ডিৰাক সীমান্ত, ২২ নৱেম্বৰঃ শিশু শিক্ষা সমিতিৰ দ্বাৰা পৰিচালিত শংকৰদেৱ শিশু নিকেতন, ফিল’বাৰীত আজি  অংকুৰ আৰু মুকুল শ্ৰেণীৰ ছাত্ৰ ছাত্ৰী সকলৰ মাতৃ সকলক লৈ  শিশু বাটিকা কৰ্মশালা অনুষ্ঠিত হয়। নিকেতনৰ পৰিচালনা সমিতিৰ সভাপতি সোমেশ্বৰ কলিতাই বন্তি প্ৰজ্বলন কৰি উদ্বোধন কৰে শিশু বাটিকা কৰ্মশালা। শংকৰদেৱ শিশু নিকেতন ফিল’বাৰীত অনুষ্ঠিত হোৱা শিশু বাটিকা কৰ্মশালাৰ প্ৰশিক্ষক হিচাপে উপস্থিত থাকে তিনিচুকীয়া সংকুলৰ শিশু বাটিকা প্ৰমুখ বন্তি বৰা, নিকেতনৰ আচাৰ্য্যা ৰাণু শইকীয়া আৰু পূৰ্ণিমা খনিকৰ। আজিৰ শিশু বাটিকা কৰ্মশালাত প্ৰশিক্ষক সকলে মাতৃ সকলক শিশুৰ সৰ্বাঙ্গীণ বিকাশৰ বাবে পেলনীয়া সামগ্ৰীৰ পৰা বিভিন্ন সামগ্ৰী নিৰ্মাণ, ছাত্ৰ-ছাত্ৰী সকলৰ বিকাশৰ বাবে নৃত্য, গীতৰ প্ৰশিক্ষণ প্ৰদান কৰে। আজিৰ কৰ্মশালাত নিদিষ্ট বক্তা হিচাপে উপস্থিত থাকে তিনিচুকীয়া সংকুলৰ সংকুল প্ৰমুখ মোহন ছেত্ৰীৰ লগতে নিকেতনৰ আচাৰ্য্য- আচাৰ্য্যা উপস্থিত । আজি শিশু বাটিকা কৰ্মশালাত প্ৰায় অৰ্ধ শতাধিক অভিভাৱিকা উপস্থিত থাকে ।

জামুগুৰিহাট,২২ নবেম্বৰ: “সাম্প্রতিক কৰো’না মহামাৰীয়ে মানুহৰ আত্মবিশ্বাস ভাঙি পেলাইছে। এনে সময়ত সাংস্কৃতিক পৰিবেশ গঢ়ি তুলি মানুহক সংস্কৃতিৰ লগত জৰিত কৰিব পাৰি লেহে মানুহৰ মনলৈ পুনৰ আত্মবিশ্বাস ঘূৰি আহিব। ” এই মন্তব্য জামুগুৰি সাংস্কৃতিক কেন্দ্ৰৰ  বিষয়া তথা তেজপুৰ জ্যোতি ভাৰতীৰ বিষয়া, বিশিষ্ট সাংস্কৃতিক সংগঠক জীতেন কুমাৰ দাসৰ। আজি জামুগুৰিহাটৰ বাপুজী ভৱনত অনুষ্ঠিত শিশু নাট কৰ্মশালা আৰু নাট প্ৰযোজনাৰ উদ্বোধনী অনুষ্ঠানত অংশ গ্ৰহণ কৰি এইদৰে মন্তব্য আগবঢ়াই বিশিষ্ট নাট্যকৰ্মী  গৰাকীয়ে। উল্লেখ্য যে মুখ্যমন্ত্রী গ্ৰাম্য উন্নয়ন যোজনাৰ অন্তৰ্গত সাংস্কৃতিক নৱ জাগৰণ অভিযান সমাজৰ উদ্যোগত অসম চৰকাৰৰ সাংস্কৃতিক সঞ্চালকালয়ৰ অধীনস্থ জামুগুৰি সাংস্কৃতিক কেন্দ্রৰ দ্বাৰা আয়োজিত শিশু নাট কৰ্মশালাৰ কালি অৰ্থাৎ ২২ নৱেম্বৰত শুভাৰম্ভ কৰে জীতেন কুমাৰ দাসে। জামুগুৰি সাংস্কৃতিক কেন্দ্ৰৰ কৰ্মচাৰী তথা তত্বাৱধায়ক,  নাট্যকৰ্মী ৰঞ্জন কুমাৰ দাসে আঁতধৰা অনুষ্ঠানটোত বিশিষ্ট অতিথি হিচাপে আসন অলংকৃত কৰে ক্ৰমে সমাজকৰ্মী মাধৱ ওজা, আখৰাৰ সম্পাদক তথা দিকৰাই উচ্চতৰ মাধ্যমিক বিদ্যালয়ৰ বিষয় শিক্ষক বিপুল বৰা আৰু অসমীয়া সাহিত্য সন্মিলনীৰ প্ৰধান সম্পাদক মিংকু কলিতাই। অহা ৬ ডিচেম্বৰলৈকে অনুষ্ঠিত হ’বলগীয়া উক্ত কৰ্মশালাখনত মুখ্য প্ৰশিক্ষক হিচাপে ৰঞ্জন কুমাৰ দাসে অংশ লোৱাৰ লগতে অতিথি প্ৰশিক্ষক হিচাপে অসমৰ বিশিষ্ট নাট্য শিল্পী, নাট পৰিচালক কুশল ডেকা, অসীম শৰ্মা প্ৰমুখ্যে বহুকেইজন বিশিষ্ট নাট্য শিল্পীয়ে অংশ গ্ৰহণ কৰিব। প্ৰতিদিনে বিয়লি ২ বজাৰ পৰা ৫ বজালৈ অনুষ্ঠিত হ’বলগীয়া উক্ত কৰ্মশালাখনত মুখ্যত পঞ্চম শ্রেণীৰ পৰা নৱম শ্ৰেণীৰ ছাত্র-ছাত্ৰীসকলে অংশ গ্ৰহণ কৰিব পাৰিব। স্মৰণযোগ্য যে ১৯৯০ চনতে স্থাপন হোৱা জামুগুৰি সাংস্কৃতিক কেন্দ্ৰৰ আজি এটি স্থায়ী কাৰ্যালয় নথকাৰ বাবে যথেষ্ট অসুবিধাৰ সন্মুখীন হোৱাৰ বাবে আঁচনি অনুসৰি আগবাঢ়ি যোৱাত বাধাৰ সৃষ্টি হৈছে। এনে পৰিপ্ৰেক্ষিতত জামুগুৰি সাংস্কৃতিক কেন্দ্ৰৰ নিজাববীয়া এটি প্ৰেক্ষাগৃহ সহ স্থায়ী কাৰ্যালয় স্থাপনৰ বাবে আহ্বান জনায় বিষয়া জীতেন কুমাৰ দাসে। কৰ্মশালাখনত অংশ গ্ৰহণ কৰিব বিচৰা ছাত্র-ছাত্ৰীসকলক বিয়লি ২ বজাত বাপুজী ভৱনত উপস্থিত হ’বলৈ আহ্বান জনাইছে মুখ্য প্ৰশিক্ষক  ৰঞ্জন কুমাৰ দাসে।

জামুগুৰিহাট, ২২ নবেম্বৰ : ঐতিহ্যমণ্ডিত জামুগুৰিহাটৰ অন্যতম সাহিত্যচৰ্চাৰ অনুষ্ঠান জামুগুৰি সাহিত্য সভাৰ ১০২ সংখ্যক আমন্ত্ৰণমুলক জনপ্ৰিয় বক্তৃতানুষ্ঠান আজি জামুগুৰিহাটৰ সূৰ্য্যোদয় ভৱনত বিয়লি অনুষ্ঠিত হয় ৷ জামুগুৰি উচ্চতৰ মাধ্যমিক বিদ্যালয়ৰ অৱসৰী অধ্যক্ষ হেমন্ত বৰাৰ সঞ্চালনাত অনুষ্ঠিত বক্তৃতানুষ্ঠানৰ মূখ্য বিষয় “বৰ্তমান সময়ত শিশু সাহিত্যৰ প্ৰয়োজনীয়তা আৰু শিশু সাহিত্যিকসকলৰ দায়িত্ব” শীৰ্ষক বিষয়ৰ আলোকপাত কৰে আলোচকৰ আসন অলংকৃত কৰা বিশিষ্ট সাহিত্যিক,গীতিকাৰ তথা শোণিতপুৰ জিলা সাহিত্য সভাৰ প্ৰাক্তন সভাপতি ইন্দ্ৰপ্ৰসাদ শইকীয়াই ৷ প্ৰায় এঘন্টা জোৰা আলোচনাত শইকীয়াই সাম্প্ৰতিক সময়ত অসমীয়া ভাষাৰ শিশু সাহিত্যিকৰ সংখ্যা দ্ৰুতগতিত হ্ৰাস পোৱাৰ লগতে শিশুসকলক সাহিত্যৰ প্ৰতি আকৰ্ষণ কৰিব পৰাকৈ এক সাহিত্যৰ পৰিৱেশ গঢ়ি উঠা নাই বুলি আক্ষেপ প্ৰকাশ কৰে ৷ ফলশ্ৰুতিত অসমৰ বহুল প্ৰচাৰিত শিশু আলোচনীসমুহো মৃত্যুৰ দিশে গতি কৰিছে বুলি উল্লেখ কৰে ৷ এনে প্ৰেক্ষাপটত সাহিত্য অনুষ্ঠান সমুহে শিশুসকলক সাহিত্যৰ প্ৰতি আগ্ৰহী কৰি তোলাত বিশেষ পদক্ষেপ গ্ৰহণ কৰাৰ প্ৰয়োজন আছে ৷ আনহাতে অভিভাৱকসকলেও শিশুসকলক অন্যান্য বিনোদনৰ বিপৰীতে সাহিত্য চৰ্চাৰ প্ৰতি আগ্ৰহী কৰি তুলিব নোৱাৰিলে অসমীয়া ভাষা সাহিত্যৰ শোচনীয় অৱস্থাৰ ওৰ নপৰে ৷ উল্লেখ্য যে জামুগুৰি সাহিত্য সভাৰ নৱ নিৰ্বাচিত সম্পাদক বাসৱ ভূঞাই আঁত ধৰা আৰু নৱ নিৰ্বাচিত সভাপতি জ্যোতি ভট্টাচাৰ্যই আদৰনি ভাষণ প্ৰদান কৰা সভাখনত কৃতি শিক্ষক তথা সাহিত্যকৰ্মী ভূপেন বৰদলৈৰ নৱতম গ্ৰন্থ “মৃত্যু তিথিৰ এটি স্মৃতি”ৰ উন্মোচক হিচাপে আসন গ্ৰহণ কৰে জামুগুৰি সাহিত্য সভাৰ প্ৰাক্তন সভাপতি তথা জামুগুৰি উচ্চতৰ মাধ্যমিক বিদ্যালয়ৰ অৱসৰী অধ্যক্ষ জনাৰ্দন ভূঞাই ৷ অঞ্চলটোৰ শতাধিক প্ৰবীন নবিন সাহিত্যনুৰাগী উপস্থিত থকা সভাখনত বিশিষ্ট ব্যক্তিসকলৰ হৈ মঞ্চত আসন অলংকৃত কৰে শোণিতপুৰ জিলা সাহিত সভাৰ প্ৰাক্তন সভাপতি , বিশিষ্ট চিন্তাবিদ ভৱেন বৰা, লক্ষীমপুৰ জিলা সাহিত্য সভাৰ প্ৰাক্তন সভাপতি তথা শোণিতপুৰ জিলা কবি সন্মিলনৰ সভাপতি ডা° হৰেন শইকীয়া, জামুগুৰি সাহিত্য সভাৰ প্ৰাক্তন সভাপতি নাৰায়ন শইকীয়া, নৱ নিৰ্বাচিত সভাপতি জ্যোতি ভট্টাচাৰ্য আৰু শিশুবন্ধু যতীন্দ্ৰ ভাগৱতীয়ে ৷ বৰ্তমানলৈকে ৮ খন গ্ৰন্থ প্ৰকাশেৰে অসমীয়া সাহিত্য ভঁৰাললৈ লেখক, ঔপন্যাসিক ভূপেন বৰদলৈয়ে গ্ৰন্থকাৰৰ একেষাৰত উল্লেখ কৰে যে গুপ্তহত্যাই এটি মধ্যবিত্ত পৰিয়াললৈ কেনেকৈ কাল অমানিশা নমাই আনিব পাৰে এনে সময়ত এখন সমাজৰ দায়বদ্ধতা কেনে হোৱা উচিত ইয়াক মূখ্য বিষয় হিচাপে লৈ উপন্যাসখন ৰচনা কৰা হৈছে ৷ সভাখনত মূল বক্তাৰ উপৰিও ৰাজহুৱা বক্তব্য দাঙি ধৰি ডা° হৰেন শইকীয়াই কয় যে শিশুসকলক শুদ্ধ পথেৰে আগবঢ়াই নিয়াত শিশু সাহিত্যিকসকলে সামাজিক দায়বদ্ধতাৰে দায়িত্ব গ্ৰহণ কৰিব লাগিব ৷ অকল বৃত্তিমুলক শিক্ষাই যে এটি শিশুৰ ভৱিষ্যত নিৰ্ণয় কৰিব নোৱাৰে সেইকথাও উদাহৰণসহ শইকীয়াই সভাত দাঙি ধৰে৷সভাখনত সফল সমাপ্তিত সকলোলৈকে ধন্যবাদ জ্ঞাপন কৰে জামুগুৰি সাহিত্য সভাই ৷