এজাক মাত্ৰ বৰষুণ! সেই বৰষুণ জাকতেই কৃত্ৰিম বানত বুৰ যায় নগাঁও জিলাৰ পুৰণিগুদামৰ এটা জনবহুল পথ৷নগাঁঁও জিলাৰ পুৰণিগুদাম আৰু ৰূপহীহাটকে ধৰি কে’বাখনো গাঁও সংযোগ কৰা অতি গুৰুত্বপূৰ্ণ পুৰণিগুদাম ৰূপহীহাট সংযোগী গড়কাপ্তানী পথটোৰ কৃত্ৰিম বান বুৰ যোৱাৰ লগতে পথটো জৰাজীৰ্ণ অৱস্থাৰ বাবে ৰাইজৰ অসুবিধাৰ সৃষ্টি হৈছে৷  এই জনবহুল পথটোৰে প্ৰতিদিনে শিশু-মহিলা,বৃদ্ধ,বেহা-বেপাৰ কৰা লোককে ধৰি নিকটৱৰ্তী গাঁও সমূহৰ বহু সংখ্যক লোকে বিপদসংকুলভাৱে যাতায়ত কৰি আহিছে৷ অতি গুৰুত্বপূৰ্ণ পথটোৰ এনে দুৰৱস্থাই এতিয়া সকলোকে জীয়াতু ভোগাইছে৷ বিশেষকৈ পুৰণিগুদাম কেঞাপটিৰ ৩৭ নং ৰাষ্ট্ৰীয় ঘাইপথৰ পৰা কেঞাপট্টী দলঙলৈকে পথচোৱা বিগত প্ৰায় পাঁচ বছৰ ধৰি জৰাজীৰ্ণ হৈ পৰাৰ বাবে এতিয়া এজাক মাত্ৰ বৰষুণতে একাঁঠু পৰ্যন্ত পানী হোৱাৰ ফলত পথচাৰীসকলৰ লগতে দুৰ্ভোগ ভুগিবলগীয়া হৈছে পথচোৱাৰ দুয়োকাষে থকা ক্ষুদ্ৰ ব্যৱসায়ীসকল৷ বৰষুণ হোৱাৰ পিছত কোনো নলা-নৰ্দমা নথকা পথচোৱা নিমিষতে পানীৰে উপচি পৰাৰ বাবে গ্ৰাহক সকলে দোকান সমূহত প্ৰৱেশ কৰিব নোৱাৰা হয়। ক’ভিড সৃষ্ট পৰিস্থিতিৰ মাজতো চৰকাৰে নিৰ্দিষ্ট কৰি দিয়া সময়সীমাৰ ভিতৰত দোকান খুলিও লোকচানৰ সন্মুখীন হয় ব্যৱসায়ীসকল। উপায়ন্তৰ হৈ শীঘ্ৰেই উক্ত পথচোৱা মেৰামতি কৰাৰ লগতে পথৰ দাঁতিত উপযুক্তভাৱে নলা-নৰ্দমাৰ নিৰ্মাণ কৰি সংশ্লিষ্ট গড়কাপ্তানী বিভাগক ব্যৱস্থা গ্ৰহণ কৰিবৰ বাবে ক্ষুদ্ধ একাংশ স্থানীয় ৰাইজৰ লগতে ভুক্তভোগী ক্ষুদ্ৰ ব্যৱসায়ীসকলে সজোৰে দাবী উত্থাপন কৰিছে৷

দৰঙৰ পূৱ মঙ্গলদৈ উন্নয়ন খণ্ডৰ অন্তৰ্গত ওজাগাও গাওঁ পঞ্চায়তত আচনিৰ নামত সংঘটিত হৈছে ব্যাপক অনিয়ম। পথ নিৰ্মাণৰ নামত বছৰে বছৰে লাখ লাখ টকা আবন্টন দি চলাই আছে লুণ্ঠন। গ্ৰামাঞ্চলৰ উন্নীতকৰণৰ স্বাৰ্থত বিভাগীয় কৰ্তৃপক্ষই  বৃহৎ পৰিমাণৰ ধন আবন্টন দিয়ে যদি তাৰে অধিকাংশ ধন পঞ্চায়ত প্ৰতিনিধিকে আদি কৰি  বিভাগীয় কৰ্মচাৰীৰ পকেটত সোমাৱাৰ অভিযোগ উত্থাপিত হৈছে। অভিযোগ অনুসৰি পূৱ মঙ্গলদৈ উন্নয়ন খণ্ডৰ অন্তৰ্গত ওজাগাও গাওঁ পঞ্চায়তৰ ১০নং ওৱাৰ্ড আৰু ৯নং ওৱাৰ্ডৰ মাজেৰে যোৱা পথৰ নামত সংঘটিত হৈছে অনিয়ম। গাঁৱৰ ৰাইজৰ যাতায়তৰ সুবিধাৰ্থে বিভাগীয় কৰ্তৃপক্ষই ২০২০-২১ বৰ্ষৰ এমজিএনৰেগা আচনিৰ অধিনত Earthen Bundh From Jholoman Ali House to Majibar Rahman Via Abul Hussain at Ozagaon Under MGNREGA 2020-21 বৰ্ষৰ এমজিএনৰেগা আচনিৰ নামত সাত লাখ একানব্বৈ হাজাৰ টকা আবন্টন দিছে যদিও চৰকাৰী প্ৰাক-কলনৰ নিয়ম নীতি উলংঘা কৰি নামমাত্ৰ কাম কৰি অধিকাংশ ধন আত্মসাত কৰাৰ অভিযোগ উত্থাপিত হৈছে।যাৰ ফলত বৰষুণৰ পানী জমা হৈ বোকাময় সৃষ্টি হোৱাত যমৰ যাতনাত ভুগাইছে ৰাইজক।আনহাতে যোৱা বৰ্ষতো উক্ত পথৰ নামত লাখ লাখ টকা আবন্টন দি আত্মসাত কৰিছিল পঞ্চায়ত প্ৰতিনিধিয়ে। যমৰ যাতনাত ভুগা স্থানীয় ৰাইজে অসম চৰকাৰ হায় হায়,আমাৰ ৰাস্তা ভাল কৰি দিয়ক,আচনিৰ নামত দুৰ্নীতি বন্ধ কৰক,দুৰ্নীতি গ্ৰস্থ কৰ্মচাৰী মুৰ্দাবাদ আদি ধ্বনি দি পথটোৰ মাজত কঠিয়া ৰুই প্ৰতিবাদ সাব্যস্ত কৰে স্থানীয় ৰাইজে। এক গোপনসুত্ৰে জানিব পৰা মতে গাওঁ পঞ্চায়তখনৰ জি আৰ এছ,এগ্ৰীকেটেড ইঞ্জিনীয়াৰ, কণিষ্ঠ অভিযন্তা আদি বিষয়া কৰ্মচাৰী সকলে প্ৰতিটো আচনিৰ বাবদ মোটা অংকৰ কমিচন লৈ ৰূপায়িত হোৱা আচনি সমূহ পৰিদৰ্শন নকৰাকৈয়ে বিল পাছ কৰি দিয়াৰ অভিযোগ। যাৰ ফলত ঠিকাদাৰৰূপি জনপ্ৰতিনিধিয়ে আচনিৰ নামত লাখ লাখ টকা লুণ্ঠন কৰিবলৈ সক্ষম হৈছে। ওজাগাও গাওঁ পঞ্চায়তত আচনিৰ নামত সংঘটিত হোৱা দুৰ্নীতিৰ বিৰূদ্ধে এক উচ্চ পৰ্যায়ৰ তদন্তৰ দাবী স্থানীয় ৰাইজৰ।

চৰকাৰী দণ্ডাধিকাৰীয়ে প্ৰ’টকল গঢ়ে আৰু ভাঙে।

ক’ৰোণা মহামাৰীৰ আতংকৰ বাবে চৰকাৰে ঘোষণা কৰিছে কোভিড প্ৰ’টকল।চৰকাৰী কোভিড প্ৰ’টকল অনুসৰি নিৰ্দিষ্ট জিলাত ১২ বজালৈ দোকান পোহাৰ তথা বজাৰ খুলা আৰু ১ বজাৰ পৰা সান্ধ্য আইন বলবৎ। ইফালে প্ৰশাসনৰ কাঢ়া নিৰ্দেশ মতে ৰাজহুৱা স্থানত একাধিক ব্যক্তিয়ে জুম কৰিব নোৱাৰিব ; সামাজিক দুৰত্ব বজাই ৰাখিব লাগিব।মহামাৰী বিধৰ অধিক সংক্ৰমণ নহ’বলৈ বজাৰ ঘাট বন্ধ কৰা হৈছে। কিন্তু কামৰূপ জিলাৰ বকোত ৰাজ্য চৰকাৰৰ কৃষি বিভাগে ভাঙিছে মহামাৰী কোভিড প্ৰ’টকল।

উল্লেখ্য যে ; প্ৰধান মন্ত্ৰী কিষাণ আঁচনি খনৰ চৰকাৰী ধন লাভ কৰিবলৈ জমা দিব লগা নথি পত্ৰ সমুহ ঠিক ঠাক কৰিবলৈ গাওঁৰ ৰাইজ হিল দোল ভাঙি ওলাই আহিছে দলে দলে। এই দৃশ্য কামৰূপ জিলাৰ বকো ৰাজহ চক্ৰৰ চক্ৰ বিষয়াৰ কাৰ্য্যালয়ৰ। আজি কেৱাদিনো ধৰি বকো ৰাজহ চক্ৰৰ চক্ৰ বিষয়াৰ কাৰ্য্যালয় আৰু ৰাজহ আদায় লোৱা মৌজাদাৰ কাৰ্য্যালয়ত এনেদৰে ভিৰ হৈছে যে পান জাপা দি জাপ খাই ভিৰ কৰিছে কাৰ্য্যালয় দুয়োটাতে। ইয়াৰ পিছতে নথি পত্ৰ সমুহ ফটোষ্টেট উলিয়াবলৈ ফটোষ্টেট দোকান অথবা চেন্টাৰ বোৰত ভিৰৰ দৃশ্য দেখিলে অনুমান হয় কোভিড পজিটিভ ৰোগীৰ সংখ্যা বঢ়াবলৈ ৰাজ্য চৰকাৰৰ কৃষি বিভাগে ঠিকা লৈছে।

ক’ৰোণা কালৰ এই মহা আতংকৰ সময়ত চৰকাৰে কিয় এই আচঁনিৰ ধন মোকলাৱ বিছাৰিছে। ইয়াৰ বিকল্প ব্যৱস্থা গ্ৰহণ কৰিব নোৱাৰি নেকি বুলি বকোৰ সমাজ সচেতন ৰাইজে প্ৰশ্ন উত্থাপন কৰিছে । আনহাতে এফালে চৰকাৰৰ মুখ্যমন্ত্ৰী ; স্বাস্থ্য মন্ত্ৰী আৰু বৰমুৰীয়া সকলেই কোভিড প্ৰ’টকল নমনাৰ বাবে সাধাৰণ জনতাক শাস্তি প্ৰদান কৰে আৰু এফালে চৰকাৰৰ বৰমুৰীয়াৰ কাৰ্য্যালয়তেই নিয়ম ভংগ কৰি জনতাৰ থেলা হেছাৰ ভিৰ কৰাৰ ব্যৱস্থা কৰে। এয়া বাৰু কেনেকুৱা চৰকাৰৰ কোভিড প্ৰ’টকল নীতি। এই লৈ শংকিত হৈ পৰিছে বকোৰ জনসাধাৰণ।