দৈনন্দিন বাৰ্তা ডেস্ক : পাঁচখন ৰাফেল যুদ্ধবিমানৰ সংযুক্তিকৰণত সমৃদ্ধ হ’ল ভাৰতীয় বায়ুসেনা৷ বুধবাৰে পাঞ্জাৱৰ আম্বালা বায়ুসেনাৰ বিমান বন্দৰত এই যুদ্ধ বিমানকেইখন অৱতৰণ কৰে৷ এই বিমানকেইখন বায়ুসেনাৰ ১৭ নং গ’ল্ডেন এৰোছ স্কোৱাড্ৰনত সংযুক্ত কৰা হ’ব৷ ফলত বায়ুসেনাৰ স্কোৱাড্ৰন শক্তি সংখ্যা বাঢ়ি ৩১ হ’লগৈ৷ আনহাতে ২০২২ চনৰ ভিতৰত বাকী ৰাফেল যুদ্ধ বিমানবোৰ পাবহি আৰু তেতিয়া তাৰ সংখ্যা ৩২ স্কোৱাড্ৰন হ’ব৷ আনহাতে অনুমোদিত স্কোৱাড্ৰনৰ শক্তি হ’ল ৪২৷ ষ্টেট-অফ-অাৰ্ট ৪.৫ জেনেৰেচন ৰাফেল জেট শব্দৰ দুগুণ গতিত উৰিব পাৰে৷ ইয়াৰ সৰ্বোচ্চ গতি ১.৮ মেক৷ ইয়াৰ বিভিন্ন ধৰণৰ সুযোগ সুবিধাবোৰৰ ভিতৰত আছে বৈদ্যুতিন অস্ত্ৰ সৰঞ্জাম, বায়ু প্ৰতিৰক্ষা, ভূমি সুৰক্ষা আৰু গভীৰতাত আক্ৰমণ কৰাৰ ব্যৱস্থা৷ উল্লেখ্য যে চীনৰ জে২ চিংডু জেটক পঞ্চম প্ৰজন্মৰ যুদ্ধ বিমান বুলি কোৱা হয়৷ আনহাতে ৰাফেল হ’ল ৪.‌৫ প্রজন্মৰ যুদ্ধবিমান। জে২তকৈ বেছি ইন্ধন আৰু অস্ত্ৰ কঢ়িয়াই নিব পাৰে ৰাফেলে৷ ইৰাক, ছিৰিয়া, লিবিয়া, আফগানিস্থানৰ দৰে দেশত যুদ্ধৰ সময়ত আমেৰিকাই এই যুদ্ধ বিমান ব্যৱহাৰ কৰিছে৷ প্ৰতিখন বিমানত অস্ত্ৰ মজুতৰ বাবে ১৪ টা স্থান আছে৷ আকাশৰ পৰা মিছাইল এৰিবলৈ সক্ষম ৰাফেল৷ মেক ৪ গতিত ১৯০ কিলোগ্ৰামৰ মিছাইল বিয়ণ্ড ভিচুৱেল ৰেঞ্জ বা বিভিআৰে ১০০ কিলোমিটাৰৰ অধিক দূৰত এৰিব পাৰে এই যুদ্ধ বিমানে৷ মন কৰিব লগা যে পাকিস্তানৰ এফ-১৬ যুদ্ধ বিমানে বিভিআৰ ৭৫ কিলোমিটাৰ পৰ্যন্ত যাব পাৰে৷

দৈনন্দিন বাৰ্তা ডেস্ক :পাঁচখন ৰাফেল যুদ্ধ বিমান বুধবাৰে ভাৰতৰ মাটিত অৱতৰণ কৰাৰ লগে লগে অধিক শক্তিশালী হৈ পৰিল ভাৰতীয় বায়ুসেনা৷ ৭০০০ কিলোমিটাৰ পথ অতিক্ৰম কৰি দিনৰ তিনি বজাত আম্বালাত এই যুদ্ধ বিমানকেইখন অৱতৰণে কৰে৷ ইপিনে ভাৰতৰ সীমান্ত সোমোৱাৰ লগে লগে এছক’ৰ্ট দি উৰাই আনিলে সুখই বিমানেৰে৷ পাঁচখন ফৰাচী ৰাফেল যুদ্ধবিমানক অভ্যৰ্থনা জনোৱাৰ বাবে আম্বালা বিমান বন্দৰত উপস্থিত আছিল বায়ুসেনাৰ প্ৰধান আৰ কে এছ ভাদৌৰিয়া৷ ৰাফেল যুদ্ধ বিমান অৱতৰণৰ পাছত ভাৰতৰ প্ৰতিৰক্ষা মন্ত্ৰী ৰাজনাথ সিঙে আদৰণি জনাই চীন আৰু পাকিস্তানক সতৰ্ক কৰি দিয়ে৷ ভাৰতৰ সংহতিত ভাবুকিস্বৰূপ হৈ পৰা এই শক্তিবোৰৰ বিৰুদ্ধে ভাৰতীয় বায়ুসেনাই নতুন শক্তিৰে কাম কৰিব৷ কেন্দ্ৰীয় প্ৰতিৰক্ষা মন্ত্ৰী ৰাজনাথ সিঙে টুইটাৰত লিখে, নিৰাপদে আম্বালাত অৱতৰণ কৰিলে বিমানকেইখন৷ ৰাফেল যুদ্ধবিমান মাটিত স্পৰ্শ কৰাৰ লগে লগে ভাৰতৰ সামৰিক ইতিহাসত নতুন যুগৰ সূচনা হ’ল৷ বহুমুখী ক্ষমতাসম্পন্ন এই বিমানকেইখনে বায়ুসেনাৰ শক্তিত বৈপ্লৱিক পৰিৱৰ্তন ঘটাব৷ বিমানকেইখন নিৰাপদে অনাৰ বাবে ভাৰতীয় বায়ুসেনাকো তেওঁ অভিনন্দন জনায়৷ নিৰ্দ্ধাৰিত সময়ৰ ভিতৰত ভাৰতৰ হাতত বিমানকেইখন তুলি দিয়াৰ বাবে ফ্ৰান্স চৰকাৰ আৰু যুদ্ধবিমান নিৰ্মাণকাৰী কোম্পানী দাছল্টক ধন্যবাদ দিয়ে প্ৰতিৰক্ষা মন্ত্ৰীজনে৷ ৰাফেল কিনাৰ বাবে সকলো কৃতিত্ব প্ৰধানমন্ত্ৰী মোডীক দিয়ে ৰাজনাথ সিঙে৷ তেওঁ লিখে, প্ৰধানমন্ত্ৰী নৰেন্দ্ৰ মোডীৰ বাবেই ৰাফেল যুদ্ধবিমান কিনাত সম্ভৱ হ’ল৷ দীৰ্ঘদিনৰ এই প্ৰক্ৰিয়াৰ পাছত ফ্ৰান্স চৰকাৰৰ সৈতে আলোচনা কৰি তেওঁৱেই ৰাফেল কিনাৰ সিদ্ধান্ত লয়৷ এই সাহসিকতা আৰু তাৎক্ষণিক সিদ্ধান্তৰ বাবে মই তেওঁক ধন্যবাদ জনাইছো৷ আনহাতে বুধবাৰে ৰাফেল যুদ্ধবিমান আম্বালাত অৱতৰণৰ সময়ত নিশ্চিদ্ৰ নিৰাপত্তাৰ ব্যৱস্থা কৰা হয়৷ বিমান বন্দৰৰ সংলগ্ন গাঁও ধুলকোট, বলদেৱনগৰ, গাৰনালা আৰু পঞ্জখোৰাত ১৪৪ ধাৰা জাৰি কৰা হয়৷ কোনো ধৰণৰ ছবি তোলা, ভিডিঅ’ কৰা নিষিদ্ধ কৰা হৈছে৷ বিমান বন্দৰৰ ৩ কিলোমিটাৰ পৰিধিত কোনেও ব্যক্তিগত ড্ৰোন আকাশত উৰুৱাব নোৱাৰিব৷ 

দৈনন্দিন বাৰ্তা ডেস্ক : ভাৰতৰ মাটিত পাঁচখন ৰাফেল যুদ্ধবিমান স্পৰ্শ কৰাৰ সময়তে ছচিয়েল মিডিয়াত প্ৰতিক্ৰিয়া প্ৰকাশ কৰিছে প্ৰধানমন্ত্ৰী নৰেন্দ্ৰ মোডী, প্ৰতিৰক্ষা মন্ত্ৰী ৰাজনাথ সিং আৰু কেন্দ্ৰীয় গৃহ মন্ত্ৰী অমিত শ্বাহে৷ তেওঁলোকে টুইটাৰত ৰাষ্ট্ৰৰ নিৰাপত্তা সুনিশ্চিত কৰাৰ কথা কয়৷ লগতে পাকিস্তান আৰু চীনক সতৰ্ক কৰে৷ ভাৰতৰ মাটিত ৰাফেল স্পৰ্শ কৰাৰ কিছু সময়ৰ পাছতে প্ৰধানমন্ত্ৰী নৰেন্দ্ৰ মোডীয়ে এটা সংস্কৃত শ্লোক টুইট কৰে৷ লগতে ৰাফেল যুদ্ধবিমান অৱতৰণৰ ভিডিঅ’ দিয়ে৷ সেই সংস্কৃত শ্লোকৰ অৰ্থ হ’ল ‘ৰাষ্ট্ৰৰ নিৰাপত্তা সুনিশ্চিত কৰাৰ বাহিৰে ডাঙৰ পুন্য নাই’৷ ৰাষ্ট্ৰীয় নিৰাপত্তা দৃঢ় কৰাৰ বাদে ডাঙৰ উপাসনা একো নাই৷ দেশৰ নিৰাপত্তা সুনিশ্চিত কৰাৰ বাদে ডাঙৰ কাম আন একো হ’ব নোৱাৰে৷ টুইটাৰত গৃহ মন্ত্ৰী অমিত শ্বাহে ৰাফেল গেম প্ৰত্যাহ্বান বুলি উল্লেখ কৰে৷ তেওঁ কয়, বিশ্বমানৰ এই অস্ত্ৰই ভাৰতক বিশ্বৰ দৰবাৰত অধিক শক্তিশালী কৰিব ৷

দৈনন্দিন বাৰ্তা ডেস্ক : অযোধ্যাত অহা ৫ আগষ্টত ৰাম মন্দিৰৰ ‘ভূমি পূজা’ আয়োজন কৰা হৈছে৷ প্ৰধানমন্ত্ৰী নৰেন্দ্ৰ মোডীয়ে এই ভূমি পূজাত অংশগ্ৰহণ কৰিব৷ এই অনুষ্ঠানৰ বাবে দেশৰ ৰাজ্যবোৰৰ মুখ্যমন্ত্ৰীসকলক আমন্ত্ৰণ জনোৱা নাই৷ মাত্ৰ নিয়ম অনুসৰি উত্তৰ প্ৰদেশৰ মুখ্যমন্ত্ৰী যোগী আদিত্যনাথ এই অনুষ্ঠানত অংশগ্ৰহণ কৰিব৷ প্ৰাপ্ত সূত্ৰৰ মতে এই অনুষ্ঠানত ৰাষ্ট্ৰীয় স্বয়ংসেৱক সংঘ (আৰএছএছ)ৰ প্ৰধ মোহন ভগৱট, কৃষ্ণ গোপাল, ইন্দ্ৰেশ কুমাৰ, যোগগুৰু বাবা ৰামদেৱ, প্ৰাক্তন মুখ্যমন্ত্ৰী আৰু প্ৰাক্তন ৰাজ্যপাল কল্যাণ সিং, প্ৰাক্তন উপ প্ৰধানমন্ত্ৰী লালকৃষ্ণ আদৱানি, প্ৰাক্তন কেন্দ্ৰীয় মন্ত্ৰী মুৰুলী মনোহৰ যোশী আৰু উমা ভাৰতী, সাধবি ৰীতামভাৰা, জগতগুৰু ৰামভদ্ৰচাৰ্য, জয়ভান সিং পোৱাইয়া, বিনয় কাটিয়াৰ, ৰাধে ৰাধে বাবা ইনদোৰী, যোগ পুৰুষ পৰমানন্দজী উপস্থিত থাকিব৷ উল্লেখ্য যে ৰাম মন্দিৰ আন্দোলনত জড়িত থকা মাত্ৰ ২০০ লোকক এই ঐতিহাসিক অনুষ্ঠানত অংশগ্ৰহণৰ বাবে আৰু ক’ভিড-১৯ৰ নীতি নিৰ্দশনা অনুসৰি উপস্থিত থাকিবৰ বাবে নিমন্ত্ৰণ জনোৱা হৈছে৷ ক’ৰোনা ভাইৰাছৰ উপৰি নিৰাপত্তাজনিত কাৰণত ভক্তসকল বঞ্চিত হ’ব লগা হৈছে ৫ আগষ্টৰ এই ঐতিহাসিক দিনটোত৷ এই তালিকাখন প্ৰস্তুত কৰাত ৰাম মন্দিৰ উচ্চ ক্ষমতাসম্পন্ন সমিতিৰ বিশ্ব হিন্দু পৰিষদ, শ্ৰী ৰাম মন্দিৰ তীৰ্থ ট্ৰাষ্ট আৰু শীৰ্ষ প্ৰশাসন যন্ত্ৰই প্ৰধান ভূমিকা গ্ৰহণ কৰিছে৷ ইয়াৰ লগতে সূত্ৰটোৱে জনায় যে এদিন বা দুদিনৰ ভিতৰত সকলো ভ্ৰমণকাৰীক টেলিফোন বা চিঠিৰ জৰিয়তে জনোৱা হ’ব৷ আনহাতে অতিথি তালিকা নিৰ্দ্ধাৰণত জড়িত সকলক বুজা যায় যে তেওঁলোকৰ বেছিভাগ ধৰ্মীয় নেতাৰ চাপৰ সন্মুখীন হৈছে৷ ইপিনে বহু কেইজন ব্যক্তি আছে যি ৰাজনৈতিক আৰু ধৰ্মীয়ভাৱে ৰাম মন্দিৰ আন্দোলনত অংশ লৈছিল, তেওঁলোকৰ কোনো মৃত্যু হৈছে৷ যিসকল জীৱিত আছে তেওঁলোকক আমন্ত্ৰণ জনোৱাৰ চেষ্টা কৰা হৈছে৷ এনে আমন্ত্ৰিত হ’ব পৰা গুৰুত্বপূৰ্ণ ব্যক্তিসকল হ’ল লাল কৃষ্ণ আডৱানী, মুৰুলি মনোহৰ যোশী, উমা ভাৰতী, বিনয় কটিয়াৰ, সাধবি ৰীতামভাৰা, কল্যাণ সিং আৰু জয়ভান সিং পোৱাইয়া৷ সেই দিনটোত প্ৰতিৰক্ষা মন্ত্ৰী ৰাজনাথ সিং আৰু কেন্দ্ৰীয় গৃহ মন্ত্ৰী অমিত শ্বাহ অযোধ্যা ভ্ৰমণ কৰা সম্ভাৱনা আছে৷ তদুপৰি শ্ৰী ৰাম জন্মভূমি তীৰ্থ ক্ষেত্ৰ ট্ৰাষ্টৰ ১৫ জন সদস্য ৫ আগষ্টৰ অনুষ্ঠানত উপস্থিত থাকিব৷ অন্তভূক্ত হোৱা ট্ৰাষ্টৰ সদস্যসকল হ’ল মহেন্দ্ৰ নৃত্য গোপাল দাস, স্বামী গোবিন্দ দেৱ গিৰি, চম্পত ৰায়, নৃপেন্দ্ৰ মিশ্ৰ, কে পৰছৰণ, স্বামী বসুদেৱান্দ সৰস্বতী, স্বামী বিশ্ব প্ৰসন্ন তীৰ্থজী মহাৰাজ, যোগ পুৰুষ পৰমানন্দ গিৰি, বিমলেন্দ্ৰ মোহন প্ৰতাপ মিশ্ৰ, অনিল মিশ্ৰ, কামেশ্বৰ চৌপাল, মহন্ত দিপেন্দ্ৰ দাসজী, গৃহ মন্ত্ৰালয়ৰ পৰা জ্ঞানেশ কুমাৰ, উত্তৰ প্ৰদেশ চৰকাৰৰ পৰা অভীশ আৱাষ্টি, অযোধ্যাৰ জিলা দণ্ডাধীশ অনুজ ঝা৷ উল্লেখ্য যে বিশ্ব হিন্দু পৰিষদে বছৰৰ পাছত বছৰ ধৰি ৰাম মন্দিৰ আন্দোলনৰ মূল ভূমিকা পালন কৰি আহিছে৷ সেয়ে অশোক সিংঘল, বিষ্ণু হৰি ডালমিয়া, আচাৰ্য গিৰিৰাজ কিশোৰৰ দৰে ব্যক্তি ইতিমধ্যে ইহলোকত নাই৷ আনহাতে বিশ্ব হিন্দু পৰিষদৰ বৰ্তমানৰ নেতা কাৰ্যবাহী সভাপতি অলক কুমাৰ, আন্তৰ্জাতিক সভাপতি সদাশিৱ কোকজা, মুখ্য পেট্ৰন দীনেশ চন্দ্ৰ, বজৰং দলৰ প্ৰাক্তন সভাপতি প্ৰকাশ শৰ্মা, সাধাৰণ সম্পাদক মিলিন্দ পৰন্দে অহা ৫ আগষ্টত অযোধ্যাৰ অনুষ্ঠানত উপস্থিত থাকিব৷ ৰাম মন্দিৰ নিৰ্মাণ আৰএছএছৰ স্বপ্ন আছিল৷ অনুষ্ঠানত আৰএছএছৰ প্ৰধান মোহন ভাগৱতসহ ২-৩জন বিষয়ববীয়া এই ঐতিহাসিক অনুষ্ঠানত অংশ ল’ব৷ এই লোকসকলৰ উপৰি বিশ্ব হিন্দু পৰিষদৰ উচ্চ ক্ষমতাসম্পন্ন সমিতিৰ ৪০-৫০ জন সদস্যক অনুষ্ঠানলৈ নিমন্ত্ৰণ কৰা হৈছে৷ সেই লোকসকলৰ ভিতৰত আছে ৰাম বিলাস বেদান্তী, জীতেন্দ্ৰ নন্দ সৰস্বতী৷ উল্লেখ্য যে উত্তৰ প্ৰদেশৰ মুখ্যমন্ত্ৰী যোগী আদিত্যনাথে এই অনুষ্ঠানত অংশ ল’ব৷ তেওঁৰ লগতে দুজন উপ মন্ত্ৰী কেশৱ প্ৰসাদ মায়ূৰীয়া আৰু দীনেশ শৰ্মা উপস্থিত থাকিব৷ উল্লেখ্য যে ৰাম মন্দিৰৰ বাবে আদালতত যুক্তি প্ৰদৰ্শন কৰা অধিবক্তাক অনুষ্ঠানলৈ নিমন্ত্ৰণ কৰা হৈছে৷ বিশ্ব হিন্দু পৰিষদৰ কাৰ্যকৰী সভাপতি অলক কুমাৰে জনায় যে মহাৰাষ্ট্ৰৰ মুখ্যমন্ত্ৰী উদ্ভৱ ঠাকৰেক এই ভূমি পূজালৈ নিমন্ত্ৰণ কৰা নাই ৷ কংগ্ৰেছৰ অন্তবৰ্ত্তীকালীন সভাপতি ছোনীয়া গান্ধী আৰু ৰাহুল গান্ধীক অযোধ্যাৰ ৰাম মন্দিৰৰ ভূমি পূজালৈ নিমন্ত্ৰণ কৰা হৈছে ৷