৰে আৰু  আৰক্ষীয়ে ২০ কিলো গাঞ্জা সহ নাহেৰুবা গাওঁৰ অজিত দৈমাৰীৰ পুএ ফিৰোজ দৈমাৰী (২২)ক আটক কৰিবলৈ সক্ষম হয় ।মাজবাট আৰক্ষীয়ে যুবক জনৰ বিৰুদ্ধে ভাৰতীয় দণ্ড বিধি আইনৰ অধীনত এটি গোচৰ ৰুজু কৰি আজি ওদালগুৰি  দণ্ডাধীশ আদালতত হাজিৰ কৰাই জেল হাজোতলৈ প্ৰেৰন কৰে ।মাজবাট অৰুনাচল সীমান্তৱৰ্তী এলেকাত  চলি থকা নিষিদ্ধ গাঞ্জাৰ বিৰুদ্ধে অভিযান তীব্ৰতৰ কৰি তোলা হৈছে বুলি মাজবাট আৰক্ষী থানাৰ ভাৰপ্ৰাপ্ত আৰক্ষী বিষয়া মিন্টু সন্দিকৈয়ে জানিবলৈ দিছে ।