দৈনন্দিন বাৰ্তাৰ সেৱা, মুম্বাই, ৪ নৱেম্বৰঃ ৰিপাব্লিক টিভিৰ সম্পাদক অৰ্নৱ গোস্বামীক আটক। ২০১৮ চনৰ আত্মহত্যাৰ গোচৰত মুম্বাই আৰক্ষীয়ে আটক কৰে ৰিপাব্লিক টিভিৰ সম্পাদক গৰাকীক।

২০১৮ চনৰ মে ৫৩ বছৰীয়া ইন্টেৰিয়ৰ ডিজাইনাৰ আনভাই নাইক আৰু তেওঁৰ মাতৃ কুমুদ নাইকৰ আত্মহত্যাৰ ফলত মৃত্যু হৈছিল। আনভাই নাইকে লিখা আত্মহত্যাৰ টোকা পোৱা গৈছিল।

নাইকে লিখিছিল যে, গোস্বামী আৰু আন দুজনে তেওঁক ৫.৪০ কোটি টকা পৰিশোধ কৰা নাই। যাৰ ফলত তেওঁৰ বিত্তীয় বাধাৰ সৃষ্টি হৈছিল। উপযুক্ত প্ৰমাণৰ অভাৱত ২০১৯ চনত গোচৰটো বন্ধ হৈছিল যদিও ২০২০ চনৰ মে মাহত এই আত্মহত্যা ঘটনাৰ চিআইডি তদন্তৰ ঘোষনা কৰিছিল মহাৰাষ্ট্ৰৰ গৃহমন্ত্ৰী অনিল দেশমুখে।

দৈনন্দিন বাৰ্তা সেৱা, গুৱাহাটী, ৩ নৱেম্বৰঃ সৰ্বব্যাপী বেংকিংৰ উদ্দেশ্য আগত লৈ চলি অহা সাৰ্বজনীন বেংক বন্ধন বেংকে আজি বিত্তীয় বৰ্ষ ২০২০-২১ৰ দ্বিতীয় ত্ৰৈমাসিকৰ বিত্তীয় ফলাফল ঘোষণা কৰিছে৷ বেংকটোৰ মুঠ ব্যৱসায়(সঞ্চয় আৰু আগধন) বছৰি ২৫.৯০ শতাংশলৈ বৃদ্ধি হৈ ১৪২৭৪২.৩  কোটি টকা হৈছে৷

বিত্তীয় বৰ্ষ ২০১৫-১৬ ত ব্যৱসায় আৰম্ভ কৰা বন্ধন বেংকে চলিত বৰ্ষৰ আগষ্ট মাহত সফলতাৰে ইয়াৰ পাঁচটা বছৰ সম্পূৰ্ণ কৰিলে৷ মাত্ৰ পাঁচটা বছৰৰ ভিতৰতে বেংকটোৱে ৪৭০১ টা বেংকিং আউটলেটৰ জৰিয়তে ২.০৮ কোটি গ্ৰাহকক সেৱা আগবঢ়াই আহিছে আৰু ইয়াত কৰ্মৰত মুঠ কৰ্মচাৰীৰ সংখ্যা হৈছে ৪৫,৫৪৯ গৰাকী৷

দেশৰ অৰ্থনীতি ক্ৰমশঃ আনলকিং হোৱাৰ লগতে বেংকৰ সঞ্চয়বহী বিগত বৰ্ষৰ একেই ত্ৰিমাসিকতকৈ ৩৪.৪ শতাংশ বৃদ্ধি পাইছে আৰু এতিয়া বেংকটোৰ মুঠ সঞ্চয় হৈছেগৈ ৬৬,১২৭.৭ কোটি টকা৷ কাৰেণ্ট একাউণ্ট, চেভিংছ একাউণ্ট(চিএএছএ বহী) বছৰি ৫৬.২ শতাংশ বৃদ্ধি হৈ ২৫,২৭৯ কোটি টকা হৈছেগৈ আৰু সামগ্ৰিকভাৱে চি এ এছ এৰ অনুপাত হৈছে এতিয়া ৩৮.২ শতাংশ৷

একেদৰে আগধনৰ ক্ষেত্ৰত চাবলৈ গ’লে চলিত বৰ্ষৰ একেই ত্ৰিমাসিকৰ তুলনাত বছৰি বৃদ্ধিৰ পৰিমাণ ১৯.৪ শতাংশ আৰু মুঠ আগধনৰ পৰিমাণ হৈছে ৭৬,৬১৪.৬ কোটি টকা৷ মানসম্পন্ন ঋণবহীৰ প্ৰমাণ দি বেংকটোৰ মুঠ এন পি এৰ পৰিমাণ হৈছে ০.৪ শতাংশ৷ মূলধনৰ উপলব্ধতাৰ অনুপাত(চিএআৰ) হৈছে বেংকৰ স্থিৰতাৰ সংকেত৷

বৰ্তমান প্ৰয়োজনীয় পৰ্যায়তকৈ অধিকভাৱে লাভসহ উক্ত পৰিমাণ হৈছে ২৭.৮ শতাংশ৷ বেংকটোৰ মুঠ লাভৰ পৰিমাণ হৈছে ৯২০ কোটি টকা৷ ২০২০ চনৰ ৩০ জুনত অন্ত পৰা ত্ৰৈমাসিকতকৈ এই পৰিমাণ ৬৭.৩ শতাংশৰ অধিক৷

বন্ধন বেংকৰ এই সফলতাৰ সন্দৰ্ভত বেংকটোৰ এমডি তথা চিইঅ’ চন্দ্ৰশেখৰ ঘোষে কয় যে, চলিত বিত্তীয় বৰ্ষৰ প্ৰথমটো ত্ৰৈমাসিকত সম্পূৰ্ণ লকডাউন হোৱাত বেংকটোৰ দ্বিতীয় ত্ৰৈমাসিকত দেশৰ বিভিন্ন অংশত অৰ্থনৈতিক কাৰ্যকলাপ পুনৰ আৰম্ভ হোৱাৰ পাছতে যথেষ্ট উন্নত হৈছে৷

অৰ্থনৈতিক প্ৰত্যাহ্বানৰ সময়তো গ্ৰাহকে সহনশীল হৈ  বেংকটোৰ প্ৰতি প্ৰদৰ্শন কৰা বিশ্বাস আৰু আস্থাৰ বাবেই বেংকটোৰ বিকাশ হোৱা বুলি ঘোষে সদৰী কৰে৷ বন্ধন বেংক সদায়েই কৰ্মচাৰীসকলৰ লগতে বেংকটোৰ সমূহ উপভোক্তাক উন্নত সেৱা প্ৰদান কৰিবলৈ আৰু সমাজ তথা অৰ্থনীতিৰ প্ৰতি অৰ্থৱহ অৱদান আগবঢ়াবলৈ দায়বদ্ধ৷   তেওঁ এক প্ৰেছ বিজ্ঞপ্তিযোগে এই কথা প্ৰকাশ কৰিছে৷

দৈনন্দিন বাৰ্তা সেৱাঃ আজি আমেৰিকাত ৰাষ্ট্রপতি পদৰ নির্বাচন অনুষ্ঠিত হ’ব৷ নির্বাচনী প্রচাৰৰ অন্তিম দিনটোত ৰাষ্ট্রপতি পদৰ দুয়োগৰাকী প্রার্থীয়ে ভোটাৰসকলৰ মন জয় কৰিবলৈ চেষ্টা চলায় লগতে ৰাষ্ট্রপতি নির্বাচিত হ’লে দেশখনৰ বাবে কি কি কাম কৰিব ব্যাখ্যা কৰে৷

প্রচাৰৰ অন্তিম দিনটোত ট্রাম্পে মিচিগান, আয়’ৱা, নর্থ কেৰলিনা, জর্জিয়া, ফ্লৰিডাত প্রচাৰ চলোৱাৰ বিপৰিতে বিডেনে পেনছিলভেনিয়াত প্রচাৰ চলোৱা দেখা যায়৷ ২০১৬ চনৰ ১৩ কোটি ৮৮ লাখ লোকৰ পৰিবৰ্তে এইবাৰ আমেৰিকাৰ ২৩ কোটি ৯০ লাখ লোকে ৰাষ্ট্ৰপতি নিৰ্বাচনত ভোট প্ৰদান কৰিব।

মনকৰিবলগীয়া এই যে ৰাষ্ট্ৰপতি নিৰ্বাচনত এইবাৰ প্রায় ২৫ লাখ ভাৰতীয়-আমেৰিকান ভোটাৰে ভোট দিব। আনহাতে ইতিমধ্যে ৯ কোটি ৩০ লাখ আমেৰিকাবাসীয়ে আগতীয়া ভোট প্ৰদান কৰিছে।