নগাঁও, ২৭ নৱেম্বৰ:   নগাঁও আৰক্ষীৰ বিফলতাৰ বাবে জিলাখনত বৃদ্ধি পাইছে অপৰাধজনিত কাৰ্যকলাপ। সাধাৰণ ৰাইজৰ কথা বাদেই খোদ আৰক্ষীকে নিৰাপত্তা প্ৰদান কৰিব নোৱাৰা নগাঁও আৰক্ষীক এতিয়া কেৰেপ নকৰা হৈছে সাধাৰণ চোৰ-দগাবাজেও। শেহতীয়াভাৱে মৰিকলং আৰক্ষী চকীৰ ভিতৰতে ফুট-গধূলিতে আৰক্ষীক প্ৰহাৰ কৰি পলায়ণ কৰা ঘটনাৰ মুল অপৰাধীক আটক কৰাত চুড়ান্ত ভাৱে ব্যৰ্থ হোৱা নগাঁও আৰক্ষীৰ পৰিয়ালৰ লোকো এতিয়া শংকিত ক্ৰমবৰ্দ্ধমান অপৰাধজনিত কাৰ্যকলাপত। সেয়ে এতিয়া আৰক্ষী নিৱেশৰ ভিতৰতে চোৰৰ টিঘিলঘিলনি। আজি নগাঁও আৰক্ষী নিৱেশত চুৰি কৰিবলৈ আহি ধৰা পৰিল আছিক আহমেদ নামৰ এটা চোৰ। আৰক্ষী নিৱেশৰ কাষতে বাস কৰা এটা পৰিয়ালত চুৰি কৰিবলৈ যোৱা আছিক আহমেদ নামৰ চোৰটোক অৱশ্যে স্থানীয় ৰাইজে আটক কৰিবলৈ সক্ষম হয়। ৰাইজে আটক কৰি চোৰটোক উত্তম-মধ্যম সোধাই আৰক্ষীক গতাই দিয়ে। কিন্তু আছিকৰ সৈতে চুৰি কৰিবলৈ অহা আন এটা চোৰে সেই স্থানৰ পৰা পলায়ণ কৰিবলৈ সক্ষম হয়। উল্লেখযোগ্য যে, সামাজিক মাধ্যমত অসমৰ ভিতৰতে সৰ্বাধিক প্ৰচাৰত গুৰুত্ব দিয়া নগাঁও আৰক্ষীয়ে আইন-শৃংখলা নিয়ন্ত্ৰনৰ দিশটোত সমানে গুৰুত্ব নিদিয়াৰ ফলতে জিলাখনত ব্যাপক হাৰত বৃদ্ধি পাইছে অপৰাধজনিত কাৰ্যকলাপ। শেহতীয়াভাৱে নগাঁও আৰক্ষীক অপৰাধীয়ে তিলমানো কেৰেপ নকৰা কাৰ্যই আতংকিত কৰি তুলিছে জিলাখনৰ সাধাৰণ ৰাইজক।

অনলাইন বাৰ্তা, ২৭ নৱেম্বৰ : অসমৰ ভূমিপুত্ৰ মটক জনগোষ্ঠীৰ আৰ্থ-সামাজিক, ক্ৰীড়া-সাংস্কৃতিক উন্নয়ন, শোষণ-বঞ্চনা আৰু ন্যায প্ৰাপ্তিৰ হকে কাম কৰি যাবৰ ১৯৩৯ চনৰ ২৪ নৱেম্বৰত তাৰিখে সেই সময়ৰ জনগোষ্ঠীটোৰ কেইগৰাকীমান পুৰুধা ব্যক্তিৰ মহান প্ৰচেষ্টাত সদৌ অসম মটক সন্মিলনে জন্ম গ্ৰহণ কৰিছিল । জন্ম লগ্নৰে পৰা সন্মিলনে মটক জনগোষ্ঠীৰ সৰ্বাংগীণ উন্নয়নৰ লগতে জনজাতিকৰণ, স্বায়ত্ত শাসন আৰু অন্যান্য দাবীৰ বাবে মাত মাতি আহিছে। ভূমিপুত্ৰ হিচাপে ন্যায্য প্ৰাপ্তিৰ বাবে চলাই যোৱা দীঘলীয়া সংগ্ৰামখনত মটক জনগোষ্ঠীৰ ভাতৃ-ভগ্নী সংগঠনসমূহ সদৌ অসম মটক যুৱ-ছাত্ৰ সন্মিলন, সদৌ অসম মটক মহিলা পৰিষদ, সদৌ অসম মটক যুৱ-ছাত্ৰ পৰিষদ, সদৌ অসম মটক ছাত্ৰ সন্থাৰ সৈতে পিতৃ সংগঠনস্বৰূপে সন্মিলনে নিজৰ দায়িত্ব পালন কৰি ঐক্যবদ্ধ সংগ্ৰামৰ অংশীদাৰ হৈ আহিছে। তদুপৰি অসমৰ অন্যান্য জনগোষ্ঠীসমূহৰ সৈতে সমন্বয় ৰক্ষা কৰি অসমৰ জনগোষ্ঠীয় সমস্যা, অন্যান্য জাতীয় সমস্যাসমূহৰ সমাধানৰ্থে চলাই যোৱা সংগ্ৰামখনতো সক্ৰিয় অংশগ্ৰহণ কৰি আহিছে। মটক জনগোষ্ঠীৰ ৰাইজ তথা অসমবাসী ৰাইজৰ মৰম চেনেহৰ সহযোগত লালিত-পালিত হৈ সদৌ অসম মটক সন্মিলননে প্ৰতিষ্ঠা কালৰ পৰা ৮১ বছৰত উপনীত হৈছে। উল্লেখ যে প্ৰাক্তন মুখ্যমন্ত্ৰী তৰণ গগৈৰ মহাপ্ৰয়াণৰ বাবে সংগঠনটোৱে যোৱা ২৪ তাৰিখে কেৱল পতাকা উত্তোলন কৰি তেখেতৰ প্ৰতি শ্ৰদ্ধা জনাই সকলো কাৰ্যসূচী স্থগিত ৰাখিছিল। মোহনবাৰী মিৰি পথাৰৰ ৰাজহুৱা প্ৰেক্ষাগৃহত আজি অনুষ্ঠিত উক্ত দিৱসত লাহোৱাল সমষ্টিৰ বিধায়ক ঋতুপৰ্ণ বৰুৱাই সাংস্কৃতিক শোভাযাত্ৰা কাৰ্যসূচী উদ্বোধন কৰি প্ৰায় ৭ কিঃমিঃ শোভা যাত্ৰাত অংশগ্ৰহণ কৰি পুনৰ মোহনবাৰীৰ মিৰি পথাৰ গাঁৱৰ ৰাজহুৱা প্ৰেক্ষাগৃহলৈ আহে। মটক জনগোষ্ঠী আটাইকেইটা সংগঠনৰ কেন্দ্ৰীয় বিষয়ববীয়াই অংশগ্ৰহণ কৰা সাংস্কৃতিক শোভাযাত্ৰা কাৰ্যসূচীত মটক জনগোষ্ঠীৰ গায়ন-বায়ন, বিহুৰ লগতে বিভিন্ন জাতি জনগোষ্ঠীয় বাৰেৰহনীয়া নৃত্য প্ৰদৰ্শন কৰা দেখিবলৈ পোৱা যায়।