আবেলি লাহোৱাল প্ৰেছ ক্লাবৰ এখন কাৰ্যনিৰ্বাহক সভা অনুষ্ঠিত হৈ যায় ৷ প্ৰেছ ক্লাবৰ কাৰ্য্যলয়ত অনুষ্ঠিত হোৱা সভাখনত সভাপতিত্ব কৰে ক্লাবৰ সভাপতি মুক্তামণি হাজৰিকাই৷ সভাৰ উদ্দেশ্য ব্যাখ্যা কৰে ক্লাবৰ ভাৰপ্ৰাপ্ত সম্পাদক লক্ষিন্দৰ কুৰ্মীয়ে৷ উক্ত সভাতেই নৱগঠিত মটক স্বায়ত্ব শাসিত পৰিষদত অন্তৰ্ভুক্ত সদস্য তথা লাহোৱাল প্ৰেছ ক্লাবৰ উপদেষ্টা দীপজয় শইকীয়াক ক্লাবৰ তৰফৰ পৰা অভিনন্দন জনোৱা লগতে বিদায় সম্ভাষণ জনোৱা হয় ৷ লগতে অসম চৰকাৰৰ ভাষা গৌৰৱ আঁচনিৰ অধীনত লেখক সম্বৰ্ধনা বঁটা লাভ কৰা লাহোৱাল প্ৰেছ ক্লাবৰ উপদেষ্টাদ্বয় ভূষণজ্যোতি সন্দিকৈ আৰু যাদৱ গগৈক এখনি ফুলাম গামোচাৰে অভিনন্দন জনোৱা হয়৷ সভাত লাহোৱাল প্ৰেছ ক্লাবৰ উপদেষ্টা ভূষণজ্যোতি সন্দিকৈ, কনৌজ শইকীয়া, যাদৱ গগৈ, উপ সভাপতি বিজন্ত গগৈ, সদস্য উজ্জল শইকীয়া, যুগল কোঁৱৰ আৰু ধন্টি শইকীয়া উপস্থিত থাকি বক্তব্য আগবঢ়ায়।

অসম  চৰকাৰৰ মথাউৰি সবলীকৰন আঁচনিৰ বাবে গায়ন গাঁও উজনি নামঘৰৰ স্থানান্তৰ হৈছে গাঁও খনৰ মধ্যস্থল গায়ন গাঁও নৱজ্যোতি উচ্চমাধ্যমিক বিদ্যালয়ৰ কাষলৈ। সেই উদ্দেশ্যে বৃহস্পতিবাৰে নামঘৰৰ লাইখুটা স্থাপনৰ শুভ উদ্বোধন কৰাৰ বাবে এক বৰ্ণাঢ্য কাৰ্যসূচী লোৱা হৈছিল। পুৱা ৮ বজাত এক ধৰ্মীয় বিশাল শোভাযাত্ৰাৰে এলেঙি নৰসিংহ সত্ৰৰ ডেকা সত্ৰীয়া নৱজ্যোতি মহন্তক ডবা শংখ, গায়ন বায়নেৰে আদৰি আনে ৰাইজে। ডেকা সত্ৰীয়া গৰাকীয়ে নিজে সিদ্ধ কৰা ভোগ, সোন ৰূপকে ধৰি পঞ্চৰত্ন দি লাইখুটাৰ নিৰ্মাণৰ শুভ উদ্বোধন কৰি ধৰ্মীয় বক্তৃতাৰে সকলোকে মুগ্ধ কৰে। বক্তৃতাত তেখেতে নামঘৰত নামকীৰ্তন , ভাওনা আদিৰ বাদে যাতে কোনেও গ্ৰাম্য আলোচনা নকৰে তাৰ প্ৰতি সকলো উপস্থিত ৰাইজক আহ্বান জনায়। এই অনুষ্ঠানতে মাজুলীৰ বিষ্ণুপুৰৰ বিশিষ্ট ভাস্কৰ্য শিল্পী দেহেশ্বৰ শইকীয়া, মিস্ত্ৰী জীৱন কলিতা, পূৰ্ণকান্ত কলিতা আৰু গহীন বৰাক সম্বৰ্ধনা জনায়। গাঁওবাসীৰ লগতে কাষৰীয়া নিকিনি খোৱা গাঁও , কলনীবাৰী গাঁও, নপমুৱা গাঁও, লাহন গাঁওৰ নিমন্ত্ৰণ অতিথি সকলে খুটাত শিল বালি চিমেন্ট  দিয়ে। অনুষ্ঠানত গাঁওৰ সমাজ কৰ্মী আনন্দ শইকীয়াই বক্তব্য আগবঢ়াই। বহুতো লোকে থিতাতে বহু অনুদান আগবঢ়াই এই অনুষ্ঠানতে। ৰাইজে দান অনুদানেৰে এই মহৎ কৰ্ম কৰিবলৈ লৈছে গতিকে ৰাইজে এই অনুষ্ঠানলৈ দান বৰঙণি আগবঢ়াই সোনকালে নামঘৰ ভাগ সম্পূৰ্ণ কৰাত সহযোগিতা  কৰাৰ লগতে দিহা পৰামৰ্শ কামনা কৰিছে। উপস্থিত সকলো ৰাইজ আৰু দাতা সকলক , বিশেষকৈ ভূমিদাতা বিমান বৰাৰ পৰিয়ালক শলাগৰ শৰাই আগবঢ়াই সভাপতি দিলীপ বৰা, যুটীয়া সম্পাদক প্ৰশান্ত বৰা আৰু জয়ন্ত মাধৱ কলিতাই। কোনো লোকে যদি নামঘৰৰ বাবে দান আদবঢ়াৱ বিচাৰে ৬০০০৫৯৯৯২৯ ত যোগাযোগ কৰিব পাৰিব বুলি বিষয়ববীয়া সকলে আমাক অৱগত কৰে ।

যান-জট নিয়ন্ত্ৰণৰ বাবে ট্ৰেফিক পইন্ট আছে যদিও যান বাহন আৰক্ষীৰ অভাৱৰ লগতে যান বাহন ৰখোৱা স্থানৰ অভাৱৰ বাবেই তীব্ৰ যান-যটৰ সমস্যাই দেখা দিছে জামুগুৰিহাটৰ মূল ব্যৱসায়িক কেন্দ্ৰস্থলত৷যাৰবাবে এতিয়া যানজটৰ সমস্যা যেন নিয়ন্ত্ৰণহীন হৈ পৰিছে জামুগুৰিহাটত ৷ সময়ৰ লগত খাপখোৱাকৈ ব্যৱসায়িক প্ৰতিস্থানৰ সংখ্যা দিনকদিনে ক্ৰমাৎ বৃদ্ধি পোৱাৰ উপৰিও জামুগুৰিহাটৰ ব্যৱসায়িক কেন্দ্ৰস্থল নগৰলৈ ৰূপান্তৰিত হ’ল ৷ যদিও যানবাহনসমুহ নিয়ন্ত্ৰণৰ বাবে ট্ৰেফিক পুলিচৰ অভাৱ আৰু ব্যৱসায়িক কেন্দ্ৰস্থলৰ নিকটৱৰ্তী স্থানত নিৰ্দিষ্টকৈ গাড়ী পাৰ্কিংৰ সুবিধা নথকাৰ ফলত কেন্দ্ৰস্থলটোত দিনকদিনে যানজঁটৰ সমস্যা বৃদ্ধি পাবলৈ ধৰিছে৷বৰ্তমান সময়ত প্ৰায়সংখ্যক লোকৰ ঘৰতেই একোখনকৈ নিজাকৈ দুচকীয়া অথবা চাৰিচকীয়া বাহন থকাৰ বাবেই ব্যৱসায়িক কেন্দ্ৰস্থলটোলৈ বজাৰ সমাৰ কৰিবলৈ অহা লোকসকলে নিজৰ নিজৰ গাড়ী, মটৰচাইকেল সমূহ নিজৰ ইচ্ছানুযায়ী বিশৃংখলভাৱে ৰখাই থোৱাৰ ফলত ব্যৱসায়িক কেন্দ্ৰস্থলটোৰ মাজেদি দুখন বাহন একে সময়তে পাৰ হৈ যোৱাতো জটিল হৈ পৰিছে ৷ ইয়াৰোপৰি চাৰিলেনযুক্ত পথ নিৰ্মাণৰ কামত ব্যৱহৃত দৈনিক শতাধিক শিল-বালিভৰ্তি ডাম্পাৰ ব্যৱসায়িক কেন্দ্ৰস্থলৰ মাজেদিয়েই অহা যোৱা কৰাত ব্যাপক সমস্যাৰ সন্মুখীন হ’বলগীয়া হৈছে পথচাৰীৰ লগতে যান-বাহনৰ গৰাকীসকলো ৷ ঠিক একেদৰে প্ৰতিদিনাই সন্ধিয়াৰ সময়ছোৱাৰ লগতে  ব্যৱসায়িক কেন্দ্ৰস্থলটোৰ নাতিদূৰত প্ৰতি বৃহস্পতিবাৰে বহা সপ্তাহিক বজাৰৰ দিনটোত জামুগুৰি ব্যৱসায়িক কেন্দ্ৰস্থলত অভাৱনীয় যান – জটৰ সমস্যাই দেখা দিয়া পৰিলক্ষিত হৈছে ৷ এই যানজটৰ সমস্যাই কেন্দ্ৰস্থলটোৰ মাজেদি খোজকাঢ়ি আৰু চাইকেল লৈ জামুগুৰিহাটৰ বিভিন্ন বিদ্যালয় আৰু মহাবিদ্যালয়লৈ অহা যোৱা কৰা ছাত্ৰ ছাত্ৰী সকলকো যাতায়াতৰ ক্ষেত্ৰত সমস্যাত পেলাই ভয়ংকৰ দূৰ্ঘটণা সংঘটিত হোৱাৰ আশংকাৰ ফালেও ঠেলি দিছে৷তাৰোপৰি ১৫ নং ৰাষ্ট্ৰীয় ঘাইপথৰে অহা যোৱা কৰা সৰু বৰ গাড়ী, যাত্ৰীবাহি, বাছসমুহ জামুগুৰিহাটৰ ৰাষ্ট্ৰীয় ঘাইপথৰ মূল ট্ৰেফিক পইন্টৰ কেকুঁৰিটোৰ ওচৰত চালকৰ নিজ খেয়ালখুচিমতে ৰখা আৰু অন্যান্য সৰু ব্যৱসায়িক যান বাহনসমুহো নিজ ইচ্ছামতে ৰখোৱাৰ বাবেই বিগত সময়চোৱাত কেবাটাও দূৰ্ঘটনা সংঘটিত হৈছে৷ঠিক একেদৰে ১৫ নং ৰাষ্ট্ৰীয় ঘাইপথৰ পৰা ব্যৱসায়িক কেন্দ্ৰস্থলটোৰ মাজেৰে শেহতীয়াকৈ পৰ্যটনৰ থলী হিচাপে স্বীকৃতি লাভ কৰা পাণপুৰঘাট, চকীঘাট আৰু গমিৰিপাললৈ যোৱা পথ তিনিটাৰ মধ্যম স্থানত সম্প্ৰতি ট্ৰেফিক পুলিচৰ অভাৱৰ বাবেই বিশৃংখলভাৱে চাইকেল, মটৰচাইকেল, চাৰিচকীয়া বাহন আদি ৰখাই থোৱাত যিকোনো সময়তেই দুৰ্ঘটনা সংঘটিত হোৱাৰ আশংকা প্ৰকট হৈ উঠিছে৷বিশেষকৈ প্ৰতিদিনেই যানজটৰ সমস্যাই এতিয়া গুৰুত্বৰ ৰূপ ধাৰণ কৰা জামুগুৰি ব্যৱসায়ীক কেন্দ্ৰস্থলত এই সমস্যা দূৰ কৰিবৰ বাবে ট্ৰেফিক পুলিচ মোতায়েন কৰাৰ লগতে সংশ্লিষ্ঠ বিভাগক পৰিকল্পিত ভাৱে পাৰ্কিং ৰ  ব্যৱস্থা কৰি শীঘ্ৰে এই গুৰুতৰ সমস্যাৰ পৰা পৰিত্ৰান পোৱাবলৈ সচেতন ৰাইজে দাবী উত্থাপন কৰিছে৷উল্লেখ্য যে পূৰ্ৱে জামুগুৰিহাটৰ ১৫ নং ৰাষ্ট্ৰীয় ঘাইপথৰ লগত থকা ট্ৰেফিক পইন্টত ট্ৰেফিকৰ দায়িত্ব কেবাগৰাকীও গৃহৰক্ষী জোৱানে সুচাৰুৰূপে পালন কৰিছিল যদিও যোৱা ডেৰ বছৰ ধৰি জামুগুৰিহাটত যান বাহন নিয়ন্ত্ৰণৰ বাবে দেখা পোৱা ন’গল এগৰাকীও ট্ৰেফিক পুলিচ ৷

নগাঁও জিলাৰ বিভিন্ন স্থানত অবৈধ সুৰাৰ ৰমৰমীয়া বেহা চলি আছে। নগাঁও চহৰ আৰু ইয়াৰ পাৰ্শ্বৱৰ্তী অঞ্চলকে ধৰি জিলাখনৰ বিভিন্ন স্থানত স্থানীয় আৰু দেশীয় তথা‌ বিলাতী সুৰাৰ অবৈধ ব্যৱসায় চলি আছে। অবৈধ সুৰাৰ অবাধ প্ৰচলনে বিভিন্ন স্থানত সামাজিক বিশৃংখলাৰ সৃষ্টি কৰিছে। সংঘটিত হৈছে বহু কেইটা অপৰাধজনিত ঘটনা। মাজে সময়ে আৰক্ষী আৰু আবকাৰী বিভাগে অবৈধ সুৰাৰ বিৰুদ্ধে অভিযান চলাই যদিও জিলাখনত অবৈধ সুৰাৰ প্ৰচলন বন্ধ কৰাত তেওঁলোক সফল হ’ব পৰা নাই। জিলা খনৰ বিভিন্ন প্ৰান্তৰ সচেতন মহলে অভিযোগ কৰিছে যে অবৈধ সুৰাৰ বিৰুদ্ধে আৰক্ষী আৰু আবকাৰী বিভাগক অবগত কৰিলেও তেওঁলোকে শক্তিশালী পদক্ষেপ গ্ৰহণ নকৰে। আৰক্ষী আৰু আবকাৰী বিভাগৰ লগত অবৈধ সুৰাৰ ব্যৱসায়ীৰ গোপন বুজা-বুজি থকাৰ বাবে তেওঁলোকে শক্তিশালী পদক্ষেপ গ্ৰহণ কৰিব নিবিচাৰে বুলি সচেতন মহলে মন্তব্য কৰিছে। আনহাতে মাজে সময়ে অবৈধ সুৰাৰ বিৰুদ্ধে আবকাৰী বিভাগে অভিযান চলাই যদিও একাংশ আবকাৰী বিষয়া কনিষ্টবলে ব্যৱসায়ী সকলৰ পৰা ধন লোৱাৰ অভিযোগ উঠিছে। নগাঁও চহৰকে ধৰি জিলাখনৰ ঠাই বিশেষে অবৈধ সুৰা ব্যৱসায়ীক আবকাৰী বিভাগৰ একাংশ বিষয়া কৰ্মচাৰীয়ে আটক কৰে যদিও পিছত ৰহস্যজনক ভাবে ব্যৱসায়ী সকলক এৰি দিয়াৰ অভিযোগ উঠিছে। কালিও নগাঁও চহৰ আৰু ইয়াৰ পাৰ্শ্ববৰ্তী অঞ্চলৰ একাংশ ব্যৱসায়ী পৰা আবকাৰী বিভাগে ধন লোৱাৰ কথা ব্যৱসায়ী সকলে সংবাদ মাধ্যমৰ আগত জানিবলৈ দিয়ে। সচেতন মহলে জিলাখনত অব্যাহত থকা অবৈধ সুৰাৰ ৰমৰমীয়া ব্যৱসায় শীঘ্ৰে বন্ধ কৰিবলৈ নগাঁও জিলা প্ৰশাসনক দাবী জনাইছে।

কোকৰাঝাৰ জিলাৰ অন্তৰ্গত শ্ৰীৰামপুৰত আৰক্ষীৰ অভিযানত ভাং সহ ট্ৰাক জব্দ। যোৱা নিশা শিমুলটাপু আৰক্ষীৰ দলে শ্ৰীৰামপুৰত ৩১ নং ৰাষ্ট্ৰীয় ঘাইপথত তালাচী চলাই ট্ৰাকখনক আটক কৰে। অসমৰ পৰা বংগ অভিমুখে গৈ থকা ইউ কে ০৬ চিবি ২২৫৩ নম্বৰৰ ট্ৰাক খনৰ গোপন চেম্বাৰত উদ্ধাৰ কৰে বৃহৎ পৰিমানা ভাংসমুহ। ট্ৰাকৰ লগতে চালক জছৱিন্দৰ সিং ক আটক কৰে  ৷আৰক্ষীৰ আগত চালকে স্বীকিৰোক্তি দিয়া মতে অবৈধ গাঞ্জাখিনি নাগালেণ্ডৰ ডিমাপুৰৰ পৰা বোজাই কৰি বংগৰ কলিকতালৈ লৈ যোবাৰ সময়ত শিমুলটাপু আৰক্ষীয়ে ট্ৰাকখন যোৱা নিশা আটক  কৰি আজি তালাচী চলোৱাত ট্ৰাকখনৰ গোপন চেম্বাৰৰ পৰা 90 খন গাঞ্জাৰ পেকেট উদ্ধাৰ হয়।উদ্ধাৰ কৃত গাঞ্জাখিনিৰ বজাৰ মূল্য  এক কোটি টকা হব বুলি অনুমান কৰা হৈছে ।