চতিয়া সমষ্টিত এতিয়া বলিছে নিৰ্বাচনী বতাহ। ৰাজ্যখনত নিৰ্বাচনী অধিসূচনা জাৰি কৰা আগলৈকে সমষ্টিটোত শাসনাধিষ্ঠ চৰকাৰখনৰ কেইবাটাও গুৰুত্বপূৰ্ণ অনুষ্ঠানৰ লগতে দলীয় সভা অনুষ্ঠিত হৈ যায়। সমষ্টিটোৰ জামুগুৰিহাটত অলপতে অনুষ্ঠিত এক দলীয় সভাত আগন্তক বিধান সভা নিৰ্বাচনত সমষ্টিটোৰ পৰা প্ৰদেশ কংগ্ৰেছ কমিটিৰ সভাপতি ৰিপুন বৰাক প্ৰত্যাহ্বান জনাইছে বিধায়ক পদ্ম হাজৰিকাই। অলপতে চতিয়া সমষ্টিৰ টুপীয়াত অনুষ্ঠিত কংগ্ৰেছৰ এখন বুথ সন্মিলনত উপস্থিত থাকি সাংবাদিকৰ আগত চতিয়া সমষ্টিত কংগ্ৰেছ দল জয়যুক্ত হ’ব বুলি মন্তব্য কৰাৰ পিছতেই প্ৰদেশ কংগ্ৰেছ দলৰ সভাপতিগৰাকীক এই দৰে উভতি ধৰিছে চতিয়াৰ বিধায়ক পদ্ম হাজৰিকাই। ৰিপুন বৰাক প্ৰত্যাহ্বান জনাই বিধায়ক পদ্ম হাজৰিকাই কয়- তেওঁৰ সৎ সাহস আছে যদি চতিয়ালৈ আহি আগন্তক নিৰ্বাচনত মোৰ লগত প্ৰতিদ্বন্দ্বিতা কৰক। যি জন ৰিপুন বৰাই ৰাজ্যিক সভাপতি হৈ নিজৰ পঞ্চায়তত নিজৰ আৰ্ড মেম্বাৰকে জিকাব নোৱাৰিলে,সেইজন ৰিপুন বৰাই চতিয়াত কংগ্ৰেছ জিকোৱাৰ কথা এক অলীক কল্পনাহে। বিধায়ক গৰাকীয়ে কয়-ৰিপুন বৰা তিহাৰ জে’লৰ পৰা ওলাই অহাৰ পাছতেই মূৰৰ বিকৃতি ঘটিছে। সেইবাবেই কিছুদিন আগতে নিজ দলকে গালি পাৰি প্ৰলাপ বকিছিল। ৰিপুন বৰা অসম প্ৰদেশ কংগ্ৰেছৰ সভাপতি হৈ থকাটো বিজেপিৰ বাবেই শুভ লক্ষণ বুলি উল্লেখ কৰি ৰিপুন বৰাক কংগ্ৰেছত এজেন্ট কৰি ৰাখিছোঁ‌ বুলি কটাক্ষ কৰে বিধায়ক হাজৰিকাই।

এইবাৰ গোলাঘাট সমষ্টিত নিৰ্বাচনী বাতাবৰণৰ  ৰং যে ধূসৰ হৈ পৰিছে সেইকথা পুনৰবাৰ প্ৰমাণ হ’ল। তিনিটা কালজুৰি কংগ্ৰেছৰ দখলত থকা সমষ্টিটো এইবাৰ বিজেপিৰ দখললৈ অহাৰ সম্ভাৱনা আছিল যদিও দলটোৰ তৃণমূল কৰ্মীসকলৰ অসন্তোষ্টিয়ে নিশ্চয়কৈ দলটোক বিমোৰত পেলাব। বিশেষকৈ সমষ্টিটোত একালৰ কংগ্ৰেছী নেত্ৰী অজন্তা নেওগৰ বিজেপি আগমণৰ পিছতেই বিজেপি কৰ্মীসকলৰ মাজত দুটা ফৈদ হোৱা পৰিলক্ষিত হল । বিভিন্ন সময়ত  দলীয় কৰ্মীসকলৰ মাজৰ  সংঘাতৰ প্ৰতিফলন হৈ আহিছিল যদিও সোমবাৰে  গোলাঘাটত বিজেপিৰ পৰ্যবেক্ষকৰ তীক্ষ্ণ পৰ্যবেক্ষণ প্ৰক্ৰিয়া চলি থকা মাজতে সন্ধিয়া  জিলা বিজেপি কাৰ্যালয়ত বিজেপি কৰ্মী সকলৰ মাজত পুনৰবাৰ  এক অপ্ৰীতিকৰ পৰিস্থিতিৰ উদ্ভৱ হোৱা দেখা যায়।জানিব পৰা মতে , গোলাঘাট ,সৰুপথাৰ আৰু দেৰগাওঁ বিধানসভা সমষ্টিত দলীয় প্ৰাৰ্থীত্বক লৈ পৰ্যবেক্ষণ কৰিবলৈ অহা বিজেপিৰ পৰ্যবেক্ষকগৰাকী কালি সন্ধিয়াভাগত গোলাঘাট বিজেপি কাৰ্যালয়ত বিভিন্ন গৰাকী নেতা কৰ্মীৰ লগত আলোচনাত মিলিত হয় । যদিও আলোচনা চলি থকাৰ মাজতে সমষ্টিটোত ইতিপূৰ্বে দলীয় কৰ্মীসকলৰ মাজত ঘটি থকা অন্তৰ্কন্দলৰ প্ৰতিচ্ছবিখন সম্পূৰ্ণ ৰূপে প্ৰতিফলন হোৱা দেখা যায়।  অৰ্থাৎ  গোলাঘাট বিধানসভা সমষ্টিত নবিজেপি আৰু পুৰণি বিজেপিৰ সংঘাত যে ক্ৰমাৎ অধিক বৃদ্ধি পাবলৈ ধৰিছে ইয়াৰে প্ৰমাণ হ’ল  আজি কাৰ্যালয়ৰ ভিতৰতে দুই ফৈদৰ জয়ধ্বনিত। এফালে অজন্তা নেওগ আনফালে বিতুপণ শইকীয়া জিন্দাবাদ, তথা ভাৰত মাতা কি জয় ধ্বনিৰে মুখৰিত হল গোলাঘাট বিজেপি কাৰ্যালয়। বিভিন্ন সময়ত বিজেপিৰ এই শক্তিশালী  নেতাদ্বয়ে নিজৰ নিজৰ শক্তি প্ৰদৰ্শন কৰি আহিছিল  যদিও  এতিয়া সময়েহে কব অজন্তা নেওগ আৰু বিতুপন শইকীয়াৰ মাজত কোনজনে প্ৰকৃততে দলীয় টিকট লাভ কৰিব।

ৰাজ্যৰ অন্যান্য ঠাইৰ লগতে গোলাঘাট  জিলাতো বিধানসভা নিৰ্বাচন সুচাৰুৰূপে সম্পন্ন কৰাৰ বাবে প্ৰয়োজনীয় সকলো ব্যৱস্থা গ্ৰহণ কৰা হৈছে । জিলাখনৰ খুমটাই আৰু গোলাঘাট সমষ্টিতো এইবাৰ প্ৰথমবাৰৰ বাবে বিশেষভাৱে সক্ষম আৰু ৮০ বছৰ বয়সৰ উৰ্ধৰ ভোটদাতাসকলক ডাক বেলটৰ সুবিধা প্ৰদান কৰা হৈছে । গোলাঘাট আৰু খুমটাই সমষ্টিত মুঠ ১২১১ গৰাকী বিশেষভাৱে সক্ষম ভোটদাতা আছে । ইয়াৰে খুমটাই সমষ্টিৰ ৫২০ আৰু গোলাঘাট সমষ্টিৰ ৬৯১গৰাকী । একেদৰে ৮০ বছৰ বয়সৰ উৰ্ধৰ গোলাঘাট সমষ্টিত ১৩১৮গৰাকী আৰু খুমটাইত ৮৪৮ গৰাকী ভোটদাতাৰ নাম এতিয়ালৈকে তালিকাভুক্ত হৈছে ।যদিও  ভোটদাতাৰ সংখ্যা অধিক বৃদ্ধি পোৱাৰ সম্ভাৱনা আছে ।  বি এল অ’ আৰু আই চি ডি এছৰ চুপাৰভাইজাৰ সকলে দুয়োটা সমষ্টিত ঘৰে ঘৰে গৈ বিশেষভাৱে সক্ষম আৰু ৮০ বছৰ বয়সৰ উৰ্ধৰ ভোটদাতাসকলৰ নাম তালিকাত নিশ্চিত কৰাৰ চূড়ান্ত প্ৰক্ৰিয়া অব্যাহত ৰাখিছে  । দুই-এদিনৰ ভিতৰতে চূড়ান্ত তালিকা প্ৰকাশ পাব । যিসকল ৮০ বছৰ বয়সৰ উৰ্ধৰ ভোটদাতা আৰু বিশেষভাৱে সক্ষম ভোটদাতাই ডাক বেলটযোগে ভোট দিব বিচাৰে তেওঁলোকে এতিয়াও 12D আৱেদন পত্ৰৰ জৰিয়তে নিজৰ নাম পঞ্জীয়ন কৰিব পাৰিব । তেওঁলোকৰ আৱেদন পত্ৰসমূহ ঘৰৰ পৰাই সংগ্ৰহ কৰা হ’ব ।